ವಿಜಯಕುಮಾರ್‌ ಡಿ.ಎಂ. ಮಾಲೂರು ಕೋಲಾರ: ನಿರಂತರವಾಗಿ ಸುರಿಯುತ್ತಿರುವ ಮಳೆಯಿಂದಾಗಿ ತರಕಾರಿಗಳ ಪೂರೈಕೆಯಲ್ಲಿ ಕೊರತೆಯಾಗಿ ದರ ದುಬಾರಿಯಾಗಿದೆ. ಮಾರುಕಟ್ಟೆಯಲ್ಲಿ ಟೊಮೇಟೊ, ಆಲೂಗಡ್ಡೆ, ದಪ್ಪ ಮೆಣಸಿನ ಕಾಯಿ, ಕ್ಯಾರೆಟ್‌, ಬೀನ್ಸ್‌, ಈರುಳ್ಳಿ ಸೇರಿದಂತೆ ಹಲವು ವ್ಯಾಪಾರಿಗಳು ದುಪ್ಪಟ್ಟು ಬೆಲೆಗೆ ಮಾರಾಟ ಮಾಡುತ್ತಿರುವುದರಿಂದ ಗ್ರಾಹಕರು ಕಂಗಾಲಾಗಿದ್ದಾರೆ. ಕಳೆದ ತಿಂಗಳು ವರುಣ ಆರ್ಭಟಿಸಿದರಿಂದ ದಾಖಲೆ ಪ್ರಮಾಣದಲ್ಲಿ ಮಳೆಯಾಗಿತ್ತು. ಅದೇ ರೀತಿ ನವಂಬರ್‌ ಪ್ರಾರಂಭದಿಂದ ಇಂದಿನವರೆಗೂ ಸತತವಾಗಿ ಸುರಿಯುತ್ತಿದೆ. ದೀಪಾವಳಿ ಹಬ್ಬದ ಪ್ರಯುಕ್ತ ತರಕಾರಿಗೆ ಹೆಚ್ಚಿನ ಬೇಡಿಕೆ ಇತ್ತು. ಪ್ರಸ್ತುತ ಬೇಡಿಕೆ ಇದ್ದರೂ ತರಕಾರಿಗಳ ಪೂರೈಕೆ ಕುಸಿತ ಕಂಡಿದೆ. ಕಾರ್ತೀಕ ಮಾಸ ಆರಂಭವಾಗಿರುವುದರಿಂದ ಮದುವೆ, ಗೃಹ ಪ್ರವೇಶ ಸೇರಿದಂತೆ ಶುಭ ಸಮಾರಂಭಗಳು ಆರಂಭವಾಗಿರುವುದರಿಂದ ತರಕಾರಿಗಳ ಬಳಕೆಯಲ್ಲಿ ಏರಿಕೆಯಾಗಿದೆ. ಮಳೆಗೆ ಬಹುತೇಕ ಕಡೆ ತರಕಾರಿ ಬೆಳೆಗೆ ಹಾನಿಯಾಗಿದೆ. ಮುಂದಿನ ದಿನಗಳಲ್ಲಿ ಮಳೆ ಹೀಗೆ ಮುಂದುವರೆದರೆ ತರಕಾರಿ ಹಣ್ಣುಗಳ ಬೆಲೆಯಲ್ಲಿ ಮತ್ತಷ್ಟು ಏರಿಕೆಯಾ ಗುವ ಸಾಧ್ಯತೆ ಇದೆ. ಟೊಮೇಟೊಗೆ ದಾಖಲೆ ಬೆಲೆಹಲವಾರು ದಿನಗಳಿಂದ ಸುರಿದ ಅಕಾಲಿಕ ಮಳೆಯಿಂದ ಕೃಷಿ ಮತ್ತು ತೋಟಗಾರಿಕೆ ಬೆಳೆಗಳು ನಾಶವಾಗಿವೆ. ಮಾರುಕಟ್ಟೆಯಲ್ಲಿ ಎಲ್ಲ ತರಕಾರಿಗಳ ಬೆಲೆ ಗಗನಮುಖಿಯಾಗಿದ್ದು ಟೊಮೇಟೊಗೆ ದಾಖಲೆ ಬೆಲೆ ಬಂದಿದೆ. ಬೆಲೆ ಏರಿಕೆಯಿಂದ ಗ್ರಾಹಕರು ಮಾರುಕಟ್ಟೆಯತ್ತ ಬರುತ್ತಿಲ್ಲ. ಬೆಲೆ ಏರಿಕೆಯಿಂದ ಮಾರುಕಟ್ಟೆಯ ಚಿತ್ರಣವೇ ಬದಲಾಗಿದೆ. ಕೆಜಿ ಟೊಮೇಟೊಗೆ 100 ರೂ ಗಡಿ ದಾಟಿದರೆ. ಬೀನ್ಸ್‌ 80 ರೂ, ಬಟಾಣಿ 200ರೂ, ನುಗ್ಗೆಕಾಯಿ 200 ರೂ, ಕ್ಯಾರೆಟ್‌ 80 ರೂ, ದಪ್ಪಮೆಣಸಿನಕಾಯಿ 100 ರೂ, ಹೀರೇಕಾಯಿ 60 ರೂ, ಬದನೆಕಾಯಿ 60 ರೂ, ಹಸಿಮೆಣಸಿನ ಕಾಯಿ 60 ರೂ, ಬೀಟ್ರೂಟ್‌ 50 ರೂ, ಬೆಂಡೆಕಾಯಿ 50 ರೂ, ಈರುಳ್ಳಿ 40 ರೂ. ಬೆಳ್ಳುಳ್ಳಿ 120ರೂ. ಕೊತ್ತಂಬರಿ ಸೊಪ್ಪು ಕಟ್ಟಿಗೆ 30 ರೂ, ಮೆಂತ್ಯ ಸೊಪ್ಪು 20 ರೂ, ಸಬ್ಬಕ್ಕಿ 30 ರೂ, ಪುದೀನಾ 15 ರೂಗಳಿಗೆ ಮಾರಾಟವಾಗುತ್ತಿದೆ.
from India & World News in Kannada | VK Polls https://ift.tt/3HXj1gC
