ಬೆಂಗಳೂರು: ಶನಿವಾರ ರಾತ್ರಿ ಸನ್‌ರೈಸರ್ಸ್ ಹೈದರಾಬಾದ್‌ ವಿರುದ್ಧ ಸೋಲಿನ ಬೇಸರದ ಹೊರತಾಗಿಯೂ ನಾಯಕತ್ವ ತಂಡ ಇಂದಿನ ಪ್ರಯುಕ್ತ ಕೋಟ್ಯಾಂತರ ಕನ್ನಡಿಗರಿಗೆ ಶುಭ ಹಾರೈಸಿದೆ. ಕನ್ನಡಿಗ ದೇವದತ್‌ ಪಡಿಕ್ಕಲ್‌, ನಾಯಕ ವಿರಾಟ್‌ ಕೊಹ್ಲಿ, ಎಬಿ ಡಿವಿಲಿಯರ್ಸ್, ಡೇಲ್‌ ಸ್ಟೇನ್‌, ಶಿವಂ ದುಬೆ, ಮೊಹಮ್ಮದ್‌ ಸಿರಾಜ್‌, ಉಮೇಶ್‌ ಯಾದವ್‌, ಪವನ್‌ ದೇಶ್‌ಪಾಂಡೆ ಸೇರಿದಂತೆ ಆಟಗಾರರು ಕರ್ನಾಟಕ ರಾಜ್ಯೋತ್ಸವದ ಶುಭಾಶಯಗಳನ್ನು ಕೋರಿರುವ ವಿಡಿಯೋವನ್ನು ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತನ್ನ ಅಧಿಕೃತ ಟ್ವಿಟರ್‌ ಖಾತೆ ಸೇರಿದಂತೆ ಸೋಶಿಯಲ್ ಮೀಡಿಯಾ ಖಾತೆಗಳಲ್ಲಿ ಅಪ್‌ಲೋಡ್ ಮಾಡಿದೆ. ಆರ್‌ಸಿಬಿ ಆಟಗಾರರು ಕನ್ನಡ ರಾಜ್ಯೋತ್ಸವಕ್ಕೆ ಶುಭಾಶಯ ಕೋರುವ ಮೂಲಕ ಕರ್ನಾಟಕದ ಅಭಿಮಾನಿಗಳ ಪ್ರೀತಿಗೆ ಪಾತ್ರರಾದರು. ಅಲ್ಲದೆ, ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡದ ಆಟಗಾರರಿಗೂ ಅಭಿಮಾನಿಗಳು ಶುಭ ಕೋರಿದರು. ಪ್ರಸಕ್ತ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಆರ್‌ಸಿಬಿ ಆಡಿರುವ 13 ಪಂದ್ಯಗಳಲ್ಲಿ 7 ಪಂದ್ಯಗಳಲ್ಲಿ ಜಯ ಸಾಧಿಸಿದೆ. ಒಟ್ಟು 14 ಅಂಕಗಳೊಂದಿಗೆ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಎರಡನೇ ಸ್ಥಾನದಲ್ಲಿದೆ. ನಾಳೆ(ಸೋಮವಾರ) ಡೆಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧ ಎರಡನೇ ಸ್ಥಾನಕ್ಕಾಗಿ ಪೈಪೋಟಿ ನಡೆಸಲಿದೆ. ಶನಿವಾರ ಶಾರ್ಜಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದಿದ್ದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್‌ ಮಾಡಿದ್ದ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ನಿಗದಿತ 20 ಓವರ್‌ಗಳಿಗೆ ಏಳು ವಿಕೆಟ್‌ಗಳನ್ನು ಕಳೆದುಕೊಂಡು 120 ರನ್‌ಗಳನ್ನು ಗಳಿಸಿತ್ತು. ಬಳಿಕ ಗುರಿ ಹಿಂಬಾಲಿಸಿದ್ದ ಸನ್‌ರೈಸರ್ಸ್ ಹೈದರಾಬಾದ್‌ ತಂಡ 14.1 ಓವರ್‌ಗಳಿಗೆ ಐದು ವಿಕೆಟ್‌ಗಳ ನಷ್ಟಕ್ಕೆ 121 ರನ್‌ಗಳನ್ನು ಗಳಿಸಿ ಗೆಲುವಿನ ದಡ ಸೇರಿತ್ತು. ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ್ದ ಎಬಿ ಡಿವಿಲಿಯರ್ಸ್, "ಪವರ್‌ಪ್ಲೇನಲ್ಲಿ ಸನ್‌ರೈಸರ್ಸ್ ಬೌಲರ್‌ಗಳು ಉತ್ತಮವಾಗಿ ಬೌಲಿಂಗ್‌ ಮಾಡಿದ್ದಾರೆ. ಅವರು ಹೆಚ್ಚು ತಪ್ಪುಗಳನ್ನು ಮಾಡಲಿಲ್ಲ. ಪವರ್‌ಪ್ಲೇ ಮುಗಿದ ಬಳಿಕ ರಶೀದ್‌ ಖಾನ್‌ ಬೌಲಿಂಗ್‌ ಆಡುವುದು ತುಂಬಾ ಕಷ್ಟವಿತ್ತು ಹಾಗೂ ಅವರು ಹೆಚ್ಚು ಕೆಟ್ಟ ಎಸೆತಗಳನ್ನು ಹಾಕಲಿಲ್ಲ. ಅವರು ನಮ್ಮ ಮೇಲೆ ಹೆಚ್ಚಿನ ಒತ್ತಡವನ್ನು ಹೇರಿದರು," ಎಂದು ತಿಳಿಸಿದರು. ''ನಾನು ಹಾಗೂ ಜೋಶ್‌ ಫಿಲಿಪ್‌ ಔಟ್‌ ಆಗಿದ್ದು, ಪಂದ್ಯದಲ್ಲಿ ಟರ್ನಿಂಗ್ ಪಾಯಿಂಟ್‌ ಆಯಿತು. ಇದರಿಂದ ನಮಗೆ 20 ರಿಂದ 30 ರನ್‌ಗಳು ಕಡಿಮೆಯಾಯಿತು. ನಾವು ಗಳಿಸಿದ್ದ ಮೊತ್ತ ದಿನದ ಕೊನೆಯಲ್ಲಿ ಸಾಕಾಗಲಿಲ್ಲ. ಎರಡನೇ ಇನಿಂಗ್ಸ್‌ನಲ್ಲಿ ಮೈದಾನ ಸ್ವಲ್ಪ ತೇವವಾಗಿದ್ದರಿಂದ ಪರಿಸ್ಥಿತಿ ವಿಭಿನ್ನವಾಗಿತ್ತು. ಹಾಗಾಗಿ 140 ರನ್‌ಗಳನ್ನು ಗಳಿಸಿದ್ದರೂ ಸ್ವಲ್ಪ ಕಡಿಮೆ ಎನಿಸುತ್ತಿತ್ತು," ಎಂದು ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2TEoGAx
