ಪಾಟ್‌ಶೆಫ್‌ಸ್ಟ್ರೂಮ್‌ (ದಕ್ಷಿಣ ಆಫ್ರಿಕಾ): ಮೊಣಕೈ ಗಾಯದ ಸಮಸ್ಯೆಯಿಂದ ಚೇತರಿಸಿ ಭರ್ಜರಿ ಕಮ್‌ ಬ್ಯಾಕ್‌ ಮಾಡಿರುವ ಭಾರತ ಜಾವೆಲಿನ್‌ ಎಸೆತಗಾರ , ಇಲ್ಲಿ ನಡೆದ ಆಕ್ನೆ (ಎಸಿಎನ್‌ಇ) ಲೀಗ್ ಅಥ್ಲೆಟಿಕ್ಸ್‌ ಸ್ಪರ್ಧೆಯಲ್ಲಿ 87.86 ಮೀ. ದೂರಕ್ಕೆ ಭರ್ಜಿಯನ್ನೆಸೆದು ಟೋಕಿಯೊ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದುಕೊಂಡಿದ್ದಾರೆ. 22 ವರ್ಷದ ಸ್ಟಾರ್‌ ಜಾವೆಲಿನ್‌ ಎಸೆತಗಾರ ಗಾಯದ ಸಮಸ್ಯೆ ಕಾರಣ 2019ರಲ್ಲಿ ನಡೆದ ಯಾವುದೇ ಕೂಟಗಳಲ್ಲಿ ಪಾಲ್ಗೊಂಡಿರಲಿಲ್ಲ. ಕೂಟದ ಆರಂಭಕ್ಕೆ ಇನ್ನು ಕೆಲವೇ ತಿಂಗಳು ಮಾತ್ರವೇ ಬಾಕಿ ಇದ್ದು, ನೀರಜ್‌ಗೆ ಅರ್ಹತೆ ಪಡೆಯಲು ಅಂತಾರಾಷ್ಟ್ರೀಯ ಕೂಟವೊಂದರಲ್ಲಿ ಕನಿಷ್ಠ 85 ಮೀ. ದೂರಕ್ಕೆ ಜಾವೆಲಿನ್‌ ಎಸೆಯಬೇಕಿತ್ತು. ಅಂತೆಯೇ ಆಕ್ನೆ (ಎಸಿಎನ್‌ಇ) ಲೀಗ್ ಅಥ್ಲೆಟಿಕ್ಸ್‌ ಪಾಲ್ಗೊಂಡ ಭಾರತೀಯ ಭರ್ಜಿಗಾರ ನೀರಜ್‌, ಮೊದಲ ಪ್ರಯತ್ನದಲ್ಲಿ 81.76 ಮೀ. ದೂರಕ್ಕೆ ಎಸೆದು ಉತ್ತಮ ಆರಂಭ ಪಡೆದರು. ಬಳಿಕ 2ನೇ ಮತ್ತು 3ನೇ ಪ್ರಯತ್ನದಲ್ಲಿ ಕ್ರಮವಾಗಿ 82 ಮೀ. ಮತ್ತು 82.57 ಮೀ. ದೂರಕ್ಕೆ ಭರ್ಜಿ ಎಸೆದು ಲಯ ಕಂಡುಕೊಂಡರು. ಬಳಿಕ ತಮ್ಮ ಶ್ರೇಷ್ಠ ಪ್ರಯತ್ನವಾಗಿ 87.86 ಮೀ. ದೂರಕ್ಕೆ ಭರ್ಜಿ ಮುಟ್ಟಿಸುವ ಮೂಲಕ ಒಲಿಂಪಿಕ್‌ ಟಿಕೆಟ್‌ ಪಡೆದುಕೊಂಡರು. "ನನ್ನ ಪ್ರದರ್ಶನದ ಬಗ್ಗೆ ತೃಪ್ತಿಯಿದೆ. ಸ್ಪರ್ಧೆಗೂ ಮುನ್ನ ನನ್ನ ಮೇಳೆ ಯಾವುದೇ ಒತ್ತಡವನ್ನು ತೆಗೆದುಕೊಳ್ಳಲಿಲ್ಲ. ದೀರ್ಘ ವಿರಾಮದ ಬಳಿಕ ನಾನು ಸ್ಪರ್ಧಿಸುತ್ತಿರುವ ಮೊದಲ ಕೂಟವಾದ್ದರಿಂದ ನನ್ನ ಸಾಮರ್ಥ್ಯವನ್ನು ಪರೀಕ್ಷಿಸಬೇಕೆಂದಿದ್ದೆ ಅಷ್ಟೆ," ಎಂದು ನೀರಜ್‌ ತಮ್ಮ ಸಂತಸ ಹಂಚಿಕೊಂಡಿದ್ದಾರೆ. "ಮೊದಲಿಗೆ ಅಭ್ಯಾಸದಲ್ಲಿ ಎಸೆದ ಥ್ರೋ ಅತ್ಯುತ್ತಮವಾಗಿ ಮೂಡಿಬಂದಿತ್ತು. ಬಳಿಕ ಸ್ಪರ್ಧೆಯ ಮೊದಲ 3 ಪ್ರಯತ್ನಗಳು 81-83 ಮೀ. ದೂರ ತಲುಪಿತ್ತು. ಬಳಿಕ ನನ್ನ ತಂತ್ರಗಾರಿಕೆಯಲ್ಲಿ ಕೊಂಚ ತಪ್ಪಾಗುತ್ತಿರುವುದನ್ನು ಅರಿತುಕೊಂಡೆ. ಗಾಯದಿಂದ ಚೇತರಿಸಿದ ಬಳಿಕ ಅಭ್ಯಾಸ ನಡೆಸುವಾಗಲೂ ನಾನು ಈ ತಪ್ಪಿನ ಸುಧಾರಣೆಗೆ ಗಮನ ನೀಡಿದ್ದೇನೆ." ಎಂದಿದ್ದಾರೆ. ಇದೇ ಕೂಟದಲ್ಲಿ ಭಾರತದ ಮತ್ತೊಬ್ಬ ಎಸೆತಗಾರ ರೋಹಿತ್‌ ಯಾದವ್‌ 77.61 ಮೀ. ದೂರಕ್ಕೆ ಭರ್ಜಿ ಎಸೆಯುವ ಮೂಲಕ 2ನೇ ಸ್ಥಾನ ಪಡೆದರು. ಆದರೆ ಒಲಿಂಪಿಕ್ಸ್‌ ಅರ್ಹತೆಗೆ ಬೇಕಿದ್ದ ಎಸೆತ ಅವರಿಂದ ಮೂಡಿಬರಲಿಲ್ಲ. ಇನ್ನು ಕೂಟದಲ್ಲಿ ಬೇರಾವ ಸ್ಪರ್ಧಿಗಳು ಕೂಡ 70 ಮೀ. ಗಡಿ ದಾಟಲಿಲ್ಲ. "ಮುಂದಿನ ದಿನಗಳಲ್ಲಿ ಹೆಚ್ಚು ಕೂಟಗಳಲ್ಲಿ ಸ್ಪರ್ಧಿಸಲಿದ್ದೇನೆ. ಫೆಡರೇಷನ್‌ ಕಪ್‌ ಮತ್ತು ಡೈಮಂಡ್‌ ಲೀಗ್‌ನಂತಹ ಗುಣಮಟ್ಟದ ಸ್ಪರ್ಧೆಗಳಲ್ಲಿ ಪಾಲ್ಗೊಂಡು ಉತ್ತಮ ಪ್ರದರ್ಶನ ನೀಡಬೇಕೆಂದಿದ್ದೇನೆ," ಎಂದು ಚೋಪ್ರ ವಿಶ್ವಾಸದ ಮಾತುಗಳನ್ನಾಡಿದ್ದಾರೆ. ಚೋಪ್ರ ಗಾಯದ ಸಮಸ್ಯೆ ಕಾರಣ 2019ರಲ್ಲಿ ನಡೆದ ಡೈಮಂಡ್‌ ಲೀಗ್ ಮತ್ತು ಐಎಎಎಫ್‌ ವಿಶ್ವ ಚಾಂಪಿಯನ್‌ಷಿಪ್‌ನಂತಹ ಮಹತ್ವದ ಕೂಟಗಳಿಂದ ಹೊರಗುಳಿದಿದ್ದರು. 2018ರ ಜಕಾರ್ತ ಏಷ್ಯನ್‌ ಗೇಮ್ಸ್‌ನಲ್ಲಿ 88.06 ಮೀ. ದೂರಕ್ಕೆಸೆದು ಚಿನ್ನ ಗೆದ್ದಿರುವುದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಚೋಪ್ರ ಅವರ ಕೊನೆಯ ಸ್ವರ್ಣ ಸಾಧನೆಯಾಗಿತ್ತು. ಒಲಿಂಪಿಕ್ಸ್‌ಗೆ ಅರ್ಹತೆ ಗಿಟ್ಟಿಸಿದ ತಮ್ಮ ಎಸೆತದ ವಿಡಿಯೋವನ್ನು ನೀರಜ್‌ ಟ್ವೀಟ್‌ ಮೂಲಕ ಹಂಚಿಕೊಂಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2tYLqSr
