ಹೊಸದಿಲ್ಲಿ: ಯೂಟ್ಯೂಬ್‌ ಚಾನಲ್‌ ಮೂಲಕ ವೆಸ್ಟ್‌ ಇಂಡೀಸ್‌ ತಂಡದ ಮಾಜಿ ಸಹ ಆಟಗಾರ ಕ್ರಿಸ್‌ ಗೇಲ್‌ ತಮ್ಮ ವಿರುದ್ಧ ಮಾಡಿದ್ದ ಎಲ್ಲಾ ಆರೋಪಗಳು ಸುಳ್ಳು ಎಂದು ರಾಮ್ನರೇಶ್ ಸರವಣ್ ಕೊನೆಗೂ ಮೌನ ಮುರಿದಿದ್ದಾರೆ. ಕೆರಿಬಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಜಮೈಕಾ ತಲಾವಾಸ್‌ ತಂಡದ ಕೋಚ್‌ ಆಗಿರುವ ಸರವಣ್ ಪಿತೂರಿ ಮಾಡಿ ಫ್ರಾಂಚೈಸಿ ತಂಡದಿಂದ ತಮ್ಮನ್ನು ಹೊರ ಬೀಳುವಂತೆ ಮಾಡಿದ್ದಾರೆ. ಸರವಣ್ ಬೆನ್ನಿಗೆ ಚೂರಿ ಹಾಕುವ ಕೆಲಸ ಮಾಡಿದ್ದಾರೆ ಎಂದು ಗೇಲ್‌ ಆರೋಪಿಸಿದ್ದರು. "2020ರ ಸಾಲಿನ ಕೆರಿಬಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಜಮೈಕಾ ತಲಾವಾಸ್‌ ತಂಡದ ಪರ ಆಡಲು ಕ್ರಿಸ್‌ ಗೇಲ್‌ ಅವರನ್ನು ಆಯ್ಕೆ ಮಾಡದೇ ಇರುವುದಕ್ಕೆ ಮತ್ತು ತಂಡದ ಆಯ್ಕೆ ಪ್ರಕ್ರಿಯೆಯಲ್ಲಿ ನನ್ನ ಯಾವುದೇ ಹಸ್ತಕ್ಷೇಪ ಇಲ್ಲ," ಎಂದು ಸರವಣ್ ಹೇಳಿರುವುದಾಗಿ ಇಎಸ್‌ಪಿಎನ್‌ ಕ್ರಿಕ್‌ಇನ್‌ಫೋ ವರದಿ ಮಾಡಿದೆ. "ಆ ವಿಡಿಯೋದಲ್ಲಿ ಗೇಲ್‌ ಮಾಡಿರುವ ಆರೋಪಗಳು ಬೋಗಸ್. ಇದರಿಂದ ಒಬ್ಬ ವ್ಯಕ್ತಿಯ ಹೆಸರಿಗೆ ಕಳಂಕ ತರುವ ಪ್ರಯತ್ನ ಮಾಡಲಾಗಿದೆ. ಹೀಗಾಗಿ ಪ್ರತಿಕ್ರಿಯೆ ನೀಡಲೇ ಬೇಕಾಯಿತು. ಜನಸಾಮಾನ್ಯರಿಗೆ ಸತ್ಯಾಂಶ ತಿಳಿಯಬೇಕಿದೆ. ಏಕೆಂದರೆ ಹಲವರ ವ್ಯಕ್ತಿತ್ವವನ್ನು ಇಲ್ಲಿ ಕಾಪಾಡುವ ಅಗತ್ಯವಿದೆ," ಎಂದು ಸರವಣ್ ಹೇಳಿದ್ದಾರೆ ಕ್ರಿಸ್‌ ಗೇಲ್‌ ತಮ್ಮ ವಿಡಿಯೋದಲ್ಲಿ ಸರವಣ್ ಅವರನ್ನು ವಿಶ ಕಾರುವ ಸರ್ಪ ಎಂದು ಕರೆದರಲ್ಲದೆ, ಕೊರೊನಾ ವೈರಸ್‌ಗಿಂತಲೂ ಅಪಾಯಕಾರಿ ಎಂದೆಲ್ಲಾ ಜರಿಸಿದ್ದರು. "ನನ್ನ ವೃತ್ತಿ ಬದುಕಿನ ಆರಂಭಿಕ ದಿನಗಳಿಂದಲೂ ನಾನು ಕ್ರಿಸ್‌ ಗೇಲ್‌ ಜೊತೆಗೆ ಆಡಿದ್ದೇನೆ. ಅವರ ಮೇಲೆ ನನಗೆ ಸದಾ ಗೌರವವಿದೆ. ಅವರು ಅದ್ಭುತ ಪ್ರತಿಭೆ. ನನ್ನ ಅತ್ಯುತ್ತಮ ಗೆಳೆಯ ಕೂಡ. ಹೀಗಾಗಿ ಅವರ ಆರೋಪಗಳು ನನಗೆ ಆಶ್ಚರ್ಯ ತಂದಿದೆ," ಎಂದಿದ್ದಾರೆ. ಈ ನಡುವೆ ಜಮೈಕಾ ತಲಾವಾಸ್‌ ತಂಡ ಕೂಡ ಕ್ರಿಸ್‌ ಗೇಲ್‌ ಅವರನ್ನು ತಂಡದಿಂದ ಕೈಬಿಟ್ಟ ವಿಚಾರದಲ್ಲಿ ಕೋಚ್‌ ರಾಮ್ನರೇಶ್ ಸರವಣ್ ಅವರ ಯಾವುದೇ ಹಸ್ತಕ್ಷೇಪ ಇಲ್ಲವೆಂದು ಸ್ಪಷ್ಟಪಡಿಸಿದೆ. "ತಂಡದಿಂದ ಅವರನ್ನು ಕೈಬಿಟ್ಟಿರುವುದಕ್ಕೆ ಗೇಲ್‌ ಹಲವು ಕಾರಣಗಳನ್ನು ಕೊಟ್ಟಿದ್ದಾರೆ. ಆದರೆ, ತಂಡದ ಮಾಲೀಕರು ಮತ್ತು ಟೀಮ್‌ ಮ್ಯಾನೇಜ್ಮೆಂಟ್‌ ಒಮ್ಮತದಿಂದ ತೆಗೆದುಕೊಂಡಿರುವ ನಿರ್ಧಾರವಿದು. ಇದರಿಂದ ಸರವಣ್ ಅವರನ್ನು ಹೊರಗಿಡಲಾಗಿತ್ತು," ಎಂದು ತಲಾವಾಸ್‌ ತನ್ನ ಅಧಿಕೃತ ವೆಬ್‌ಸೈಟ್‌ ಮೂಲಕ ಹೇಳಿಕೆ ಬಿಡುಗಡೆ ಮಾಡಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3bVH9Qz
