ವಾಷಿಂಗ್ಟನ್: 15 ವರ್ಷದ ವಿದ್ಯಾರ್ಥಿಯೊಬ್ಬ ಶಾಲೆಯಲ್ಲಿ ಮಂಗಳವಾರ ನಡೆಸಿ ಮೂವರನ್ನು ಹತ್ಯೆ ಮಾಡಿದ್ದಾನೆ. ಘಟನೆಯಲ್ಲಿ ಇನ್ನೂ ಎಂಟು ಮಂದಿ ಗಾಯಗೊಂಡಿದ್ದಾರೆ. ಅಮೆರಿಕದ ಮಿಚಿಗನ್‌ನಲ್ಲಿನ ಹೈಸ್ಕೂಲಿನಲ್ಲಿ ಈ ದಾಳಿ ನಡೆದಿದೆ. ಮನಬಂದಂತೆ ಗುಂಡು ಹಾರಿಸಿದ ಬಾಲಕ, ಬಳಿಕ ಪೊಲೀಸರಿಗೆ ಶರಣಾಗಿದ್ದಾನೆ. ಇದು ಅಮೆರಿಕದಲ್ಲಿ ಈ ವರ್ಷ ನಡೆದ ಅತ್ಯಂತ ಮಾರಕ ಶೂಟಿಂಗ್ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಗಾಯಗೊಂಡವರಲ್ಲಿ ಒಬ್ಬ ಶಿಕ್ಷಕ ಸೇರಿದ್ದಾರೆ. ಟೌನ್‌ಶಿಪ್‌ನಲ್ಲಿ ಇರುವ ಆಕ್ಸ್‌ಫರ್ಡ್ ಹೈಸ್ಕೂಲ್‌ನಲ್ಲಿ ಮಧ್ಯಾಹ್ನದ ತರಗತಿಗಳು ಆರಂಭವಾದ ಕೆಲವೇ ಸಮಯದಲ್ಲಿ ಆಕ್ರಮಣ ಎಸಗಿದ್ದಾನೆ ಎಂದು ಓಕ್ಲಾಂಡ್ ಕಂಟ್ರಿ ಶೆರಿಫ್ ಕಚೇರಿ ತಿಳಿಸಿದೆ. ಮೃತಪಟ್ಟವರಲ್ಲಿ 16 ವರ್ಷದ ಬಾಲಕ, 14 ಮತ್ತು 17 ವರ್ಷದ ಬಾಲಕಿಯರು ಸೇರಿದ್ದಾರೆ. ಗಾಯಾಳುಗಳ ಪೈಕಿ ಇಬ್ಬರನ್ನು ಶಸ್ತ್ರಚಿಕಿತ್ಸೆಗೆ ಒಳಪಡಿಸಲಾಗಿದೆ. ಇನ್ನು ಆರು ಮಂದಿಯ ಸ್ಥಿತಿ ಸ್ಥಿರವಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಡೆಟ್ರೋಯ್ಟ್‌ನ ಉತ್ತರ ಭಾಗದಿಂಧ ಸುಮಾರು 30 ಮೈಲು ದೂರದಲ್ಲಿ ಈ ಪಟ್ಟಣವಿದೆ. ದಾಳಿಕೋರ ಶಂಕಿತನನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ. ಆತನ ಬಳಿಯಿಂದ ಸೆಮಿ ಆಟೋಮ್ಯಾಟಿಕ್ ಹ್ಯಾಂಡ್‌ಗನ್ ಅನ್ನು ವಶಪಡಿಸಿಕೊಳ್ಳಲಾಗಿದೆ. ಆಕ್ಸ್‌ಫರ್ಡ್‌ನಲ್ಲಿ ನಡೆದ ಈ ದಾಳಿಗೆ ಯಾವ ಪ್ರಚೋದನೆ ಇದೆ, ಬಾಲಕನ ದಾಳಿಯ ಹಿಂದಿನ ಉದ್ದೇಶ ಏನು ಎನ್ನುವುದು ತಕ್ಷಣಕ್ಕೆ ತಿಳಿದುಬಂದಿಲ್ಲ. ದಾಳಿ ಎಸಗಿದ ವಿದ್ಯಾರ್ಥಿಯನ್ನು ಬಂಧಿಸುವಾಗ ಆತ ಪ್ರತಿರೋಧ ತೋರಿಸಲಿಲ್ಲ. ವಕೀಲರ ನೆರವಿಗಾಗಿ ಆತ ಕೇಳಿದ್ದು, ದಾಳಿಯ ಉದ್ದೇಶದ ಬಗ್ಗೆ ಯಾವುದೇ ಹೇಳಿಕೆ ನೀಡಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮಧ್ಯಾಹ್ನ 12.55ರ ವೇಳೆಗೆ ಪೊಲೀಸರಿಗೆ ದಾಳಿ ಕುರಿತು ಸತತವಾಗಿ ಫೋನ್ ಕರೆಗಳು ಬಂದಿದ್ದವು. ಕೂಡಲೇ ಅವರು ಅಲ್ಲಿಗೆ ತೆರಳಿದಾಗ ವಿದ್ಯಾರ್ಥಿ ಶರಣಾಗಿದ್ದಾನೆ. ಶಾಲೆಯ ಒಳಗೆ ಹೇಗೆ ಬಂದೂಕು ತೆಗೆದುಕೊಂಡು ಹೋಗಲು ಸಾಧ್ಯವಾಯಿತು ಎಂಬ ಪ್ರಶ್ನೆಗೂ ಆತ ಉತ್ತರ ನೀಡಿಲ್ಲ. ವಿದ್ಯಾರ್ಥಿ ಐದು ನಿಮಿಷದಲ್ಲಿ 15-20 ಗುಂಡುಗಳನ್ನು ಹಾರಿಸಿದ್ದಾನೆ. ಪೊಲೀಸ್ ತುರ್ತು ಸಹಾಯವಾಣಿ 911ಕ್ಕೆ ಕರೆ ಬಂದ ಐದು ನಿಮಿಷದ ಒಳಗೇ ಆತನನ್ನು ವಶಕ್ಕೆ ಪಡೆದುಕೊಂಡಿದ್ದೇವೆ. ಇದು ನಿಜಕ್ಕೂ ಬಹಳ ದುರಂತ ಘಟನೆ. ಇದರಲ್ಲಿ ಮೂವರು ಅಪ್ರಾಪ್ತ ವಯಸ್ಸಿನವರು ಮೃತಪಟ್ಟಿದ್ದಾರೆ. ಇವರೆಲ್ಲರೂ ಇದೇ ಶಾಲೆಯ ವಿದ್ಯಾರ್ಥಿಗಳು ಎಂದು ಭಾವಿಸಿದ್ದೇವೆ ಎಂದು ಅಧಿಕಾರಿ ಮೈಖಲ್ ಮೆಕ್‌ಕೇಬ್ ತಿಳಿಸಿದ್ದಾರೆ. ಶಾಲೆಯಲ್ಲಿ ಸುಮಾರು 1800 ವಿದ್ಯಾರ್ಥಿಗಳಿದ್ದಾರೆ. ಶಂಕಿತ ವಿದ್ಯಾರ್ಥಿ ಯಾವುದೇ ಹೇಳಿಕೆ ನೀಡದ ಕಾರಣ, ಆತನ ಬಗ್ಗೆ ಮಾಹಿತಿ ಇರುವವರಿಂದ ವಿವರ ಕಲೆ ಹಾಕಲು ಬಯಸಿರುವುದಾಗಿ ಹೇಳಿದ್ದಾರೆ. ಇದು ಶಾಲೆಯೊಂದರಲ್ಲಿ ಈ ವರ್ಷ ನಡೆದ ಅತ್ಯಂತ ಭೀಕರ ಗುಂಡಿನ ದಾಳಿ ಎನ್ನಲಾಗಿದೆ. ಇಲ್ಲಿ ವಿದ್ಯಾರ್ಥಿಗಳು ಬಂದೂಕು ತಂದು ಗುಂಡು ಹಾರಿಸುವ ಘಟನೆಗಳು ಪ್ರತಿ ವರ್ಷ ದಾಖಲಾಗುತ್ತಿರುತ್ತದೆ. ಮಂಗಳವಾರದ ಘಟನೆಗೂ ಮುನ್ನ 2021ರಲ್ಲಿ ಅಮೆರಿಕದಾದ್ಯಂತ 138 ಶೂಟಿಂಗ್ ಪ್ರಕರಣಗಳು ವರದಿಯಾಗಿವೆ. ಇಷ್ಟು ಘಟನೆಗಳಲ್ಲಿ ಈವರೆಗೂ 26 ಮಂದಿ ಜೀವ ಕಳೆದುಕೊಂಡಿದ್ದಾರೆ. 2007ರ ಏಪ್ರಿಲ್‌ನಲ್ಲಿ ವರ್ಜೀನಿಯಾದ ಬ್ಲ್ಯಾಕ್ಸ್‌ಬರ್ಗ್‌ನಲ್ಲಿ ಇರುವ ವರ್ಜೀನಿಯಾ ಟೆಕ್‌ನಲ್ಲಿ ಭಯಾನಕ ದಾಳಿಯಲ್ಲಿ 33 ಮಂದಿ ಮೃತಪಟ್ಟಿದ್ದರು. 2012ರ ಡಿಸೆಂಬರ್‌ನಲ್ಲಿ ಕನೆಕ್ಟಿಕಟ್‌ನ ನ್ಯೂಟೌನ್‌ನಲ್ಲಿರುವ ಸ್ಯಾಂಡಿ ಹೂಕ್ ಎಲಿಮೆಂಟರಿ ಶಾಲೆಯಲ್ಲಿ ನಡೆದ ದಾಳಿಯಲ್ಲಿ 28 ಜನರು ಹತ್ಯೆಯಾಗಿದ್ದರು. ಇದರಲ್ಲಿ 20 ಮಕ್ಕಳು ಮತ್ತು ಶೂಟರ್ ಕೂಡ ಸೇರಿದ್ದ.
from India & World News in Kannada | VK Polls https://ift.tt/3oaO6pk
