ಬೆಂಗಳೂರು: ಬೆಳೆಗಳ ಬೆಲೆ ಕುಸಿತದ ಹಿನ್ನೆಲೆಯಲ್ಲಿ ಕಂಗೆಟ್ಟಿರುವ ಅನ್ನದಾತರ ನೆರವಿಗೆ ಧಾವಿಸಲು ರಾಜ್ಯ ಸರಕಾರ ತೀರ್ಮಾನಿಸಿದೆ. ಕೇಂದ್ರ ಸರಕಾರ ನಿಗದಿಪಡಿಸಿದ ಅನ್ವಯ ಎಂಟು ಧಾನ್ಯಗಳ ಖರೀದಿಗೆ ನಿರ್ಧರಿಸಿದೆ. ಜತೆಗೆ ರಾಜ್ಯ ಸರಕಾರದಿಂದ ಕ್ವಿಂಟಾಲ್‌ ಭತ್ತಕ್ಕೆ 200 ರೂ. ಹಾಗೂ ತೊಗರಿಗೆ 300 ರೂ. ಪ್ರೋತ್ಸಾಹ ಧನ ನೀಡಲು ಸೋಮವಾರ ನಡೆದ ಸಚಿವ ಸಂಪುಟ ಉಪ ಸಮಿತಿ ಸಭೆಯಲ್ಲಿ ಒಪ್ಪಿಗೆ ನೀಡಲಾಗಿದೆ. ಡಿಸಿಎಂ ಲಕ್ಷ್ಮಣ ಸವದಿ ನೇತೃತ್ವದ ಸಂಪುಟ ಉಪಸಮಿತಿ ಸಭೆಯಲ್ಲಿ ಬೆಂಬಲ ಬೆಲೆ ಅನ್ವಯ ಖರೀದಿಸುವ ಬೆಳೆಗಳ ಪಟ್ಟಿಯನ್ನು ಅಂತಿಮಗೊಳಿಸಲಾಗಿದೆ. ಮಾರ್ಚ್ 31ರವರೆಗೆ ಖರೀದಿ ಕೇಂದ್ರಗಳು ಕಾರ್ಯ ನಿರ್ವಹಿಸುತ್ತವೆ. ಇದಕ್ಕಾಗಿ ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ಟಾಸ್ಕ್‌ಪೋರ್ಸ್‌ ರಚಿಸಲಾಗಿದೆ. ಖರೀದಿ ಅವಧಿ ಮೂರು ತಿಂಗಳುಬೆಂಬಲ ಬೆಲೆ ಅನ್ವಯ ಮೂರು ತಿಂಗಳ ಕಾಲ ರೈತರಿಂದ ಧಾನ್ಯಗಳ ಖರೀದಿಗೆ ಡಿಸಿಎಂ ಲಕ್ಷ್ಮಣ ಸವದಿ ನೇತೃತ್ವದ ಸಂಪುಟ ಉಪಸಮಿತಿ ಸಭೆ ನಿರ್ಧರಿಸಿದೆ. ಈ ಹಿಂದೆ ಸಣ್ಣ ರೈತರಿಂದ ಮಾತ್ರ ರಾಗಿ ಖರೀದಿಸಬೇಕೆಂದು ವಿಧಿಸಿದ್ದ ನಿಬಂಧನೆ ಸಡಿಲಗೊಳಿಸಲಾಗಿದೆ. ಇದನ್ನು ಎಲ್ಲ ರೈತರಿಗೂ ವಿಸ್ತರಿಸಲಾಗಿದೆ. ಆದರೆ ಎಕರೆಗೆ 10 ಕ್ವಿಂಟಾಲ್‌ ನಿರ್ಬಂಧ ವಿಧಿಸಲಾಗಿದ್ದು, ಒಬ್ಬ ರೈತನಿಂದ 50 ಕ್ವಿಂಟಾಲ್‌ವರೆಗೆ ರಾಗಿ ಖರೀದಿ ಮಾಡಬಹುದಾಗಿದೆ. ಒಟ್ಟಾರೆಯಾಗಿ ಈ ಹಂಗಾಮಿನಲ್ಲಿ 2 ಲಕ್ಷ ಮೆಟ್ರಿಕ್‌ ಟನ್‌ ರಾಗಿ ಖರೀದಿಸಲಾಗುತ್ತದೆ. ಡಿಸೆಂಬರ್‌ 12ರಂದು ನಡೆದ ಉಪಸಮಿತಿ ಸಭೆಯಲ್ಲಿ , ಜೋಳ ಹಾಗೂ ರಾಗಿ ಖರೀದಿಗೆ ಒಪ್ಪಿಗೆ ನೀಡಲಾಗಿತ್ತು. ಸೋಯಾಬೀನ್‌, ತೊಗರಿ ಹಾಗೂ ಶೇಂಗಾ ಖರೀದಿಗೂ ಅವಕಾಶ ನೀಡುವಂತೆ ಕೇಂದ್ರ ಸರಕಾರಕ್ಕೆ ಪ್ರಸ್ತಾಪ ಕಳುಹಿಸಲಾಗಿತ್ತು. ಇದಕ್ಕೆ ಕೇಂದ್ರ ಕೃಷಿ ಇಲಾಖೆ ಸಮ್ಮತಿ ನೀಡಿದೆ. ತೊಗರಿಗೆ 5800 ರೂ. (ಪ್ರತಿ ಕ್ವಿಂಟಾಲ್‌ ) ಎಂಎಸ್‌ಪಿ ನಿಗದಿಯಾಗಿದ್ದು, ರಾಜ್ಯ ಸರಕಾರ 300 ರೂ. ಪ್ರೋತ್ಸಾಹಧನ ನೀಡುತ್ತದೆ. ಹೀಗಾಗಿ ಖರೀದಿ ಕೇಂದ್ರದಲ್ಲಿ ಪ್ರತಿ ಕ್ವಿಂಟಾಲ್‌ ತೊಗರಿಯನ್ನು 6100 ರೂ.ನಂತೆ ಖರೀದಿಸಲಾಗುತ್ತದೆ. ಭತ್ತಕ್ಕೆ 200 ರೂ. ಪ್ರೋತ್ಸಾಹಧನ ನಿಗದಿ ಮಾಡಲಾಗಿದ್ದು, ಗ್ರೇಡ್‌ ಎ 2035 ಹಾಗೂ ಸಾಮಾನ್ಯ 2015 ರೂ. (ಪ್ರತಿ ಕ್ವಿಂಟಾಲ್‌ )ನಂತೆ ಖರೀದಿಸಲಾಗುತ್ತದೆ. ಖರೀದಿ ಹೇಗೆ?ಡಿಸಿ ಅಧ್ಯಕ್ಷತೆಯ ಜಿಲ್ಲಾಟಾಸ್ಕ್‌ಪೋರ್ಸ್‌ ರಚಿಸಲಾಗಿದ್ದು, ಸ್ಥಳೀಯ ಅಗತ್ಯಕ್ಕೆ ಅನುಗುಣವಾಗಿ ಖರೀದಿ ಕೇಂದ್ರ ಸ್ಥಾಪನೆ ಮಾಡಲಾಗುತ್ತದೆ. ಆಹಾರ ಮತ್ತು ನಾಗರಿಕ ಸರಬರಾಜು ನಿಗಮ, ಉಗ್ರಾಣ ನಿಗಮ, ಸಹಕಾರ ಮಾರಾಟ ಮಂಡಳಿಗೆ ನಿಯೋಜಿತವಾದ ಜಿಲ್ಲೆಗಳಲ್ಲಿ ಖರೀದಿಗೆ ಅವಕಾಶ ನೀಡಲಾಗಿದೆ. ಭತ್ತವನ್ನು ಜಿಲ್ಲಾಧಿಕಾರಿಗಳು ಗುರುತಿಸಿದ ಅಕ್ಕಿ ಗಿರಣಿಗೆ ಫ್ರುಟ್‌ ತಂತ್ರಾಂಶದ ಗುರುತಿನೊಂದಿಗೆ ಒದಗಿಸಬಹುದು. ದರ ಕುಸಿತದ ಹಿನ್ನೆಲೆಯಲ್ಲಿ ಬೆಂಬಲ ಬೆಲೆಯಲ್ಲಿಕೆಲ ಬೆಳೆಗಳನ್ನು ಖರೀದಿಸಲು ರಾಜ್ಯ ಸರಕಾರ ನಿರ್ಧರಿಸಿದೆ. ಭತ್ತ ಹಾಗೂ ತೊಗರಿಗೆ ಕೇಂದ್ರ ಸರಕಾರ ನಿಗದಿ ಪಡಿಸಿದ ದರದ ಜತೆಗೆ ರಾಜ್ಯ ಸರಕಾರ ಪ್ರೋತ್ಸಾಹಧನ ನೀಡುತ್ತದೆ. ಕಷ್ಟದಲ್ಲಿರುವ ಅನ್ನದಾತರ ನೆರವಿಗೆ ಧಾವಿಸುವುದು ನಮ್ಮ ಕರ್ತವ್ಯ ಎಂದು ಸರಕಾರ ಪರಿಗಣಿಸಿದೆ. - ಲಕ್ಷ್ಮಣ ಸವದಿ, ಉಪ ಮುಖ್ಯಮಂತ್ರಿ ಬೆಂಬಲ ಬೆಲೆ ನಿಗದಿ ಮಾಡಿರುವುದು ಸ್ವಾಗತಾರ್ಹ. ಆದರೆ ಸ್ವಲ್ಪ ವಿಳಂಬವಾಯ್ತು. ಎಂಎಸ್‌ಪಿ ಜತೆಗೆ ಸಂಗ್ರಹ ಹಾಗೂ ಸಾಗಾಟಕ್ಕೆ ವೆಚ್ಚವಾಗುವ ಹಣವನ್ನೂ ರೈತರಿಗೆ ನೀಡಬೇಕು. ತಕ್ಷಣ ಖರೀದಿ ಆರಂಭಿಸಬೇಕು. - ಪ್ರಕಾಶ್‌ ಕಮ್ಮರಡಿ, ಕೃಷಿ ಬೆಲೆ ಆಯೋಗದ ಮಾಜಿ ಅಧ್ಯಕ್ಷ ಭತ್ತ ಹಾಗೂ ತೊಗರಿಗೆ ಪ್ರೋತ್ಸಾಹಧನ ನೀಡುವುದು ಒಳ್ಳೆಯದು. ಆದರೆ ಖರೀದಿ ಪ್ರಕ್ರಿಯೆ ಸರಳಗೊಳಿಸಬೇಕು. ಅನಗತ್ಯ ಮಿತಿಯಿಂದ ರೈತರಿಗೆ ಅನುಕೂಲವಾಗುವುದಿಲ್ಲ. - ಕುರುಬೂರು ಶಾಂತಕುಮಾರ್‌, ರೈತ ಹೋರಾಟಗಾರ
from India & World News in Kannada | VK Polls https://ift.tt/2S0XeeK
