ಕಾನ್ಪುರ: ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧ ಇಲ್ಲಿನ ಗ್ರೀನ್‌ ಪಾರ್ಕ್ ಕ್ರೀಡಾಂಗಣದಲ್ಲಿ ನಡೆದ 2 ಟೆಸ್ಟ್‌ಗಳ ಸರಣಿಯ ಮೊದಲ ಪಂದ್ಯದಲ್ಲಿ ರೋಚಕ ಡ್ರಾ ಫಲಿತಾಂಶಕ್ಕೆ ತೃಪ್ತಿ ಪಡಬೇಕಾಯಿತು. ಅಂದಹಾಗೆ ಈ ಟೆಸ್ಟ್‌ ಪಂದ್ಯದ ಬಳಿಕ ಭಾರತ ತಂಡದ ಮುಖ್ಯ ಕೋಚ್‌ ಭಾರಿ ಸುದ್ದಿಯಾಗಿದ್ದು, ಪಂದ್ಯಕ್ಕೆ ಐದು ದಿನಗಳ ಆಟ ಮೂಡಿಬರುವಂತಹ ಸ್ಪರ್ಧಾತ್ಮಕ ಪಿಚ್‌ ಮಾಡಿಕೊಟ್ಟ ಗ್ರೀನ್‌ ಪಾರ್ಕ್ ಸಿಬ್ಬಂದಿ ಬಳಗಕ್ಕೆ 35 ಸಾವಿರ ರೂ. ಬಹುಮಾನ ಕೊಟ್ಟು ಕ್ರಿಕೆಟ್ ಪ್ರಿಯರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. ಈ ಬಗ್ಗೆ ಪತ್ರಕರ್ತ ಕುಶನ್‌ ಸರ್ಕಾರ್‌ ತಮ್ಮ ಅಧಿಕೃತ ಟ್ವಿಟರ್‌ ಖಾತೆ ಮೂಲಕ ಟ್ವೀಟ್‌ ಮಾಡಿ ಮಾಹಿತಿ ಹಂಚಿಕೊಂಡಿದ್ದಾರೆ. "ರಾಹುಲ್‌ ದ್ರಾವಿಡ್ ಉಳಿದವರಿಗಿಂತಲೂ ಸದಾ ವಿಭಿನ್ನ. ಬಹುಶಃ ಟೆಸ್ಟ್‌ ಪಂದ್ಯಕ್ಕೆ 5 ದಿನಗಳ ಆಟ ಸಾಧ್ಯವನ್ನಾಗಿಸಿದ ಪಿಚ್‌ ಕೊಟ್ಟಿದ್ದಕ್ಕೆ ಅವರು ಬಹುಮಾನ ನೀಡಿದ್ದಾರೆ," ಎಂದು ಕುಶನ್‌ ಟ್ವೀಟ್‌ ಮಾಡಿದ್ದಾರೆ. ಇನ್ನು ಕಾನ್ಪುರ ಟೆಸ್ಟ್‌ ಪಂದ್ಯ ಹಾವು ಏಣಿಯ ಆಟದಂತೆ ಸಾಗಿ ಕೊನೆಗೆ ರೋಚಕ ಡ್ರಾ ಫಲಿತಾಂಶ ಕಂಡಿತು. ನ್ಯೂಜಿಲೆಂಡ್ ತಂಡದ ಕೆಳ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ಅದ್ಭುತ ರಕ್ಷಣಾತ್ಮಕ ಆಟ ಹೊರತಂದು ಕೊನೇ ವಿಕೆಟ್‌ ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಗಿ ಎದುರಾಗಬಹುದಿದ್ದ ಸೋಲಿನಿಂದ ತಂಡವನ್ನು ಪಾರು ಮಾಡಿದರು. ಭಾರತ ತಂಡ ತಡವಾಗಿ ಡಿಕ್ಲೇರ್‌ ಮಾಡಿತ್ತೆ?ಇನ್ನು ಪಂದ್ಯದ ನಾಲ್ಕನೇ ದಿನ ನ್ಯೂಜಿಲೆಂಡ್ ಕೇವಲ 4 ಓವರ್‌ಗಳ ಬ್ಯಾಟಿಂಗ್‌ ಮಾತ್ರವೇ ಮಾಡಿತ್ತು. ಇಲ್ಲಿ ಭಾರತ ತಂಡ ಕೊಂಚ ತಡವಾಗಿ ಡಿಕ್ಲೇರ್‌ ಮಾಡಿತ್ತೆ ಎಂದು ಹಲವರು ಪ್ರಶ್ನೆ ಮಾಡಿದ್ದಾರೆ. ಆದರೆ ತಂಡದ ಡಿಕ್ಲೇರ್‌ ನಿರ್ಧಾರ ಸೂಕ್ತ ಸಮಯಕ್ಕೆ ಬಂದಿತ್ತು ಎಂದು ಕೋಚ್‌ ದ್ರಾವಿಡ್ ಮತ್ತು ನಾಯಕ ಅಜಿಂಕ್ಯ ರಹಾನೆ ಸಮರ್ಥಿಸಿಕೊಂಡಿದ್ದಾರೆ. ಪಂದ್ಯದ 5ನೇ ಹಾಗೂ ಅಂತಿಮ ದಿನವಾದ ಸೋಮವಾರ ಮೊದಲ ಅವಧಿಯಲ್ಲಿ ಯಾವುದೇ ವಿಕೆಟ್‌ ಪತನವಾಗಲಿಲ್ಲ. ಟಾಮ್‌ ಲೇಥಮ್‌ (52) ಮತ್ತು ವಿಲ್‌ ಸಮರ್‌ವಿಲ್ಲೆ (36) ಟೀಮ್ ಇಂಡಿಯಾ ಬೌಲರ್‌ಗಳನ್ನು ಬಹಳಾ ಕಾಡಿದರು. ಆದರೆ, ಭೋಜನದ ಬಳಿಕ ಸತತ ವಿಕೆಟ್‌ಗಳು ಬೀಳಲಾರಂಭಿಸಿತು. ರವೀಂದ್ರ ಚಡೇಜಾ (40ಕ್ಕೆ 3) ಮತ್ತು ಆರ್‌ ಅಶ್ವಿನ್‌ (35ಕ್ಕೆ 3) ಸತತ ಭರ್ಜರಿ ದಾಳಿ ನಡೆಸಿ ಟೀಮ್ ಇಂಡಿಯಾಗೆ ಜಯ ತಂದುಕೊಡುವ ಹೋರಾಟ ನಡೆಸಿದರು. ಆದರೆ, ರಚಿನ್ ರವೀಂದ್ರ 91 ಎಸೆತಗಳಲ್ಲಿ ಅಜೇಯ 17 ರನ್‌ಗಳಿಸಿ ಕಿವೀಸ್‌ ತಂಡಕ್ಕೆ ಹೀರೋ ಆದರು. ಪಂದ್ಯದ ಮೊದಲ ಇನಿಂಗ್ಸ್‌ನಲ್ಲಿ 105 ಮತ್ತು 2ನೇ ಇನಿಂಗ್ಸ್‌ನಲ್ಲಿ 65 ರನ್ ಬಾರಿಸಿದ ಟೀಮ್ ಇಂಡಿಯಾದ ಯುವ ಬ್ಯಾಟ್ಸ್‌ಮನ್‌ ಪಂದ್ಯಶ್ರೇಷ್ಠ ಗೌರವ ಪಡೆದರು. ಸರಣಿಯ 2ನೇ ಪಂದ್ಯ ಡಿಸೆಂಬರ್‌ 3ರಿಂದ 7ರವರೆಗೆ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಕಾನ್ಪುರ ಟೆಸ್ಟ್‌ ಪಂದ್ಯದ ಸಂಕ್ಷಿಪ್ತ ಭಾರತ: ಮೊದಲ ಇನಿಂಗ್ಸ್ 111.1 ಓವರ್‌ಗಳಲ್ಲಿ 345ಕ್ಕೆ ಆಲ್‌ಔಟ್‌ ನ್ಯೂಜಿಲೆಂಡ್: ಮೊದಲ ಇನಿಂಗ್ಸ್ 142.3 ಓವರ್‌ಗಳಲ್ಲಿ 296ಕ್ಕೆ ಆಲ್‌ಔಟ್‌ ಭಾರತ: ಎರಡನೇ ಇನಿಂಗ್ಸ್ 81 ಓವರ್‌ಗಳಲ್ಲಿ 7 ವಿಕೆಟ್‌ಗೆ 234 ರನ್ ಡಿಕ್ಲೇರ್‌ ನ್ಯೂಜಿಲೆಂಡ್: ಎರಡನೇ ಇನಿಂಗ್ಸ್ 96 ಓವರ್‌ಗಳಲ್ಲಿ 9 ವಿಕೆಟ್‌ಗೆ 160 ರನ್ (ಟಾಮ್‌ ಲೇಥಮ್‌ 52, ವಿಲಿಯಮ್‌ ಸೋಮರ್‌ವಿಲ್ಲೆ 36, ಕೇನ್‌ ವಿಲಿಯಮ್ಸನ್ 24, ರಚಿನ್ ರವೀಂದ್ರ 17*; ಆರ್‌ ಅಶ್ವಿನ್‌ 35ಕ್ಕೆ 3, ರವೀಂದ್ರ ಜಡೇಜಾ 40ಕ್ಕೆ 4 ). ಪಂದ್ಯಶ್ರೇಷ್ಠ: ಶ್ರೇಯಸ್‌ ಅಯ್ಯರ್‌
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3lfRlK7
