ಹೊಸದಿಲ್ಲಿ: ಅನುಚಿತ ವರ್ತನೆ ಕಾರಣದಿಂದ ವಿರೋಧ ಪಕ್ಷದ 12 ಸಂಸದರನ್ನು ಅನಿವಾರ್ಯವಾಗಿ ಮಾಡುವಂತಾಗಿತ್ತು. ಅವರು ಸ್ಪೀಕರ್ ಮತ್ತು ಲೋಕಸಭೆಗೆ ಕ್ಷಮಾಪಣೆ ಕೋರಿದರೆ ಮಾತ್ರವೇ ಅವರ ಅಮಾನತಿನ ಆದೇಶವನ್ನು ಮರು ಪರಿಗಣಿಸುತ್ತೇವೆ ಎಂದು ಸಂಸದೀಯ ವ್ಯವಹಾರಗಳ ಸಚಿವ ಅವರು ಮಂಗಳವಾರ ತಿಳಿಸಿದ್ದಾರೆ. 'ಸದನದ ಘನತೆಯನ್ನು ಕಾಪಾಡುವ ಉದ್ದೇಶದಿಂದ ಸರ್ಕಾರವು ಸದನದ ಮುಂದೆ ಈ ಅಮಾನತು ಪ್ರಸ್ತಾಪದ ಕಾನೂನನ್ನು ಬಲವಂತವಾಗಿ ಮುಂದಿರಿಸುವಂತಾಗಿದೆ. ಆದರೆ ಈ 12 ಮಂದಿ ಸಂಸದರು ತಮ್ಮ ದುರ್ವರ್ತನೆಗಾಗಿ ಈಗಲೂ ಸ್ಪೀಕರ್ ಹಾಗೂ ಸದನಕ್ಕೆ ಕ್ಷಮೆ ಕೋರಿದರೆ, ಸರ್ಕಾರವು ಮುಕ್ತ ಮನಸ್ಸಿನೊಂದಿಗೆ ಅವರ ಪ್ರಸ್ತಾಪವನ್ನು ಸಕಾರಾತ್ಮಕವಾಗಿ ಪರಿಗಣಿಸಲು ಸಿದ್ಧವಿದೆ' ಎಂದು ಅವರು ಟ್ವೀಟ್ ಮಾಡಿದ್ದಾರೆ. ಸಂಸತ್‌ನ ಕಳೆದ ಮುಂಗಾರು ಅಧಿವೇಶನದ ವೇಳೆ ಆಗಸ್ಟ್ 11ರಂದು ವಿರೋಧ ಪಕ್ಷಗಳ ಸದಸ್ಯರು ಹೇಗೆ ನಡೆದುಕೊಂಡಿದ್ದರು ಎಂಬುದನ್ನು ಇಡೀ ದೇಶ ನೋಡಿದೆ ಎಂದು ಜೋಶಿ ಸುದ್ದಿಗಾರರೊಂದಿಗೆ ಮಾತನಾಡುವಾಗ ಹೇಳಿದ್ದರು. 'ಸಂಸದರ ಕೆಟ್ಟ ವರ್ತನೆಯ ಎಲ್ಲ ವಿಡಿಯೋ ದೃಶ್ಯಾವಳಿಗಳು ಸಾಮಾಜಿಕ ಜಾಲತಾಣದಲ್ಲಿ ಲಭ್ಯವಿವೆ. ಅವುಗಳನ್ನು ಸ್ವತಃ ಅವರೇ ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಂಡಿದ್ದಾರೆ. ಇದು ಕ್ರಮ ತೆಗೆದುಕೊಳ್ಳಲು ಇದ್ದ ಮೊದಲ ಅವಕಾಶವಾಗಿತ್ತು ಮತ್ತು ಅಧ್ಯಕ್ಷರು ಕ್ರಮ ತೆಗೆದುಕೊಂಡಿದ್ದಾರೆ' ಎಂದು ತಿಳಿಸಿದ್ದರು. ಮುಂಗಾರು ಅಧಿವೇಶನದ ಕೊನೆಯ ದಿನದಂದು ರಾಜ್ಯಸಭೆಯ 12 ವಿಪಕ್ಷ ಸಂಸದರು ಗದ್ದಲ, ಹಿಂಸಾಚಾರ ನಡೆಸಿದ್ದರಿಂದ ಅಮಾನತು ಮಾಡಲಾಗಿತ್ತು. ಈ ಅಮಾನತನ್ನು ವಿಪಕ್ಷಗಳು ಖಂಡಿಸಿದ್ದವು. ಇದು ನಿಯಮಾವಳಿಗಳಿಗೆ ವಿರುದ್ಧ ಎಂದು ಆರೋಪಿಸಿದ್ದವು. 'ಸಂಸದರು ಹಿಂದೆಂದೂ ಕಾಣದಂತಹ ಅನುಚಿತ ವರ್ತನೆ, ಅವಿಧೇಯತೆ, ಹಿಂಸೆ ಮತ್ತು ಒರಟು ನಡವಳಿಕೆ ಹಾಗೂ ಭದ್ರತಾ ಸಿಬ್ಬಂದಿ ಮೇಲೆ ಉದ್ದೇಶಪೂರ್ವಕ ದಾಳಿಗಳನ್ನು ಸ್ವ ಇಚ್ಛೆಯಿಂದಲೇ ನಡೆಸಿದ್ದಾರೆ' ಎಂದು ಅಮಾನತು ನಿಲುವಳಿಯಲ್ಲಿ ಹೇಳಲಾಗಿದೆ. ಶಿವ ಸೇನಾ ಸಂಸದರಾದ ಪ್ರಿಯಾಂಕಾ ಚತುರ್ವೇದಿ ಮತ್ತು ಅನಿಲ್ ದೇಸಾಯಿ, ಟಿಎಂಸಿ ಸಂಸದರಾದ ದೋಲಾ ಸೇನ್ ಮತ್ತು ಶಾಂತಾ ಛೆಟ್ರಿ, ಸಿಪಿಎಂನ ಎಲಮಾರನ್ ಕರೀಮ್ ಹಾಗೂ ಕಾಂಗ್ರೆಸ್‌ನ ಆರು ಸಂಸದರನ್ನು ಅಮಾನತು ಮಾಡಲಾಗಿತ್ತು. ಕೃಷಿ ಕಾಯ್ದೆಗಳ ವಿರುದ್ಧ ರೈತರ ಪ್ರತಿಭಟನೆ ವಿಚಾರ ಹಾಗೂ ಪೆಗಾಸಸ್ ವಿಷಯಗಳ ಕುರಿತು ಗದ್ದಲ ಎಬ್ಬಿಸಿದ್ದ ವಿರೋಧ ಪಕ್ಷಗಳ ಸದಸ್ಯರು ರಾಜ್ಯಸಭೆಯಲ್ಲಿ ಅಧಿಕಾರಿಗಳು ಕೂರುವ ಮೇಜುಗಳ ಮೇಲೆ ಹತ್ತಿ ಪ್ರತಿಭಟನೆ ನಡೆಸಿದ್ದರು. ಸರ್ಕಾರದ ವಿರುದ್ಧ ಕಪ್ಪು ಬಾವುಟಗಳನ್ನು ಪ್ರದರ್ಶಿಸಿದ್ದರು. ಕಾಗದ ಪತ್ರಗಳನ್ನು ಹರಿದು ಎಸೆದಿದ್ದರು. ಅಲ್ಲದೆ, ಭದ್ರತಾ ಸಿಬ್ಬಂದಿಯ ಮೇಲೆಯೂ ಕೈ ಮಾಡಿದ್ದರು. ಮಹಿಳಾ ಮಾರ್ಷಲ್‌ಗಳ ಮೇಲೆ ಕೂಡ ಹಲ್ಲೆ ಮಾಡಿದ್ದರು. ಈ ಬಗ್ಗೆ ಉಪಾಧ್ಯಕ್ಷ ಎಂ. ವೆಂಕಯ್ಯ ನಾಯ್ಡು ಅವರು ನೋವಿನಿಂದ ಸದನದಲ್ಲಿಯೇ ಕಣ್ಣೀರಿಟ್ಟಿದ್ದರು. ವಿಪಕ್ಷಗಳ ಈ ಕ್ರಮವನ್ನು ಖಂಡಿಸಿದ್ದ ಸರ್ಕಾರ, 12 ಮಂದಿ ಸಂಸದರನ್ನು ಅಮಾನತು ಮಾಡಿದೆ.
from India & World News in Kannada | VK Polls https://ift.tt/3I2TYcf
