ಮೆಲ್ಬೋರ್ನ್: ಲೋಕದ ಅತ್ಯಂತ ರೋಚಕ ಕದನಗಳಲ್ಲಿ ಒಂದಾಗಿ ವಿಶ್ಲೇಷಿಸಬಹುದಾದ ಪಂದ್ಯವೊಂದರಲ್ಲಿ ಎದುರಾಳಿಯಿಂದ ಏಳು ಮ್ಯಾಚ್ ಪಾಯಿಂಟ್‌ಗಳಿಂದ ಪಾರಾಗಿರುವ ಸ್ವಿಜರ್ಲೆಂಡ್‌ನ ಹಿರಿಯ ಅನುಭವಿ ಆಟಗಾರ , ಪ್ರತಿಷ್ಠಿತ 2020 ಗ್ರ್ಯಾನ್ ಸ್ಲಾಮ್ ಟೆನಿಸ್ ಟೂರ್ನಿಯಲ್ಲಿ ಸೆಮಿಫೈನಲ್‌ಗೆ ಲಗ್ಗೆಯಿಟ್ಟಿದ್ದಾರೆ. ದಾಖಲೆಯ 20 ಗ್ರ್ಯಾನ್ ಸ್ಲಾಮ್ ಪ್ರಶಸ್ತಿಗಳನ್ನು ಗೆದ್ದು 21ನೇ ಗ್ರ್ಯಾನ್ ಸ್ಲಾಮ್ ಕಿರೀಟದ ಹುಡುಕಾಟದಲ್ಲಿರುವ 38ರ ಹರೆಯದ ಫೆಡರರ್‌ಗೆ, ಕ್ವಾರ್ಟರ್ ಫೈನಲ್ ಹಂತದಲ್ಲಿ ಅಮೆರಿಕದ ಟೆನ್ನಿಸ್ ಸ್ಯಾಂಡ್‌ಗ್ರೆನ್ ಅವರಿಂದ ನಿಕಟ ಪೈಪೋಟಿ ಎದುರಾಗಿತ್ತು. ಟೂರ್ನಿಯಲ್ಲಿ ಮೂರನೇ ಶ್ರೇಯಾಂಕವನ್ನು ಪಡೆದಿರುವ ಫೆಡರರ್‌ಗೆ ಶ್ರೇಯಾಂಕರಹಿತ ಸ್ಪರ್ಧಿ ಟೆನ್ನಿಸ್ ಸ್ಯಾಂಡ್‌ಗ್ರೆನ್ ವಿರುದ್ಧದ ಪಂದ್ಯವು ಅಕ್ಷರಶ: ಕಬ್ಬಿಣದ ಕಡಲೆಯಾಗಿ ಪರಿಣಮಿಸಿತ್ತು. ಕೊನೆಗೂ ತಮ್ಮ ಅನುಭವ ಸಂಪತ್ತನ್ನು ಸಂಪೂರ್ಣ ಧಾರೆಯೆಳೆದ ಫೆಡರರ್ 6-3, 2-6, 2-6, 7-6 (10-8), 6-3ರ ಕಠಿಣ ಅಂತರದಲ್ಲಿ ಗೆದ್ದು ಅಂತಿಮ ನಾಲ್ಕರ ಘಟ್ಟವನ್ನು ಪ್ರವೇಶಿಸಿದರು. ಏಳನೇಯ ಆಸ್ಟ್ರೇಲಿಯನ್ ಓಪನ್ ಗ್ರ್ಯಾನ್ ಸ್ಲಾಮ್ ಕಿರೀಟ ಎದುರು ನೋಡುತ್ತಿರುವ ಫೆಡರರ್, ಮೆಲ್ಬೋರ್ನ್ ಪಾರ್ಕ್‌ನಲ್ಲಿ ನಡೆದ ಪಂದ್ಯದಲ್ಲಿ ಮೊದಲ ಸೆಟ್ 6-2ರ ಅಂತರದಲ್ಲಿ ಗೆದ್ದು ಶುಭಾರಂಭ ಮಾಡಿಕೊಂಡರು. ಆದರೆ ಈ ಸಂದರ್ಭದಲ್ಲಿ ಅಸಲಿ ಸವಾಲು ಎದುರಾಗಿತ್ತು. ನಂತರದ ಎರಡು ಸೆಟ್‌ಗಳಲ್ಲಿ ಅಚ್ಚರಿಯೆಂಬಂತೆ ತಲಾ 2-6ರ ಅಂತರದಲ್ಲಿ ಸೋಲುವ ಮೂಲಕ ಹಿನ್ನೆಡೆ ಅನುಭವಿಸಿದರು. ನಾಲ್ಕನೇ ಸೆಟ್‌ನಲ್ಲಿ ಇಬ್ಬರು ಸಮಬಲದ ಹೋರಾಟವನ್ನು ನೀಡಿದರು. ಈ ನಡುವೆ ಫೆಡರರ್ ತೊಡೆ ಸಂದಿನ ನೋವಿಗೆ ಒಳಗಾಗಿರುವುದರಿಂದ ತಮ್ಮ ಶ್ರೇಷ್ಠ ಪ್ರದರ್ಶನ ನೀಡಲು ಸಾಧ್ಯವಾಗುತ್ತಿರಲಿಲ್ಲ. ಇನ್ನೇನು ಪಂದ್ಯವನ್ನು 'ಟೈ ಬ್ರೇಕರ್‌'ನಲ್ಲಿ ಕಳೆದುಕೊಳ್ಳುತ್ತಾರೆ ಎಂದೇ ಅಂದುಕೊಳ್ಳಲಾಗಿತ್ತು. ಆದರೆ ಈ ವಯಸ್ಸಿನಲ್ಲೂ ತಾವೇಕೆ ವಿಶ್ವಶ್ರೇಷ್ಠ ಎಂಬುದನ್ನು ನಿರೂಪಿಸಿದ ಫೆಡರರ್ ಏಳು ಬಾರಿ ಎದುರಾಳಿಯಿಂದ ಮ್ಯಾಚ್ ಪಾಯಿಂಟ್‌ನಿಂದ ಪಾರಾದರಷ್ಟೇ ಅಲ್ಲದೆ ನಿರ್ಣಾಯಕ ನಾಲ್ಕನೇ ಸೆಟ್ ಅನ್ನು 7-6 (10-8) ರ ಅಂತರದಲ್ಲಿ ವಶಪಡಿಸಿಕೊಂಡರು. ಇಲ್ಲಿಂದ ಬಳಿಕ ತಮ್ಮ ನೈಜ ಪ್ರದರ್ಶನ ನೀಡಿದ ಫೆಡರರ್ ಡಿಸೈಡರ್ ಐದನೇ ಸೆಟ್ ಅನ್ನು 6-3ರ ಅಂತರದಲ್ಲಿ ವಶಪಡಿಸಿ ಎದುರಾಳಿಗೆ ಗುಡ್ ಬೈ ಹೇಳಿದರು. ಪ್ರಸ್ತುತ ಫೆಡರರ್ ಪ್ರತಿ ಹೋರಾಟವನ್ನು ಟೆನಿಸ್ ಇತಿಹಾಸದಲ್ಲೇ ಗ್ರೇಟ್ ಎಸ್ಕೇಟ್ ಎಂದು ಬಿಂಬಿಸಲಾಗಿದೆ. ಇಲ್ಲಿ ಸೋಲಿನ ಅಂಚಿನಲ್ಲಿದ್ದರೂ ಛಲ ಬಿಡದ ಫೆಡರರ್ ಐಸ್ ಐಸ್ ಕೂಲ್‌ನಂತೆ ತಾಳ್ಮೆಯನ್ನು ಮೆರೆದು ಅದ್ಭುತ ಹೋರಾಟ ತೋರಿರುವುದು ಎಲ್ಲೆಡೆಯಿಂದ ಮೆಚ್ಚುಗೆಗೆ ಪಾತ್ರವಾಗಿದೆ. ಬಳಿಕ ಪ್ರತಿಕ್ರಿಯೆ ನೀಡಿದ ಫೆಡರರ್, ನಾನು ಈ ಗೆಲುವಿಗೆ ಅರ್ಹವಾಗಿರಲಿಲ್ಲ. ಆದರೂ ಈ ಹಂತಕ್ಕೆ ತಲುಪಿರುವುದರಿಂದ ಸಂತಸಗೊಂಡಿದ್ದೇನೆ. ಸೋಲುವ ಹಂತದಲ್ಲಿ ಪವಾಡದಲ್ಲಿ ನಂಬಿಕೆಯನ್ನಿಟ್ಟುಕೊಂಡಿದ್ದೆ ಎಂದು ನುಡಿದರು. ಏತನ್ಮಧ್ಯೆ ಆಸ್ಟ್ರೇಲಿಯನ್ ಓಪನ್‌ನಲ್ಲಿ ಕಳೆದ 43 ವರ್ಷಗಳ ಇತಿಹಾಸದಲ್ಲಿ ಕೆನ್ ರೋಸ್‌ವಾಲ್ ಬಳಿಕ ಅಂತಿಮ ನಾಲ್ಕರ ಘಟ್ಟಕ್ಕೆ ತಲುಪಿದ ಎರಡನೇ ಅತಿ ಹಿರಿಯ ಆಟಗಾರ ಎಂಬ ಹೆಗ್ಗಳಿಕೆಗೆ 38ರ ಹರೆಯದ ಫೆಡರರ್ ಭಾಜನವಾದರು. ಇದು ಮೆಲ್ಬೋರ್ನ್ ಪಾರ್ಕ್‌ನಲ್ಲಿ ಫೆಡರರ್‌ನಿಂದ ದಾಖಲಾದ 102ನೇ ಗೆಲುವಾಗಿದೆ. ಈ ಮೂಲಕ ವಿಂಬಲ್ಡನ್‌ನಲ್ಲಿ ತಮ್ಮದೇ ಸಾಧನೆ ಹಿಂದಿಕ್ಕಿರುವ ಸ್ವಿಸ್ ಸ್ಟಾರ್, ತಮ್ಮ ಪಾಲಿಗೆ ಆಸ್ಟ್ರೇಲಿಯನ್ ಓಪನ್ ಅತ್ಯಂತ ಯಶಸ್ವಿ ಗ್ರ್ಯಾನ್ ಸ್ಲಾಮ್ ಎಂಬುದನ್ನು ನಿರೂಪಿಸಿದರು. ಫೆಡರರ್ ಇದೀಗ ಸೆಮಿಫೈನಲ್ ಹೋರಾಟದಲ್ಲಿ ತಮ್ಮ ಬದ್ದ ವೈರಿ ನೊವಾಕ್ ಜೊಕೊವಿಚ್ ಸವಾಲನ್ನು ಎದುರಿಸುವ ಸಾಧ್ಯತೆಯಿದೆ. ರೋಜರ್ ಫೆಡರರ್ ಗ್ರ್ಯಾನ್ ಸ್ಲಾಮ್ ಪ್ರಶಸ್ತಿ ಸಾಧನೆಗಳು: ಆಸ್ಟ್ರೇಲಿಯನ್ ಓಪನ್: (2004, 2006, 2007, 2010, 2017, 2018) ಫ್ರೆಂಚ್ ಓಪನ್: (2009) ವಿಂಬಲ್ಡನ್: (2003, 2004, 2005, 2006, 2007, 2009, 2012, 2017) ಅಮೆರಿಕನ್ ಓಪನ್: (2004, 2005, 2006, 2007, 2008)
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2GwSDvz
