ಶ್ರೀಕಾಂತ್‌ ಹುಣಸವಾಡಿ ಬೆಂಗಳೂರು: ಬೆಂಗಳೂರಿನಲ್ಲಿನ ಆಸ್ತಿ ಅಧಿಕೃತ ಅಥವಾ ಅನಧಿಕೃತ ಯಾವುದೇ ಆಗಿದ್ದರೂ ಪ್ರಾಪರ್ಟಿ ಐಡೆಂಟಿಫಿಕೇಷನ್‌ ನಂಬರ್‌ (ಪಿಐಡಿ) ಕಡ್ಡಾಯವಾಗಿ ನೀಡಲೇಬೇಕು ಎಂದು ಹೈಕೋರ್ಟ್ ಆದೇಶ ನೀಡಿದೆ. 2020ರ ಬೃಹತ್‌ ಬೆಂಗಳೂರು ಮಹಾನಗರ ಆಸ್ತಿ ತೆರಿಗೆ (ತಿದ್ದುಪಡಿ) ನಿಯಮ 11(2) ಅನ್ವಯ ಎಲ್ಲಆಸ್ತಿಗಳಿಗೆ ಪಿಐಡಿ ಸಂಖ್ಯೆ ನೀಡಲೇಬೇಕು ಎಂದು ಪಾಲಿಕೆಗೆ ನಿರ್ದೇಶನ ನೀಡಿದೆ. ಬೆಂಗಳೂರಿನ ಜೆ.ಪಿ.ನಗರ 7ನೇ ಹಂತದ ಶ್ರೇಯಸ್‌ ಕಾಲೊನಿಯ ಮಧುಸೂದನ ಭದ್ರಿ ಮತ್ತು ಜಗದೀಶ್‌ ನಗರದ ಡಯಾನಾ ಲೋಬೊ ಸಲ್ಲಿಸಿದ್ದ ಎರಡು ಪ್ರತ್ಯೇಕ ಪ್ರಕರಣಗಳಲ್ಲಿ ನ್ಯಾ. ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯಪೀಠ ಈ ಗಮನಾರ್ಹ ತೀರ್ಪು ನೀಡಿದೆ. ಹಾಗಾಗಿ ಇನ್ನು ಮುಂದೆ ಪಾಲಿಕೆ ಕೇವಲ ಅಧಿಕೃತ ಆಸ್ತಿಗಳಿಗೆ ಮಾತ್ರ ಪಿಐಡಿ ನೀಡುತ್ತೇವೆ, ಅನಧಿಕೃತ ಆಸ್ತಿಗಳಿಗೆ ಪಿಐಡಿ ನೀಡುವುದಿಲ್ಲ ಎಂದು ಹೇಳುವಂತೆಯೇ ಇಲ್ಲ. ನಿಯಮದಂತೆ ಪ್ರತಿ ಆಸ್ತಿಗೂ ಪಿಐಡಿ ಸಂಖ್ಯೆಯನ್ನು ನೀಡಲೇಬೇಕು. ವಾದ-ಪ್ರತಿವಾದ ಆಲಿಸಿದ ಬಳಿಕ ನ್ಯಾಯಪೀಠ ''2020ರ ಬಿಬಿಎಂಪಿ ಆಸ್ತಿ ತೆರಿಗೆ ತಿದ್ದುಪಡಿ ನಿಯಮ 2020ರ ಸೆ.1ರಿಂದ ಜಾರಿಗೆ ಬಂದಿದೆ. ಅದರಂತೆ ಪಾಲಿಕೆಗೆ ಅಧಿಕೃತ ಆಸ್ತಿಗಳ ತೆರಿಗೆ ವಿವರಗಳನ್ನು ನಮೂನೆಯಲ್ಲಿ ಮತ್ತು ಅನಧಿಕೃತ ಆಸ್ತಿಗಳ ತೆರಿಗೆ ವಿವರಗಳನ್ನು ನಮೂನೆ-ಬಿ ಯಲ್ಲಿ ಎಂಟ್ರಿ ಮಾಡಬೇಕು. ಮತ್ತು ನಿಯಮದಂತೆ ಆಸ್ತಿ ಸಂಖ್ಯೆ ನೀಡುವುದು ಅತ್ಯವಶ್ಯಕ'' ಎಂದು ಹೈಕೋರ್ಟ್ ಸಾರಿದೆ. ಅರ್ಜಿದಾರರ ಆಸ್ತಿಗಳು ನಮೂನೆ-ಎ ಅಥವಾ ನಮೂನೆ-ಬಿ ಯಾವುದರಡಿ ಬರುತ್ತದೆಂದು ಮರು ಪರಿಶೀಲಿಸಿ ನಿರ್ಧಾರ ಕೈಗೊಳ್ಳಬೇಕು ಎಂದು ಬಿಬಿಎಂಪಿಗೆ ಆದೇಶ ನೀಡಿದೆ. 'ಸಕ್ಷಮ ಪ್ರಾಧಿಕಾರದಿಂದ ಅನುಮೋದನೆ ಪಡೆದ ಬಳಿಕವೇ ಕೆಲವು ಕಟ್ಟಡಗಳನ್ನು ಮಾಸ್ಟರ್‌ಪ್ಲಾನ್‌, ವಲಯ ನಿಯಮಾವಳಿ ಮತ್ತು ಬಿಲ್ಡಿಂಗ್‌ ಬೈಲಾಗೆ ವಿರುದ್ಧವಾಗಿ ನಿರ್ಮಿಸಲಾಗಿದೆ. ಅನುಮೋದಿಸದ ಮತ್ತು ನಿಯಮ ಉಲ್ಲಂಘಿಸಿದ ಕಟ್ಟಡಗಳು ಸಕ್ಷಮ ಪ್ರಾಧಿಕಾರದಿಂದ ಯಾವುದೇ ಒಪ್ಪಿಗೆ ಪಡೆದಿರುವುದಿಲ್ಲ. ಆದರೆ ಅವುಗಳು ಮಾಸ್ಟರ್‌ ಪ್ಲಾನ್‌, ಝೋನಲ್‌ ನಿಯಮ ಮತ್ತು ಬಿಲ್ಡಿಂಗ್‌ ಬೈಲಾ ಪ್ರಕಾರವೇ ನಿರ್ಮಾಣಗೊಂಡಿರುತ್ತದೆ. ಹಾಗಾಗಿ ಆಸ್ತಿ ಅಥವಾ ಮನೆ ಅಧಿಕೃತವೂ ಅನಧಿಕೃತವೋ ಪಿಐಡಿ ಸಂಖ್ಯೆಯನ್ನು ಪಾಲಿಕೆ ಕಡ್ಡಾಯವಾಗಿ ನೀಡಲೇಬೇಕು 'ಎಂದು ನ್ಯಾಯಪೀಠ ಆದೇಶ ನೀಡಿದೆ. ಅರ್ಜಿದಾರರ ವಾದವೇನು? ಅರ್ಜಿದಾರರ ಪರ ವಾದ ಮಂಡಿಸಿದ್ದ ನ್ಯಾಯವಾದಿ ಎಂ.ಎಸ್‌. ಭಾಗ್ವತ್‌ ''ನಮೂನೆ-ಬಿಯಲ್ಲಿ ಅರ್ಜಿದಾರರ ಆಸ್ತಿ ಎಂಟ್ರಿ ಮಾಡಿರುವುದೇ ಕರ್ನಾಟಕ ಮುನಿಸಿಪಾಲಿಟಿ ಕಾಯಿದೆ 1976ರ ಸೆಕ್ಷನ್‌ 108(ಎ)ಗೆ ವಿರುದ್ಧವಾಗಿದೆ. ಬಿಬಿಎಂಪಿ ಈ ಹಿಂದೆ ನಮೂನೆ-ಎ ಮತ್ತು ಬಿಯಲ್ಲಿ ಮಾಡಿದ್ದ ಎಂಟ್ರಿ ರದ್ದುಗೊಳಿಸಿ ಆದೇಶ ನೀಡಿದೆ. ಪಾಲಿಕೆ ಕ್ರಮ ನಿಯಮಬಾಹಿರ, ''ಎಂದು ವಿವರಿಸಿದ್ದರು. ಬಿಬಿಎಂಪಿ ವಾದವೇನು? ಪ್ರಕರಣದಲ್ಲಿ ಬಿಬಿಎಂಪಿ ಪರ ವಾದ ಮಂಡಿಸಿದ್ದ ನ್ಯಾಯವಾದಿಗಳಾದ ವಿ. ಶ್ರೀನಿಧಿ ಮತ್ತು ಎಸ್‌.ಎನ್‌.ಪ್ರಶಾಂತ್‌ ಚಂದ್ರ ''2014ರಲ್ಲಿ ಹಾಲಿ ಇರುವ ನಿಯಮಗಳ ಪ್ರಕಾರ ಪಾಲಿಕೆ ಆಸ್ತಿ ತೆರಿಗೆ ವಿವರಗಳನ್ನು ನಮೂನೆ-ಎ ಮತ್ತು ನಮೂನೆ-ಬಿ ಎಂದು ವರ್ಗೀಕರಿಸುವಂತಿಲ್ಲ ಎಂದು ಹೈಕೋರ್ಟ್ ಆದೇಶ ನೀಡಿತ್ತು. ಜೊತೆಗೆ ಬಿಬಿಎಂಪಿಗೆ ಕಾನೂನು ತಿದ್ದುಪಡಿಗೆ ಅವಕಾಶ ನೀಡಿತ್ತು,'' ಎಂದಿದ್ದರು. ಹೈಕೋರ್ಟ್ ಆದೇಶದಂತೆ 2020ರಲ್ಲಿ ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ ಆಸ್ತಿ ತೆರಿಗೆ (ತಿದ್ದುಪಡಿ) ನಿಯಮಗಳನ್ನು ರೂಪಿಸಿ, ಅವುಗಳನ್ನು 2020ರ ಸೆ.1ರಿಂದ ಜಾರಿಗೊಳಿಸಲಾಗಿದೆ. ಅದರಂತೆ ಆಸ್ತಿ ತೆರಿಗೆ ವಿವರಗಳನ್ನು ಅರ್ಜಿ ನಮೂನೆ-ಎ ಮತ್ತು ನಮೂನೆ-ಬಿ ಎಂದು ವರ್ಗೀಕರಿಸಲು ಪಾಲಿಕೆಗೆ ಅಧಿಕಾರವಿದೆ,'' ಎಂದು ಹೇಳಿದ್ದರು.
from India & World News in Kannada | VK Polls https://ift.tt/316atUc
