ಅಮರಾವತಿ: ಇತ್ತೀಚೆಗೆ ರಾಜ್ಯದಲ್ಲಿ ಸುರಿದ ಅಕಾಲಿಕ ಮಳೆಯಿಂದ ಉಂಟಾದ ಪ್ರವಾಹದಿಂದಾಗಿ ಈವರೆಗೂ 44 ಮಂದಿ ಜೀವ ಕಳೆದುಕೊಂಡಿದ್ದಾರೆ ಎಂದು ಸರ್ಕಾರ ಶುಕ್ರವಾರ ತಿಳಿಸಿದೆ. ರಾಜ್ಯ ಸರ್ಕಾರ ಹೊರಡಿಸಿರುವ ಹೇಳಿಕೆ ಪ್ರಕಾರ, ನಾಲ್ಕು ಜಿಲ್ಲೆಗಳಾದ ಕಡಪ, ಚಿತ್ತೂರು, ಅನಂತಪುರ ಮತ್ತು ನೆಲ್ಲೂರ್‌ನಲ್ಲಿ 119 ಮಂಡಲಗಳಲ್ಲಿನ 1990 ಗ್ರಾಮಗಳು ಪ್ರವಾಹದಿಂದ ಹಾನಿಗೊಳಗಾಗಿವೆ. ಇವುಗಳಲ್ಲಿ 211 ಗ್ರಾಮಗಳು ಸಂಪೂರ್ಣ ಮುಳುಗಿ ಹೋಗಿವೆ. ಇದರಿಂದ 44 ಮಂದಿ ಮೃತಪಟ್ಟಿದ್ದಾರೆ. ಇನ್ನೂ 16 ಮಂದಿ ನಾಪತ್ತೆಯಾಗಿದ್ದಾರೆ. 'ಈ ತಿಂಗಳ ಮೊದಲ ವಾರದ ಬಳಿಕ ಆರಂಭವಾದ ಮಳೆ, ಇಂದಿನವರೆಗೂ ಮುಂದುವರಿದಿದೆ. 16 ಮತ್ತು 17ರಂದು ಆರಂಭವಾಗಿದೆ. ಇತಿಹಾಸದಲ್ಲಿ ಎಂದಿಗೂ ಇಂತಹ ಮಳೆ ಕಂಡಿರಲಿಲ್ಲ. ಭಾರಿ ಮಳೆ ರಾಯಲಸೀಮೆಯನ್ನು ಮುಳುಗಿಸಿದೆ. ತಿರುಮಲದ ರಸ್ತೆಗಳು ಮತ್ತು ತಿರುಪತಿ ಪಟ್ಟಣದಲ್ಲಿ ನಾವು ವಿಪರೀತ ಮಳೆ ಕಂಡಿದ್ದೇವೆ. ವಾಹನಗಳು ಪ್ರವಾಹದಲ್ಲಿ ಕೊಚ್ಚಿ ಹೋಗಿವೆ' ಎಂದು ಸರ್ಕಾರದ ಹೇಳಿಕೆ ತಿಳಿಸಿದೆ. 'ನಾಲ್ಕು ಬಸ್‌ಗಳು ಪ್ರವಾಹದ ನಡುವೆ ಸಿಲುಕಿಕೊಂಡಿದ್ದವು. ಒಂದು ರಾಜ್ಯ ಸರ್ಕಾರಿ ಬಸ್ ನಡಲೂರು ಸೇತುವೆಯಿಂದ ಕೆಳಗೆ ಉರುಳಿ ಬಿದ್ದು 10 ಜನರ ಸಾವಿಗೆ ಕಾರಣವಾಗಿದೆ. ಉಳಿದವರನ್ನು ಎಸ್‌ಡಿಆರ್‌ಎಫ್ ತಂಡಗಳು ರಕ್ಷಿಸಿವೆ. ನದಿ ತೀರದಲ್ಲಿರುವ ಶಿವಾಲಯಂನಲ್ಲಿ ಇನ್ನು 10 ಜನರು ಮೃತಪಟ್ಟಿದ್ದಾರೆ' ಎಂದು ಹೇಳಿದೆ. ರಾಜ್ಯದಲ್ಲಿ ವಿಪರೀತ ಮಳೆಯಿಂದ ಹಾನಿಗೀಡಾದ ನಾಲ್ಕು ಜಿಲ್ಲೆಗಳಲ್ಲಿ ಈಗ ವಿದ್ಯುತ್ ಪೂರೈಕೆಯನ್ನು ಮರಳಿ ಸರಿಪಡಿಸಲಾಗಿದೆ. 95,949 ಸಂತ್ರಸ್ತ ಕುಟುಂಬಗಳಿಗೆ ಅಗತ್ಯ ನೆರವುಗಳನ್ನು ನೀಡಲಾಗಿದೆ. ಪ್ರವಾಹದಿಂದ ಸಂಪೂರ್ಣ ಹಾಗೂ ಭಾಗಶಃ ಮನೆಗಳು ಹಾನಿಯಾದ ಕುಟುಂಬದವರಿಗೆ ಪರಿಹಾರ ಪಾವತಿಸುವುದಾಗಿ ಸರ್ಕಾರ ಪ್ರಕಟಿಸಿದೆ. 'ಸಂಪೂರ್ಣವಾಗಿ ಧ್ವಂಸವಾದ ಮನೆಗಳ ಮಾಲೀಕರಿಗೆ ಸರ್ಕಾರವು ಪ್ರತಿ ಹೊಸ ಮನೆಗೆ 1.8 ಲಕ್ಷ ರೂ ಮಂಜೂರು ಮಾಡುತ್ತಿದೆ. ಜತೆಗೆ 95,000 ಪರಿಹಾರ ಕೊಡಲಾಗುತ್ತಿದೆ. ಜಾನುವಾರುಗಳನ್ನು ಕಳೆದುಕೊಂಡ ಮಾಲೀಕರಿಗೆ ಕೂಡಲೇ ಪರಿಹಾರಗಳನ್ನು ನೀಡಲಾಗುವುದು. ಜಾನುವಾರುಗಳಿಗೆ ಲಸಿಕೆ ನೀಡುವಂತೆ ಆದೇಶಿಸಲಾಗಿದೆ. ಎಲ್ಲಿಯೂ ಕೊರತೆ ಉಂಟಾಗದಂತೆ ಪಶು ಆಹಾರ ವಿತರಣೆಗೆ ಸೂಚಿಸಲಾಗಿದೆ. ಹಾಗೆಯೇ ಬೆಳೆ ನಾಶಕ್ಕೆ ಸಂಪೂರ್ಣ ಪರಿಹಾರಕ್ಕೆ ಆದೇಶಿಸಲಾಗಿದೆ' ಎಂದು ಹೇಳಿದೆ. ಇದಕ್ಕೂ ಮುನ್ನ ಆಂಧ್ರ ಸರ್ಕಾರವು ಹಾನಿಗೊಳಗಾದ ಜಿಲ್ಲೆಗಳಲ್ಲಿನ ಕುಟುಂಬ ಒಂದಕ್ಕೆ 25 ಕೆಜಿ ಅಕ್ಕಿ, 1 ಕೆಜಿ ಬೇಳೆ, ಒಂದು ಲೀಟರ್ ತಾಳೆ ಎಣ್ಣೆ, ಒಂದು ಕೆಜಿ ಈರುಳ್ಳಿ ಮತ್ತು ಒಂದು ಕೆಜಿ ಆಲೂಗಡ್ಡೆ ನೀಡಲು ನಿರ್ಧರಿಸಿತ್ತು. ಸನ್ನಿವೇಶ ಆಂಧ್ರದಲ್ಲಿ ಮತ್ತೆ ಮಳೆ ಸುರಿಸುತ್ತಿದೆ. ರಾಜ್ಯದ ಕರಾವಳಿ ಪ್ರದೇಶಗಳು, ಯಾನಂ ಮತ್ತು ರಾಯಲಸೀಮಾಗಳ ಅಲ್ಲಲ್ಲಿ ಶನಿವಾರ ಭಾರಿ ಮಳೆ ಸಾಧ್ಯತೆ ಇದೆ. ಭಾನುವಾರ ಹಾಗೂ ಸೋಮವಾರ ಈ ಮಳೆಯ ಆರ್ಭಟ ಮತ್ತಷ್ಟು ಹೆಚ್ಚುವ ನಿರೀಕ್ಷೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತಿಳಿಸಿದೆ. ಈ ಪ್ರದೇಶಗಳಲ್ಲಿನ ಮೀನುಗಾರರು ಮುಂದಿನ ಸೂಚನೆಯವರೆಗೆ ಮೀನುಗಾರಿಕೆಗೆ ಹೋಗಬಾರದು ಎಂದು ಸೂಚನೆ ನೀಡಲಾಗಿದೆ.
from India & World News in Kannada | VK Polls https://ift.tt/312Yjey
