ಕಾನ್ಪುರ: ಅನುಭವಿ ಆಫ್‌ ಸ್ಪಿನ್ನರ್‌ ಅಪ್ಪಟ ವಿಕೆಟ್‌ ಟೇಕರ್‌. ವಿಕೆಟ್‌ ಪಡೆಯುವ ಸಲುವಾಗಿ ಹಲವು ಪ್ರಯೋಗಗಳನ್ನು ತರುವುದರಲ್ಲಿ ಅಶ್ವಿನ್ ನಿಸ್ಸೀಮರು. ಕ್ರೀಸ್‌ನ ಬಳಕೆ ಮಾಡಿ ವಿವಿಧ ಎಂಗಲ್‌ಗಳಿಂದ ಚೆಂಡನ್ನು ಎಸೆದು ಬ್ಯಾಟ್ಸ್‌ಮನ್‌ಗಳ ನಿದ್ರೆ ಕೆಡಿಸುತ್ತಾರೆ. ಇದೀಗ ವಿರುದ್ಧದ 2 ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್ ಸರಣಿಯಲ್ಲಿ ಕಾನ್ಪುರದ ಗ್ರೀನ್‌ ಪಾರ್ಕ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪ್ರಥಮ ಟೆಸ್ಟ್‌ ಪಂದ್ಯದಲ್ಲೂ ಅಶ್ವಿನ್ ತಮ್ಮ ವಿವಿಧ ತಂತ್ರಗಳ ಮೂಲಕ ವಿಕೆಟ್‌ ಪಡೆಯುವ ಪ್ರಯತ್ನ ಮಾಡಿದರು. ಕಿವೀಸ್‌ ಪರ ಪ್ರಥಮ ಇನಿಂಗ್ಸ್‌ನಲ್ಲಿ ಮೊದಲ ವಿಕೆಟ್‌ಗೆ ಶತಕದ ಜೊತೆಯಾಟ ನಡೆಸಿದ್ದ ಟಾಮ್‌ ಲೇಥಮ್ ಮತ್ತು ವಿಲ್‌ ಯಂಗ್ ಅವರನ್ನು ಬೇರ್ಪಡಿಸಲು ಅಶ್ವಿನ್ ತರಹೇವಾರಿ ತಂತ್ರಗಳನ್ನು ಬಳಕೆ ಮಾಡಿದ್ದರು. ಕ್ರೀಸ್‌ನ ಬಳಕೆ ಮಾಡಿ ವಿವಿಧ ಕೋನಗಳಿಂದ ಚೆಂಡನ್ನು ಎಸೆದು ವಿಕೆಟ್‌ ಪಡೆಯುವ ಪ್ರಯತ್ನ ಮಾಡಿ, ಕೊನೆಗೂ 89 ರನ್‌ಗಳಿಸಿದ್ದ ಯಂಗ್ ವಿಕೆಟ್‌ ಪಡೆಯುವಲ್ಲಿ ಯಶಸ್ವಿಯಾಗಿದ್ದರು. ಆದರೆ, ಅಶ್ವಿನ್ ಅವರ ಈ ಪ್ರಯತ್ನದಲ್ಲಿ ಆನ್‌ಫೀಲ್ಡ್‌ ಅಂಪೈರ್‌ ನಿತಿನ್ ಮೆನನ್‌ ಅವರಿಂದ ಹಲವು ಬಾರಿ ಎಚ್ಚರಿಕೆ ಪಡೆದಿದ್ದರು. ಇನಿಂಗ್ಸ್‌ನ 77ನೇ ಓವರ್‌ನಲ್ಲಿ ನಡೆದ ಘಟನೆಯದು. ಆಗಷ್ಟೇ ಬ್ಯಾಟಿಂಗ್‌ಗೆ ಇಳಿದಿದ್ದ ಕೇನ್‌ ವಿಲಿಯಮ್ಸನ್‌ ವಿಕೆಟ್‌ ಪಡೆಯಲು ಅಶ್ವಿನ್ ಅರೌಂಡ್‌ ದಿ ವಿಕೆಟ್‌ ಬೌಲಿಂಗ್ ಮಾಡಲು ಮುಂದಾಗಿದ್ದರು. ಈ ಸಂದರ್ಭದಲ್ಲಿ ಅಶ್ವಿನ್ ತಮ್ಮ ಬೌಲಿಂಗ್ ಪೂರೈಸಿ ಫಾಲೋಥ್ರೂನಲ್ಲಿ ಅಂಪೈರ್‌ನ ನೇರವಾಗಿ ಬಂದು ನಿಲ್ಲುತ್ತಿದ್ದರು. ಈ ಸಲುವಾಗಿ ಸ್ಟ್ರೈಕ್‌ ಅಂಪೈರ್‌ ಸತತ ವಾರ್ನಿಂಗ್‌ ಕೊಟ್ಟರು. ನಂತರ ಕ್ಯಾಪ್ಟನ್‌ ಅಜಿಂಕ್ಯ ರಹಾನೆ ಅವರನ್ನು ಕರೆದ ನಿತಿನ್ ಮೆನನ್‌ ಅಶ್ವಿನ್ ಬೌಲಿಂಗ್ ಶೈಲಿ ಬಗ್ಗೆ ಎಚ್ಚರಿಕೆಯನ್ನೂ ನೀಡಿದರು. 80ನೇ ಓವರ್‌ ವೇಳೆ ಅಂಪೈರ್‌, ಅಶ್ವಿನ್ ಮತ್ತು ರಹಾನೆ ನಡುವೆ ಮಾತಿನ ಚಕಮಕಿಯೇ ನಡೆದಿತ್ತು. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಭಾರತ ತಂಡದ ಮಾಜಿ ನಾಯಕ ಸುನಿಲ್‌ ಗವಾಸ್ಕರ್‌ ಆನ್‌ಫೈಲ್‌ ಅಂಪೈರ್‌ನ ವರ್ತನೆಯನ್ನು ಟೀಕಿಸಿದ್ದಾರೆ. "ಅಶ್ವಿನ್ ಡೇಂಜರ್‌ ಏರಿಯಾ ಪ್ರವೇಶಿಸಿಲ್ಲ ಎಂದಮೇಲೆ ಸಮಸ್ಯೆಯಾದರೂ ಏನು ಎಂದು ಅಲ್ಲಿ ಅಜಿಂಕ್ಯ ಪ್ರಶ್ನೆ ಮಾಡಿದ್ದಾರೆ. ಅಂಪೈರ್‌ಗೆ ಮುಂದೆ ಏನಾಗುತ್ತಿದೆ ಎಂಬುದನ್ನು ನೋಡಲು ಅಲ್ಲಿ ಕಷ್ಟವಾಗುತ್ತಿರಬಹುದು. ಆದರೆ ಕ್ಯಾಪ್ಟನ್‌ ಮತ್ತು ಅಶ್ವಿನ್ ಜೊತೆಗಿನ ಅವರ ವಾದ ಅರ್ಥಹೀನ. ಅಂದಹಾಗೆ ಬೌಲರ್‌ ಈ ರೀತಿ ಮಾಡಿದಾಗ ಅವರ ವಿರುದ್ಧ ಪೆನಾಲ್ಟಿ ಹೇರಬಹುದೆ? ಆ ರೀತಿ ಏನಾದರೂ ನಿಯಮಗಳು ಇವೆಯೆ? ನಮಗೆ ತಿಳಿಯದೇ ಇರುವುದು ಏನಾದರೂ ಇದೆಯೆ? ವಿಕೆಟ್‌ ಹಿಂಬದಿ ಇಟ್ಟಿರುವ ಹೆಲ್ಮೆಟ್‌ಗೆ ಚೆಂಡು ಬಡಿದರೆ ಪೆನಾಲ್ಟಿ ಇದೆ. ಆದರೆ ಅಶ್ವಿನ್ ಅಡ್ಡ ಬಂದರು ಎಂದ ಕಾರಣಕ್ಕೆ ಪೆನಾಲ್ಟಿ ಹಾಕಬಹುದೆ? ಅಶ್ವಿನ್ ಬೇಕೆಂದೇ ಹೀಗೆ ಮಾಡುತ್ತಿದ್ದಾರೆ ಎಂಬುದು ಅಂಪೈರ್‌ ಅಭಿಪ್ರಾಯವೆ?," ಎಂದು ಗವಾಸ್ಕರ್‌ ಪ್ರಶ್ನೆಗಳ ಬೌನ್ಸರ್‌ ಎಸೆದಿದ್ದಾರೆ. ದಿನದಾಟದಲ್ಲಿ ಅದ್ಭುತ ಬೌಲಿಂಗ್ ಪ್ರದರ್ಶನ ತಂದ ಅಶ್ವಿನ್ 82ಕ್ಕೆ 3 ವಿಕೆಟ್‌ ಪಡೆಯುವಲ್ಲಿ ಯಶಸ್ವಿಯಾದರು. ಜೊತೆಗೆ ಅಕ್ಷರ್‌ ಪಟೇಲ್‌ 62ಕ್ಕೆ 5 ವಿಕೆಟ್‌ ಕಿತ್ತ ಪರಿಣಾಮ ನ್ಯೂಜಿಲೆಂಡ್ ಮೊದಲ ಇನಿಂಗ್ಸ್‌ನಲ್ಲಿ 296 ರನ್‌ಗಳಿಗೆ ಆಲ್‌ಔಟ್‌ ಆಯಿತು. ಕಾನ್ಪುರ ಟೆಸ್ಟ್‌ ಪಂದ್ಯದ ಸಂಕ್ಷಿಪ್ತ (ನಾಲ್ಕನೇ ದಿನದ ಭೋಜನದ ಅಂತ್ಯಕ್ಕೆ) ಭಾರತ: ಮೊದಲ ಇನಿಂಗ್ಸ್ 111.1 ಓವರ್‌ಗಳಲ್ಲಿ 345ಕ್ಕೆ ಆಲ್‌ಔಟ್‌ (ಶುಭಮನ್ ಗಿಲ್ 52, ಚೇತೇಶ್ವರ್‌ ಪೂಜಾರ 26, ಅಜಿಂಕ್ಯ ರಹಾನೆ 35, ಶ್ರೇಯಸ್‌ ಅಯ್ಯರ್‌ 105, ರವೀಂದ್ರ ಜಡೇಜಾ ಅಜೇಯ 50; ಕೈಲ್‌ ಜೇಮಿಸನ್‌ 91ಕ್ಕೆ 3, ಟಿಮ್ ಸೌಥೀ 69ಕ್ಕೆ 5, ಎಜಾಝ್ ಪಟೇಲ್‌ 90ಕ್ಕೆ 2). ನ್ಯೂಜಿಲೆಂಡ್: ಮೊದಲ ಇನಿಂಗ್ಸ್ ವಿಕೆಟ್‌ ನಷ್ಟವಿಲ್ಲದೆ 142.3 ಓವರ್‌ಗಳಲ್ಲಿ 296ಕ್ಕೆ ಆಲ್‌ಔಟ್‌ (ಟಾಮ್‌ ಲೇಥಮ್ 95, ವಿಲ್‌ ಯಂಗ್ 89; ಅಕ್ಷರ್‌ ಪಟೇಲ್‌ 62ಕ್ಕೆ 5, ಆರ್‌ ಅಶ್ವಿನ್ 82ಕ್ಕೆ 3). ಭಾರತ: ಎರಡನೇ ಇನಿಂಗ್ಸ್ 26 ಓವರ್‌ಗಳಲ್ಲಿ 5 ವಿಕೆಟ್‌ಗೆ 74 ರನ್‌ (ಮಯಾಂಕ್‌ ಅಗರ್ವಾಲ್ 17, ಚೇತೇಶ್ವರ್‌ ಪೂಜಾರ 22; ಟಿಮ್ ಸೌಥೀ 23ಕ್ಕೆ 2, ಕೈಲ್‌ ಜೇಮಿಸನ್‌ 22ಕ್ಕೆ 2).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3xvFRHl
