ನಾಗರಾಜ್‌ ನವೀಮನೆ ಮೈಸೂರು: ಎಲ್ಲೆಂದರಲ್ಲಿ ಎಸೆಯುವವರ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿರುವ ಮಹಾ ನಗರ ಕಳೆದ ಆರು ತಿಂಗಳಲ್ಲಿ 68 ಸಾವಿರ ರೂ. ವಸೂಲಿ ಮಾಡಿದೆ. ನಗರದ 65 ವಾರ್ಡ್‌ಗಳಿಂದ 9 ಜೋನ್‌ಗಳಿದ್ದು, ಕಸ ಎಸೆಯುವವರ ವಿರುದ್ಧ ಕ್ರಮ ಕೈಗೊಳ್ಳಲು ಆಯಾ ಬಡಾವಣೆಗಳ ಹೆಲ್ತ್‌ ಇನ್ಸ್‌ಪೆಕ್ಟರ್‌ ನೇತೃತ್ವದಲ್ಲಿ ತಂಡವೊಂದನ್ನು ಪಾಲಿಕೆ ನೇಮಿಸಿದೆ. ಒಂಬತ್ತು ಜೋನ್‌ಗಳಲ್ಲಿ ಮೂರು ಮಂದಿ ಎಕ್ಸಿಕ್ಯುಟೀವ್‌ಗಳು ಇದ್ದಾರೆ. ಅಲ್ಲದೆ, ಗಸ್ತು ವಾಹನಗಳನ್ನು ಹೆಚ್ಚಿಸಲಾಗಿದ್ದು, ಪಾಲಿಕೆಯಿಂದ ದೂರು ಬಂದರೆ ನೇರವಾಗಿ ದಾಳಿ ನಡೆಸಿ ದಂಡ ಹಾಕಲಾಗುತ್ತಿದೆ. ಮೈಸೂರು ಸ್ವಚ್ಛ ನಗರಿ. ಇಡೀ ದೇಶಕ್ಕೆ ಮಾದರಿಯಾಗಿದೆ. ಈ ನಿಟ್ಟಿನಲ್ಲಿ ನಾಗರಿಕರಿಗೂ ಕಸವನ್ನು ಎಲ್ಲೆಂದರಲ್ಲಿ ಎಸೆಯಬೇಡಿ ಎಂಬ ಜಾಗೃತಿಯನ್ನೂ ಪಾಲಿಕೆ ಮೂಡಿಸುತ್ತಿದೆ. ಇಷ್ಟರ ಹೊರತಾಗಿಯೂ ನಗರ ಹೊರವಲಯವಾದ ರಿಂಗ್‌ ರಸ್ತೆ, ಖಾಲಿ ನಿವೇಶನ, ಬಡಾವಣೆಯ ಮೂಲೆ, ಖಾಲಿ ಚರಂಡಿ, ಸ್ಮಶಾನ, ಮೈದಾನ, ಖಾಲಿ ಪೊದೆಯಂತಹ ಜಾಗಗಳಲ್ಲಿ ಹಸಿ, ಒಣ ಹಾಗೂ ಘನ ಕಸವನ್ನು ಎಸೆಯಲಾಗುತ್ತಿದೆ. ಕಟ್ಟಡ ನಿರ್ಮಾಣಕ್ಕೆ ಬಳಸಿ ಉಳಿದ ತ್ಯಾಜ್ಯವನ್ನೂ ಸಿಕ್ಕಸಿಕ್ಕಲ್ಲಿ ಎಸೆಯಲಾಗುತ್ತಿದೆ. ಇದನ್ನು ಗಂಭೀರವಾಗಿ ಪರಿಗಣಿಸಿರುವ ನಗರಪಾಲಿಕೆ ದಾಳಿ ಪ್ರಮಾಣವನ್ನು ಹೆಚ್ಚು ಮಾಡಿದ್ದು, ಸ್ವಚ್ಛ ಮೈಸೂರಿಗೆ ಪೂರಕವಾಗಿ ಪಾಲಿಕೆ ಕಾರ್ಯ ನಿರ್ವಹಿಸುತ್ತಿದೆ. 11 ಬ್ಲ್ಯಾಕ್‌ ಸ್ಪಾಟ್‌: ರಿಂಗ್‌ ರಸ್ತೆಗಳ ಬಳಿ ಹೆಚ್ಚಿನ ಪ್ರಮಾಣದಲ್ಲಿ ಕಸ ಎಸೆಯುವ ಪ್ರಕರಣಗಳು ಕಂಡು ಬಂದಿವೆ. ಅಲ್ಲದೆ, ಹೋಟೆಲ್‌ ಕಸ, ಮಾಂಸ, ಕೋಳಿ ತ್ಯಾಜ್ಯಗಳನ್ನು ಬಡಾವಣೆಯ ಖಾಲಿ ಜಾಗಗಳಲ್ಲಿ ಹಾಕಿರುವ ಪ್ರಕರಣವೂ ವರದಿಯಾಗಿದೆ. ಕೆ.ಜಿ.ಕೊಪ್ಪಲು, ಕುವೆಂಪು ನಗರ ರೈಲ್ವೆ ಅಂಡರ್‌ ಬ್ರಿಡ್ಜ್‌ನ ಮೂಲೆಯಲ್ಲಿ ರಾತ್ರಿ ವೇಳೆ ಕಸ ಎಸೆಯುತ್ತಾರೆ. ಹಾಗಾಗಿ ಆ ಭಾಗಗಳಲ್ಲಿ ಗಸ್ತು ಹೆಚ್ಚಿಸಲಾಗಿದ್ದು, ಅಧಿಕಾರಿಗಳ ಕಣ್ಣಿಗೆ ಬಿದ್ದರೆ ಸ್ಥಳದಲ್ಲಿ ದಂಡ ವಿಧಿಸಲಾಗುತ್ತಿದೆ. ಇದಕ್ಕಾಗಿ 11 ಬ್ಲ್ಯಾಕ್‌ ಸ್ಪಾಟ್‌ಗಳನ್ನು ಗುರುತಿಸಲಾಗಿದ್ದು, ನಿಯಮಿತವಾಗಿ ಈ ಸ್ಥಳಗಳನ್ನು ಪರಿಶೀಲನೆ ಮಾಡಲಾಗುತ್ತಿದೆ. ದಂಡ ಮೊತ್ತ ಎಷ್ಟು: ಕಸ ಎಷ್ಟು ಪ್ರಮಾಣದಲ್ಲಿ ಹಾಕಿರುತ್ತಾರೆ ಎಂಬುದರ ಮೇಲೆ ದಂಡದ ಮೊತ್ತ ನಿರ್ಧಾರವಾಗುತ್ತದೆ. ಸಾಮಾನ್ಯವಾಗಿ 500 ರೂ.ನಿಂದ 10 ಸಾವಿರದವರೆಗೆ ದಂಡ ವಸೂಲಿ ಮಾಡಲಾಗಿದೆ. ಎಷ್ಟೋ ಬಾರಿ ಆಟೋ, ಟ್ರ್ಯಾಕ್ಟರ್‌ಗಳಲ್ಲೂ ಕಸ ತುಂಬಿಕೊಂಡು ಬಂದಿರುವುದು ಉಂಟು. ಈ ವೇಳೆ ಆರೋಗ್ಯಾಧಿಕಾರಿಗಳು ಖಚಿತ ಮಾಹಿತಿ ಪಡೆದುಕೊಂಡು ದಾಳಿ ನಡೆಸಿ ದಂಡ ವಿಧಿಸಿದ್ದಾರೆ. ಹೆಚ್ಚಿದ ಗಸ್ತು: ಈಗಾಗಲೇ ಪಾಲಿಕೆ ಹೆಲ್ತ್‌ ಇನ್ಸ್‌ಪೆಕ್ಟರ್‌ ನೇತೃತ್ವದ ತಂಡ ಹಗಲು, ರಾತ್ರಿ ಎನ್ನದೆ ಗಸ್ತು ತಿರುಗುತ್ತಿದ್ದು, ಅಕ್ರಮವಾಗಿ ಕಸ ಎಸೆಯುವವರ ವಿರುದ್ಧ ಕ್ರಮ ಕೈಗೊಂಡಿದ್ದಾರೆ. ಎಷ್ಟೋ ಬಾರಿ ಎಚ್ಚರಿಕೆ ಕೊಟ್ಟು ಕಳುಹಿಸಲಾಗಿದೆ. ಬೆಳಗ್ಗೆ ವಾಕಿಂಗ್‌ ಹೋಗುವಾಗ ಅಥವಾ ಆಫೀಸ್‌ಗೆ ಹೋಗುವಾಗ ಕಸ ಎಸೆದು ಹೋಗುವ ಪರಿಪಾಠವಿದೆ. ಪ್ಲಾಸ್ಟಿಕ್‌ ಮಾರಾಟಕ್ಕೂ ಕಡಿವಾಣ: ಕಸದ ಜತೆಗೆ ಪ್ಲಾಸ್ಟಿಕ್‌ ಬಳಕೆ ಮತ್ತು ಮಾರಾಟವನ್ನು ನಿಯಂತ್ರಿಸುವ ನಿಟ್ಟಿನಲ್ಲಿ ಪಾಲಿಕೆ ಅಧಿಕಾರಿಗಳು ನಗರದ ಹಲವು ಅಂಗಡಿಗಳ ಮೇಲೆ ದಾಳಿ ನಡೆಸಿ ಅಪಾರ ಪ್ರಮಾಣದ ಪ್ಲಾಸ್ಟಿಕ್‌ ವಸ್ತುವನ್ನು ವಶಪಡಿಸಿಕೊಂಡಿದ್ದಾರೆ. ಜತೆಗೆ ದಂಡ ಪ್ರಯೋಗಕ್ಕೂ ಮುಂದಾಗಿದ್ದಾರೆ. ಪ್ಲಾಸ್ಟಿಕ್‌ ಕವರ್‌, ಗ್ಲಾಸ್‌ (ನೀರಿನ ಲೋಟ) ಸೇರಿದಂತೆ ವಿವಿಧ ಪರಿಕರಗಳನ್ನು ವಶಕ್ಕೆ ತೆಗೆದುಕೊಂಡಿದ್ದಾರೆ. ಸಿಕ್ಕಸಿಕ್ಕಲ್ಲಿ ಕಸ ಎಸೆಯುವವರ ವಿರುದ್ಧ ಪಾಲಿಕೆ ವತಿಯಿಂದ ನಿಯಮಿತವಾಗಿ ದಾಳಿ ನಡೆಸುವ ಜತೆಗೆ ದಂಡ ವಸೂಲಿಯನ್ನು ಮಾಡಲಾಗುತ್ತಿದೆ. ಮೈಸೂರು ಸ್ವಚ್ಛನಗರಿ ಎಂಬ ಗರಿಮೆ ಪಡೆದಿದೆ. ನಮ್ಮ ಸುತ್ತಮುತ್ತಲಿನ ಪರಿಸರ ಶುಚಿಯಾಗಿದ್ದರೆ ನಾವು ಆರೋಗ್ಯವಾಗಿರಬಹುದು. ಹಾಗಾಗಿ ನಾಗರಿಕರು ಜವಾಬ್ದಾರಿಯಿಂದ ವರ್ತಿಸಬೇಕಿದೆ ಎಂದು ಮೈಸೂರು ನಗರ ಪಾಲಿಕೆ ಆಯುಕ್ತ-ಗುರುದತ್ತ ಹೆಗ್ಡೆ ಹೇಳಿದ್ದಾರೆ. ರಿಂಗ್‌ ರಸ್ತೆ ಸೇರಿದಂತೆ ಎಲ್ಲೆಂದರಲ್ಲಿ ಕಸ ಸುರಿಯುವವರ ವಿರುದ್ಧ ಕಳೆದ ಆರು ತಿಂಗಳಿನಲ್ಲಿ 68 ಸಾವಿರಕ್ಕೂ ಹೆಚ್ಚು ದಂಡ ವಸೂಲಿ ಮಾಡಲಾಗಿದೆ. ಕೊರೊನಾ ಕಾರಣದಿಂದ ಹೆಚ್ಚು ದಾಳಿ ನಡೆಸಲು ಸಾಧ್ಯವಾಗಿರಲಿಲ್ಲ. ಇದೀಗ ದಂಡ ವಸೂಲಾತಿಯನ್ನು ಮತ್ತಷ್ಟು ಚುರುಕುಗೊಳಿಸಲಾಗುವುದು ಎಂದು ಪಾಲಿಕೆ ಆರೋಗ್ಯಾಧಿಕಾರಿ ಡಾ.ನಾಗರಾಜು ಎಚ್ಚರಿಕೆ ನೀಡಿದ್ದಾರೆ.
from India & World News in Kannada | VK Polls https://ift.tt/2HSSiYh
