ದುಬೈ: ಯುಎಇ ಮತ್ತು ಒಮಾನ್ ಆತಿಥ್ಯದಲ್ಲಿ ನಡೆಯುತ್ತಿರುವ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್ ಟೂರ್ನಿಯಲ್ಲಿ ಸೆಮಿಫೈನಲ್ ರೇಸ್ನಲ್ಲಿ ಜೀವಂತವಾಗಿ ಉಳಿಯಲು ಶತಾಯ ಗತಾಯ ಹೋರಾಟ ನಡೆಸುತ್ತಿರುವ , ಈಗ ಸೂಪರ್ 12 ಹಂತದಲ್ಲಿನ ತನ್ನ ನಾಲ್ಕನೇ ಪಂದ್ಯದಲ್ಲಿ ಕ್ರಿಕೆಟ್ ಕೂಸು ಸ್ಕಾಟ್ಲೆಂಡ್ ಎದುರು ಬೃಹತ್ ಗೆಲುವಿನ ನಿರೀಕ್ಷೆಯಲ್ಲಿದೆ. ಈ ಮಹತ್ವದ ಪಂದ್ಯದ ಬಗ್ಗೆ ಮಾತನಾಡಿರುವ ಸ್ಕಾಟ್ಲೆಂಡ್ ತಂಡದ ನಾಯಕ ಕೈಲ್ ಕೋಟ್ಸರ್, ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ತಮ್ಮ ತಂಡದ ಆಟಗಾರರು ವಿರಾಟ್ ಕೊಹ್ಲಿ, ಕೇನ್ ವಿಲಿಯಮ್ಸನ್ ಮತ್ತು ಬಾಬರ್ ಆಝಮ್ ಅವರಿಂದ ಕಲಿತುಕೊಳ್ಳುವುದು ಬಹಳಷ್ಟಿದೆ. ಭಾರತ ತಂಡದ ವಿರುದ್ಧದ ಪಂದ್ಯದಲ್ಲಿ ಆಡು ತಾವು ಬಹಳಾ ಉತ್ಸುಕರಾಗಿರುವುದಾಗಿ ಹೇಳಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ ಹಿಂದೆ ತಾವೆಂದೂ ಅವರನ್ನು ಭೇಟಿಯಾಗಿಲ್ಲ. ಈಗ ಈ ಪಂದ್ಯದ ಮೂಲಕ ಅವರೊಟ್ಟಿಗೆ ಮಾತನಾಡಲು ಎದುರು ನೋಡುತ್ತಿರುವುದಾಗಿ ಪಂದ್ಯ ಪೂರ್ವ ಪತ್ರಿಕಾಗೋಷ್ಠಿಯಲ್ಲಿ ಹೇಳಿರುವ ಕೈಲ್, ಜೊತೆಗೆ ಕ್ಯಾಪ್ಟನ್ ಕೊಹ್ಲಿ ತಮ್ಮ ಡ್ರೆಸಿಂಗ್ ರೂಮ್ಗೆ ಭೇಟಿ ನೀಡಬೇಕು ಎಂಬ ವಿಶೇಷ ಮನವಿಯನ್ನು ಮುಂದಿಟ್ಟಿದ್ದಾರೆ. ತಮ್ಮ ಆಟಗಾರರೊಂದಿಗೆ ಮಾತನಾಡಿ ಅವರಿಗೆ ಸ್ಫೂರ್ತಿ ತುಂಬುವಂತೆ ಕೇಳಿಕೊಂಡಿದ್ದಾರೆ. "ವಿರಾಟ್ ಕೊಹ್ಲಿ ಕ್ರಿಕೆಟ್ ಆಟದ ಬಹುದೊಡ್ಡ ರಾಯಭಾರಿ. ನಮ್ಮ ತಂಡದ ಆಟಗಾರರು ಅವರೊಟ್ಟಿಗೆ ಮಾತನಾಡಬೇಕು ಎಂಬುದು ನನ್ನ ಬಯಕೆ. ವಿರಾಟ್ ಕೊಹ್ಲಿ, ಕೇನ್ ವಿಲಿಯಮ್ಸನ್ ಅಥವಾ ರಶೀದ್ ಖಾನ್ ಇವರಿಂದ ನಮ್ಮ ಆಟಗಾರರು ಕಲಿಯುವುದು ಬಹಳಷ್ಟಿದೆ. ಕಲಿಕೆಗೆ ಇದಕ್ಕಿಂತಲೂ ದೊಡ್ಡ ಅವಕಾಶ ಮತ್ತೊಂದು ಸಿಗಲಾರದು," ಎಂದು ಕೈಲ್ ಕೋಟ್ಸರ್ ಹೇಳಿದ್ದಾರೆ. "ಪ್ರತಿಯೊಂದು ಅನುಭವದಿಂದಲೂ ನಮ್ಮ ತಂಡ ಸಾಕಷ್ಟು ಕಲಿತುಕೊಳ್ಳಲಿದೆ. ಭಾರತ, ಪಾಕಿಸ್ತಾನ, ನ್ಯೂಜಿಲೆಂಡ್ ಮತ್ತು ಬಾಂಗ್ಲಾದೇಶ ತಂಡಗಳ ಎದುರು ಆಡುವ ಅವಕಾಶ ಸಿಕ್ಕಿರುವುದು ಅದ್ಭುತ ಅನುಭವ. ಶ್ರೇಷ್ಠ ತಂಡಗಳ ಎದುರು ಇಷ್ಟು ದೊಡ್ಡ ವೇದಿಕೆಯಲ್ಲಿ ಆಡುವ ಅನುಭವವೇ ಬೇರೆ. ನಮ್ಮ ತಂಡದ ಆಟಗಾರರಿಗೆ ಇದು ಜೀವನದಲ್ಲಿ ಒಮ್ಮೆ ಸಿಗುವ ಅನುಭವ. ವಿಶ್ವದ 12ನೇ ಶ್ರೇಯಾಂಕ ಪಡೆದಿರುವ ನಮ್ಮ ತಂಡ ಇಲ್ಲಿಯವರೆಗೆ ಬಂದಿರುವುದು ಬಹುದೊಡ್ಡ ಸಾಧನೆ," ಎಂದಿದ್ದಾರೆ. ಅರ್ಹತಾ ಸುತ್ತಿನಲ್ಲಿ ಭರ್ಜರಿ ಪ್ರದರ್ಶನ ನೀಡಿ ಸೂಪರ್ 12 ಹಂತಕ್ಕೆ ಕಾಲಿಟ್ಟಿರುವ ಸ್ಕಾಟ್ಲೆಂಡ್ ತಂಡ ಗೆಲುವಿನ ಹಳಿ ಕಂಡುಕೊಳ್ಳಲು ವಿಫಲವಾಗಿದೆ. 3 ಪಂದ್ಯ ಸೋತಿರುವ ಸ್ಕಾಟ್ಲೆಂಡ್ ತನ್ನ ಮುಂದಿನ ಪಂದ್ಯಗಳಲ್ಲಿ ಟೀಮ್ ಇಂಡಿಯಾ ಮತ್ತು ಪಾಕಿಸ್ತಾನ ತಂಡಗಳ ಸವಾಲು ಎದುರಿಸಲಿದೆ. "ವಿರಾಟ್ ಜೊತೆಗೆ ಟಾಸ್ ವೇಳೆ ನಿಲ್ಲುವುದೇ ವಿಶೇಷ ಸಂಗತಿ. ಕೇವಲ ನನಗಷ್ಟೇ ಹಲವರಿಗೆ ಅವರು ಸ್ಫೂರ್ತಿಯಾಗಿದ್ದಾರೆ. ಟೀಮ್ ಇಂಡಿಯಾಗೆ ಕಠಿಣ ಪೈಪೋಟಿ ನೀಡುವ ಪ್ರಯತ್ನ ಮಾಡಲಿದ್ದೇವೆ. ಈ ಸವಾಲಿನ ಕಠಿಣತೆ ಬಗ್ಗೆ ನಮಗೆ ಅರಿವಿದೆ," ಎಂದು ತಮ್ಮ ಮಾತುಗಳನ್ನು ಮುಗಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/31p9T3z
