ನಂದೀಶ್‌ ಭದ್ರಾವತಿ ದಾವಣಗೆರೆ: ಇವರಿಗೆ ದೇವರ ಮೇಲೆ ಅಪಾರ ಭಕ್ತಿ, ದೇವರ ಮೈಮೇಲಿರುವ ಒಡವೆ ಕದ್ದರೇ ಬೇಗನೇ ಸಿಕ್ಕಿ ಬೀಳುತ್ತೇವೆ ಎಂಬ ಭಯ ಕೂಡ ಇವರಿಗಿತ್ತು. ಶೋಕಿ ಜೀವನ, ಜೂಜಾಟಕ್ಕೆ ಹಣ ಕೊರತೆಯಾದಾಗ ದೇವರ ಹುಂಡಿಕಳ್ಳತನಕ್ಕೂ ಹೇಸಲಿಲ್ಲ. ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲೂಕಿನಲ್ಲಿ ಬಂಧಿತರಾದ ಎಂಟು ಜನರ ದಿನ ನಿತ್ಯದ ಕಾಯಕ ಕೋಳಿ ಜೂಜಾಟ. ಆಂಧ್ರ ಮತ್ತು ಕರ್ನಾಟಕ ಗಡಿಯಲ್ಲಿನ ಊರ ಹೊರವಲಯದಲ್ಲಿನ ಪ್ರದೇಶ ಇವರ ನಿವಾಸದ ತಾಣವಾಗಿದ್ದು, ಇಲ್ಲಿಂದ ಕದ್ದ ಬೈಕ್‌ಗಳಲ್ಲಿ ಬಟ್ಟೆ, ಬೆಡ್‌ ಶೀಟ್‌, ಪಾತ್ರೆ ವ್ಯಾಪಾರದ ಸೋಗಿನಲ್ಲಿ ಪಟ್ಟಣ, ನಗರ, ಗ್ರಾಮಾಂತರ ಪ್ರದೇಶದಲ್ಲಿ ಸುತ್ತಾಡಿ ಹೊಂಚು ಹಾಕುತ್ತಿದ್ದರು. ರಾತ್ರಿ ವೇಳೆ ದೇವಾಲಯಗಳ ಹುಂಡಿಗಳಿಗೆ ಕನ್ನ ಹಾಕುತ್ತಿದ್ದ ಇವರಿಂದ ಹೊಸದುರ್ಗದಲ್ಲಿ ಆರು ಕಳವಾಗಿದೆ. ಆಂಧ್ರ ಮೂಲ ಹಾಗೂ ಹಿರಿಯೂರು ನಿವಾಸಿಗಳಾದ ರಮೇಶ್‌, ಪ್ರಸಾದ್‌, ಚಿಕ್ಕಮಗಳೂರು ಜಿಲ್ಲೆಯ ಕಡೂರು ಮೂಲದ ಕಲ್ಲೇಶ್‌ ತುಮಕೂರು ಜಿಲ್ಲೆಯ ಶಿರಾ ಮೂಲದ ತಿಪ್ಪೇಶ್‌, ಕೊರಟಗೆರೆ ಮೂಲದ ಗೋಪಿನಾಥ್‌ ಹಾಗೂ ಕಾನೂನು ಸಂಘರ್ಷಕ್ಕೊಳಪಟ್ಟ ಮೂವರು ಬಾಲಕರು ಈ ತಂಡದ ಪ್ರಮುಖರು. ಹುಂಡಿ ಕಳ್ಳತನ ಮಾಡಿ, ಅಕ್ಕಪಕ್ಕದ ರಾಜ್ಯದ ಹೊರವಲಯಕ್ಕೆ ಹೋಗಿ ಕೆಲ ದಿನಗಳ ಕಾಲ ಕಣ್ಮರೆಯಾಗುತ್ತಿದ್ದರು. ತುಮಕೂರಿನ ಶಿರಾದಲ್ಲಿ ಕೋಳಿ ಹೆಚ್ಚಾಗಿ ನಡೆಯುತ್ತಿದ್ದು, ಹುಂಡಿಯಲ್ಲಿ ಕದ್ದ ಹಣದಲ್ಲಿ ಒಟ್ಟಿಗೆ ಊಟ, ನೈಟ್‌ ಶೋ ಫಿಲಂ, ಎಣ್ಣೆ ಪಾರ್ಟಿ ಮಾಡಿ, ಉಳಿದ ಹಣವನ್ನು ಜೂಜಿಗೆ ಬಳಕೆ ಮಾಡಿಕೊಳ್ಳುತ್ತಿದ್ದರು. ಸಾಮಾನ್ಯವಾಗಿ ಹೆಚ್ಚಿನವರು ಇಸ್ಪೀಟ್‌ ಆಟಕ್ಕೆ ಕದ್ದ ಹಣ ಬಳಸಿದರೆ, ಈ ಕಳ್ಳರು ಗ್ರಾಮೀಣ ಕ್ರೀಡೆ ಕೋಳಿ ಜೂಜಿನ ಆಟಕ್ಕೆ ಬಳಸುತ್ತಿದ್ದರು. ಕೋಳಿ ಜೂಜಿನ ನಿಷೇಧ ಕಾರಣ ಗುಪ್ತ ಸ್ಥಳದಲ್ಲಿ ಜೂಜಿನ ಆಟ ನಡೆಯುತ್ತಿತ್ತು. ಬಂಧಿತರಲ್ಲಿ ಇದ್ದ ಸಂಬಂಧಿಕರ ನಡುವೆಯೇ ಕೋಳಿ ಜೂಜಾಟ ಏರ್ಪಾಡಾಗುತ್ತಿತ್ತು. ಕೋಳಿ ಜೂಜಾಟಕ್ಕಾಗಿಯೇ ಪ್ರತ್ಯೇಕ ಅಡ್ಡೆ ಮಾಡಿಕೊಂಡಿದ್ದರು. ಕೋಳಿಗಳ ಮೇಲೆ 8000 ರೂ.ನಿಂದ 10000 ರೂ. ಬೆಟ್‌ ಕಟ್ಟಲಾಗುತ್ತಿತ್ತು ಎಂದು ಹೇಳಲಾಗುತ್ತಿದೆ. ಹಣ ಕೊಟ್ಟು ಕೋಳಿ ಖರೀದಿಕೋಳಿ ಜೂಜಾಟಕ್ಕೋಸ್ಕರವೇ ಹುಂಜಗಳನ್ನು ಸಾಕಿ ಬೆಳೆಸಲಾಗಿದ್ದು, ಅವುಗಳಿಗೆ ಜಗಳದ ತರಬೇತಿ ಕೊಡುತ್ತಿದ್ದವರ ಬಳಿ ಹೋಗಿ ಎರಡರಿಂದ ಮೂರು ಸಾವಿರ ನೀಡಿ ತುಮಕೂರಿನಲ್ಲಿ ಖರೀದಿ ಮಾಡುತ್ತಿದ್ದರು. ನಂತರ ಹಣ ಕೊಟ್ಟು ಕಾಲಿಗೆ ಚಾಕುವನ್ನು ಕಟ್ಟಿಸಿ ಪರಸ್ಪರ ಜಗಳವಾಡಿಸುವುದು. ಕೋಳಿಗೆ ಆದ ಗಾಯಕ್ಕೆ ಅಂಕಗಳ ಆಧಾರದ ಮೇಲೆ ತಂಡದ ಜಯ ನಿರ್ಧಾರವಾಗುತ್ತಿತ್ತು. ಹುಂಜದ ನಡುವೆ ಒಮ್ಮೆ ಹೋರಾಟ ಶುರುವಾಯಿತೆಂದರೆ ಒಂದು ಕೋಳಿ ಸಾಯುವವರೆಗೆ ಮತ್ತೊಂದು ವಿರಮಿಸುವುದಿಲ್ಲ. ಯಾವ ಕೋಳಿ ಗೆಲ್ಲುತ್ತದೆ ಎಂದು ಕಳ್ಳರು ಬೆಟ್‌ ಕಟ್ಟುತ್ತಿದ್ದರು. ಒಟ್ಟಾರೆ ಮೋಜಿನ ಜೀವನಕ್ಕಾಗಿ ಹುಂಡಿಯನ್ನು ಮುರಿಯುತ್ತಿದ್ದ ಹರಾಮಿಗಳ ಹಿಡಿದಿರುವ ಹೊಸದುರ್ಗ ಪೊಲೀಸರ ಕಾರ್ಯಕ್ಕೆ ಶ್ಲಾಘನೆ ವ್ಯಕ್ತವಾಗುತ್ತಿದೆ.
from India & World News in Kannada | VK Polls https://ift.tt/3DZb7Be
