ಕೆ.ಎಚ್‌.ರುದ್ರಯ್ಯ, ಚಿಕ್ಕಮಗಳೂರು: ಪಡಿತರದ ಜತೆ ನೀಡುತ್ತಿದ್ದ ಸೀಮೆಎಣ್ಣೆಗೂ ತತ್ವಾರ ಉಂಟಾಗಿದ್ದು ಬಡವರ ಮನೆಯಲ್ಲಿ ರಾತ್ರಿ ಕಗ್ಗತ್ತಲು ಆವರಿಸಿದೆ. ಕಳೆದ ಎರಡು ತಿಂಗಳಿಂದ ಜಿಲ್ಲೆಯಲ್ಲಿ ವಿತರಣೆ ಸ್ಥಗಿತಗೊಳಿಸಿರುವುದರಿಂದ ಬಡವರ ಬುಡ್ಡಿದೀಪಕ್ಕೂ ಸಂಚಕಾರ ಬಂದೊದಗಿದೆ. ಹೌದು, ಜಿಲ್ಲೆಯ ಕಡೂರು, ಅಜ್ಜಂಪುರ ಮತ್ತು ತರೀಕೆರೆ ತಾಲೂಕುಗಳು ಹೊಗೆ ಮುಕ್ತ ತಾಲೂಕು ಆಗಿವೆ. ಅಲ್ಲಿನ ನ್ಯಾಯ ಬೆಲೆ ಅಂಗಡಿಗಳಿಗೆ ಸೀಮೆಎಣ್ಣೆ ನಿಲ್ಲಿಸಿ ವರ್ಷವೆ ಕಳೆದಿದೆ. ಉಳಿದ ಮಲೆನಾಡು ಭಾಗದ 4 ತಾಲೂಕುಗಳಿಗೆ ಕಳೆದ 2 ತಿಂಗಳಿಂದ ಸೀಮೆಎಣ್ಣೆ ಪೂರೈಕೆ ಆಗಿಲ್ಲ. ಇನ್ನು ಚಿಕ್ಕಮಗಳೂರು ತಾಲೂಕು ಒಂದಕ್ಕೆ ಸರಕಾರದ ಆದೇಶದ ಅನ್ವಯ ಸೀಮೆಎಣ್ಣೆ ನಿಲ್ಲಿಸಲಾಗಿದ್ದು ಕಾರಣ ತಿಳಿದಿಲ್ಲ. ಇದರಿಂದ ಕಟ್ಟಿಗೆ ಒಲೆ ನಂಬಿಕೊಂಡು ಅಡುಗೆ ಬೇಯಿಸುವ ಬಡವರು ಒಲೆ ಹಚ್ಚಲು ಸೀಮೆಎಣ್ಣೆ ಇಲ್ಲದೆ ದುಬಾರಿ ಡಿಸೇಲ್‌ಗೆ ಮೊರೆ ಹೋಗಿದ್ದಾರೆ. ಜಿಲ್ಲೆಯಲ್ಲಿ ಸುಮಾರು 524 ನ್ಯಾಯ ಬೆಲೆ ಅಂಗಡಿಗಳಿದ್ದು ಪಡಿತರದಾರರು ಪ್ರತಿ ತಿಂಗಳು ನ್ಯಾಯಬೆಲೆ ಅಂಗಡಿಗೆ ಕ್ಯಾನ್‌ ಕೊಂಡೊಯ್ಯುವುದು ಬರಿಗೈಲಿ ಬರುವುದೆ ಆಗಿದೆ. ಸೀಮೆಎಣ್ಣೆ ಏಕಿಲ್ಲ ಎಂದು ಸಿಬ್ಬಂದಿಗೆ ಕೇಳಿದರೆ ಅವರ ಬಳಿ ಉತ್ತರವಿಲ್ಲ. ಇದರಿಂದ ಎಷ್ಟೋ ನ್ಯಾಯಬೆಲೆ ಅಂಗಡಿಗಳಲ್ಲಿ ಗ್ರಾಹಕರು ಮತ್ತು ಸಿಬ್ಬಂದಿ ನಡುವೆ ಘರ್ಷಣೆ ಉಂಟಾಗಿದೆ. ಉಜ್ವಲದಲ್ಲಿ ಗ್ಯಾಸ್‌ ಪಡೆದಿರುವ ಪಡಿತರದಾರರಿಗೆ ಒಂದು ಲೀಟರ್‌ ಸೀಮೆಎಣ್ಣೆ ನೀಡಲಾಗುತ್ತಿತ್ತು. ಈಗ ಅದಕ್ಕೂ ಕಲ್ಲುಬಿದ್ದಿದ್ದು ಬಡವರ ದೈನಂದಿನ ಜೀವನ ನಿರ್ವಹಣೆ ಏರುಪೇರಾಗಿದೆ. ಈ ಬಗ್ಗೆ ಕೂಡಲೆ ಗಮನಹರಿಸಿ ಹಣ ಬಿಡುಗಡೆ ಮಾಡಬೇಕು ಎಂಬುದು ಪಡಿತರದಾರರ ಆಗ್ರಹ ಆಗಿದೆ. ಬುಡ್ಡಿದೀಪಕ್ಕೂ ಎಣ್ಣೆ ಇಲ್ಲಮಲೆನಾಡು ಭಾಗದಲ್ಲಿ ಮಳೆಗಾಲದಲ್ಲಿ ವಿದ್ಯುತ್‌ ನಿಲುಗಡೆ ಸಮಸ್ಯೆ ನಿರಂತರವಾಗಿದ್ದು ಓದು, ಬರಹಕ್ಕೆ ಬುಡ್ಡಿ ದೀಪ ಅಶ್ರಯಿಸಿಕೊಂಡಿದ್ದ ವಿದ್ಯಾರ್ಥಿಗಳು ಓದಿಗೆ ಫುಲ್‌ಸ್ಟಾಪ್‌ ನೀಡಿ ಕತ್ತಲೆಯಲ್ಲಿ ಮುದುಡಿ ಕೂತಿದ್ದಾರೆ. ಏಕೆ ನಿಂತಿದೆ ಸೀಮೆಣ್ಣೆ? ಜಿಲ್ಲೆಯ ನ್ಯಾಯ ಬೆಲೆ ಅಂಗಡಿಗೆ ಸೀಮೆಎಣ್ಣೆ ಬಾರದೆ ಎರಡು ತಿಂಗಳಾಗಿದೆ. ಕಾರಣ ಜಿಲ್ಲೆಗೆ ಸೀಮೆಎಣ್ಣೆ ವಿತರಿಸುವ ಗುತ್ತಿಗೆದಾರನಿಗೆ ನೀಡಬೇಕಿದ್ದ ಸುಮಾರು 23 ಲಕ್ಷ ರೂ. ಹಣ ಸರಕಾರದಿಂದ ಇನ್ನೂ ಬಿಡುಗಡೆ ಆಗಿಲ್ಲ. ಹೀಗಾಗಿ ಮಂಗಳೂರು ಮೂಲದ ಸೈಂಟ್‌ ಜೊಸೆಫ್‌ ಎಂಬ ಗುತ್ತಿಗೆದಾರ ಸೀಮೆಎಣ್ಣೆ ಎತ್ತುವಳಿ ಮಾಡಲು ಹಿಂದೇಟು ಹಾಕುತ್ತಿದ್ದಾರೆ. ನ್ಯಾಯಬೆಲೆ ಅಂಗಡಿದಾರರು ಲೀಟರ್‌ ಒಂದಕ್ಕೆ 35 ರೂ.ನಂತೆ ಸೀಮೆಎಣ್ಣೆ ಪಡೆದುಕೊಳ್ಳಬೇಕು. ಪಡೆದ ಸೀಮೆಎಣ್ಣೆಯ ಬಾಬ್ತು ಈಗಾಗಲೇ ಸರಕಾರದ ಖಜಾನೆಗೆ ಕೆ-2ನಲ್ಲಿ ಸಂದಾಯ ಆಗಿದೆ. ಆದರೆ, ಸರಕಾರ ಮಾತ್ರ ಈವರೆಗೂ ಗುತ್ತಿಗೆದಾರನಿಗೆ ಬರಬೇಕಿರುವ ಹಣ ಬಿಡುಗಡೆ ಮಾಡದೆ ಮೀನಮೇಷ ಎಣಿಸುತ್ತಿದೆ. ಕ್ರಮೇಣ ಸೀಮೆಎಣ್ಣೆಯನ್ನೇ ಸ್ಥಗಿತಗೊಳಿಸುವ ಹುನ್ನಾರ ಸರಕಾರ ನಡೆಸುತ್ತಿದೆ ಎಂದು ಪಡಿತರದಾರರು ದೂರಿದ್ದಾರೆ. ಯಾವುದೆ ಕಾರಣಕ್ಕೂ ಸೀಮೆಎಣ್ಣೆ ಪೂರೈಕೆ ಸ್ಥಗಿತಗೊಳ್ಳುವುದಿಲ್ಲ. ತಾಂತ್ರಿಕ ಸಮಸ್ಯೆಯಿಂದ ಸರಕಾರದಿಂದ ಹಣ ಬಿಡುಗಡೆ ವಿಳಂಬವಾಗಿರಬಹುದು. ಬಿಡುಗಡೆ ಆದಲ್ಲಿ ಶೀಘ್ರ ಸೀಮೆಎಣ್ಣೆ ಎತ್ತುವಳಿ ಮಾಡಲಾಗುವುದು. ಈ ಬಗ್ಗೆ ಜಿಲ್ಲೆಯ ಜನಪ್ರತಿನಿಧಿಗಳು, ಸರಕಾರದ ಇಲಾಖೆ ಕಾರ್ಯದರ್ಶಿ ಮತ್ತು ಆಯುಕ್ತರಿಗೆ ಪತ್ರ ಬರೆದಿದ್ದೇವೆ. ಜಿಲ್ಲಾಧಿಕಾರಿಗಳು ಕೂಡ ಪತ್ರ ಬರೆದು ಗಮನಸೆಳೆದಿದ್ದಾರೆ. ಕೃಷ್ಣಮೂರ್ತಿ, ಆಹಾರ ಇಲಾಖೆ ಉಪನಿರ್ದೇಶಕರು ಕಳೆದ ಎರಡು ತಿಂಗಳಿಂದ ಸೀಮೆಣ್ಣೆ ಇಲ್ಲದೆ ಒಲೆ ಹಚ್ಚಲು ಕರ್ಪೂರ ಬಳಸುತ್ತಿದ್ದೇನೆ. ಒಂದೆರೆಡು ಕರ್ಪೂರ ಹಾಕಿ ಪ್ರಯಾಸದಿಂದ ಬೆಂಕಿ ಹಚ್ಚಿ ಅಡುಗೆ ಮಾಡಬೇಕಿದೆ. ಜತೆಗೆ ಕರೆಂಟ್‌ ಇರುವುದೆ ಇಲ್ಲ. ಈ ಸಂದರ್ಭ ಕಗ್ಗತ್ತೆಯಲ್ಲೇ ಮಕ್ಕಳು ಕಾಲಕಳೆಯಬೇಕಿದೆ. ಗಂಗಮ್ಮ, ಹರವಿನಗಂಡಿ
from India & World News in Kannada | VK Polls https://ift.tt/3xpsita
