ಹ್ಯಾಮಿಲ್ಟನ್: ನ್ಯೂಜಿಲೆಂಡ್ ವಿರುದ್ದ 'ಟೈ'ನಲ್ಲಿ ಅಂತಗೊಂಡ ಪಂದ್ಯದಲ್ಲಿ ಸೂಪರ್ ಓವರ್‌ನಲ್ಲಿ ರೋಚಕ ಗೆಲುವು ಬಾರಿಸಿರುವ ಟೀಮ್ ಇಂಡಿಯಾ ಐದು ಪಂದ್ಯಗಳ ಟಿ20 ಸರಣಿಯನ್ನು ಇನ್ನೆರಡು ಪಂದ್ಯಗಳು ಬಾಕಿ ಉಳಿದಿರುವಂತೆಯೇ 3-0 ಅಂತರದಲ್ಲಿ ವಶಪಡಿಸಿಕೊಂಡಿದೆ. ಈ ಮೊದಲು ಆಕ್ಲೆಂಡ್‌ನಲ್ಲಿ ನಡೆದ ಮೊದಲೆರಡು ಟಿ20 ಪಂದ್ಯಗಳಲ್ಲೂ ಭಾರತ ಗೆಲುವು ಬಾರಿಸಿತ್ತು. ಮೂರನೇ ಟಿ20 ಪಂದ್ಯದಲ್ಲೂ ವಿಜಯ ಗಳಿಸುವಲ್ಲಿ ಭಾರತ ಯಶಸ್ವಿಯಾಗಿರಬಹುದು. ಆದರೆ ಎದುರಾಳಿ ತಂಡವು ತೋರಿರುವ ಹೋರಾಟ ಮನೋಭಾವವನ್ನು ಭಾರತ ತಂಡದ ನಾಯಕ ಮೆಚ್ಚಿದ್ದಾರೆ. ವಿಶೇಷವಾಗಿಯೂ ಕಿವೀಸ್ ನಾಯಕ ಕೇನ್ ವಿಲಿಯಮ್ಸನ್ ಅವರಿಗಾಗಿ ಕೊಹ್ಲಿ ಹೃದಯ ಮಿಡಿಯಿತು. 'ನನಗನಿಸುತ್ತದೆ ಒಂದು ಹಂತದಲ್ಲಿ ನಮ್ಮ ಕೈಯಿಂದ ಪಂದ್ಯ ಕೈ ಜಾರಿತು ಎಂದು ಅಂದುಕೊಂಡಿದ್ದೆ. ನಮ್ಮ ಕೋಚ್ ಬಳಿಯೂ ಎದುರಾಳಿಗಳು ಗೆಲುವಿಗೆ ಅರ್ಹವಾಗಿದ್ದಾರೆ ಎಂದೇ ನುಡಿದಿದ್ದೆ. 95 ರನ್‌ಗಳಲ್ಲಿ ಬ್ಯಾಟಿಂಗ್ ಮಾಡಿದ ರೀತಿ ನೋಡಿದರೆ ಅವರಿಗಾಗಿ ಬೇಸರ ಅನಿಸುತ್ತಿದೆ. ಫಲಿತಾಂಶಗಳು ನಿಮ್ಮ ಪರವಾಗಿಲ್ಲದಿದ್ದಾಗ ಅಂತಹ ಇನ್ನಿಂಗ್ಸ್ ಭಾವನೆಗಳನ್ನು ಅರಿತುಕೊಳ್ಳಬಲ್ಲೆ' ಎಂದರು. ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ ರೋಹಿತ್ ಶರ್ಮಾ ಅರ್ಧಶತಕದ (65) ನೆರವಿನಿಂದ ಐದು ವಿಕೆಟ್ ನಷ್ಟಕ್ಕೆ 179 ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತ್ತು. ಬಳಿಕ ಗುರಿ ಬೆನ್ನಟ್ಟಿದ ನ್ಯೂಜಿಲೆಂಡ್, ನಾಯಕ ವಿಲಿಯಮ್ಸನ್ ಅದ್ಭುತ ಆಟದಿಂದ ಇನ್ನೇನು ಗೆದ್ದೇ ಬಿಟ್ಟಿತು ಎಂದು ಅಂದುಕೊಂಡಿದ್ದೆವು. ಆದರೆ ಮೊಹಮ್ಮದ್ ಶಮಿ ಅಂತಿಮ ಓವರ್‌ನಲ್ಲಿ ವಿಲಿಯಮ್ಸನ್ ವಿಕೆಟ್ ಒಪ್ಪಿಸುವುದರೊಂದಿಗೆ ಪಂದ್ಯದ ಚಿತ್ರಣವು ಬದಲಾಯಿತು. ಅಂತಿಮವಾಗಿ ರೋಚಕ ಟೈನಲ್ಲಿ ಪಂದ್ಯ ಅಂತ್ಯಗೊಂಡಿತು. ವಿರೋಚಿತ ಹೋರಾಟ ನೀಡಿದ ವಿಲಿಯಮ್ಸನ್ 48 ಎಸೆತಗಳಲ್ಲಿ ಎಂಟು ಬೌಂಡರಿ ಹಾಗೂ ಆರು ಸಿಕ್ಸರ್‌ಗಳಿಂದ 95 ರನ್ ಗಳಿಸಿದರು. ಇದರಿಂದ ಸರಣಿ ಸೋಲಿನ ಮುಖಭಂಗಕ್ಕೊಳಗಾದರು. ಅದೇ ಹೊತ್ತಿಗೆ ಕೊನೆಯ ಎಸೆತವನ್ನು ನೇರವಾಗಿ ವಿಕೆಟ್‌ಗೆ ದಾಳಿ ಮಾಡಲು ಮೊಹಮ್ಮದ್ ಶಮಿ ಜೊತೆಗೆ ಮಾತುಕತೆ ನಡೆಸಿರುವುದಾಗಿ ಕೊಹ್ಲಿ ಗೇಮ್ ಪ್ಲ್ಯಾನ್ ವಿವರಿಸಿದರು. ಯಾಕೆಂದರೆ ಬೇರೆ ಯಾವುದೇ ದಾಳಿಯನ್ನು ಪ್ರಯತ್ನಿಸಿದರೂ ಕನಿಷ್ಠ ಸಿಂಗಲ್ಸ್ ದೊರಕುವ ಅವಕಾಶವಿತ್ತು ಎಂದು ಹೇಳಿದರು. ಪಂದ್ಯದ ಅಂತಿಮ ಎಸೆತದಲ್ಲಿ ರಾಸ್ ಟೇಲರ್ ಅವರನ್ನು ಮೊಹಮ್ಮದ್ ಶಮಿ ಕ್ಲೀನ್ ಬೌಲ್ಡ್ ಮಾಡಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/31gr2IV
