ಬೆಂಗಳೂರು: ಹದಿಮೂರನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯನ್ನು ಯಾವುದೇ ಅಡಚಣೆಗಳಿಲ್ಲದೆ ಸುರಕ್ಷಿತವಾಗಿ ಆಯೋಜಿಸಲು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಯುಎಇನ ದುಬೈ, ಶರ್ಜಾ ಮತ್ತಯ ಅಬುದಾಭಿ ಕ್ರೀಡಾಂಗಣಗಳಲ್ಲಿ ನಿರ್ಮಿಸಿರುವ ಬಯೋ ಸೆಕ್ಯೂರ್‌ ವಾತಾವರಣಕ್ಕೆ ಕಿಂಚಿತ್ತೂ ದಕ್ಕೆಯಾಗದಂತೆ ಆಟಗಾರರು ಎಚ್ಚರಿಕೆ ವಹಿಸಬೇಕು ಎಂದು ನಾಯಕ ಕರೆ ನೀಡಿದ್ದಾರೆ. ಕೊರೊನಾ ವೈರಸ್‌ ಭೀತಿ ನಡುವೆಯೂ ಕ್ರಿಕೆಟಿಗರಿಗೆ ಐಪಿಎಲ್‌ನಂತಹ ವಿಶ್ವ ಶ್ರೇಷ್ಠ ಟೂರ್ನಿಯಲ್ಲಿ ಆಡುವ ಅವಕಾಶ ಸಿಕ್ಕಿರುವುದು ಅದೃಷ್ಟವೇ ಸರಿ. ಹೀಗಾಗಿ ಐಪಿಎಲ್‌ 2020 ಟೂರ್ನಿ ವೇಳೆ ಕೇವಲ ಆಟದ ಕಡೆಗಷ್ಟೇ ಗಮನ ನೀಡಬೇಕು ಎಂದು ಆರ್‌ಸಿಬಿ ಆಟಗಾರರಿಗೆ ಎಚ್ಚರಿಕೆ ರವಾನಿಸಿದ್ದಾರೆ. ಆರ್‌ಸಿಬಿ ತಂಡದ ಯೂಟ್ಯೂಬ್‌ ಕಾರ್ಯಕ್ರಮ 'ಬೋಲ್ಡ್‌ ಡೈರೀಸ್‌' ಸಲುವಾಗಿ ನಿರೂಪಕ ದಾನಿಶ್‌ ಸೇಟ್‌ ನಡೆಸಿಕೊಟ್ಟ ಸಂದರ್ಶನದಲ್ಲಿ ಮಾತನಾಡಿದ 31 ವರ್ಷದ ಬಲಗೈ ಬ್ಯಾಟ್ಸ್‌ಮನ್‌ ವಿರಾಟ್ ಕೊಹ್ಲಿ, "ನಾವೆಲ್ಲರೂ ಇಲ್ಲಿ ಬಂದಿರುವುದು ಕೇವಲ ಕ್ರಿಕೆಟ್ ಆಡುವ ಸಲುವಾಗಿ. ಬಯೋ ಬಬಲ್‌ಗೆ ಗೌರವ ನೀಡುವುದು ನಮ್ಮೆಲ್ಲರ ಆದ್ಯ ಕರ್ತವ್ಯ. ಈ ಮೂಲಕ ಟೂರ್ನಿ ಯಾವುದೇ ಅಡಚಣೆಯಿಲ್ಲದೆ ಸಾಗುವಂತೆ ಕಾಪಾಡುವ ಜವಾಬ್ದಾರಿ ನಮ್ಮೆಲರ ಮೇಲಿದೆ," ಎಂದಿದ್ದಾರೆ. "ನಾವಿಲ್ಲಿ ಬಂದಿರುವುದು ಮೋಜು ಮಸ್ತಿ ಮಾಡಿ ದುಬೈ ಸುತ್ತಾಡಲು ಅಲ್ಲ. ಅದೆಲ್ಲವನ್ನೂ ಮಾಡಲು ಇದು ಸೂಕ್ತ ಸಮಯವೂ ಅಲ್ಲ," ಎಂದು ಕೊಹ್ಲಿ ತಂಡದ ಯುವ ಆಟಗಾರರಿಗೆ ಖಡಕ್‌ ಎಚ್ಚರಿಕೆ ಒಂದನ್ನು ರವಾನಿಸಿದ್ದಾರೆ. "ನಾವೆಲ್ಲರೂ ಈಗ ಎದುರಿಸುತ್ತಿರುವ ಕಾಲಘಟ್ಟದ ಸೂಕ್ಷ್ಮತೆಯನ್ನು ಅರ್ಥಮಾಡಿಕೊಳ್ಳಬೇಕು. ಐಪಿಎಲ್‌ನ ಭಾಗವಾಗಿರುವುದಕ್ಕೆ ನಮಗೆ ಸಿಕ್ಕಿರುವ ಸೌಲಭ್ಯದ ಮೌಲ್ಯವನ್ನು ಅರ್ಥಮಾಡಿಕೊಳ್ಳಬೇಕು. ಪರಿಸ್ಥಿತಿಗೆ ವಿರುದ್ಧವಾಗಿ ಯಾವುದೇ ಕೆಲಸಗಳನ್ನು ಮಾಡಬಾರದು ಎಂಬುದನ್ನು ತಿಳಿದುಕೊಳ್ಳಬೇಕು," ಎಂದಿದ್ದಾರೆ. ಅಭ್ಯಾಸಕ್ಕೂ ಮುನ್ನ ಆತಂಕ ಕಾಡಿತ್ತು: ಕೊಹ್ಲಿ ಇದೇ ವೇಳೆ 6 ತಿಂಗಳ ಸುದೀರ್ಘಾವಧಿಯ ವಿರಾಮದ ಬಳಿಕ ಮತ್ತೆ ಬ್ಯಾಟ್‌ ಹಿಡಿದಾಗ ಆದಂತಹ ಅನುಭವವನ್ನೂ ಕ್ಯಾಪ್ಟನ್‌ ಕೊಹ್ಲಿ ಹಂಚಿಕೊಂಡಿದ್ದಾರೆ. ನೆಟ್ಸ್‌ಗೆ ಮುಂದಾಗುವ ಮೊದಲು ಆತಂಕ ತಮ್ಮನ್ನು ಕಾಡಿದ್ದಾಗಿ ಹೇಳಿಕೊಂಡಿದ್ದಾರೆ. "ಎರಡು ಮುರು ತಿಂಗಳ ಹಿಂದೆ ಈ ವರ್ಷ ಐಪಿಎಲ್‌ ಆಡುವುದು ಸಾಧ್ಯ ಎಂಬುದನ್ನು ಕಲ್ಪಿಸಿಕೊಳ್ಳಲು ಕೂಡ ಸಾಧ್ಯವಾಗಿರಲಿಲ್ಲ. ನೆನ್ನೆ ನಾವು ಮೊದಲ ಬಾರಿ ಅಭ್ಯಾಸಕ್ಕೆ ಇಳಿದಾಗ ಕ್ರಿಕೆಟ್ ಆಡದೇ ಎಷ್ಟು ಸಮಯ ಕಳೆಯಲಾಗಿದೆ ಎಂಬುದರ ಅರಿವಾಯ್ತು. ಅಭ್ಯಾಸಕ್ಕೆ ತೆರಳುವ ಮುನ್ನ ನನ್ನಲ್ಲಿ ಆತಂಕ ಮನೆ ಮಾಡಿತ್ತು," ಎಂದು ಕೊಹ್ಲಿ ಹೇಳಿದ್ದಾರೆ. "ಆರಂಭದಲ್ಲಿ ಕೊಂಚ ತಡವರಿಸಿದೆ ನಂತರ ಎಲ್ಲವೂ ಸರಿ ಹೋಯಿತು. ಇನ್ನು ಕೋವಿಡ್‌-19 ಕಾರಣ ಸಿಕ್ಕಂತ್ತಹ ದೊಡ್ಡ ವಿರಾಮದಲ್ಲಿ ನಾನು ಕ್ರಿಕೆಟ್ ಆಟವನ್ನು ಬಹಳ ಮಿಸ್‌ ಮಾಡಿಕೊಳ್ಳುತ್ತೇನೆಂದು ಆರಂಭದಲ್ಲಿ ಅಂದುಕೊಂಡಿದ್ದೆ. ಆದರೆ ಹಾಗಾಗಲಿಲ್ಲ. ಜೀವನವನ್ನು ಮುನ್ನಡೆಸುವುದು ಇಲ್ಲಿ ಮುಖ್ಯ ಎಂಬುದು ಅರ್ಥವಾಯಿತು. ಕುಟುಂಬದವರ ಜೊತೆಗೆ ಸಮಯ ಕಳೆಯಲು ಸಿಕ್ಕ ಅವಕಾಶವನ್ನು ಸಂಪೂರ್ಣವಾಗಿ ಬಳಸಿಕೊಂಡೆ," ಎಂದು ವಿವರಿಸಿದ್ದಾರೆ. ಐಪಿಎಲ್‌ 2020 ಟೂರ್ನಿಯು ಸೆಪ್ಟೆಂಬರ್‌ 19ರಿಂದ ನವೆಂಬರ್‌ 10ರವರೆಗೆ ನಡೆಯಲಿದ್ದು, ಆರ್‌ಸಿಬಿ ತಂಡ ತನ್ನ ಚೊಚ್ಚಲ ಪ್ರಶಸ್ತಿಯನ್ನು ಎದುರು ನೋಡುತ್ತಿದೆ. ಅಷ್ಟೇ ಅಲ್ಲದೆ ಉದ್ಘಾಟನಾ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್‌ ವಿರುದ್ಧ ಸ್ಪರ್ಧಿಸುವ ಸಾಧ್ಯತೆ ಇದೆ. ವಿರಾಟ್ ಕೊಹ್ಲಿ ಸಂದರ್ಶನದ ಸಂಪೂರ್ಣ ವಿಡಿಯೋ ಇಲ್ಲಿ ವೀಕ್ಷಿಸಬಹುದಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3jy42wF
