ಬೆಂಗಳೂರು: ಟಾರ್ ಸರ್ಚ್ ಎಂಜಿನ್ ಬಳಸಿ ಡಾರ್ಕ್ನೆಟ್ ಮುಖಾಂತರ ವಿದೇಶದಿಂದ ಮಾದಕ ವಸ್ತುಗಳನ್ನು ತರಿಸಿಕೊಂಡು ನಗರದಲ್ಲಿ ಪೂರೈಕೆ ಮಾಡುತ್ತಿದ್ದ ನೈಜೀರಿಯಾ ಪ್ರಜೆ ಸೇರಿದಂತೆ 10 ಮಂದಿ ಡ್ರಗ್ ಪೆಡ್ಲರ್ಗಳನ್ನು ಬಂಧಿಸಿರುವ ಪೊಲೀಸರು, ಆರೋಪಿಗಳಿಂದ 90 ಲಕ್ಷ ರೂ. ಮೌಲ್ಯದ ಮಾದಕ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಬೆನ್ನಿಗಾನಹಳ್ಳಿ ನಿವಾಸಿ ನೈಜೀರಿಯಾ ಮೂಲದ ಸನ್ನಿ ಒ ಇನೋಶೇಂಟ್(26), ಕೇರಳ ಮೂಲದ ಅಮಲ್ ಬೈಜು(20), ಫಿನಿಕ್ಸ್ ಡಿಸೋಜಾ(24), ಎಚ್ಬಿಆರ್ ಲೇಔಟ್ನ ಮಹಮದ್ ಅಲಿತೂಜರಿ(29), ಹಲಸೂರಿನ ಝಮಾನ್ ಹಂಜಾಮಿನಾ(25), ಮಾರತ್ಹಳ್ಳಿಯ ಶಾನ್ ಶಾಜಿ(33), ಜೆ.ಸಿ.ನಗರದ ಕಾರ್ತಿಕ್(25), ಇಂದಿರಾನಗರದ ಪಾಲಡುಗ ಶಿವಶಂಕರ್(33), ಸಾರ್ಥಕ್(31) ಮತ್ತು ವಿಜಯನಗರದ ನಿತಿನ್(24) ಬಂಧಿತರು. ಆರೋಪಿಗಳ ವಿರುದ್ಧ ಎನ್ಡಿಪಿಎಸ್ ಕಾಯಿದೆಯಡಿ 8 ಪ್ರಕರಣ ದಾಖಲಿಸಲಾಗಿದೆ. 90 ಲಕ್ಷ ರೂ. ಮೌಲ್ಯದ 660 ಎಲ್ಎಸ್ಡಿ, 386 ಎಂಡಿಎಂಎ, 180 ಎಕ್ಸ್ಟೆಸಿ ಮಾತ್ರೆ, ಕೊಕೇನ್, 12 ಮೊಬೈಲ್ ಪೋನ್, 3 ಲ್ಯಾಪ್ಟಾಪ್ ಸೇರಿದಂತೆ ಇನ್ನಿತರ ವಸ್ತುಗಳನ್ನು ಜಪ್ತಿ ಮಾಡಲಾಗಿದೆ ಎಂದು ಪೊಲೀಸ್ ಆಯುಕ್ತ ಕಮಲ್ ಪಂತ್ ತಿಳಿಸಿದರು. ಕೆಲ ಆರೋಪಿಗಳು ಎಂಜಿನಿಯರಿಂಗ್ ಓದಿದ್ದು, ಖಾಸಗಿ ಕಂಪನಿಯಲ್ಲಿಯೂ ಕೆಲಸ ಮಾಡಿದ್ದಾರೆ. ಮಾದಕ ವ್ಯಸನಿಗಳಾಗಿದ್ದು, ಪಾರ್ಟಿಗಳಿಗೆ ಹೋಗುವ ಹವ್ಯಾಸ ಬೆಳೆಸಿಕೊಂಡಿದ್ದರು. ಈ ವೇಳೆ ಡ್ರಗ್ಸ್ಗೆ ಹೆಚ್ಚಿನ ಬೇಡಿಕೆ ಇದೆ ಎಂಬುದನ್ನು ತಿಳಿದುಕೊಂಡಿದ್ದರು. ವಿದೇಶಿ ಡ್ರಗ್ ಪೆಡ್ಲರ್ಗಳ ಜತೆ ನಂಟು ಬೆಳೆಸಿಕೊಂಡು ವಿದೇಶದಿಂದ ಅಂಚೆ ಮುಖಾಂತರ ಮಾದಕ ವಸ್ತುಗಳನ್ನು ತರಿಸಿಕೊಳ್ಳುತ್ತಿದ್ದರು ಎಂದು ಕಮಿಷನರ್ ವಿವರಿಸಿದರು. ಕಸ್ಟಮ್ಸ್ ಅಧಿಕಾರಿಗಳಿಂದ ಸುಳಿವು ವಿಮಾನ ನಿಲ್ದಾಣದಲ್ಲಿ ಕಸ್ಟಮ್ಸ್ ಅಧಿಕಾರಿಗಳಿಗೆ ಸುಳಿವು ಸಿಗದಂತೆ ಆಟಿಕೆ, ಉಡುಗೊರೆ ರೂಪದ ಪಾರ್ಸೆಲ್ ಬಂದಿದ್ದವು. ಕಸ್ಟಮ್ಸ್ ಅಧಿಕಾರಿಗಳ ಪರಿಶೀಲನೆ ವೇಳೆ ಡ್ರಗ್ಸ್ ಪತ್ತೆಯಾಗಿದ್ದು, ಈ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದರು. ಸಿಸಿಬಿ ಮಾದಕ ದ್ರವ್ಯ ನಿಗ್ರಹ ದಳ ನಗರದಾದ್ಯಂತ ಕಾರ್ಯಾಚರಣೆ ಕೈಗೊಂಡಿತ್ತು. ಈ ಹಿನ್ನೆಲೆಯಲ್ಲಿ ಆರೋಪಿಗಳ ಮನೆ ಮೇಲೆ ದಾಳಿ ನಡೆಸಿದಾಗ ಸಿಕ್ಕಿಬಿದ್ದಿದ್ದಾರೆ. ಮನೆಯಲ್ಲಿ ಸಂಗ್ರಹಿಸಿದ್ದ ಡ್ರಗ್ಸ್ ಪತ್ತೆಯಾಗಿದೆ. ಆರೋಪಿಗಳು ಹಲವು ತಿಂಗಳಿಂದ ದಂಧೆಯಲ್ಲಿ ತೊಡಗಿದ್ದರು. ಕಾಲೇಜು ವಿದ್ಯಾರ್ಥಿಗಳಿಗೆ ಹಾಗೂ ಟೆಕ್ಕಿಗಳಿಗೆ ಡ್ರಗ್ಸ್ ಪೂರೈಕೆ ಮಾಡುತ್ತಿದ್ದರು ಎಂಬುದು ವಿಚಾರಣೆಯಿಂದ ಗೊತ್ತಾಗಿದೆ. ಲ್ಯಾಪ್ಟಾಪ್ ಪರಿಶೀಲನೆ ಡಾರ್ಕ್ನೆಟ್ ಬಳಸಿ ಟಾರ್ ಬ್ರೌಸರ್ ಮುಖಾಂತರ ಎಂಪೈರ್ ಮಾರ್ಕೆಟ್, ಸ್ಕಿಲ್ ರೂಟ್, ಡ್ರಗ್ ಬೋರ್ಡ್ ಮುಂತಾದ ವೆಬ್ಸೈಟ್ಗಳಿಂದ ಡ್ರಗ್ಸ್ ಖರೀದಿಸುತ್ತಿದ್ದರು. ನೆದರ್ಲ್ಯಾಂಡ್, ಆಫ್ರಿಕಾ, ಜರ್ಮನಿ ಸೇರಿದಂತೆ ಇನ್ನಿತರ ದೇಶಗಳಿಂದ ಡ್ರಗ್ಸ್ ತರಿಸಿಕೊಂಡಿದ್ದಾರೆ. ಬಿಟ್ ಕಾಯಿನ್ ಮೂಲಕವೂ ಹಣ ಸಂದಾಯ ಮಾಡುತ್ತಿದ್ದರು. ಆರೋಪಿಗಳಿಂದ ಜಪ್ತಿ ಮಾಡಿರುವ ಮೊಬೈಲ್, ಲ್ಯಾಪ್ಟಾಪ್ಗಳನ್ನು ಪರಿಶೀಲಿಸಲಾಗುತ್ತಿದೆ. ಅದರಲ್ಲಿನ ಮಾಹಿತಿ ಆಧರಿಸಿ ತನಿಖೆ ಮುಂದುವರಿಸಲಾಗುವುದು ಎಂದು ಜಂಟಿ ಪೊಲೀಸ್ ಆಯುಕ್ತ ಸಂದೀಪ್ ಪಾಟೀಲ್ ತಿಳಿಸಿದರು.
from India & World News in Kannada | VK Polls https://ift.tt/34RRjAI
