ಹೊಸದಿಲ್ಲಿ: ವಿರುದ್ಧ ಮೊದಲನೇ ಟೆಸ್ಟ್ ಪಂದ್ಯದ ಐದನೇ ಹಾಗೂ ಅಂತಿಮ ದಿನದ ಕೊನೆಯ ಸೆಷನ್‌ನಲ್ಲಿ ಟೀಮ್ ಇಂಡಿಯಾ ರೂಪಿಸಿದ್ದ ತಂತ್ರವನ್ನು ಆಸ್ಟ್ರೇಲಿಯಾ ಮಾಜಿ ಸ್ಪಿನ್ನರ್‌ ಶೇನ್‌ ವಾರ್ನ್‌ ಪ್ರಶ್ನೆ ಮಾಡಿದ್ದಾರೆ. ಸೋಮವಾರ ಕಾನ್ಪುರದ ಗ್ರೀನ್‌ ಪಾರ್ಕ್‌ ಸ್ಟೇಡಿಯಂನಲ್ಲಿ ಮುಕ್ತಾಯವಾಗಿದ್ದ ಭಾರತ ಹಾಗೂ ನ್ಯೂಜಿಲೆಂಡ್‌ ನಡುವಣ ಆರಂಭಿಕ ಟೆಸ್ಟ್ ಸಾಕಷ್ಟು ಕುತೂಹಲ ಮೂಡಿಸಿತ್ತು. ಅದರಲ್ಲೂ ಐದನೇ ದಿನ ಮೊದಲ ಸೆಷನ್‌ನಲ್ಲಿ ಕಿವೀಸ್‌ ಒಂದೂ ವಿಕೆಟ್‌ ಕಳೆದುಕೊಳ್ಳದೆ ಬೌಲರ್‌ಗಳ ಸವಾಲನ್ನು ಸಮರ್ಥವಾಗಿ ಮೆಟ್ಟಿ ನಿಂತಿತ್ತು. ಆದರೆ, ಭೋಜನ ವಿರಾಮದ ಬಳಿಕ ಭಾರತ ತಂಡದ ಬೌಲರ್‌ಗಳು ಶಕ್ತಿಯುತವಾಗಿ ಕಮ್‌ಬ್ಯಾಕ್‌ ಮಾಡಿದ್ದರು. ಅದರಂತೆ 90ನೇ ಓವರ್‌ನಲ್ಲಿಯೇ ವಿಲಿಯಮ್ಸನ್‌ ಪಡೆ 155 ರನ್‌ಗಳಿಗೆ 9 ವಿಕೆಟ್‌ ಕಳೆದುಕೊಂಡು ಸೋಲಿನ ಭೀತಿಗೆ ಒಳಗಾಗಿತ್ತು. ಭಾರತ ತಂಡ ಗೆಲುವು ಪಡೆಯಲು ಕೊನೆಯ ಎಂಟು ಓವರ್‌ಗಳಲ್ಲಿ ಒಂದೇ ಒಂದು ವಿಕೆಟ್‌ ಅಗತ್ಯವಿತ್ತು. ಈ ವೇಳೆ ಭಾರತ ಗೆಲುವು ಸಾಧಿಸುವುದು ಬಹುತೇಕ ಖಚಿತ ಎಂದೇ ಭಾವಿಸಲಾಗಿತ್ತು. ಆದರೆ, ರಚಿನ್‌ ರವೀಂದ್ರ(18*) ಹಾಗೂ ಅಜಾಝ್‌ ಪಟೇಲ್‌(2*) ಜೋಡಿಯನ್ನು ಬೇರ್ಪಡಿಸಲು ಟೀಮ್ ಇಂಡಿಯಾ ಬೌಲರ್‌ಗಳ ಕೈಯಲ್ಲಿ ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಪಂದ್ಯ ಡ್ರಾನಲ್ಲಿ ಸಮಾಪ್ತಿಯಾಯಿತು. ಕೊನೆಯ ವಿಕೆಟ್‌ ಪಡೆಯದ ಟೀಮ್ ಇಂಡಿಯಾದ ತಂತ್ರದ ಬಗ್ಗೆ ಇದೀಗ ಶೇನ್‌ ವಾರ್ನ್‌ ಬೇಸರ ವ್ಯಕ್ತಪಡಿಸಿದ್ದಾರೆ. ಹೊಸ ಚೆಂಡು ಲಭ್ಯವಿದ್ದರೂ ಪಡೆಯದ ಟೀಮ್ ಇಂಡಿಯಾ ನಿರ್ಧಾರದ ಬಗ್ಗೆ ಶೇನ್‌ವಾರ್ನ್‌ ಪ್ರಶ್ನೆ ಮಾಡಿದ್ದಾರೆ. 81ನೇ ಓವರ್‌ನಲ್ಲಿ ಹೊಸ ಚೆಂಡು ಭಾರತಕ್ಕೆ ಲಭ್ಯವಾಗಿತ್ತು. ಆದರೆ, ಇನ್ನೂ ಮೂರು ಓವರ್‌ಗಳವರೆಗೂ ಆತಿಥೇಯರು ಹಳೆಯ ಚೆಂಡಿನಲ್ಲಿಯೇ ಬೌಲ್‌ ಮಾಡಿದ್ದರು. ನಂತರ, 84ನೇ ಓವರ್‌ಗೆ ಹೊಸ ಚಂಡು ಪಡೆದರೂ ಯಾವುದೇ ಪ್ರಯೋಜನವಾಗಿರಲಿಲ್ಲ. "ಹೊಸ ಚೆಂಡು ಲಭ್ಯವಾಗಿದ್ದರೂ ಭಾರತ ತಂಡ ಪಡೆಯದೇ ಇರುವುದು ನನ್ನಲ್ಲಿ ಅಚ್ಚರಿ ಮೂಡಿಸಿತ್ತು. ವಿಚಿತ್ರವೆಂದರೆ ಓವರ್‌ಗಳು ಮುಗಿಯುತ್ತಿರುವಾಗ ಇನ್ನೂ ಹಗುರವಾಗಿರುವ ಹಳೆಯ ಚೆಂಡಿನೊಂದಿಗೆ ಬೌಲಿಂಗ್ ಮಾಡುತ್ತಿದ್ದಾರೆ!!!!" ಎಂದು ಟ್ವೀಟ್‌ ಮಾಡಿ ಬೇಸರ ವ್ಯಕ್ತಪಡಿಸಿದ್ದಾರೆ. ಡ್ರಾನಲ್ಲಿ ಅಂತ್ಯವಾದ ಭಾರತ ಹಾಗೂ ನ್ಯೂಜಿಲೆಂಡ್‌ ನಡುವಣ ಮೊದಲನೇ ಟೆಸ್ಟ್ ಪಂದ್ಯಕ್ಕೆ ಟರ್ನಿಂಗ್‌ ಪಾಯಿಂಟ್‌ ಯಾವುದು ಎಂಬ ಬಗ್ಗೆ ಸ್ಪಿನ್ ದಂತಕತೆ ಬೆಳಕು ಚೆಲ್ಲಿದರು. "ಹೊಸ ಚೆಂಡು ಲಭ್ಯವಿದ್ದರೂ ಟೀಮ್ ಇಂಡಿಯಾ ಪಡೆಯದೆ ಹಳೆಯ ಚೆಂಡಿನಲ್ಲಿಯೇ ನಾಲ್ಕು ಓವರ್‌ ಬೌಲ್‌ ಮಾಡಿದ್ದು ಪಂದ್ಯಕ್ಕೆ ಟರ್ನಿಂಗ್‌ ಪಾಯಿಂಟ್‌ ಆಯಿತು. ಇದನ್ನು ಸದುಪಯೋಗಪಡಿಸಿಕೊಂಡ ನ್ಯೂಜಿಲೆಂಡ್‌ ತಂಡ ಆತಿಥೇಯರ ಗೆಲುವನ್ನು ಕಸಿದುಕೊಂಡಿತು. ಭಾರತ ಗೆಲುವು ಪಡೆಯಲು ಸಾಧ್ಯವಾಗದೆ ಇರುವುದಕ್ಕೆ ಇದೇ ಕಾರಣವಿರಬಹುದಲ್ಲವೆ,? ಎಂದು ವಾರ್ನ್‌ ಪ್ರಶ್ನಿಸಿದರು. ಡಿಸೆಂಬರ್‌ 3 ರಿಂದ ಮುಂಬೈನ ವಾಂಖೆಡೆ ಕ್ರೀಡಾಗಣದಲ್ಲಿ ಆರಂಭವಾಗಲಿರುವ ಎರಡನೇ ಹಾಗೂ ಟೆಸ್ಟ್ ಸರಣಿಯ ಕೊನೆಯ ಪಂದ್ಯದಲ್ಲಿ ಭಾರತ ಹಾಗೂ ನ್ಯೂಜಿಲೆಂಡ್‌ ತಂಡಗಳು ಮುಖಾಮುಖಿಯಾಗಲಿವೆ. ಅಂದಹಾಗೆ, ನಿಯಮಿತ ನಾಯಕ ವಿರಾಟ್‌ ಕೊಹ್ಲಿ ಈ ಪಂದ್ಯಕ್ಕೆ ಮರಳಲಿದ್ದು, ತಂಡವನ್ನು ಮುನ್ನಡೆಸಲಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3o6ngyP
