ರಾಜ್ಕೋಟ್: ಶ್ರೇಯಸ್ ಗೋಪಾಲ್ ನೇತೃತ್ವದ ತಂಡ, ಶನಿವಾರ ಇಲ್ಲಿನ ಕ್ರಿಕೆಟ್ ಸಂಸ್ಥೆಯ ಕ್ರೀಡಾಂಗಣದಲ್ಲಿ ಆರಂಭಗೊಳ್ಳಲಿರುವ 2019-20ನೇ ಸಾಲಿನ ರಣಜಿ ಟ್ರೋಫಿ ಕ್ರಿಕೆಟ್ ಟೂರ್ನಿಯ 'ಎ' ಮತ್ತು 'ಬಿ' ಗುಂಪಿನ 5ನೇ ಸುತ್ತಿನ ಪಂದ್ಯದಲ್ಲಿ ಸೌರಾಷ್ಟ್ರ ತಂಡದ ಸವಾಲಿಗೆ ಎದೆಯೊಡ್ಡಲಿದೆ. ಮದುವೆ ನಿಮಿತ್ತ ಕರುಣ್ ನಾಯರ್ ರಜೆಯಲ್ಲಿರುವುದರಿಂದ ಕರ್ನಾಟಕ ತಂಡದ ಜವಾಬ್ದಾರಿ ಶ್ರೇಯಸ್ ಹೆಗಲೇರಿದೆ. ನಾಲ್ಕನೇ ಸುತ್ತಿನ ಪಂದ್ಯದಲ್ಲಿ ಬಲಿಷ್ಠ ಮುಂಬಯಿ ತಂಡವನ್ನು ಸದೆಬಡಿದಿರುವ ಕರ್ನಾಟಕ ತಂಡ ಪ್ರಸ್ತುತ ಆತ್ಮವಿಶ್ವಾಸ ಬುಗ್ಗೆಯಂತಾಗಿದ್ದು ಮಗದೊಂದು ಜಯದ ಕನಸು ಕಾಣುತ್ತಿದೆ. ಗಾಯದ ಸಮಸ್ಯೆಯಿಂದ ಮುಕ್ತಿ ಪಡೆದಿರುವ ಪವನ್ ದೇಶಪಾಂಡೆ ಇದೀಗ ತಂಡ ಸೇರಿಕೊಂಡಿದ್ದು, ಬ್ಯಾಟಿಂಗ್ ಬಲ ಇಮ್ಮಡಿಯಾಗಿದೆ. ಮುಂಬಯಿ ವಿರುದ್ಧ ಪಂದ್ಯದಲ್ಲಿ ಹೀರೋಗಳಾಗಿ ಮೆರೆದ ರವಿಕುಮಾರ್ ಸಮರ್ಥ್ ಹಾಗೂ ದೇವದತ್ ಪಡಿಕ್ಕಲ್ ಸದ್ಯ ಅತ್ಯುತ್ತಮ ಲಹರಿಯಲ್ಲಿದ್ದಾರೆ. ಬೌಲಿಂಗ್ ವಿಭಾಗದಲ್ಲಿ ಮಿಥುನ್ ತಮ್ಮ ವೇಗಕ್ಕೆ ಇನ್ನಷ್ಟು ಸಾಣೆ ಹಿಡಿದು ಮೈದಾನಕ್ಕಿಳಿಯುವ ಹುಮ್ಮಸ್ಸಿನಲ್ಲಿದ್ದಾರೆ. ಸೌರಾಷ್ಟ್ರ ತಂಡದಲ್ಲೂ ಪ್ರತಿಭೆಗಳಿಗೇನೂ ಕೊರತೆ ಇಲ್ಲ. ಐದು ಇನಿಂಗ್ಸ್ನಲ್ಲಿ 21 ವಿಕೆಟ್ ಉರುಳಿಸಿರುವ ನಾಯಕ ಜಯದೇವ್ ಉನಾದ್ಕಟ್ ಹಾಗೂ ಐದು ಇನಿಂಗ್ಸ್ಗಳಲ್ಲಿ 145 ರನ್ ಪೇರಿಸಿರುವ ಟೆಸ್ಟ್ ಸ್ಪೆಷಲಿಸ್ಟ್ ಚೇತೇಶ್ವರ ಪೂಜಾರ ಆ ತಂಡದ ಆಧಾರಸ್ತಂಭಗಳೆನಿಸಿಕೊಂಡಿದ್ದಾರೆ. ಕರ್ನಾಟಕ ತಂಡ ಇಲ್ಲಿಯ ತನಕ ಆಡಿದ ನಾಲ್ಕು ಪಂದ್ಯಗಳಲ್ಲಿ (2 ಗೆಲುವು, 2 ಡ್ರಾ) 16 ಅಂಕ ಕಲೆಹಾಕಿ 'ಎ' ಮತ್ತು 'ಬಿ' ಗುಂಪಿನ ಅಂಕ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದೆ. ಸೌರಾಷ್ಟ್ರ ಮೂರು ಪಂದ್ಯಗಳಲ್ಲಿ (2 ಗೆಲುವು, 1 ಸೋಲು) 13 ಅಂಕ ಕಲೆಹಾಕಿದೆ. ಕರ್ನಾಟಕ: ರವಿಕುಮಾರ್ ಸಮರ್ಥ್, ದೇವದತ್ ಪಡಿಕ್ಕಲ್, ಕೆ.ವಿ ಸಿದ್ದಾರ್ಥ್, ರೋಹನ್ ಕದಂ, ಪವನ್ ದೇಶಪಾಂಡೆ, ಶ್ರೇಯಸ್ ಗೋಪಾಲ್ (ನಾಯಕ), ಬಿ. ಆರ್ ಶರತ್ (ವಿಕೆಟ್ಕೀಪರ್), ಅಭಿಮನ್ಯು ಮಿಥುನ್, ರೋನಿತ್ ಮೋರೆ, ವಿ. ಕೌಶಿಕ್, ಪ್ರತೀಕ್ ಜೈನ್. ಸೌರಾಷ್ಟ್ರ: ಹರ್ವಿಕ್ ದೇಸಾಯಿ, ಸ್ನೆಲ್ ಪಟೇಲ್ (ವಿಕೆಟ್ಕೀಪರ್), ಚೇತೇಶ್ವರ ಪೂಜಾರ, ಶೆಲ್ಡನ್ ಜಾಕ್ಸನ್, ಸಮರ್ಥ್ ವ್ಯಾಸ್, ಪ್ರೇಕರ್ ಮಂಕಡ್, ಧರ್ಮೇಂದ್ರ ಸಿನ್ಹ ಜಡೇಜಾ, ಪರ್ಥ್ ಭಟ್, ಜಯ್ ಚವ್ಹಾಣ್, ಕಮಲೇಶ್ ಮಕ್ವಾನ, ಜಯದೇವ್ ಉನಾದ್ಕಟ್ (ನಾಯಕ).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/35CZgXq
