ಗಂಗಾಧರ ಬಂಡಿಹಾಳ ಕೊಪ್ಪಳ: ಜಿಲ್ಲೆಯ ಭತ್ತ ಬೆಳೆಯುವ ನೀರಾವರಿ ವ್ಯಾಪ್ತಿಯ ಪ್ರದೇಶದಲ್ಲಿ ರೈತರಿಗೆ ಅಧಿಕ ಆದಾಯ ಸಿಗುವ ತಾಳೆ ಬೆಳೆಯಲು 8 ಹೋಬಳಿಗಳನ್ನು ಪ್ರಾಯೋಗಿಕವಾಗಿ ಆಯ್ಕೆ ಮಾಡಿದೆ. ಕೊಪ್ಪಳ, ಗಂಗಾವತಿ ಹಾಗೂ ಕಾರಟಗಿ ತಾಲೂಕಿನ ತುಂಗಭದ್ರಾ ಅಚ್ಚುಕಟ್ಟು ಪ್ರದೇಶ ವ್ಯಾಪ್ತಿಯಲ್ಲಿ ರೈತರು ಭತ್ತ ಬೆಳೆಯುತ್ತಿದ್ದು, ಗೊಬ್ಬರ, ಕ್ರಿಮಿನಾಶಕ್ಕಾಗಿಯೇ ಸಾವಿರಾರು ರೂ. ವ್ಯಯಿಸುತ್ತಿದ್ದಾರೆ. ಆದರೆ ರೈತರಿಗೆ ಕೆಲವೊಮ್ಮೆ ಖರ್ಚು ಮಾಡಿರುವ ವೆಚ್ಚವೂ ಕೈಗೆ ಬರುವುದಿಲ್ಲ. ಆದ್ದರಿಂದ ಕಡಿಮೆ ಖರ್ಚಿನಲ್ಲಿಯೇ ಅಧಿಕ ಆದಾಯ ನೀಡಲಿರುವ ತಾಳೆ ಬೆಳೆಯಲು ಪ್ರೋತ್ಸಾಹಿಸುವುದಕ್ಕಾಗಿಯೇ ತುಂಗಭದ್ರಾ ಜಲಾಶಯದ ಹಿನ್ನೀರು ಪ್ರದೇಶ ವ್ಯಾಪ್ತಿ ಹಾಗೂ ಅಚ್ಚುಕಟ್ಟು ಪ್ರದೇಶದಲ್ಲಿ ರೈತರಿಗೆ ತಾಳೆ ಬೆಳೆಯಲು ಪ್ರೋತ್ಸಾಹಿಸಲು ತೋಟಗಾರಿಕೆ ಇಲಾಖೆ ಯೋಜನೆ ರೂಪಿಸಿದೆ. ಉತ್ತೇಜನ ಮಲೆಶಿಯನ್‌ದಿಂದ ತಾಳೆ ಆಮದು ಮಾಡಿಕೊಂಡು, ಇದಕ್ಕಾಗಿ ಸಾವಿರಾರು ಕೋಟಿ ರೂ. ವ್ಯಯಿಸಲಾಗುತ್ತಿತ್ತು. ಆದರೆ ಆಮದು ಕೈಬಿಟ್ಟು ಸ್ಥಳೀಯ ರೈತರಿಗೆ ಪ್ರೋತ್ಸಾಹ ನೀಡುವ ಉದ್ದೇಶದಿಂದ ಉತ್ತೇಜಿಸಲು ಮುಂದಾಗಿದೆ. ಒಂದು ಎಕರೆಗೆ ಸುಮಾರು 55 ತಾಳೆ ಗಿಡಗಳನ್ನು ಬೆಳೆಯಬಹುದಾಗಿದೆ. ಸುಮಾರು 4 ವರ್ಷದವರೆಗೆ ತಾಳೆಗೆ ಗೊಬ್ಬರ ಹಾಕಿ ಬೆಳೆಸಬೇಕಾಗಿದೆ. ತಾಳೆ ಇಳುವರಿ ಎರಡೂವರೆ ವರ್ಷದ ಬಳಿಕ ಆರಂಭವಾಗಲಿದ್ದು, ಸುಮಾರು ಮೂರು ವರ್ಷದವರೆಗೆ ತಾಳೆ ಗಿಡಗಳ ನೆಟ್ಟಿರುವ ಜಮೀನಿನಲ್ಲಿ ಇನ್ನಿತರ ಬೆಳೆ ಬೆಳೆಯಲು ಸ್ಥಳಾವಕಾಶವಿದೆ. ರೈತರಿಗೆ ಪ್ರತಿವರ್ಷ 10,500 ರೂ. ಪ್ರೋತ್ಸಾಹ ಧನ ವಿತರಿಸುತ್ತದೆ. ಮೂರು ವರ್ಷದವರೆಗೆ ಈ ಮೊತ್ತ ವಿತರಿಸಲಾಗುತ್ತಿದ್ದು, ತಾಳೆ ಇಳುವರಿ ಆರಂಭವಾದ ಮೇಲೆ ಪ್ರೋತ್ಸಾಹ ಧನ ಕೈಬಿಡಲಾಗುತ್ತದೆ. ಧನ ಸಹಾಯ ಮೂರು ವರ್ಷದ ಬಳಿಕ ದಿನಕ್ಕೆ ಒಂದು ಗಿಡಕ್ಕೆ ಸುಮಾರು 80ರಿಂದ 200 ಲೀಟರ್‌ ನೀರು ಬೇಕಾಗುತ್ತದೆ. ಆದ್ದರಿಂದ ಜಮೀನುಗಳಲ್ಲಿಯೇ ಕೃಷಿ ಹೊಂಡ ನಿರ್ಮಾಣ ಮಾಡಿ ನೀರು ಪೂರೈಸಲು ಡಿಸೇಲ್‌ ಪಂಪ್‌ಸೆಟ್‌ ಖರೀದಿಗೆ ಧನ ಸಹಾಯ ಒದಗಿಸಲಾಗುತ್ತದೆ. ಐದು ವರ್ಷದ ಬಳಿಕ ಜಮೀನಿಗೆ ಅವಶ್ಯಕತೆ ಬಿದ್ದರೆ ರೈತರಿಗೆ ಬೋರ್‌ವೆಲ್‌ ಕೊರೆಸಲು ಧನ ಸಹಾಯ ಒದಗಿಸುತ್ತಿದೆ. ಒಂದು ಎಕರೆ ಜಮೀನಿನಲ್ಲಿ ಸುಮಾರು 10 ಟನ್‌ ಇಳುವರಿ ಬರಲಿದ್ದು, ಸರಕಾರವೇ ರೈತರಿಂದ ಖರೀದಿಸಲಿದೆ. ಪ್ರಸಕ್ತ ವರ್ಷದಿಂದ ಒಂದು ಟನ್‌ಗೆ 15 ಸಾವಿರ ರೂ. ನಿಗದಿಗೊಳಿಸಿರುವುದರಿಂದ ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆ, ಇಳಿಕೆ ಸಮಸ್ಯೆ ಇರುವುದಿಲ್ಲ ಎನ್ನುತ್ತಾರೆ ಅಧಿಕಾರಿಗಳು. ಕನಕಗಿರಿ ತಾಲೂಕಿನ ಮುಸಲಾಪುರ ಗ್ರಾಮದ ಬಳಿ ತಾಳೆ ಎಣ್ಣೆ ಸಂಸ್ಕರಣ ಘಟಕ ಅಳವಡಿಸಿದೆ. ಆದರೆ ಬರಗಾಲದ ಹಿನ್ನೆಲೆಯಲ್ಲಿ ಕೆಲ ದಿನದವರೆಗೆ ಬಂದ್‌ ಆಗಿದ್ದ ಸಂಸ್ಕರಣ ಘಟಕಕ್ಕೆ ಮತ್ತೆ ಚಾಲನೆ ಸಿಕ್ಕಿದೆ. ಈ ಘಟಕದಲ್ಲಿಯೇ ರೈತರು ನೇರವಾಗಿ ತಾಳೆ ಮಾರಾಟ ಮಾಡಬಹುದಾಗಿದೆ. ಜಿಲ್ಲೆಯಲ್ಲಿ ಆಯ್ದ 8 ಹೋಬಳಿ ವ್ಯಾಪ್ತಿಯ ಗ್ರಾಮಗಳು 50 ಕಿ.ಮೀ. ಒಳಗಡೆ ಇರುವುದರಿಂದ ಸಾರಿಗೆ ವೆಚ್ಚವೂ ಕಡಿಮೆಯಾಗಲಿದೆ. ಈ ಸಂಸ್ಕರಣ ಘಟಕಕ್ಕೆ ವಿಜಯಪುರ, ಬಾಗಲಕೋಟ, ಗದಗ, ಬಳ್ಳಾರಿ ಜಿಲ್ಲೆಯಿಂದ ರೈತರು ಆಗಮಿಸಿ ತಾಳೆ ಮಾರಾಟ ಮಾಡುತ್ತಿದ್ದಾರೆ. ಸ್ಥಳೀಯರಿಗೆ ಕಡಿಮೆ ವೆಚ್ಚದಲ್ಲಿಯೇ ಅಧಿಕ ಆದಾಯ ಬರಲಿದೆ. ನೀರು ಹೆಚ್ಚಿಗೆ ಬೇಕಾದ ಹಿನ್ನೆಲೆಯಲ್ಲಿ ತುಂಗಭದ್ರಾ ಅಚ್ಚುಕಟ್ಟು ಪ್ರದೇಶ ಹಾಗೂ ಹಿನ್ನೀರು ಪ್ರದೇಶಗಳನ್ನು ಆಯ್ಕೆ ಮಾಡಿ ಪ್ರಾಯೋಗಿಕವಾಗಿ ಜಾರಿ ಮಾಡಲು ಯೋಜನೆ ರೂಪಿಸಿದೆ. ರೈತರು ಭತ್ತದ ಬದಲಿ ತಾಳೆ ಬೆಳೆದರೆ ಇನ್ನೂ ಅಧಿಕ ಆದಾಯ ಬರಲಿದೆ. ತಾಳೆ ಗಿಡಗಳಿಗೆ ನೀರು ಹೆಚ್ಚಿಗೆ ಬೇಕಾಗಿದ್ದರೂ ಸಹಿತ ಭತ್ತದಷ್ಟು ಬೇಕಾಗಿಲ್ಲ. ಅಲ್ಲದೇ ರೈತರು ಬೆಳೆದ ತಾಳೆಗೆ ಸರಕಾರ ನಿಗದಿಗೊಳಿಸಿದ ಬೆಲೆ ಸಿಗಲಿದೆ. ಪ್ರಾಯೋಗಿಕವಾಗಿ 8 ಹೋಬಳಿ ಆಯ್ಕೆ ಮಾಡಿಕೊಳ್ಳಲಾಗುತ್ತಿದೆ. ಕೃಷ್ಣ ಉಕ್ಕುಂದ, ಉಪನಿರ್ದೇಶಕರು, ತೋಟಗಾರಿಕೆ ಇಲಾಖೆ, ಕೊಪ್ಪಳ
from India & World News in Kannada | VK Polls https://ift.tt/3FQU2dg
