ಕೊಚ್ಚಿ: 'ಪೌರತ್ವ ತಿದ್ದುಪಡಿ ಕಾಯಿದೆ ವಿರೋಧಿಸಿ ದಿಲ್ಲಿಯ ಶಹೀನ್‌ಬಾಗ್‌ ಪ್ರತಿಭಟನಾಕಾರರ ಜೊತೆ ಕೈಜೋಡಿಸಿದರೆ ಬಿರಿಯಾನಿ ಸಿಗುತ್ತದೆ' ಎಂಬ ಸಲಹೆ ಕೇರಳದ ಉದ್ಯೋಗ ಆಕಾಂಕ್ಷಿಗೆ ಇಮೇಲ್‌ ಮೂಲಕ ಸಿಕ್ಕಿದೆ! ತಿರುವನಂತಪುರದ ನಿವಾಸಿಯಾಗಿರುವ, ಪ್ರಸ್ತುತ ಬುರ್‌ ದುಬೈನಲ್ಲಿ ನೆಲೆಸಿರುವ ಅಬ್ದುಲ್ಲಾ ಎಸ್‌ ಎಸ್‌ ಎಂಬ ಯುವಕ ಉದ್ಯೋಗಕ್ಕಾಗಿ ಇಮೇಲ್‌ ಮೂಲಕ ಅರ್ಜಿ ಸಲ್ಲಿಸಿದಾಗ 'ಶಹೀನ್‌ಬಾಗ್‌ನಲ್ಲಿ ಪ್ರತಿಭಟನೆ ನಡೆಸಲು ಹೋದರೆ ಪ್ರತಿದಿನ ಬಿರಿಯಾನಿ ತಿನ್ನಬಹುದು' ಎಂಬ ಸಲಹೆ ಪ್ರತಿಕ್ರಿಯೆ ರೂಪದಲ್ಲಿ ಬಂದಿದೆ. ಅಬ್ದುಲ್ಲಾ ಅವರಿಗೆ ಬಂದ ಪ್ರತ್ಯುತ್ತರದ ಸ್ಕ್ರೀನ್‌ಶಾಟ್‌ ವೈರಲ್‌ ಆಗಿದ್ದು, ಉದ್ಯೋಗದಾತರ ಪ್ರತಿಕ್ರಿಯೆ ವಿರುದ್ಧ ಭಾರಿ ಖಂಡನೆ ವ್ಯಕ್ತವಾಗಿದೆ. ''ತರಬೇತಿ ಅವಧಿಯಲ್ಲಿ ವೇತನ ರಹಿತವಾಗಿ ಕೆಲಸ ಮಾಡಲು ಸಿದ್ಧವಿದ್ದೇನೆ'' ಎಂದು ಮೈಲ್‌ ಮೂಲಕ ವಿನಂತಿಸಿಕೊಂಡಿದ್ದರು. ಅಬ್ದುಲ್ಲಾ ಅವರ ಇಮೇಲ್‌ಗೆ ಪ್ರತಿಕ್ರಿಯಿಸಿರುವ ಜಯಂತ್‌ ಗೋಖಲೆ ಎಂಬುವವರು, ''ಹೀಗೆ ನನಗೆ ಅನಿಸಿದ ಪ್ರಕಾರ ನಿಮಗೆ ಉದ್ಯೋಗ ಏಕೆ ಬೇಕು? ದಿಲ್ಲಿಗೆ ಹೋಗಿ ಮತ್ತು ಶಹೀನ್‌ಬಾಗ್‌ನಲ್ಲಿ ಕುಳಿತುಕೊಂಡು ಪ್ರತಿಭಟನೆ ನಡೆಸಿ. ಪ್ರತಿದಿನ 1,000 ರೂ. ಗಳಿಸಬಹುದು. ಉಚಿತ ಬಿರಿಯಾನಿ, ಬೇಕಾದಷ್ಟು ಚಹಾ ಮತ್ತು ಹಾಲು, ಕೆಲವು ಸಂದರ್ಭ ಸಿಹಿ ತಿನಿಸುಗಳು ಸಿಗತ್ತವೆ'' ಎಂದಿದ್ದಾರೆ. ಇಮೇಲ್‌ ಸ್ಕ್ರೀನ್‌ಶಾಟ್‌ಅನ್ನು ಸಾಮಾಜಿಕ ತಾಣಗಳಲ್ಲಿ ಹಂಚಿಕೊಂಡಿರುವ ಅಸಂಖ್ಯ ಬಳಕೆದಾರರು ಉದ್ಯೋಗಾಕಾಂಕ್ಷಿಗೆ ಧರ್ಮದ ಹೆಸರಿನಲ್ಲಿ ಕಿರುಕುಳ ನೀಡಲಾಗಿದೆ ಎಂದು ಆರೋಪಿಸಿದ್ದಾರೆ. ಶಹೀನ್‌ಬಾಗ್‌ನಲ್ಲಿ ದುಡ್ಡು ಪಡೆದು ಪ್ರತಿಭಟನೆ ನಡೆಸುತ್ತಿದ್ದಾರೆ ಎಂದು ಬಿಂಬಿಸಲಾಗುತ್ತಿದ್ದು, ಬೆಂಬಲಿಗರು ಎಷ್ಟು ಕೀಳು ಮಟ್ಟಕ್ಕೆ ಇಳಿದಿದ್ದಾರೆ ಎಂಬುದನ್ನು ಸೂಚಿಸುತ್ತದೆ ಎಂದು ಆಕ್ರೋಶ ವ್ಯಕ್ತ ಪಡಿಸಿದ್ದಾರೆ. ''ಉದ್ಯೋಗಕ್ಕಾಗಿ ಹಲವು ಕಂಪನಿಗಳಿಗೆ ಅರ್ಜಿ ಹಾಕಿದ್ದೆ. ಪ್ರತಿಕ್ರಿಯೆಗಳನ್ನು ನೋಡುತ್ತಿದ್ದಾಗ ಶಹೀನ್‌ಬಾಗ್‌ ಪ್ರತಿಭಟನೆಗೆ ಹೋಗುವಂತೆ ಸೂಚಿಸಿರುವ ಇಮೇಲ್‌ ಬಂದಿತ್ತು. ಅದರ ಸ್ಕ್ರೀನ್‌ಶಾಟ್‌ಅನ್ನು ನನ್ನ ಸಹೋದರನ ಸ್ನೇಹಿತನಿಗೆ ಕಳುಹಿಸಿದ್ದೆ. ಸಾಮಾಜಿಕ ತಾಣಗಳಲ್ಲಿ ಸ್ಕ್ರೀನ್‌ಶಾಟ್‌ಅನ್ನು ಆತನೆ ಹರಿಯಬಿಟ್ಟಿರಬೇಕು. ಇದೀಗ ಹಲವರು ನನಗೆ ಕರೆ ಮಾಡಿ ಜಾಬ್‌ ಕೊಡಿಸಲು ಸಹಾಯ ಮಾಡುವುದಾಗಿ ಹೇಳುತ್ತಿದ್ದಾರೆ. ಜೊತೆಗೆ ನಾನು ಉದ್ಯೋಗದಾತನೆಂದು ಭಾವಿಸಿ ಅವಹೇಳನಕಾರಿ ಕರೆಗಳು ಬರುತ್ತಿವೆ'' ಎಂದು ಫೋನ್‌ ಮೂಲಕ ಅಬ್ದುಲ್ಲಾ ಘಟನೆ ಬಗ್ಗೆ ವಿವರಿಸಿದ್ದಾರೆ. ಕೆಲವರು ಕೀಳು ಮಟ್ಟದ ಪ್ರತಿಕ್ರಿಯೆ ನೀಡಿರುವ ಉದ್ಯೋಗದಾತನ ವಿರುದ್ಧ ಕಾನೂನು ಹೋರಾಟ ಮಾಡುವಂತೆ ಸಲಹೆ ನೀಡಿದ್ದಾರೆ. ಈ ಬಗ್ಗೆ ಮಾತನಾಡಿದ ಅಬ್ದುಲ್ಲಾ, ''ನಾನು ಯಾರ ಮೇಲೆಯೂ ಯಾವುದೇ ದೂರು ನೀಡಲು ಹೋಗುವುದಿಲ್ಲ. ನಾನು ಒಂದು ಉದ್ಯೋಗವನ್ನು ಗಿಟ್ಟಿಸಿಕೊಳ್ಳಬೇಕು'' ಎಂದು ಅಬ್ದುಲ್ಲಾ ತಿಳಿಸಿದರು.
from India & World News in Kannada | VK Polls https://ift.tt/3aNzUtJ
