ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಮಂಗಳವಾರ ರೈತರು, ರೈತ ಮಹಿಳೆಯರ ಯಶೋಗಾಥೆಗಳ ಅನುರಣನ. ಅನ್ನ ನೀಡುವ ಕೈಗಳಿಗೆ ಗೌರವದ ಫಲಕ ನೀಡಿ ಶಿರಕ್ಕೆ ಸೂಪರ್‌ಸ್ಟಾರ್‌ ಕಿರೀಟ ತೊಡಿಸುವ ಮಹಾಸಂಭ್ರಮ. ಇದಕ್ಕೆಲ್ಲ ಸಾಕ್ಷಿಯಾದವರು ಸಿಎಂ ಬಿ ಎಸ್‌ ಯಡಿಯೂರಪ್ಪ ಮತ್ತು ಸಮಾಜದ ನಾನಾ ಗಣ್ಯರು. ರೈತರ ಸಬಲೀಕರಣ ಮತ್ತು ಕೃಷಿ ಬದುಕಿಗೆ ಸ್ಫೂರ್ತಿ ತುಂಬುವ ಉದ್ದೇಶಧಿದಿಂದ ಆರಂಭಗೊಂಡ 'ವಿಜಯ ಕರ್ನಾಟಕ ಸೂಪರ್‌ ಸ್ಟಾರ್‌ ರೈತ' ಎರಡನೇ ಆವೃತ್ತಿಯ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮ ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ನಡೆಯಿತು. ಪತ್ರಿಕೆಯು ರಾಜ್ಯ ಮಟ್ಟದಲ್ಲಿ ಗುರುತಿಸಿದ 20 ಕೃಷಿ ಸಾಧಕರಿಗೆ ಯಡಿಯೂರಪ್ಪ ಅವರು ಸೂಪರ್‌ಸ್ಟಾರ್‌ ರೈತ ಪ್ರಶಸ್ತಿ ನೀಡಿ ಗೌರವಿಸಿದರು. 30 ಗುಂಟೆ ಜಮೀನನ್ನೇ 'ನಂದನವನ'ವನ್ನಾಗಿಸಿದ ಸಣ್ಣ ರೈತರಿಂದ ಹಿಡಿದು 80 ಎಕರೆ ಭೂಮಿಯಲ್ಲಿ ಕೃಷಿಯನ್ನು ಉದ್ಯಮದಂತೆ ನಡೆಸುತ್ತಿರುವ ದೊಡ್ಡ ಕೃಷಿಕರವರೆಗಿನ ಸಾಧಕರ ಯಶೋಗಾಥೆಗಳಿಗೆ ರೈತ ನಾಯಕ ಕಿವಿಯಾದರು. ಕನ್ನಡ ಪತ್ರಿಕೋದ್ಯಮದಲ್ಲೇ ಹೊಸ ಇತಿಹಾಸ ಸೃಷ್ಟಿಸಿದ ಈ ಅಭಿಯಾನದ ಮೆಗಾ ಫೈನಲ್‌ಅನ್ನು ಮುಖ್ಯಮಂತ್ರಿಯವರು ರಾಶಿ ಪೂಜೆಯ ಮೂಲಕ ಉದ್ಘಾಟಿಸಿದ್ದು ಗಮನ ಸೆಳೆಯಿತು. ಗ್ರಾಮೀಣ ಪರಿಕರಗಳ ಪ್ರದರ್ಶನಧಿದೊಂದಿಗೆ ಹಳ್ಳಿ ಸೊಗಡಿನ ವಾತಾವರಣದಲ್ಲಿ ರಾಜ್ಯದ ನಾನಾ ಜಿಲ್ಲೆಗಳಿಂದ ಆಗಮಿಸಿದ ರೈತರ ಪರಿವಾರಗಳು ಸಂಭ್ರಮಿಸಿದವು. ತಮ್ಮ ಭಾಗದ ವೇಷಭೂಷಣಗಳಲ್ಲೇ ಬಂದಿದ್ದ ರೈತರ ಪ್ರಾದೇಶಿಕ ಸೊಗಡು ಕಣ್ಮನ ಸೆಳೆಯಿತು. ಬೆಂಗಳೂರು ಕೃಷಿ ವಿವಿ ಕುಲಪತಿ ಡಾ. ರಾಜೇಂದ್ರ ಪ್ರಸಾದ್‌, ಕೃಷಿ ಇಲಾಖೆ ನಿರ್ದೇಶಕ ಬಿ.ವೈ. ಶ್ರೀನಿವಾಸ್‌, ವಿಕ ಅಭಿಯಾನದಲ್ಲಿ ಪಾಲ್ಗೊಂಡ ಕೃಷಿ ಉದ್ಯಮಕ್ಕೆ ಸಂಬಂಧಿಸಿದ ನಾನಾ ಕಂಪನಿಗಳು, ಸಂಸ್ಥೆಗಳ ಮುಖ್ಯಸ್ಥರು ಉಪಸ್ಥಿತರಿದ್ದರು.
from India & World News in Kannada | VK Polls https://ift.tt/2U5eKkI
