ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಭರ್ಜರಿ ಎಂಟ್ರಿ ಕೊಟ್ಟಿದ್ದ ಬಲಗೈ ವೇಗದ ಬೌಲರ್‌ ನಂತರ ಲಯ ಕಳೆದುಕೊಂಡಿದ್ದರು. ಸ್ವಿಂಗ್‌ ಬೌಲಿಂಗ್‌ ಸ್ಪೆಷಲಿಸ್ಟ್‌ ಭುವಿ ಬಳಿಕ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಸನ್‌ ರೈಸರ್ಸ್‌ ಹೈದರಾಬಾದ್ ತಂಡದ ಪರ ಸತತ ಎರಡು ಆವೃತ್ತಿಗಳಲ್ಲಿ ಅಮೋಘ ಪ್ರದರ್ಶನ ನೀಡುವ ಮೂಲಕ ಟೀಮ್‌ ಇಂಡಿಯಾಗೆ ಕಮ್‌ಬ್ಯಾಕ್‌ ಕೂಡ ಮಾಡಿದ್ದರು. ಸನ್‌ ರೈಸರ್ಸ್‌ ಹೈದರಾಬಾದ್ ತಂಡ ತನ್ನ ಚೊಚ್ಚಲ ಪ್ರಶಸ್ತಿ ಗೆದ್ದ 2016ರ ಆವೃತ್ತಿ ಮತ್ತು 2017ರ ಆವೃತ್ತಿಗಳಲ್ಲಿ ಭುವಿ ಐಪಿಎಲ್‌ನಲ್ಲಿ ಅತಿ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ ಆಗಿ ಪರ್ಪಲ್ ಕ್ಯಾಪ್‌ ಸಂಪಾದಿಸಿದ್ದರು. ಐಪಿಎಲ್‌ ಇತಿಹಾಸದಲ್ಲಿ ಡ್ವೇನ್‌ ಬ್ರಾವೋ ಬಳಿಕ ಸತತ ಪರ್ಪಲ್ ಕ್ಯಾಪ್‌ ಗೆದ್ದ ಏಕಮಾತ್ರ ಬೌಲರ್‌ ಎಂಬ ಹೆಗ್ಗಳಿಕೆ ಅವರದ್ದು. ಇನ್ನು ಟೀಮ್‌ ಇಂಡಿಯಾದಲ್ಲಿ ಸಿಕ್ಕ ಅನುಭವದಿಂದ ಒಬ್ಬ ವಿಭಿನ್ನ ಬೌಲರ್‌ ಆಗಿ ಬೆಳೆಯಲು ಸಾಧ್ಯವಾಯಿತು ಎಂದು ಭುವನೇಶ್ವರ್ ಕುಮಾರ್‌ ಹೇಳಿಕೊಂಡಿದ್ದಾರೆ. "ಕಳೆದ ಕೆಲ ವರ್ಷಗಳಲ್ಲಿ ನಾನು ಸಂಪೂರ್ಣ ವಿಭಿನ್ನ ಬೌಲರ್‌ ಆಗಿ ಬೆಳೆದಿದ್ದೇನೆ. ಟೀಮ್‌ ಇಂಡಿಯಾ ಪರ ಆಡುತ್ತಾ ಸಿಕ್ಕಿರುವ ಅನುಭವದಿಂದ ನನ್ನ ಗತಿಯಲ್ಲಿ ಬದಲಾವಣೆ ತಂದುಕೊಳ್ಳುವುದನ್ನು ಕಲಿತಿದ್ದೇನೆ," ಎಂದು ಐಪಿಎಲ್‌ನ ವೆಬ್‌ ಸೈಟ್ ಪ್ರಕಟಿಸಿರುವ ವಿಡಿಯೋದಲ್ಲಿ ಭುವಿ ಹೇಳಿಕೊಂಡಿದ್ದಾರೆ. ಕೆಲ ವರ್ಷಗಳಿಂದ ಸತತ ಗಾಯದ ಸಮಸ್ಯೆ ಎದುರಿಸಿರುವ ಬಲಗೈ ವೇಗಿ, ಇದೇ ಕಾರಣಕ್ಕೆ ಕಳೆದ ವರ್ಷ ಇಂಗ್ಲೆಂಡ್ ಮತ್ತು ವೇಲ್ಸ್‌ ಆತಿಥ್ಯದಲ್ಲಿ ನಡೆದ ಐಸಿಸಿ ಏಕದಿನ ಕ್ರಿಕೆಟ್ ವಿಶ್ವಕಪ್ ಟೂರ್ನಿಯಿಂದಲೂ ಹೊರಗುಳಿದಿದ್ದರು. ನಂತರ ವೆಸ್ಟ್‌ ಇಂಡೀಸ್‌ ವಿರುದ್ಧದ ಸರಣಿಯಲ್ಲಿ ಕಮ್‌ಬ್ಯಾಕ್‌ ಮಾಡಿದರೂ ಇದೇ ವರ್ಷ ಸ್ಪೋರ್ಟ್‌ ಹರ್ನಿಯಾ ಶಸ್ತ್ರಚಿಕಿತ್ಸೆಗೆ ಒಳಪಟ್ಟರು. "ಕ್ರಿಕೆಟ್ ಅಂಗಣಕ್ಕೆ ಮರಳಿರುವುದು ಅದ್ಭುತ ಅನುಭವ ನೀಡಿದೆ. ಏಕೆಂದರೆ ನಾನು ಆಟದಿಂದ ದೂರ ಉಳಿದು ಬಹಳ ಸಮಯವೇ ಕಳೆದಿದೆ. ಗಾಯದ ಸಮಸ್ಯೆಗಳ ನಂತರ ಈ ಮಹಾಮಾರಿ ರೋಗ ದೀರ್ಘ ವಿರಾಮವನ್ನೇ ತಂದೊಡ್ಡಿತು. ಹೀಗಾಗಿ ಐಪಿಎಲ್‌ ಆಡುವುದನ್ನು ಬಹಳ ಕಾತುರದಿಂದ ಎದುರು ನೋಡುತ್ತಿದ್ದೇನೆ," ಎಂದಿದ್ದಾರೆ. ರಶೀದ್‌ ಖಾನ್‌ ತಂಡದ ಸ್ಟಾರ್ ಬೌಲರ್‌ಇದೇ ವೇಳೆ ಸನ್‌ರೈಸರ್ಸ್‌ ತಂಡದ ಬೌಲಿಂಗ್‌ ವಿಭಾಗದ ಬಗ್ಗೆ ಮಾತನಾಡಿರುವ ಡೆತ್‌ ಓವರ್‌ ಸ್ಪೆಷಲಿಸ್ಟ್‌ ಭುವನೇಶ್ವರ್, ಕಳೆದ ಎರಡು ಮೂರು ಆವೃತ್ತಿಗಳಲ್ಲಿ ಹೈದರಾಬಾದ್ ತಂಡದ ಬೌಲಿಂಗ್‌ ಅತ್ಯುತ್ತಮವಾಗಿ ಕಾಣಿಸಿಕೊಂಡಿದೆ. ಬೌಲರ್‌ಗಳು ಒಬ್ಬರ ಸಾಮರ್ಥ್ಯವನ್ನು ಒಬ್ಬರು ಚೆನ್ನಾಗಿ ಅರಿತುಕೊಂಡಿದ್ದಾರೆ ಎಂದು ಹೇಳಿದ್ದಾರೆ. "ತಂಡದಲ್ಲಿ ಹಿರಿಯ ಬೌಲರ್‌ ಆಗಿ ಯುವ ಆಟಗಾರರೊಂದಿಗೆ ನನ್ನ ಅನುಭವ ಹಂಚಿಕೊಳ್ಳುತ್ತೇನೆ. 2-3 ವರ್ಷಗಳಿಂದ ಜೊತೆಯಾಗಿ ಆಡುತ್ತಿರುವ ಕಾರಣ ತಂಡದ ಬೌಲರ್‌ಗಳಲ್ಲಿ ಉತ್ತಮ ಹೊಂದಾಣಿಕೆ ಇದೆ. ಇದು ನನ್ನಂತಹ ಹಿರಿಯ ಬೌಲರ್‌ನ ಕೆಲಸ ಸುಲಭವಾಗಿದೆ. ನಮ್ಮ ತಂಡ ಸ್ಟಾರ್ ಬೌಲರ್‌ ಎಂದೇ ಹೇಳಬೇಕು. ಯಾವುದೇ ತಂಡದ ಬಹುದೊಡ್ಡ ಆಸ್ತಿ ಆಗಬಲ್ಲ ಆಟಗಾರ ಅವರು. ವಿವಿಧ ಲೀಗ್‌ಗಳಲ್ಲಿ ಆಡಿ ಸ್ಥಿರ ಪ್ರದರ್ಶನ ನೀಡಿದ್ದಾರೆ. ಈಗ ಕೇವಲ ಬಾಲ್‌ನಲ್ಲಿ ಮಾತ್ರವಲ್ಲ ಬ್ಯಾಟಿಂಗ್‌ನಲ್ಲೂ ಮಿಂಚುತ್ತಿದ್ದಾರೆ," ಎಂದು ಅಫಘಾನಿಸ್ಥಾನದ ಯುವ ಲೆಗ್‌ ಸ್ಪಿನ್ನರ್‌ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನು ಆಡಿದ್ದಾರೆ. ಕೋವಿಡ್‌-19 ಸೋಂಕು ವ್ಯಾಕವಾಗಿದ್ದ ಕಾರಣಕ್ಕೆ ಟೂರ್ನಿಯನ್ನು ಈ ವರ್ಷ ಯುಎಇ ಅಂಗಣದಲ್ಲಿ ಆಯೋಜಿಸಲಾಗುತ್ತಿದೆ. ಬಯೋ ಸೆಕ್ಯೂರ್‌ ವಾತಾವರಣ ಇರುವ ದುಬೈ, ಶಾರ್ಜಾ ಮತ್ತು ಅಬುದಾಭಿ ಕ್ರೀಡಾಂಗಣಗಳಲ್ಲಿ ಸೆಪ್ಟೆಂಬರ್‌ 19ರಿಂದ ನವೆಂಬರ್‌ 10ರವರೆಗೆ ಸಂಪೂಣ್ 60 ಪಂದ್ಯಗಳ ಆಯೋಜನೆ ಆಗಲಿದೆ. ಭುವನೇಶ್ವರ್ ಕುಮಾರ್‌ ಸಂದರ್ಶನದ ವಿಡಿಯೋ ಇಲ್ಲಿ ವೀಕ್ಷಿಸಬಹುದಾಗಿದೆ. ಭುವಿ ಐಪಿಎಲ್‌ ಸಾಧನೆಇಂಡಿಯನ್ ಪ್ರೀಮಿಯರ್‌ ಲೀಗ್‌ನಲ್ಲಿ ಈವರೆಗೆ 117 ಪಂದ್ಯಗಳನ್ನು ಆಡಿರುವ 30 ವರ್ಷ ವೇಗದ ಬೌಲರ್‌ ಭುವನೇಶ್ವರ್ ಕುಮಾರ್‌, 23.71ರ ಸರಾಸರಿಯಲ್ಲಿ 133 ವಿಕೆಟ್‌ಗಳನ್ನು ಉರುಳಿಸಿದ್ದಾರೆ. ಒಮ್ಮೆ 5ಕ್ಕೂ ಹೆಚ್ಚು ವಿಕೆಟ್‌ ಪಡೆದು 2 ಬಾರಿ ನಾಲ್ಕಕ್ಕೂ ಹೆಚ್ಚು ವಿಕೆಟ್‌ ಪಡೆದ ಸಾಧನೆ ಮಾಡಿರುವ ಭುವಿ ಇನಿಂಗ್ಸ್‌ ಒಂದರಲ್ಲಿ 19ಕ್ಕೆ 5 ವಿಕೆಟ್‌ ಉರುಳಿಸಿದ ಶ್ರೇಷ್ಠ ಪ್ರದರ್ಶನ ನೀಡಿದ್ದಾರೆ. 2016 ಮತ್ತು 2017ರ ಆವೃತ್ತಿಗಳಲ್ಲಿ ಕ್ರಮವಾಗಿ 23 ಮತ್ತು 26 ವಿಕೆಟ್‌ಗಳನ್ನು ಪಡೆದು ಪರ್ಪಲ್ ಕ್ಯಾಪ್‌ ಸಂಪಾದಿಸಿದ್ದರು. ಐಪಿಎಲ್‌ ಇತಿಹಾಸದಲ್ಲಿ 3 ಬಾರಿ ಆವೃತ್ತಿ ಒಂದರಲ್ಲಿ 20ಕ್ಕೂ ಹೆಚ್ಚು ವಿಕೆಟ್‌ ಪಡೆದ ಸಾಧನೆ ಮಾಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3hPcozs
