: ಬಿಬಿಎಂಪಿಯ ವ್ಯಾಪ್ತಿಯಲ್ಲಿ ಕೋವಿಡ್‌ ಲಸಿಕೆ ಪ್ರಮಾಣವನ್ನು ಹೆಚ್ಚಿಸಲು ಕೇರ್‌ ಇಂಡಿಯಾ ಸಹಯೋಗದಲ್ಲಿ 80 ಲಸಿಕಾ ದ್ವಿಚಕ್ರ ವಾಹನ ಹಾಗೂ 16 ಮೊಬೈಲ್‌ ಲಸಿಕಾ ವಾಹನಗಳಿಗೆ ಬುಧವಾರ ಮುಖ್ಯ ಆಯುಕ್ತ ಗೌರವ್‌ ಗುಪ್ತ ಚಾಲನೆ ನೀಡಿದರು. ಪ್ರತಿಯೊಂದು ವಲಯದಲ್ಲಿ 8 ದ್ವಿಚಕ್ರ ವಾಹನ ಮತ್ತು 2 ಮೊಬೈಲ್‌ ವಾಹನಗಳನ್ನು ಒದಗಿಸಲಾಗಿದೆ. ಈ ವಾಹನಗಳು ಬ್ಲಾಕ್‌ ಮತ್ತು ಲೇನ್‌ ಮಟ್ಟದಲ್ಲಿ ಲಸಿಕೆ ನೀಡಲು ತೆರಳುವ ಆರೋಗ್ಯ ಸಿಬ್ಬಂದಿ ಜತೆ ಕಾರ್ಯನಿರ್ವಹಿಸಲಿವೆ. ಲಸಿಕಾ ವಾಹನಗಳ ಸಿಬ್ಬಂದಿಯು ಮನೆ ಮನೆಗೆ ತೆರಳಿ, ಲಸಿಕೆ ಪಡೆಯದವರ ಮಾಹಿತಿ ಪಡೆಯಲಿವೆ. ಆನಂತರ ಅವರನ್ನು ಬ್ಲಾಕ್‌ ಮತ್ತು ಲೇನ್‌ ಮಟ್ಟದ ಶಿಬಿರಗಳಿಗೆ ಕರೆದೊಯ್ದು ಲಸಿಕೆ ಕೊಡಿಸಲಿದ್ದಾರೆ. ''ನಗರದಲ್ಲಿ ಇಲ್ಲಿಯವರೆಗೆ 1,36,99,018 ಡೋಸ್‌ ಲಸಿಕೆ ನೀಡಲಾಗಿದೆ. ಒಟ್ಟು 80,57,563 ಮಂದಿ(ಶೇ.88) ಮೊದಲ ಡೋಸ್‌ ಮತ್ತು 56,41,455 ಮಂದಿ(ಶೇ.62) ಎರಡನೇ ಡೋಸ್‌ ಲಸಿಕೆ ಪಡೆದುಕೊಂಡಿದ್ದಾರೆ. ಪಾಲಿಕೆಯ ಎಲ್ಲ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಲಸಿಕೆ ಹಾಕಲಾಗುತ್ತಿದೆ. ಯಲಹಂಕದ ಡಾ. ಬಿ.ಆರ್‌.ಅಂಬೇಡ್ಕರ್‌ ಭವನ, ಮಲ್ಲೇಶ್ವರದ ಯಂಗ್‌ಸ್ಟರ್ಸ್‌ ಕಬಡ್ಡಿ ಮೈದಾನದಲ್ಲಿ ಸ್ಥಾಪಿಸಿರುವ ಬೃಹತ್‌ ಲಸಿಕಾ ಕೇಂದ್ರಗಳಲ್ಲೂ ಲಸಿಕೆ ವಿತರಿಸಲಾಗುತ್ತಿದೆ. ವಾಕ್‌ ಇನ್‌ ಮತ್ತು ಡ್ರೈವ್‌ ಇನ್‌ ಮೂಲಕ ವಾಹನಗಳಲ್ಲೇ ಕುಳಿತು ಲಸಿಕೆ ಪಡೆಯುವ ವ್ಯವಸ್ಥೆ ಮಾಡಲಾಗಿದೆ,'' ಎಂದು ಮುಖ್ಯ ಆಯುಕ್ತ ಗೌರವ್‌ ಗುಪ್ತ ತಿಳಿಸಿದರು. ''ಮೊದಲ ಡೋಸ್‌ ಲಸಿಕೆ ಪಡೆದು, ಅವಧಿ ಮುಗಿದರೂ ಎರಡನೇ ಡೋಸ್‌ ಲಸಿಕೆ ಪಡೆಯದಿರುವವರ ಪಟ್ಟಿಯನ್ನು ಕೋವಿನ್‌ ಪೋರ್ಟಲ್‌ನಿಂದ ಪಡೆಯಲಾಗಿದೆ. ಅದರಂತೆ ಎರಡನೇ ಡೋಸ್‌ ಪಡೆಯದವರಿಗೆ ಕರೆ ಮಾಡಿ, ಲಸಿಕೆ ಪಡೆಯುವಂತೆ ಮನವಿ ಮಾಡಿಕೊಳ್ಳಲಾಗುತ್ತಿದೆ. ಆರೋಗ್ಯ ಸಿಬ್ಬಂದಿ ತಂಡವು ಎಲ್ಲ ವಿಧಾನಸಭಾ ಕ್ಷೇತ್ರಗಳ ವ್ಯಾಪ್ತಿಯ ತಲಾ ಒಂದು ವಾರ್ಡ್‌ನಲ್ಲಿಮನೆ ಮನೆಗೆ ಭೇಟಿ ಕೊಟ್ಟು, ಲಸಿಕೆ ಪಡೆಯದವರಿಗೆ ಲಸಿಕೆ ಹಾಕುತ್ತಿವೆ. ಇದುವರೆಗೆ ಸುಮಾರು 70 ವಾರ್ಡ್‌ಗಳಲ್ಲಿ 10 ದಿನಗಳಿಂದ 35 ಸಾವಿರ ಮಂದಿಗೆ ಲಸಿಕೆ ನೀಡಲಾಗಿದೆ,'' ಎಂದು ಮಾಹಿತಿ ನೀಡಿದರು. ಈ ಸಂದರ್ಭದಲ್ಲಿ ಪಾಲಿಕೆಯ ವಿಶೇಷ ಆಯುಕ್ತ ಡಾ. ಕೆ.ವಿ.ತ್ರಿಲೋಕ್‌ಚಂದ್ರ, ಮುಖ್ಯ ಆರೋಗ್ಯಾಧಿಕಾರಿ ಡಾ. ಬಾಲಸುಂದರ್‌ ಮತ್ತಿತರರು ಉಪಸ್ಥಿತರಿದ್ದರು.
from India & World News in Kannada | VK Polls https://ift.tt/3p2eh0L
