ಹೊಸದಿಲ್ಲಿ: ಮಿಸ್ಟರ್‌ ಐಪಿಎಲ್‌ ಖ್ಯಾತಿಯ ಸ್ಟಾರ್‌ ಬ್ಯಾಟ್ಸ್ಮನ್ , ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯ 13ನೇ ಆವೃತ್ತಿಯ ಟೂರ್ನಿಯಿಂದ ಹಠಾತ್‌ ಹೊರನಡೆದದ್ದು ಎಲ್ಲರ ಅಚ್ಚರಿಗೆ ಕಾರಣವಾಗಿತ್ತು. ಈ ನಡುವೆ ಇದ್ದಕ್ಕಿದ್ದಂತೇ ಚೆನ್ನೈ ಸೂಪರ್‌ ಕಿಂಗ್ಸ್ ತಂಡವನ್ನು ತೊರೆದು ರೈನಾ ಭಾರತಕ್ಕೆ ಹಿಂದಿರುಗಿದ್ದೇಕೆ ಎಂಬುದರ ಬಗ್ಗೆ ಸಾಕಷ್ಟು ಚರ್ಚೆಗಳು ಆಗಿದ್ದವು. ಅಷ್ಟೇ ಅಲ್ಲದೆ ಎಂಎಸ್‌ ಧೋನಿ ಮತ್ತು ಸುರೇಶ್‌ ರೈನಾ ನಡುವೆ ಜಗಳವಾಗಿದ್ದು ಇದೇ ಕಾರಣಕ್ಕೆ ರೈನಾ ಟೂರ್ನಿಯಿಂದ ಹೊರನಡೆದಿದ್ದಾರೆ. ಜೊತೆಗೆ ರೈನಾ, ಕ್ಯಾಪ್ಟನ್‌ ಧೋನಿಗೆ ನೀಡಿರುವ ವಿಶೇಷ ಕೊಠಡಿ ರೀತಿಯಲ್ಲಿ ತಮಗೂ ವ್ಯವಸ್ಥೆ ಕಲ್ಪಿಸಬೇಕು ಎಂದು ಕೇಳಿದ್ದಕ್ಕೆ ಟೀಮ್‌ ಮ್ಯಾನೇಜ್ಮೆಂಟ್‌ನಿಂದ ನಕಾರ ಎದುರಾದ ಕಾರಣ ಮುನಿಸಿಕೊಂಡು ಹೊರನಡೆದಿದ್ದಾರೆ ಎಂದೆಲ್ಲಾ ಊಹಾಪೋಹಗಳು ಹಬ್ಬಿದ್ದವು. ಆದರೆ, ರೈನಾ ನಿಜವಾಗಿಯೂ ತಾವು ಐಪಿಎಲ್‌ ತೊರೆಯಲು ಇದ್ದ ಕಾರಣ ಏನೆಂಬುದನ್ನು ಮಂಗಳವಾರ ಬ್ಯಾಕ್ ಟು ಬ್ಯಾಕ್ ಟ್ವೀಟ್‌ ಮಾಡುವ ಮೂಲಕ ಬಹಿರಂಗ ಪಡಿಸಿದ್ದಾರೆ. ಶನಿವಾರವೇ ದುಬೈನಿಂದ ಭಾರತಕ್ಕೆ ಹಿಂದಿರುಗಿದ್ದ ರೈನಾ, ಇದ್ದಕ್ಕಿದ್ದಂತೆಯೇ ಟೂರ್ನಿಯಿಂದ ಹೊರ ನಡೆಯಲು ಇದ್ದ ನೈಜ ಕಾರಣ ಏನೆಂಬುದನ್ನು ಎಲ್ಲಿಯೂ ಹೇಳಿಕೊಂಡಿರಲಿಲ್ಲ. ಕೇವಲ ತಂಡದ ಸಿಇಒ ಮಾತನಾಡಿ, ರೈನಾ ವೈಯಕ್ತಿಕ ಕಾರಣದಿಂದ ಈ ಬಾರಿಯ ಐಪಿಎಲ್‌ನಿಂದ ಹೊರಗುಳಿದಿದ್ದಾರೆ ಎಂದು ಹೇಳಿಕೆ ನೀಡಿದ್ದರು. ರೈನಾ ಇದೀಗ ತಮ್ಮ ಟ್ವೀಟ್‌ಗಳಲ್ಲಿ ಪಂಜಾಬ್‌ನ ಪಠಾಣ್‌ಕೋಟ್‌ನಲ್ಲಿ ತಮ್ಮ ಮಾವನ ಮನೆ ಮೇಲೆ ಕೆಲ ದಿನಗಳ ಹಿಂದೆ ನಡೆದ ದಾಳಿಯನ್ನು ವಿವರಿಸಿದ್ದಾರೆ. "ನನ್ನ ಕುಟುಂಬಕ್ಕೆ ಆಗಿರುವುದು ಅತ್ಯಂತ ಭಯಾನಕ್ಕಿಂತಲೂ ದೊಡ್ಡ ಸಂಗತಿ. ನನ್ನ ಮಾವನನ್ನು ಕೊಚ್ಚಿ ಕೊಲೆ ಮಾಡಲಾಗಿದೆ. ನನ್ನ ಸೋದರತ್ತೆ ಮತ್ತು ನನ್ನಿಬ್ಬರು ಕಸಿನ್‌ಗಳ ಮೇಲೆ ಮಾರಣಾಂತಿಕ ಹಲ್ಲೆ ನಡೆದಿದೆ. ದುರದೃಷ್ಟವಶಾತ್‌ ಕಳೆದ ರಾತ್ರಿ ನನ್ನ ಒಬ್ಬ ಕಸಿನ್‌ ಕೂಡ ಹಲವು ದಿನಗಳಿಂದ ಸಾವಿನ ವಿರುದ್ಧ ಹೋರಾಡಿ ತೀರಿಕೊಂಡಿದ್ದಾರೆ. ನನ್ನ ಅತ್ತೆಯ ಸ್ಥಿತಿ ಈಗಲೂ ಗಂಭೀರವಾಗಿದ್ದು, ಲೈಫ್‌ ಸಪೋರ್ಟ್‌ನಲ್ಲಿ ಇರಿಸಲಾಗಿದೆ," ಎಂದು ರೈನಾ ತಮ್ಮ ಟ್ವೀಟ್‌ನಲ್ಲಿ ವಿವರಿಸಿದ್ದಾರೆ. ಈ ಮಧ್ಯೆ ಹಲ್ಲೆ ನಡೆಸಿದವರನ್ನು ಕೂಡಲೇ ಬಂಧಿಸಿ ಶಿಕ್ಷೆಗೆ ಒಳಪಡಿಸಬೇಕೆಂದು ಪಂಜಾಬ್‌ ಪೊಲೀಸ್‌ಗೆ ಮನವಿ ಮಾಡಿರುವ ಟೀಮ್‌ ಇಂಡಿಯಾದ ಮಾಜಿ ಬ್ಯಾಟ್ಸ್ಮನ್, ಪಂಜಾಬ್‌ನ ಮುಖ್ಯಮಂತ್ರಿ ಅಮರಿಂದರ್‌ ಸಿಂಗ್‌ ಅವರನ್ನೂ ತಮ್ಮ ಟ್ವೀಟ್‌ಗೆ ಟ್ಯಾಗ್‌ ಮಾಡಿದ್ದಾರೆ. "ಈಗಿನವರೆಗೆ ಆ ರಾತ್ರಿ ನಡೆದ ನೈಜ ಘಟನೆ ಏನೆಂಬುದು ಯಾರಿಗೂ ಗೊತ್ತಾಗಿಲ್ಲ. ಯಾರು ಮಾಡಿದ್ದಾರೆ ಎಂಬುದು ಇನ್ನು ಸ್ಪಷ್ಟವಾಗಿಲ್ಲ. ಪಂಜಾಬ್‌ ಪೊಲೀಸ್‌ ಈ ಬಗ್ಗೆ ತನಿಖೆ ತೀವ್ರಗೊಳಿಸಬೇಕೆಂದು ಮನವಿ ಮಾಡಿಕೊಳ್ಳುತ್ತೇನೆ. ಈ ಅಮಾನವೀಯ ಕೃತ್ಯ ಮಾಡಿದವರಾದರೂ ಯಾರು ಎಂಬುದು ನಮಗೆ ಗೊತ್ತಾಗಬೇಕು. ಆ ಅಪರಾಧಿಗಳಿಗೆ ಶಿಕ್ಷೆಯಾಗಬೇಕು. ಮುಂದೆಂದೂ ಈ ರೀತಿಯ ಘಟನೆಗಳು ನಡೆಯಬಾರದು ಎಂಬ ರೀತಿಯಲ್ಲಿ ಶಿಕ್ಷೆ ಆಗಬೇಕು," ಎಂದು ರೈನಾ ತಮ್ಮ ಎರಡನೇ ಟ್ವೀಟ್‌ ಮೂಲಕ ಕೇಳಿಕೊಂಡಿದ್ದಾರೆ. ಆಗಸ್ಟ್‌ 15ರಂದು 74ನೇ ಸ್ವಾತಂತ್ರ್ಯ ದಿನಾಚರಣೆಯ ದಿನದಂದು ಟೀಮ್‌ ಇಂಡಿಯಾ ವೃತ್ತಿಬದುಕಿಗೆ ಎಂಎಸ್‌ ಧೋನಿ ನಿವೃತ್ತಿ ಘೋಷಿಸಿದ ಬೆನ್ನಲ್ಲೇ ರೈನಾ ಕೂಡ ತಮ್ಮ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೆರಿಯರ್‌ಗೆ ಗುಡ್‌-ಬೈ ಹೇಳಿದ್ದರು. ಆದರೆ, ಐಪಿಎಲ್‌ನಲ್ಲಿ ಸಿಎಸ್‌ಕೆ ಪರ ಆಟ ಮುಂದುವರಿಸಲು ನಿರ್ಧರಿಸಿದ ಸ್ಟಾರ್‌ ಬ್ಯಾಟ್ಸ್‌ಮನ್‌ಗೆ ಈಗ ಇಂಥದ್ದೊಂದು ಸಂಕಷ್ಟ ಎದುರಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3gOVP5z
