ಬೆಂಗಳೂರು: ನೆಲದಲ್ಲಿ ಓಮಿಕ್ರಾನ್‌ ಹೆಸರಿನ ಹೊಸ ಮಾದರಿಯ ಸೋಂಕು ವ್ಯಾಪಕವಾಗಿ ಹರಡಲು ಶುರುವಾಗಿದೆ. ಹೀಗಿರುವಾಗ ಹರಿಣಗಳ ನಾಡಿಗೆ ಪ್ರವಾಸ ಕೈಗೊಳ್ಳುವುದು ಬಹುತೇಕ ಅನುಮಾನ ಎಂಬಂತ್ತಾಗಿತ್ತು. ಆದರೆ, ದಕ್ಷಿಣ ಆಫ್ರಿಕಾ ಸರಕಾರ ಈ ಬಗ್ಗೆ ಅಭಯ ಸೂಚಿಸಿದೆ. ಟೀಮ್ ಇಂಡಿಯಾ ಉಳಿದುಕೊಳ್ಳಲು ಅತ್ಯಂತ ಸುರಕ್ಷಿತ ಬಯೋ ಬಬಲ್‌ ವಾತಾವರಣದ ನಿರ್ಮಾಣ ಮಾಡುವುದಾಗಿ ಭರವಸೆ ನೀಡಿದೆ. ಹೀಗಾಗಿ ಭಾರತ ತಂಡ ದ್ವಿಪಕ್ಷೀಯ ಕ್ರಿಕೆಟ್ ಸರಣಿ ಸಲುವಾಗಿ ದಕ್ಷಿಣ ಆಫ್ರಿಕಾಕ್ಕೆ ತೆರಳುವುದು ಬಹುತೇಕ ಖಾತ್ರಿಯಾದಂತ್ತಿದೆ. ಈಗಾಗಲೇ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿದ್ದ ನೆದರ್ಲೆಂಡ್ಸ್‌ ತಂಡ ಸರಣಿಯಿಂದ ಅರ್ಧಕ್ಕೆ ಹೊರನಡೆದು ತಾಯ್ನಾಡಿಗೆ ಹಿಂದಿರುಗಿದೆ. ಆದರೆ, ತನ್ನ 'ಎ' ತಂಡವನ್ನು ಕರೆಸಿಕೊಳ್ಳದೆ ಸರಣಿಯಲ್ಲಿ ಮುಂದುವರಿಯಲು ಬಿಟ್ಟಿರುವುದನ್ನು ದಕ್ಷಿಣ ಆಫ್ರಿಕಾ ಶ್ಲಾಘಿಸಿದೆ. ಭಾರತ 'ಎ' ತಂಡ ಸದ್ಯ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿದ್ದು, 3 ಪಂದ್ಯಗಳ ಅನಧಿಕೃತ ಟೆಸ್ಟ್ ಸರಣಿಯಲ್ಲಿ ದಕ್ಷಿಣ ಆಫ್ರಿಕಾ 'ಎ' ತಂಡದೊಂದಿಗೆ ಪೈಪೋಟಿ ನಡೆಸುತ್ತಿದೆ. ಡಿ.9ಕ್ಕೆ ಪ್ರವಾಸ ಸಾಧ್ಯತೆ ಭಾರತ ತಂಡ ಸದ್ಯ ತಾಯ್ನಾಡಿನಲ್ಲಿ ನ್ಯೂಜಿಲೆಂಡ್‌ ಎದುರು ಟೆಸ್ಟ್ ಸರಣಿಯನ್ನಾಡುತ್ತಿದೆ. ಸರಣಿಯ 2ನೇ ಹಾಗೂ ಅಂತಿಮ ಪಂದ್ಯ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಡಿ.3ರಿಂದ 7ರವರೆಗೆ ನಡೆಯಲಿದ್ದು, ದಕ್ಷಿಣ ಆಫ್ರಿಕಾಕ್ಕೆ ಡಿ.9ರಂದು ಮುಂಬೈನಿಂದ ಭಾರತ ತಂಡ ಪ್ರವಾಸ ಬೆಳೆಸಲಿದೆ. ಅಲ್ಲಿ 4 ದಿನಗಳ ಕ್ವಾರಂಟೈನ್‌ ಬಳಿಕ ಟೆಸ್ಟ್ ಕ್ರಿಕೆಟ್ ಸರಣಿಗೆ ಅಣಿಯಾಗಲಿದೆ. 3 ಪಂದ್ಯಗಳ ಟೆಸ್ಟ್ ಸರಣಿ ಡಿ.17ರಂದು ಶುರುವಾಗಲಿದೆ. ಟೆಸ್ಟ್ ಸರಣಿ ಬಳಿಕ 3 ಪಂದ್ಯಗಳ ಒಡಿಐ ಮತ್ತು 4 ಪಂದ್ಯಗಳ ಟಿ20 ಕ್ರಿಕೆಟ್ ಸರಣಿ ಜರುಗಲಿದೆ. "ಟೀಮ್ ಇಂಡಿಯಾ ಆಟಗಾರರ ಆರೋಗ್ಯ ಮತ್ತು ರಕ್ಷಣೆ ಸಲುವಾಗಿ ದಕ್ಷಿಣ ಆಫ್ರಿಕಾ ಸಕಲ ವ್ಯವಸ್ಥೆಯನ್ನು ಕಲ್ಪಿಸಲಿದೆ. ದಕ್ಷಿಣ ಆಫ್ರಿಕಾ, ಭಾರತ 'ಎ' ತಂಡ ಮತ್ತು ಟೀಮ್ ಇಂಡಿಯಾ ಆಟಗಾರರಿಗೆ ಸಂಪೂರ್ಣ ಸುರಕ್ಷಿತವಾದ ಬಯೋ ಸೆಕ್ಯೂರ್‌ ವಾತಾವರಣ ನಿರ್ಮಾಣ ಮಾಡಲಾಗುವುದು. ಭಾರತ 'ಎ' ತಂಡವನ್ನು ಹಿಂಪಡೆಯದೆ ಬಿಸಿಸಿಐ ಉತ್ತಮ ಒಗ್ಗಟ್ಟನ್ನು ಪ್ರದರ್ಶಿಸಿದೆ," ಎಂದು ದಕ್ಷಿಣ ಆಫ್ರಿಕಾದ ವಿದೇಶಾಂಗ ಸಚಿವಾಲಯದ ಅಧಿಕಾರಿ ಒಬ್ಬರು ಹೇಳಿದ್ದಾರೆ ಎಂದು ಇಂಡಿಯನ್‌ ಎಕ್ಸ್‌ಪ್ರೆಸ್‌ ವರದಿ ಮಾಡಿದೆ. ಭಾರತ ತಂಡದ ದಕ್ಷಿಣ ಆಫ್ರಿಕಾ ಪ್ರವಾಸದ ವೇಳಾಪಟ್ಟಿ ಹೀಗಿದೆ ಟೆಸ್ಟ್ ಸರಣಿಪ್ರಥಮ ಟೆಸ್ಟ್: ಡಿ. 17-21, ವಾಂಡರರ್ಸ್‌, ಜೊಹಾನ್ಸ್‌ಬರ್ಗ್‌ ದ್ವಿತೀಯ ಟೆಸ್ಟ್: ಡಿ. 26-30, ಸೂಪರ್‌ಸ್ಪೋರ್ಟ್‌ ಪಾರ್ಕ್‌, ಸೆಂಚೂರಿಯನ್ ತೃತೀಯ ಟೆಸ್ಟ್: ಜ. 3-7, ನ್ಯೂಲ್ಯಾಂಡ್ಸ್‌, ಕೇಪ್‌ ಟೌನ್‌ ಏಕದಿನ ಕ್ರಿಕೆಟ್ ಸರಣಿಮೊದಲ ಒಡಿಐ: ಜನವರಿ 11, ಬೊಲ್ಯಾಂಡ್ ಪಾರ್ಕ್‌, ಪಾರ್ಲ್‌ ಎರಡನೇ ಒಡಿಐ: ಜನವರಿ 14, ನ್ಯೂಲ್ಯಾಂಡ್ಸ್‌, ಕೇಪ್‌ ಟೌನ್‌ ಮೂರನೇ ಒಡಿಐ: ಜನವರಿ 16, ನ್ಯೂಲ್ಯಾಂಡ್ಸ್‌, ಕೇಪ್‌ ಟೌನ್‌ ನಾಲ್ಕು ಪಂದ್ಯಗಳ ಟಿ20 ಕ್ರಿಕೆಟ್ ಸರಣಿಮೊದಲ ಟಿ20-ಐ: ಜನವರಿ 19, ನ್ಯೂಲ್ಯಾಂಡ್ಸ್‌, ಕೇಪ್‌ ಟೌನ್‌ ಎರಡನೇ ಟಿ20-ಐ: ಜನವರಿ 21, ನ್ಯೂಲ್ಯಾಂಡ್ಸ್‌, ಕೇಪ್‌ ಟೌನ್‌ ಮೂರನೇ ಟಿ20-ಐ: ಜನವರಿ 23, ಬೊಲ್ಯಾಂಡ್ ಪಾರ್ಕ್‌, ಪಾರ್ಲ್‌ ನಾಲ್ಕನೇ ಟಿ20-ಐ: ಜನವರಿ 26, ಬೊಲ್ಯಾಂಡ್ ಪಾರ್ಕ್‌, ಪಾರ್ಲ್‌
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3lr515n
