ರಾಘವೇಂದ್ರ ಮೇಗರವಳ್ಳಿ ತೀರ್ಥಹಳ್ಳಿ () ಶಿವಮೊಗ್ಗ: ಪಶ್ಚಿಮಘಟ್ಟ ಸಾಲಿನ ಪರಿಸರ ಸೂಕ್ಷ್ಮತೆಗೆ ಗಂಭೀರ ಸ್ವರೂಪದ ದಕ್ಕೆ ತರುತ್ತಿರುವ ಅಕ್ರಮ ಗಣಿಗಾರಿಕೆಗೆ ಕಡಿವಾಣ ಇಲ್ಲವಾಗಿದೆ. ಆಡಳಿತವೇ ಅಕ್ರಮ ಗಣಿಗಾರಿಕೆಗೆ ಬೆಂಗಾವಲಿನಂತಿದ್ದು ಪರಿಸರ ಸಂರಕ್ಷಣೆ ಕಾನೂನು ಕಾಲಕಸದಂತಿದೆ. ಪಟ್ಟಣದ ತುಂಗಾನದಿ ತೀರದ ಕುರುವಳ್ಳಿಯಲ್ಲಿ ಹಲವು ವರ್ಷಗಳಿಂದ ನಡೆಯುತ್ತಿರುವ ಕಲ್ಲುಗಣಿಗಾರಿಕೆ ಪರಿಸರ ಸೂಕ್ಷ್ಮ ನಿಯಮಗಳನ್ನು ಸಂಪೂರ್ಣ ಉಲ್ಲಂಘಿಸಿದೆ. ಪ್ರತಿ ವರ್ಷ 700 ಕೋಟಿ ರೂ.ಗೂ ಹೆಚ್ಚು ಮೊತ್ತದ ವಹಿವಾಟಿನ ಗಣಿಗಾರಿಕೆಯ ಈ ಪ್ರದೇಶದಲ್ಲಿ ಪರಿಸರ ಸಂರಕ್ಷಣೆ ಕ್ರಮಗಳು ಇಲ್ಲವಾಗಿದೆ. ಆರಂಭದಿಂದಲೂ ಸರಕಾರದ ಬೊಕ್ಕಸಕ್ಕೆ ಹೆಚ್ಚಿನ ರಾಜಸ್ವ ಆದಾಯ ಸಿಗುತ್ತಿಲ್ಲ. 30 ವರ್ಷ ಕಲ್ಲುಗಣಿ ಗುತ್ತಿಗೆ ನಿರ್ವಹಿಸಿದ ಹರಿಜನ ಗಿರಿಜನ ಕಲ್ಲುಕುಟಿಗರ ಸಹಕಾರ ಸಂಘ ಸುಮಾರು 17 ಕೋಟಿ ರೂ.ಗೂ ಹೆಚ್ಚು ಮೊತ್ತವನ್ನು ಸರಕಾರದ ಬೊಕ್ಕಸಕ್ಕೆ ಅಧಿಕೃತವಾಗಿ ಪಾವತಿಸಬೇಕಿದೆ. ಅಚ್ಚರಿ ಎಂದರೆ, ಕೋಟ್ಯಂತರ ರೂ. ಬಾಕಿ ಇರಿಸಿಕೊಂಡ ಸಹಕಾರ ಸಂಘದ ಹೆಸರಿಗೆ 6 ಎಕರೆ ಗಣಿಗಾರಿಕೆ ಪ್ರದೇಶದ ಕಲ್ಲುಗಣಿ ಗುತ್ತಿಗೆ ಹಕ್ಕನ್ನು ನವೀಕರಿಸಲು ಸರಕಾರದ ಹಂತದಲ್ಲಿ ಈಗ ತೀವ್ರ ಲಾಬಿ ನಡೆಯುತ್ತಿದೆ. ಏತ್ಮನಧ್ಯೆ, ಸಹಕಾರ ಸಂಘದ ವಹಿವಾಟಿನ ಅಕ್ರಮದ ವಿರುದ್ಧ ಭ್ರಷ್ಟಾಚಾರ ನಿಗ್ರಹ ದಳಕ್ಕೆ 2021 ಏಪ್ರಿಲ್‌ 22ರಂದು ದೂರು ದಾಖಲಾಗಿದೆ. ಸರಕಾರದ ಬೊಕ್ಕಸಕ್ಕೆ ಮೋಸ ಮೇಲಿನಕುರುವಳ್ಳಿ ಗ್ರಾಮ ಸ.ನಂ.38, 75, ಬುಕ್ಲಾಪುರ ಗ್ರಾಮ ಸ.ನಂ.64ರಲ್ಲಿ ಕೆಲವರ ಹಿಡಿತದಲ್ಲಿ ನಡೆಯುತ್ತಿದೆ. ಗುತ್ತಿಗೆ ಪ್ರದೇಶದಿಂದ ಸರಕಾರದ ಬೊಕ್ಕಸಕ್ಕೆ 1ಟನ್‌ ಕಲ್ಲು ಮಾರಾಟದಿಂದ ಕೇವಲ 60 ರೂಪಾಯಿ ಮಾತ್ರ ರಾಯಲ್ಟಿ ಸಂದಾಯವಾಗುತ್ತಿದೆ. ಕಲ್ಲು ಸಾಮಗ್ರಿ ರಾಯಲ್ಟಿ ಇಲ್ಲದೆ ಸಾಗಣೆ ಆಗುತ್ತಿದ್ದು ಸರಕಾರಕ್ಕೆ ಭಾರಿ ಮೋಸ ಮಾಡಲಾಗುತ್ತಿದೆ. 2019-20ನೇ ಸಾಲಿನ ವರೆಗಿನ ಕಲ್ಲುಗಣಿ ಗುತ್ತಿಗೆ ಬಾಕಿ, ತೆರಿಗೆ ಶುಲ್ಕಪಾವತಿ, ಗುತ್ತಿಗೆ ನಿಯಮ ಉಲ್ಲಂಘನೆ ಸರಿಪಡಿಸಲು ಕೈಗೊಳ್ಳಬೇಕಾದ ಕ್ರಮ, ಪಾವತಿ ಮೊತ್ತ ಬಾಕಿ ಕುರಿತಾಗಿ ಹರಿಜನ ಗಿರಿಜನ ಕಲ್ಲುಕುಟಿಗರ ಸಹಕಾರ ಸಂಘಕ್ಕೆ ಜಿಲ್ಲಾಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಹಿರಿಯ ಭೂ ವಿಜ್ಞಾನಿ 2020 ಅಗಸ್ಟ್‌ 21ರಂದು ಬೇಡಿಕೆ ಪತ್ರ ರವಾನಿಸಿದ್ದಾರೆ. ಒಟ್ಟು 17,13,24,670 ರೂ. ಬಾಕಿ ಪಾವತಿಗೆ ಪತ್ರದಲ್ಲಿ ಸೂಚಿಸಿದ್ದಾರೆ. ಆದರೆ ಸಂಘ ಸರಕಾರದ ಬೊಕ್ಕಸಕ್ಕೆ ಈವರೆಗೂ ಬಾಕಿ ಪಾವತಿ ಮಾಡಿಲ್ಲ. 2020 ಏಪ್ರಿಲ್‌ 24ರಂದು ಸಂಘದ ಕಲ್ಲುಗಣಿ ಗುತ್ತಿಗೆ ಅವಧಿ ಮುಕ್ತಾಯವಾಗಿದೆ. ಎಸಿಬಿಗೆ ನೀಡಿದ ದೂರಿನ ಹಿನ್ನೆಲೆಯಲ್ಲಿ ಗುತ್ತಿಗೆ ಅವಧಿ ಮುಕ್ತಾಯದ ಕಲ್ಲುಗಣಿ ಪ್ರದೇಶದ ಸುತ್ತ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಈ ಹಿಂದೆ ಕಾಲುವೆ ನಿರ್ಮಿಸಿದೆ. ಈಗ ಕಾಲುವೆ ಮುಚ್ಚಿ ಅಕ್ರಮ ಗಣಿಗಾರಿಕೆ ಮಾಡಲಾಗುತ್ತಿದ್ದು, ನಿಯಮಗಳನ್ನೇ ಲೇವಡಿ ಮಾಡಿದಂತಾಗಿದೆ. ವಾಣಿಜ್ಯ, ವರಮಾನ ತೆರಿಗೆ ಮೋಸ..! ಮೇಲಿನ ಕುರುವಳ್ಳಿ ಕಲ್ಲುಸಾಮಗ್ರಿಗೆ ರಾಜ್ಯಾದ್ಯಂತ ಭಾರಿ ಬೇಡಿಕೆ ಇದ್ದು ವಿಪರೀತ ದರಕ್ಕೆ ಮಾರಲಾಗುತ್ತಿದೆ. 1ಲಾರಿ ಲೋಡ್‌ ಬೋಡ್ರಸ್‌ಗೆ 6ರಿಂದ 8 ಸಾವಿರ ರೂ., 1ಲಾರಿ ಲೋಡ್‌ ಸೈಜ್‌ ಕಲ್ಲಿಗೆ 12ರಿಂದ 15 ಸಾವಿರ, 1 ಚದರ ಅಡಿ ಅಳತೆ ಚಪ್ಪಡಿಗೆ 55 ರೂ. ದುಬಾರಿ ದರ ನಿಗದಿ ಮಾಡಲಾಗಿದೆ. 1 ಲಾರಿ ಲೋಡ್‌ನ 400 ಬೇಲಿ ಕಂಬ ಸ್ಥಳೀಯವಾಗಿ 80 ಸಾವಿರ ರೂ.ಗೆ ಮಾರಾಟವಾಗುತ್ತಿದೆ. ಲಾರಿಯಲ್ಲಿ ಕನಿಷ್ಟ 25 ಟನ್‌ ಮೀರಿ ಕಲ್ಲುಸಾಮಗ್ರಿ ಸಾಗಣೆ ಆಗುತ್ತಿದೆ. ಕಾರ್ಮಿಕರಿಗೆ 1 ಬೇಲಿ ಕಂಬಕ್ಕೆ 30 ರೂ. ನೀಡಲಾಗುತ್ತಿದೆ. ಸಾರ್ವಜನಿಕರು ಮಾತ್ರ ದುಬಾರಿ ದರಕ್ಕೆ ಕಲ್ಲು ಸಾಮಗ್ರಿ ಖರೀದಿಸಬೇಕಾಗಿದೆ. ವಾಣಿಜ್ಯ ಮಾರಾಟ, ವರಮಾನ ತೆರಿಗೆ ಮೋಸ ಮಾಡಲಾಗುತ್ತಿದ್ದರೂ ಸಂಬಂಧಿತ ಇಲಾಖೆಗಳು ಕಲ್ಲುಗಣಿಗಾರಿಕೆ ಪ್ರದೇಶದ ವಹಿವಾಟಿನ ಕುರಿತು ಗಮನಹರಿಸದಿರುವುದು ಸಾರ್ವಜನಿಕರಲ್ಲಿ ಅಚ್ಚರಿ ಮೂಡಿಸಿದೆ. ಮೇಲಿನ ಕುರುವಳ್ಳಿ ಪ್ರದೇಶದಲ್ಲಿನ ಅಕ್ರಮ ಕಲ್ಲುಗಣಿಗಾರಿಕೆ ಕುರಿತು ವರದಿ ಪಡೆದು ಕಾನೂನು ರೀತಿ ಕ್ರಮ ಜರುಗಿಸಲಾಗುತ್ತದೆ. ಅವಧಿ ಮುಕ್ತಾಯದ ಕಲ್ಲುಗಣಿ ಗುತ್ತಿಗೆ ಹಂಚಿಕೆ ಕುರಿತು ನಿಯಮದ ಅನ್ವಯ ಜಿಲ್ಲಾಮಟ್ಟದ ಸಮಿತಿ ತೀರ್ಮಾನಿಸಲಿದೆ. ಪ್ರಕಾಶ್‌, ಉಪವಿಭಾಗಾಧಿಕಾರಿ, ಶಿವಮೊಗ್ಗ
from India & World News in Kannada | VK Polls https://ift.tt/3E7cSwk
