ಕೋಪನ್ಹ್ಯಾಗನ್: ಯುರೋಪ್ನ ಬಹುತೇಕ ರಾಷ್ಟ್ರಗಳಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ದಿನೇ ದಿನೆ ಜಾಸ್ತಿಯಾಗುತ್ತಿರುವ ಕಾರಣ ಫೆಬ್ರವರಿ ವೇಳೆಗೆ ಸೋಂಕಿನಿಂದಲೇ ಸುಮಾರು ಐದು ಲಕ್ಷ ಜನ ಮೃತಪಡಲಿದ್ದಾರೆ ಎಂದು (ಡಬ್ಲ್ಯೂಎಚ್ಒ) ಯುರೋಪ್ ನಿರ್ದೇಶಕ ಹಾನ್ಸ್ ಕ್ಲೂಗ್ ಹೇಳಿದ್ದಾರೆ. "ಯುರೋಪಿಯನ್ ಪ್ರದೇಶದ 53 ರಾಷ್ಟ್ರಗಳಲ್ಲಿಯೂ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿರುವುದು ಆತಂಕ ತಂದಿದೆ. ಇದೇ ರೀತಿ ಸೋಂಕಿನ ಪ್ರಸರಣ ಹೆಚ್ಚಾದರೆ ಫೆಬ್ರವರಿ ವೇಳೆಗೆ ಲಕ್ಷಾಂತರ ಜನ ಮೃತಪಡುವ ಸಾಧ್ಯತೆ ಇದೆ," ಎಂದು ಅವರು ಎಚ್ಚರಿಸಿದ್ದಾರೆ. "ಕೊರೊನಾ ನಿರೋಧಕ ಲಸಿಕೆ ಅಭಿಯಾನಕ್ಕೆ ವೇಗ ನೀಡದಿರುವುದು, ಸಾಮಾಜಿಕ ಅಂತರ ಕಾಪಾಡುವುದು ಸೇರಿ ಹಲವು ಮುನ್ನೆಚ್ಚರಿಕೆ ಕ್ರಮ ತೆಗೆದುಕೊಳ್ಳದ ಕಾರಣ ಯುರೋಪ್ ಈಗ ಮತ್ತೆ ಕೊರೊನಾ ಹರಡುವ ಕೇಂದ್ರವಾಗಿದೆ. ಲಸಿಕೆ ವಿತರಣೆ ಪ್ರಮಾಣ ಕಡಿಮೆ ಇರುವ ದೇಶಗಳಲ್ಲಿಯೇ ಹೆಚ್ಚಿನ ಜನ ಆಸ್ಪತ್ರೆಗೆ ದಾಖಲಾಗುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಸೋಂಕಿನ ವಿರುದ್ಧ ಹೋರಾಡುವ ವಿಧಾನವನ್ನೇ ಬದಲಾಯಿಸುವ ಅನಿವಾರ್ಯತೆ ಇದೆ," ಎಂದು ಅವರು ಹೇಳಿದ್ದಾರೆ. ಡಬ್ಲ್ಯೂಎಚ್ಒ ಪ್ರಕಾರ ಯುರೋಪಿಯನ್ ಪ್ರದೇಶದಲ್ಲಿ 53 ರಾಷ್ಟ್ರಗಳಿದ್ದು, ಕೆಲವು ಪ್ರದೇಶಗಳು ಹಾಗೂ ಸೆಂಟ್ರಲ್ ಏಷ್ಯಾದ ಕೆಲವು ರಾಷ್ಟ್ರಗಳು ಇದೇ ಪ್ರದೇಶದ ವ್ಯಾಪ್ತಿಗೆ ಬರುತ್ತವೆ. ಯುರೋಪ್ನಲ್ಲಿ ಸತತ ಐದು ವಾರಗಳಿಂದಲೂ ಸೋಂಕಿತರ ಸಂಖ್ಯೆ ಗಣನೀಯವಾಗಿ ಏರಿಕೆಯಾಗುತ್ತಿದೆ. ಕಳೆದ ವಾರವೇ ಪ್ರಕರಣಗಳ ಸಂಖ್ಯೆ ಶೇ. 18ರಷ್ಟು ಹೆಚ್ಚಾಗಿದೆ. ಅತ್ತ, ಚೀನಾದಲ್ಲೂ ಸಾಂಕ್ರಾಮಿಕದ ಅಬ್ಬರ ಜಾಸ್ತಿಯಾಗುತ್ತಿದ್ದು, ರಾಜಧಾನಿ ಬೀಜಿಂಗ್ ಸೇರಿ ದೇಶದ ಅರ್ಧದಷ್ಟು ಪ್ರಾಂತ್ಯಗಳಿಗೆ ಸೋಂಕು ಹರಡಿದೆ. ಹಾಗಾಗಿ ಕಠಿಣ ನಿಯಮ ಜಾರಿಗೊಳಿಸಲಾಗಿದ್ದು, ಜನರಿಗೆ ಅಗತ್ಯ ವಸ್ತುಗಳ ಶೇಖರಣೆ ಮಾಡಿಟ್ಟುಕೊಳ್ಳುವಂತೆ ಸೂಚಿಸಲಾಗಿದೆ. ಅದರಲ್ಲೂ ಬೀಜಿಂಗ್ನಲ್ಲಿ ಪ್ರಕರಣಗಳ ಸಂಖ್ಯೆ ಜಾಸ್ತಿಯಾಗುತ್ತಿರುವ ಕಾರಣ ಜನರ ಸಂಚಾರ ನಿರ್ಬಂಧಿಸಲಾಗುತ್ತಿದೆ. ಸುಮಾರು 23 ಪ್ರದೇಶಗಳ 123 ರೈಲು ನಿಲ್ದಾಣಗಳಲ್ಲಿ ಟಿಕೆಟ್ ಮಾರಾಟ ಸ್ಥಗಿತಗೊಳಿಸಲಾಗಿದೆ. ಹಾಗೆಯೇ ನಗರದಾದ್ಯಂತ ನಿಯಮ ಬಿಗಿಗೊಳಿಸಲಾಗಿದ್ದು, ಜನರ ಓಡಾಟದ ಮೇಲೆ ನಿಗಾ ಇರಿಸಲಾಗಿದೆ.
from India & World News in Kannada | VK Polls https://ift.tt/3kreDN5
