ಬೀದಿ ನಾಯಿಗಳ ಆಟಾಟೋಪಕ್ಕೆ ಜನ ಕಂಗಾಲು; ಸೊರಬದಲ್ಲಿ 11 ತಿಂಗಳಲ್ಲಿ 775ಕ್ಕೂ ಹೆಚ್ಚು ನಾಯಿ ಕಡಿತ!

ನೀಲೇಶ್‌ ಸಮನೀ ಶಿವಮೊಗ್ಗ: ತಾಲೂಕಿನಲ್ಲಿತಾಲೂಕು ಕೇಂದ್ರ ಸೊರಬದಲ್ಲಿಯೇ ಬೀದಿನಾಯಿಗಳ ಹಾವಳಿಯ ದೊಡ್ಡಪಾಲಿದ್ದರೂ ನಿಯಂತ್ರಣಕ್ಕೆ ಜನಪ್ರತಿನಿಧಿಗಳು, ಅಧಿಕಾರಿಗಳು ಮುಂದಾಗದಿರುವುದು ಜನರ ಆತಂಕಕ್ಕೆ ಕಾರಣವಾಗಿದೆ. ಈ ವರ್ಷ ಜನವರಿಯಿಂದ ಇಲ್ಲಿಯವರೆಗೂ ಬೀದಿ ನಾಯಿಗಳ ಕಡಿತದ 605 ಪ್ರಕರಣಗಳು ತಾಲೂಕು ಸಾರ್ವಜನಿಕ ಆಸ್ಪತ್ರೆಯಲ್ಲಿ ನೊಂದಣಿಯಾಗಿದ್ದು, ಚಿಕಿತ್ಸೆ ನೀಡಲಾಗಿದೆ. ತಾಲೂಕಿನ ಆನವಟ್ಟಿ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ 170ಕ್ಕೂ ಹೆಚ್ಚು ಪ್ರಕರಣಗಳಿಗೆ ಚಿಕಿತ್ಸೆ ನೀಡಲಾಗಿದೆ. ಇನ್ನೂಕೆಲವು ಪ್ರಕರಣಗಳಿಗೆ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಹೀಗಿದ್ದರೂ ಸೊರಬ ಪುರಸಭೆ, ಆನವಟ್ಟಿ ಪಟ್ಟಣ ಪಂಚಾಯಿತಿ ಹಾಗೂ ಸ್ಥಳೀಯ ಗ್ರಾಮ ಪಂಚಾಯಿತಿಗಳು ಕ್ರಮ ತೆಗೆದುಕೊಳ್ಳಲು ಮುಂದಾಗದಿರುವ ಹಿಂದೆ ಆಡಳಿತ ವ್ಯವಸ್ಥೆಯ ಹೊಣೆಗೇಡಿತನ ಎದ್ದು ಕಾಣುತ್ತಿದೆ. ಪಟ್ಟಣದ ಎಲ್ಲ ವಾರ್ಡ್‌ಗಳಲ್ಲಿ ಬೀದಿ ನಾಯಿಗಳದ್ದೆ ದರ್ಬಾರ್‌ ಆಗಿದೆ. ಮಕ್ಕಳು ಮನೆಯ ಹೊಸಿಲು ದಾಟಿ ಬರಲು ಯೋಚಿಸಬೇಕಿದೆ. ಶಾಲೆ ಮಕ್ಕಳಂತೂ ಒಂಟಿಯಾಗಿ ಚಲಿಸುವುದು ಅಪಾಯಕಾರಿಯಾಗಿದೆ. ಬೈಕ್‌, ಸೈಕಲ್‌ಗಳಲ್ಲಿ ಚಲಿಸುವವರನ್ನೂ ಬೆನ್ನತ್ತಿ ಕಚ್ಚುವ ನಾಯಿಗಳೂ ಇವೆ. ಮಕ್ಕಳು ಬಿಸ್ಕೀಟ್‌ ಇನ್ನಿತರೆ ತಿನ್ನುವ ವಸ್ತು ಕೈಲಿ ಹಿಡಿದು ರಸ್ತೆಯಲ್ಲಿ ಹೊರಟರೆ ಬೀದಿನಾಯಿಗಳು ಕೈಗೇ ಬಾಯಿಹಾಕುತ್ತವೆ. ಮೈಯೆಲ್ಲಾ ಕಣ್ಣಾಗಿ ಜಾಗ್ರತೆಯಿಂದ ನಡೆದು ಹೋಗಬೇಕಿದೆ. ಸ್ವಲ್ಪ ಎಚ್ಚರ ತಪ್ಪಿದರೂ ಹಿಂಬದಿಯಿಂದ ಬಂದು ಕಡಿಯುವ ಸಾಧ್ಯತೆ ಹೆಚ್ಚಿದೆ. ಇತ್ತೀಚೆಗಷ್ಟೇ ಬೆಳಗ್ಗೆ ವಾಕ್‌ ಮಾಡುತ್ತಿದ್ದ ಪ್ರೌಢಶಾಲೆ ಶಿಕ್ಷಕರೊಬ್ಬರನ್ನು, ಮಧಾಹ್ನ ಬಸ್‌ ಇಳಿಯುತ್ತಿದ್ದ ಮಹಿಳೆಯನ್ನು ಕಚ್ಚಿದೆ. ಇಂತಹ ಪ್ರಕರಣಗಳು ಪ್ರತಿನಿತ್ಯ ನಡೆಯುತ್ತಿದ್ದರೂ ಅಧಿಕಾರಿಗಳು, ಜನಪ್ರತಿನಿಧಿಗಳು ತಮಗೆ ಸಂಬಂಧಿಸಿದ್ದಲ್ಲ ಎಂಬಂತೆ ಮೌನವಹಿಸಿದ್ದು, ನಾಗರಿಕರು ತೀವ್ರವಾಗಿ ಖಂಡಿಸಿದ್ದಾರೆ. ಕೆಲ ನಾಯಿಗಳಿಗೆ ಆರೋಗ್ಯ ಕೆಟ್ಟಿದ್ದು ಅವುಗಳ ಕಡಿತದಿಂದ ರೋಗಕ್ಕೆ ತುತ್ತಾಗಿ ಜೀವಹಾನಿಯಾಗುವ ಸಂಭವ ಹೆಚ್ಚಿದೆ. ಚಲಿಸುವ ಸೈಕಲ್‌, ಬೈಕ್‌ಗೆ ದಿಢೀರನೇ ನಾಯಿಗಳು ಅಡ್ಡಬಂದು ಸವಾರರು ನೆಲಕ್ಕೆ ಬಿದ್ದು ಏಟು ಮಾಡಿಕೊಂಡ ಪ್ರಕರಣ ಹೆಚ್ಚುತ್ತಿವೆ. ಅಧಿಕಾರಿಗಳು ತಕ್ಷಣ ಎಚ್ಚೆತ್ತು ಬೀದಿ ನಾಯಿಗಳ ನಿಯಂತ್ರಣಕ್ಕೆ ಕ್ರಮ ತೆಗೆದುಕೊಳದಿದ್ದಲ್ಲಿ ನಾಗರಿಕರು ಪ್ರತಿಭಟನೆಯ ಎಚ್ಚರಿಕೆ ನೀಡಿದ್ದಾರೆ. ಸೊರಬದಲ್ಲಿ ಕಡಿತ ಪ್ರಕರಣ

• ಜನವರಿ 98
• ಫೆಬ್ರುವರಿ 76
• ಮಾರ್ಚ್ 85
• ಏಪ್ರಿಲ್‌ 54
• ಮೇ 17
• ಜೂನ್‌ 46
• ಜುಲೈ 37
• ಆಗಸ್ಟ್‌ 50
• ಸೆಪ್ಟೆಂಬರ್‌ 48
• ಅಕ್ಟೋಬರ್‌ 49
• ನವೆಂಬರ್‌ 45

ಒಟ್ಟು 605 ನಾಯಿ ಕಡಿತ ಪ್ರಕರಣಗಳು ಹೆಚ್ಚಾಗುತ್ತಿವೆ. ನಾಯಿ ಕಡಿತಕ್ಕೊಳಗಾದವರು ನಿರ್ಲಕ್ಷ್ಯ ವಹಿಸದೆ ತಕ್ಷಣ 1 ತಿಂಗಳು 5 ಡೋಸ್‌ ರೇಬಿಸ್‌ ವ್ಯಾಕಿನೇಷನ್‌ ಪಡೆದುಕೊಳ್ಳಬೇಕು. ನಂತರ 90ನೇ ದಿನಕ್ಕೆ ಬೂಸ್ಟರ್‌ ಡೋಸ್‌ ಪಡೆದುಕೊಳ್ಳಬೇಕು. ಆರೋಗ್ಯ ಸರಿಯಿಲ್ಲದ ನಾಯಿ ಕಡಿದಾಗ ರೇಬಿಸ್‌ ಇಮಿನೋ ಗ್ಲೋಬ್ಲಿನ್‌ ಪಡೆದುಕೊಳ್ಳಬೇಕು. ಬಿಪಿಎಲ್‌ ಕಾರ್ಡುದಾರರಿಗೆ ಉಚಿತ ಹಾಗೂ ಎಪಿಎಲ್‌ ಕಾರ್ಡುದಾರರು ಶೇ.30ರಷ್ಟು ವೆಚ್ಚದಲ್ಲಿ ಚಿಕಿತ್ಸೆ ದೊರೆಯುವುದು. ಡಾ.ವಿನಯ್‌ ಪಟೇಲ್‌, ತಾಲೂಕು ಆರೋಗ್ಯಾಧಿಕಾರಿ, ಸೊರಬ ನಾಯಿ ಕ ಡಿತಕ್ಕೆ ಒಳಗಾಗುವ ಸಂಭವ ಇರುವ ವ್ಯಕ್ತಿಗಳು ಮುಂಜಾಗ್ರತೆಯಿಂದ 3 ಡೋಸ್‌ ರೇಬಿಸ್‌ ವ್ಯಾಕಿನೇಷನ್‌ ಪಡೆದುಕೊಳ್ಳಬೇಕು. ಮನೆ ಮಾಲೀಕರು ಸಾಕು ಪ್ರಾಣಿಗಳಿಗೆ ಪಶು ಆಸ್ಪತ್ರೆಯಲ್ಲಿ ರೇಬಿಸ್‌ ವ್ಯಾಕ್ಸಿನ್‌ ಹಾಕಿಸಬೇಕು. ಪಟ್ಟಣದಲ್ಲಿ ನಾಯಿಗಳ ಹಾವಳಿ ಹೆಚ್ಚಾಗಿದ್ದು, ನಿಯಂತ್ರಣಕ್ಕೆ ಸೂಕ್ತ ಕ್ರಮ ಅಗತ್ಯವಿದೆ. ಡಾ.ಪ್ರಭು ಸಾಹುಕಾರ್‌, ಆಡಳಿತ ವೈದ್ಯಾಧಿಕಾರಿ, ತಾಲೂಕು ಸಾರ್ವಜನಿಕ ಆಸ್ಪತ್ರೆ, ಸೊರಬ

from India & World News in Kannada | VK Polls https://ift.tt/3D06u8v