ಆರಗ ರವಿ ಚಿಕ್ಕಮಗಳೂರು: ಕೋವಿಡ್‌ ಲಸಿಕೆ ಹಾಕಿಸಿಕೊಳ್ಳಲು ರಾಜ್ಯದ ಜನತೆ ಹಿಂದೇಟು ಹಾಕುತ್ತಿರುವುದರ ನಡುವೆಯೇ ಶೇ.70ಕ್ಕೂ ಹೆಚ್ಚು ಜನ ಮಾಸ್ಕ್‌ಗೂ ಗೇಟ್‌ಪಾಸ್‌ ಕೊಟ್ಟಿದ್ದಾರೆ. ಕೋವಿಡ್‌ ನಿಯಮಗಳ ಪಾಲನೆಯೂ ಕಣ್ಮರೆಯಾಗಿದೆ. ಕೊರೊನಾ ಪ್ರಕರಣಗಳು ಇಳಿಮುಖವಾದ ಬೆನ್ನಲ್ಲೇ ಓಮಿಕ್ರಾನ್‌ ಆತಂಕ ಶುರುವಾಗಿದೆ. ಆದರೆ, ಕಳೆದ 2-3 ತಿಂಗಳಿಂದಲೂ ಕೋವಿಡ್‌ ನಿಯಮಗಳ ಪಾಲನೆಯಿಂದ ಜನ ದೂರ ಸರಿದಿದ್ದು, ಕೋವಿಡ್‌ ಪೂರ್ವದ ಸಹಜ ಜೀವನಕ್ಕೆ ಮರಳಿದ್ದಾರೆ. ರಾಜ್ಯದಲ್ಲಿ ಶಾಲಾ ಕಾಲೇಜುಗಳು ಆರಂಭವಾಗಿದ್ದು, ಸಭೆ, ಸಮಾರಂಭಗಳು, ವಿವಾಹಗಳು, ರಾಜಕೀಯ ಸಮಾವೇಶಗಳು, ಪ್ರತಿಭಟನೆಗಳು, ಸಾಂಸ್ಕೃತಿಕ ಕಾರ‍್ಯಕ್ರಮಗಳು ಹೆಚ್ಚಿನ ಪ್ರಮಾಣದಲ್ಲಿ ನಡೆಯುತ್ತಿವೆ. ಅದರಲ್ಲೂ ಕೋವಿಡ್‌ ಕಾಲದಲ್ಲಿ ಸರಳತೆಗೆ ಜಾರಿದ್ದ ಮದುವೆಗಳು ಈಗ ಕಲ್ಯಾಣ ಮಂಟಪಗಳಲ್ಲಿ ಅದ್ಧೂರಿಯಾಗಿಯೇ ನಡೆಯುತ್ತಿವೆ. ಮಾಸ್ಕ್‌ಗೆ ಗೇಟ್‌ಪಾಸ್‌ ಕೋವಿಡ್‌ ಹರಡಿದ ಆರಂಭಿಕ ದಿನಗಳಲ್ಲಿ ಮಾಸ್ಕ್‌ಗಳ ಕೊರತೆ ತೀವ್ರವಾಗಿತ್ತು. ಆದರೆ, ಕೆಲವೇ ದಿನಗಳಲ್ಲಿ ಅಪಾರ ಪ್ರಮಾಣದ ಮಾಸ್ಕ್‌ಗಳು ಮಾರುಕಟ್ಟೆಗೆ ಬಂದಿದ್ದು, ಸಂಘ ಸಂಸ್ಥೆಗಳು ಉಚಿತವಾಗಿಯೂ ವಿತರಿಸಿದ್ದವು. ಗ್ರಾಮೀಣ ಪ್ರದೇಶವೂ ಸೇರಿದಂತೆ ಶೇ.99ರಷ್ಟು ಜನ ಮಾಸ್ಕ್‌ ಧರಿಸುತ್ತಿದ್ದರು. ಕೊರೊನಾ ಪ್ರಕರಣ ಇಳಿಮುಖವಾಗಿ ಸರಕಾರ ನಿರ್ಬಂಧಗಳನ್ನು ಹಂತ ಹಂತವಾಗಿ ಸಡಿಲಿಸುತ್ತ ಬಂದಂತೆ ಜನ ಮಾಸ್ಕ್‌ ಧರಿಸುವುದನ್ನೇ ಬಿಟ್ಟಿದ್ದಾರೆ. ಅಂಗಡಿ ಮುಂಗಟ್ಟುಗಳು, ಹೋಟೆಲ್‌ಗಳು, ಕಲ್ಯಾಣ ಮಂಟಪಗಳು, ಮಾಲ್‌ಗಳು, ಚಿತ್ರಮಂದಿರಗಳು, ಸಾಂಸ್ಕೃತಿಕ ಭವನಗಳು, ಮಾರ್ಕೆಟ್‌ ಸೇರಿದಂತೆ ಎಲ್ಲಿಯೂ ಹೆಚ್ಚಿನ ಜನ ಮಾಸ್ಕ್‌ಗಳನ್ನು ಧರಿಸುತ್ತಿಲ್ಲ. ಅಂತರವೂ ಇಲ್ಲ! ಯಾವುದೇ ಪ್ರದೇಶದಲ್ಲಿ ಎಷ್ಟೇ ಜನ ಸೇರಿದರೂ ಭೌತಿಕ ಅಂತರ ಕಾಪಾಡುತ್ತಿಲ್ಲ. ಕೋವಿಡ್‌ ಹರಡುವ ಮುನ್ನ ಸೇರುತ್ತಿದ್ದಂತೆಯೇ ನೂರಾರು ಜನ ಗುಂಪು ಸೇರುತ್ತಿದ್ದಾರೆ. ಹಬ್ಬ ಹರಿದಿನ, ಜಾತ್ರಾ ಮಹೋತ್ಸವಗಳು ಕೂಡ ಕೋವಿಡ್‌ ನಿಯಮಗಳನ್ನು ಪಾಲಿಸದೆ ಸರಾಗವಾಗಿ ನಡೆಯುತ್ತಿವೆ. ಅಪರೂಪಕ್ಕೆಂಬಂತೆ ಕೆಲವರು ಮಾತ್ರ ಸ್ಯಾನಿಟೈಸರ್‌ ಬಳಸುತ್ತಿದ್ದು, ಕೋವಿಡ್‌ ನಿಯಮಗಳ ಪಾಲನೆಗೆ ಬಹುತೇಕ ಜನ ಗುಡ್‌ಬೈ ಹೇಳಿದ್ದಾರೆ. ಶಾಲೆಗಳಲ್ಲಿ ಕೂಡ ವಿದ್ಯಾರ್ಥಿಗಳನ್ನು ನಿಯಂತ್ರಿಸಿ ಕೋವಿಡ್‌ ನಿಯಮಗಳನ್ನು ಪಾಲಿಸಿ ಪಾಠ, ಪ್ರವಚನ ಮಾಡುವುದು ಶಿಕ್ಷಕರಿಗೆ ಕಷ್ಟ ಸಾಧ್ಯವಾಗಿದೆ. ಕೋವಿಡ್‌ ಬಗ್ಗೆ ಈ ಹಿಂದೆ ಜನರಿಗಿದ್ದ ಭಯ, ಆತಂಕ ದೂರವಾಗಿದ್ದು, ಅದರೊಂದಿಗೆ ಹೊಂದಿಕೊಂಡು ಬದುಕುವಷ್ಟು ಆತ್ಮಸ್ಥೈರ‍್ಯ ಬೆಳೆದಿದೆ. ಆದರೆ, ಕೊರೊನಾ ಪ್ರಕರಣ ಕಡಿಮೆಯಾದರೂ ಓಮಿಕ್ರಾನ್‌ ಸೇರಿದಂತೆ ನಾನಾ ಬಗೆಯಲ್ಲಿ ಮತ್ತೆ ಮತ್ತೆ ದಾಳಿ ಮಾಡುತ್ತಿರುವ ವೈರಸ್‌ಗಳಿಂದ ರಕ್ಷಣೆ ಮಾಡಿಕೊಳ್ಳಲು ಜನ ಕೋವಿಡ್‌ ನಿಯಮಗಳನ್ನು ಪಾಲಿಸುವ ಅನಿವಾರ‍್ಯತೆ ಇದೆ ಎನ್ನುತ್ತಾರೆ ಆರೋಗ್ಯ ಇಲಾಖೆ ಹಿರಿಯ ಅಧಿಕಾರಿಗಳು. ನಿಯಮ ಪಾಲಿಸಿ ಕೊರೊನಾ ವೈರಸ್‌ಗಿಂತಲೂ ಓಮಿಕ್ರಾನ್‌ ವೇಗವಾಗಿ ಹರಡುತ್ತದೆ ಎಂದು ಹೇಳಲಾಗುತ್ತಿದೆ. ಕೊರೊನಾ ಇಳಿಮುಖವಾದ ಕಾರಣ ಜನಜೀವನ ಸಹಜ ಸ್ಥಿತಿಗೆ ಮರಳುತ್ತಿದೆ. ಆದರೆ, ಕೋವಿಡ್‌ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದು ಅಗತ್ಯ. ಇದರಿಂದ ಮಾತ್ರ ಕೊರೊನಾ, ಓಮಿಕ್ರಾನ್‌ ಸೇರಿದಂತೆ ವೈರಸ್‌ಗಳಿಂದ ರಕ್ಷಣೆ ಪಡೆದುಕೊಳ್ಳಲು ಸಾಧ್ಯ. ಹೆಸರು ಹೇಳಲು ಇಚ್ಛಿಸದ ವೈದ್ಯಾಧಿಕಾರಿ ಮಾಸ್ಕ್‌ಗಳೇ ಮಾಯ ಕೋವಿಡ್‌ ನಿಯಮಗಳ ಪಾಲನೆಯಿಂದ ಜನ ಬಹುತೇಕ ವಿಮುಖರಾಗಿದ್ದಾರೆ. ಶೇ.80ರಷ್ಟು ಜನ ಮಾಸ್ಕ್‌ ಧರಿಸುತ್ತಿಲ್ಲ. ಸಾಮಾಜಿಕ ಅಂತರವನ್ನೂ ಕಾಪಾಡುತ್ತಿಲ್ಲ. ಕೋವಿಡ್‌ ಮತ್ತೆ ಯಾವತ್ತು ಬೇಕಿದ್ದರೂ ದಾಳಿ ಮಾಡಬಹುದು. ಓಮಿಕ್ರಾನ್‌ ಸೇರಿದಂತೆ ಹಲವು ವೈರಸ್‌ಗಳ ಕಾಟ ಶುರುವಾಗಿದೆ. ಕೋವಿಡ್‌ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿದರೆ ಲಾಕ್‌ಡೌನ್‌ ಅಪಾಯದಿಂದ ತಪ್ಪಿಸಿಕೊಳ್ಳಬಹುದು ಎನಿಸುತ್ತದೆ. ಇಂದ್ರೇಶ್‌, ಚಿಕ್ಕಮಗಳೂರು
from India & World News in Kannada | VK Polls https://ift.tt/3E9v4VN
