ಬೆಂಗಳೂರು: ಚುಮು ಚುಮು ಚಳಿಯಲ್ಲಿ ಬಿಸಿ ಬಿಸಿ ಕಡ್ಲೆಕಾಯಿ ಮೆಲ್ಲುತ್ತಾ ಸಾಗುವ ಯುವ ಜೋಡಿಗಳು ಒಂದೆಡೆಯಾದರೆ, ಆಟಿಕೆಗಳಿಗೆ ಹಠ ಹಿಡಿಯುವ ಮಕ್ಕಳು ಇನ್ನೊಂದೆಡೆ. ಮತ್ತೊಂದೆಡೆ ಓಲೆ-ಬಳೆ ಇತ್ಯಾದಿಗಳ ಖರೀದಿಯಲ್ಲಿ ತೊಡಗಿದ್ದ ಯುವತಿಯರ ದಂಡು.... ಇವೆಲ್ಲದರ ಜತೆಗೆ ಕಿವಿಗಡಚಿಕ್ಕುವ ಪೀಪಿಗಳ ಸದ್ದು... ಶನಿವಾರ ಬಸವನಗುಡಿಯ ಪರಿಷೆಯಲ್ಲಿ ಕಂಡು ಬಂದ ದೃಶ್ಯವಿದು. ರಾಮಕೃಷ್ಣ ಮಠದ ಬಳಿಯಿಂದ ಬಿಎಂಎಸ್‌ ಕಾಲೇಜಿನವರೆಗಿನ ರಸ್ತೆಯ ಎರಡೂ ಬದಿಗಳಲ್ಲಿ ಸಾಲು ಸಾಲು ಅಂಗಡಿಗಳನ್ನು ನಿರ್ಮಿಸಲಾಗಿದೆ. ಕಡ್ಲೆಕಾಯಿ, ತಿಂಡಿ- ತಿನಿಸು, ಆಟಿಕೆಗಳು ಹಾಗೂ ಆಭರಣ ಮಳಿಗೆಗಳು ಹೀಗೆ ತರಹೇವಾರಿ ಮಳಿಗೆಗಳು ರಾರಾಜಿಸುತ್ತಿವೆ. 'ಬೆಳಗಾಂ ಕಾಯಿ, ಸಾಮ್ರಾಟ್‌, ಗಡಂಗ್‌, ಬಾದಾಮಿ...' ಇಂತಹ ಹತ್ತಾರು ಜಾತಿಯ ಕಡಲೆಕಾಯಿಗಳು ಬಸವನಗುಡಿಯ ಬುಲ್‌ಟೆಂಪಲ್‌ ರೋಡ್‌ಗೆ ಆಗಮಿಸಿವೆ. ರುಚಿ ಮತ್ತು ಗಾತ್ರದಲ್ಲಿ ಇವು ಒಂದಕ್ಕಿಂತ ಒಂದು ಭಿನ್ನ. ಕಡ್ಲೆಕಾಯಿ ಪರಿಷೆಗೆ ದಿನಗಣನೆ (ಕಡೇ ಕಾರ್ತಿಕ ಸೋಮವಾರ ನ.29) ಆರಂಭವಾಗಿದೆ. ಕೋವಿಡ್‌ ಹಿನ್ನೆಲೆಯಲ್ಲಿ ಕಳೆದ ವರ್ಷ ಪರಿಷೆಯನ್ನು ಸರಳವಾಗಿ ಆಚರಿಸಲಾಗಿದ್ದು, ಸಾರ್ವಜನಿಕರಿಗೆ ಪ್ರವೇಶ ಇರಲಿಲ್ಲ. ಈ ವರ್ಷ ಅದ್ಧೂರಿಯಾಗಿ ಪರಿಷೆಯನ್ನು ಆಯೋಜಿಸಲಾಗಿದೆ. ಹೀಗಾಗಿ ಈ ವರ್ಷ ಭಾನುವಾರ, ಸೋಮವಾರ ಮತ್ತು ಮಂಗಳವಾರ ಮೂರು ದಿನಗಳ ಕಾಲ ಕನಿಷ್ಠ 6-7 ಲಕ್ಷ ಮಂದಿ ಆಗಮಿಸುವ ನಿರೀಕ್ಷೆಯಿದೆ. ರಸ್ತೆಯ ಎಡ ಮತ್ತು ಬಲ ಬದಿಗಳಲ್ಲಿ ಬಹುತೇಕ ಮಳಿಗೆಗಳಲ್ಲಿ ಹಸಿ ಹಾಗೂ ಹುರಿದ ಕಡ್ಲೆಕಾಯಿ ರಾಶಿ ಕಂಡುಬಂದಿದೆ. ಇದಲ್ಲದೆ ಪರಿಷೆಗೆ ಇಂಬು ಕೊಡುವಂತೆ ಕಡ್ಲೆಪುರಿ, ಬೆಂಡು-ಬತ್ತಾಸು, ಕಲ್ಯಾಣಸೇವೆ, ಮಿಠಾಯಿ ಮಳಿಗೆಗಳೂ ಕಳೆಗಟ್ಟಿವೆ. ಆಟಿಕೆಗಳ ಮಾರಾಟವೂ ಜೋರಾಗಿದೆ. ಪೀಪಿಗಳು ಸದ್ದು ಮಾಡುತ್ತಿವೆ. ಅಲಂಕಾರಿಕ ಗಾಜಿನ ಬಾಟಲಿಗಳು ಗಮನ ಸೆಳೆಯುತ್ತಿವೆ. ಎಲ್ಲೆಲ್ಲಿಂದ ಕಡ್ಲೆಕಾಯಿ ಆಗಮನ ಬೆಳಗಾವಿ, ಚಿಂತಾಮಣಿ, ಶ್ರೀನಿವಾಸಪುರ, ಕೋಲಾರ, ಚಿಕ್ಕಬಳ್ಳಾಪುರ, ಮಾಗಡಿ, ಮಂಡ್ಯ, ಮೈಸೂರು, ತುಮಕೂರು, ಕುಣಿಗಲ್‌ ಹೀಗೆ ರಾಜ್ಯದ ಹಲವು ಭಾಗಗಳಿಂದ ಕಡ್ಲೆಕಾಯಿ ಆಗಮಿಸಿದ್ದರೆ, ತಮಿಳುನಾಡು ಮತ್ತು ಆಂಧ್ರ ಪ್ರದೇಶದಿಂದ ಬಗೆ ಬಗೆಯ ಕಡ್ಲೆಕಾಯಿಗಳು ಬಂದಿವೆ. ಸೇರಿಗೆ 25-30 ರೂ. ಕಳೆದ ಕೆಲವು ವರ್ಷಗಳಿಂದ ಇದೇ ನಿಗದಿತ ಬೆಲೆ ಮುಂದುವರಿಯುತ್ತಿದೆ. ಹುರಿದದ್ದಿರಲಿ, ಹಸಿ ಕಾಯಿಯಿರಲಿ ಸೇರಿಗೆ 25-30 ರೂ. ದರದಲ್ಲೇ ಮಾರಾಟ ಮಾಡಲಾಗುತ್ತದೆ. ಆದರೆ ಟನ್‌ ಕಾಯಿಗೆ 3-4 ಸಾವಿರ ರೂ.ವರೆಗೆ ದರವಿದೆ. ಈ ಬಾರಿ ಉತ್ತಮ ಮಳೆಯಾಗಿದೆ. ಬೆಳೆಯೂ ಇದೆ. ಹೀಗಾಗಿ ಕಳೆದ ವರ್ಷದ ಬೆಲೆಗೂ, ಈ ವರ್ಷದ ಬೆಲೆಗೂ ಅಂತಹ ವ್ಯತ್ಯಾಸವೇನೂ ಇಲ್ಲ ಎನ್ನುತ್ತಾರೆ ವ್ಯಾಪಾರಿ ಲಲಿತಾ. ನಮ್ಮ ಅತ್ತೆ 20 ವರ್ಷಗಳಿಂದ ಕಡಲೆಕಾಯಿ ವ್ಯಾಪಾರ ಮಾಡುತ್ತಿದ್ದಾರೆ. ಇದೀಗ ನಾವು ಆ ಉದ್ಯಮವನ್ನು ಆರಂಭಿಸಿದ್ದೇವೆ ಎನ್ನುತ್ತಾರೆ ತಮಿಳುನಾಡು ಮೂಲದ ನಿವಾಸಿ ಲಲಿತಾ. ನಾವು ಯಶವಂತಪುರದಿಂದ ಐದು ಮೂಟೆ ತಂದಿದ್ದೇವೆ. ವ್ಯಾಪಾರ ನೋಡಿಕೊಂಡು ಮತ್ತಷ್ಟು ಕಾಯಿ ತರಲಾಗುವುದು. ಸೇರಿನ ಲೆಕ್ಕದಲ್ಲೇ ವ್ಯಾಪಾರ ಮಾಡುವುದರಿಂದ ಒಂದು ಸೇರಿಗೆ 30 ರೂ. ಇದೆ. ಸ್ವಲ್ಪ ಎಳೆ ಕಾಯಿಯಾದರೆ 22-25 ರೂ. ಗೆ ಸಿಗುತ್ತದೆ ಎನ್ನುತ್ತಾರೆ ಕಡಲೆಕಾಯಿ ವ್ಯಾಪಾರಿ ದೇವಿ. ತೂಕದ ಲೆಕ್ಕದಲ್ಲಿ ಮಾರಿದರೆ ದುಬಾರಿಯಾಗುತ್ತೆ ಮೂರು ಬೀಜದ ಸಾಮ್ರಾಟ್‌ ಕಾಯಿ ಮೂಟೆಗೆ 5 ಸಾವಿರ ರೂ.ಗಿಂತಲೂ ಹೆಚ್ಚಿದೆ. ಇಷ್ಟು ಬೆಲೆ ಕೊಟ್ಟು ಕೆ.ಜಿ. ಲೆಕ್ಕದಲ್ಲಿ ಮಾರಬೇಕೆಂದರೆ 120 ರೂ.ನಂತೆ ಮಾರಬೇಕು. ಯಾರೂ ಬರುವುದಿಲ್ಲ. ಹೀಗಾಗಿ ಪರಿಷೆಯಲ್ಲಿ ಯಾರೂ ತೂಕದ ಲೆಕ್ಕದಲ್ಲಿ ಕಡ್ಲೆಕಾಯಿ ಮಾರುತ್ತಿಲ್ಲ. ಎಲ್ಲರೂ ಸೇರಲ್ಲೇ ಅಳೆದು ಕೊಡುತ್ತಾರೆ ಎಂದು ಕಲಾಸಿಪಾಳ್ಯದ ಕಡ್ಲೆಕಾಯಿ ವ್ಯಾಪಾರಿ ಗೌರಮ್ಮ ಹೇಳಿದರು. ಕಡ್ಲೆಕಾಯಿ ಹುರಿಯಲು ಮೂಟೆಗೆ 250 ರೂ. '50 ಕೆ.ಜಿ.ಯಷ್ಟು ಕಡಲೆಕಾಯಿ ಹುರಿಯಲು 250 ರೂ. ಕೂಲಿ ಕೊಡಬೇಕು. ಅಷ್ಟೇ ಅಲ್ಲ, ನಾವು ಯಶವಂತಪುರ ಎಪಿಎಂಸಿಯಲ್ಲಿ ಕಾಯಿ ಖರೀದಿಸುತ್ತೇವೆ. ಅಲ್ಲಿಂದ ತಂದು ಕೆ.ಆರ್‌. ಮಾರುಕಟ್ಟೆ ಬಳಿ ಹುರಿಯಲು ಕೊಡುತ್ತೇವೆ. ಅಲ್ಲಿಂದ ಸಾರಿಗೆ ವೆಚ್ಚ ಸೇರಿಸಿ ಮೂಟೆಗೆ 300 ರೂ. ವೆಚ್ಚ ತಗಲುತ್ತದೆ. ಈ ಬಾರಿ ಎಲ್ಲವೂ ದುಬಾರಿಯಾಗಿರುವುದರಿಂದ ಕಡ್ಲೆಕಾಯಿ ವ್ಯಾಪಾರ ಲಾಭವಿಲ್ಲದ ಉದ್ಯಮವಾಗಿದೆ' ಎನ್ನುತ್ತಾರೆ ಧರ್ಮಪುರಿ ಮೂಲದ ವ್ಯಾಪಾರಿ ಎಂ. ಮಾದಮ್ಮ. ಪರಿಷೆಯಲ್ಲಿ ಪ್ಲಾಸ್ಟಿಕ್‌ ಬಳಕೆಗೆ ನಿಷೇಧ ಇಲ್ಲ ಕಡಲೆಕಾಯಿ ಪರಿಷೆಯಲ್ಲಿ ಪ್ಲಾಸ್ಟಿಕ್‌ಗೆ ನಿಷೇಧ ಹೇರಲಾಗಿದೆ ಎಂದು ಆಯೋಜಕರು ಪ್ರತಿ ವರ್ಷ ಹೇಳುತ್ತಾರೆ. ಆದರೆ ಅದು ಯಾವ ಬಾರಿಯೂ ಅನುಷ್ಠಾನಗೊಳ್ಳುವುದಿಲ್ಲ. ಎಂದಿನಂತೆ ಈ ಬಾರಿಯೂ ಪ್ಲಾಸ್ಟಿಕ್‌ ಕವರ್‌ಗಳಲ್ಲೇ ಕಡಲೆಕಾಯಿ, ಕಡಲೆಪುರಿ ಇತ್ಯಾದಿಗಳನ್ನು ತುಂಬಿ ಕೊಡುತ್ತಿದ್ದಾರೆ. ಯಾರಾದರೂ ಕೇಳಲು ಬಂದರೆ ಅವುಗಳನ್ನು ಬಚ್ಚಿಟ್ಟು, ಪೇಪರ್‌ ಬ್ಯಾಗ್‌ಗಳನ್ನೇ ಬಳಸುತ್ತೇವೆ ಎನ್ನುತ್ತಾರೆ. ಇನ್ನು ಕೆಲವರು ಕವರ್‌ನಲ್ಲಿ ಕಾಯಿ ಕೊಡಲಿಲ್ಲ ಎಂದರೆ ವ್ಯಾಪಾರ ಆಗುವುದಿಲ್ಲ ಎನ್ನುತ್ತಾರೆ. ಮಾಸ್ಕ್‌ ಧರಿಸದ ಮಂದಿ ಈಗಾಗಲೇ ಕೊರೋನಾ ಹೆಚ್ಚುತ್ತಿರುವ ಬಗ್ಗೆ ವರದಿಯಾಗುತ್ತಿದೆ. ಆದರೆ ಪರಿಷೆಯಲ್ಲಿ ವ್ಯಾಪಾರಿಗಳಾಗಲಿ, ಗ್ರಾಹಕರಾಗಲಿ ಕಡ್ಡಾಯವಾಗಿ ಮಾಸ್ಕ್‌ ಧರಿಸುತ್ತಿಲ್ಲ. ಪರಿಷೆಗೆ ಹಣ ಕೊಂಡೊಯ್ಯಿರಿ ಕೆಲವು ಮಳಿಗೆಗಳಲ್ಲಿ ಮಾತ್ರ ಪೇಟಿಯಂ, ಫೋನ್‌ ಪೆ ವ್ಯವಸ್ಥೆಯಿದೆ. ಉಳಿದಂತೆ ಸಣ್ಣ ಪುಟ್ಟ ವ್ಯಾಪಾರಿಗಳಿಂದ ಹಣ ಕೊಟ್ಟೇ ಖರೀದಿಸಬೇಕು. ಹೀಗಾಗಿ ಪರಿಷೆಗೆ ಹೋಗುವವರು ಸಾಕಷ್ಟು ಹಣ ಕೊಂಡೊಯ್ಯಲೇಬೇಕು.
from India & World News in Kannada | VK Polls https://ift.tt/3D3LAW6
