ಹ್ಯಾಮಿಲ್ಟನ್‌: ದೇಶಿ ಟೂರ್ನಿಗಳಲ್ಲಿ ರನ್‌ ಹೊಳೆಯನ್ನೇ ಹರಿಸಿ ಕಿವೀಸ್‌ ತಂಡದಲ್ಲಿ ಸ್ಥಾನ ಪಡೆದಿರುವ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ತಮ್ಮದೇ ನೆಲದಲ್ಲಿ ಬ್ಯಾಟ್‌ ಮಾಡಿದರೂ ಟೀಮ್‌ ಇಂಡಿಯಾ ವೇಗಿ ಎದುರು ರನ್‌ ಗಳಿಸುವುದು ಕಷ್ಟ ಎಂಬ ಸಂಗತಿಯನ್ನು ಒಪ್ಪಿಕೊಂಡಿದ್ದಾರೆ. ಭಾರತದ ಸ್ಟಾರ್‌ ವೇಗದ ಬೌಲರ್‌ನಲ್ಲಿ ಚೆಂಡಿನ ಗತಿ ಬದಲಾವಣೆಯ ಕಲೆ ಅದ್ಭುತವಾಗಿದ್ದು ಪ್ರಸಕ್ತ ಟಿ20 ಸರಣಿಯಲ್ಲಿ ಅವರ ಎದುರು ರನ್‌ ಗಳಿಸುವುದು ಕಷ್ಟವಾಗುತ್ತಿದೆ ಎಂದು ಹೇಳಿಕೊಂಡಿದ್ದಾರೆ. ಭಾನುವಾರ ಆಕ್ಲೆಂಡ್‌ನಲ್ಲಿ ನಡೆದ 2ನೇ ಟಿ20 ಪಂದ್ಯದಲ್ಲಿ ಡೆತ್‌ ಓವರ್‌ಗಳಲ್ಲಿ ಕಿವೀಸ್‌ ಬ್ಯಾಟ್ಸ್‌ಮನ್‌ಗಳಿಗೆ ಲಗಾಮು ಹಾಕಿದ ಬುಮ್ರಾ, ತಮ್ಮ ನಾಲ್ಕು ಓವರ್‌ಗಳ ಸ್ಪೆಲ್‌ನಲ್ಲಿ ಕೇವಲ 21 ರನ್‌ ಮಾತ್ರವೇ ಬಿಟ್ಟುಕೊಟ್ಟು ಒಂದು ವಿಕೆಟ್‌ ಪಡೆದರು. ಇನಿಂಗ್ಸ್‌ನ ಅಂತ್ಯದ ಓವರ್‌ಗಳಲ್ಲಿ ಬುಮ್ರಾ ಬೌಲಿಂಗ್‌ ಎದುರು ಕಿವೀಸ್‌ ಬ್ಯಾಟ್ಸ್‌ಮನ್‌ಗಳು ಅಕ್ಷರಶಃ ಪರದಾಡಿದರು. "ಮೊದಲ ಪಂದ್ಯದಲ್ಲೂ ಬುಮ್ರಾ ಮಂದಗತಿಯ ಎಸೆತಗಳನ್ನು ಆಫ್‌ಸ್ಟಂಪ್‌ನಿಂದ ಆಚೆಗೆ ಎಸೆದಿದ್ದರು. ಸಾಮಾನ್ಯವಾಗಿ ಡೆತ್‌ ಓವರ್‌ನಲ್ಲಿ ಬೌಲರ್‌ಗಳು ವಿಕೆಟ್‌ಗೆ ನೇರವಾಗಿ ಬೌಲ್‌ ಮಾಡುತ್ತಾರೆ. ಯಾರ್ಕರ್‌ ಮತ್ತು ಬೌನ್ಸರ್‌ಹಳೊಂದಿಗೆ ಬೌಲಿಂಗ್‌ ಮಾಡುತ್ತಾರೆ. ಆದರೆ, ಬುಮ್ರಾ ಎಲ್ಲವನ್ನೂ ಬದಲಾಯಿಸುತ್ತಾರೆ. ಹೀಗಾಗಿ ಅವರ ಎದುರು ಬ್ಯಾಟ್‌ ಬೀಸುವುದು ಕಷ್ಟ," ಎಂದು ಸೀಫರ್ಟ್‌ ಹೇಳಿದ್ದಾರೆ. "ಪಿಚ್‌ನಲ್ಲಿ ಚೆಂಡು ನಿಧಾನವಾಗಿ ಬರುತ್ತಿತ್ತು. ಇದರಿಂದ ರನ್‌ ಗಳಿಸುವುದು ಕೂಡ ಕಷ್ಟವಾಗಿತ್ತು. ಕೆಲವೊಮ್ಮೆ ಬೌಲರ್‌ಗಳು ಚೆಂಡನ್ನು ನೇರವಾಗಿ ಎಸೆಯುವಂತೆ ಮಾಡಲು ಸ್ಟಂಪ್‌ನಿಂದ ಆಚೆಗೆ ಬ್ಯಾಟ್ಸ್‌ಮನ್‌ಗಳು ಹೋಗಬೇಕಾಗುತ್ತದೆ. ಹೀಗಾಗಿ ಸ್ಟಂಪ್‌ ಎದುರು ನಿಲ್ಲುವುದರ ಬದಲು ಬೇರೆ ಪ್ರಯತ್ನಗಳನ್ನು ಮಾಡುತ್ತಿದ್ದೆ," ಎಂದಿದ್ದಾರೆ. ಸೀಫರ್ಟ್‌ 2ನೇ ಟಿ20ಯಲ್ಲಿ ಕಿವೀಸ್‌ ಪರ 26 ಎಸೆತಗಳಲ್ಲಿ 33 ರನ್‌ಗಳನ್ನು ಗಳಿಸಿ ಔಟಾಗದೇ ಉಳಿದಿದ್ದರು. "ಚೆಂಡು ಪಿಚ್‌ನಲ್ಲಿ ಕೊಂಚ ನಿಂತು ನಂತರ ಮುನ್ನುಗ್ಗುತ್ತಿತ್ತು. ಕೊನೆಯ ಓವರ್‌ಗಳಲ್ಲಿ ಬುಮ್ರಾ ದಾಳಿಗಿಳಿಯುತ್ತಾರೆ ಎಂಬುದನ್ನು ಅರಿತಿದ್ದ ಕಾರಣಕ್ಕೆ ಚಹಲ್‌ ಬೌಲಿಂಗ್‌ನಲ್ಲಿ ರನ್‌ ಗಳಿಸಲು ಮುಂದಾಗಿದ್ದೆವು. ಆದರೆ ಚಹಲ್‌ ಬೌಲಿಂಗ್‌ನಲ್ಲಿ ಕೇನ್‌ (ವಿಲಿಯಮ್ಸನ್) ಔಟಾದರು," ಎಂದು ತಮ್ಮ ರಣತಂತ್ರ ಉಲ್ಟಾ ಹೋಡೆದ ಸಂಗತಿಯನ್ನು ಸೀಫರ್ಟ್‌ ವಿವರಿಸಿದ್ದಾರೆ. ಇದೇ ವೇಳೆ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವ ಮೂಲಕ ಅದಕ್ಕೆ ತಕ್ಕ ಆಟ ಆಡುವುದನ್ನು ಟೀಮ್‌ ಇಂಡಿಯಾದ ಬ್ಯಾಟ್ಸ್‌ಮನ್‌ಗಳನ್ನು ನೋಡಿ ಕಲಿತುಕೊಳ್ಳಬೇಕಿದೆ ಎಂದು ಕಿವೀಸ್‌ ಆಟಗಾರ ಅಭಿಪ್ರಾಯ ಪಟ್ಟಿದ್ದಾರೆ. "ಟೀಮ್‌ ಇಂಡಿಯಾ ಬ್ಯಾಟ್ಸ್‌ಮನ್‌ಗಳು ಪರಿಸ್ಥಿತಿಗೆ ತಕ್ಕ ಆಟವಾಡಿದರು. ಪಿಚ್‌ ಮಂದಗತಿಯಲ್ಲಿರುವುದನ್ನು ಅರಿತು ಅದಕ್ಕೆ ತಕ್ಕಂತೆ ಕ್ರೀಸ್‌ನಲ್ಲಿ ಭದ್ರವಾಗಿ ನೆಲೆನಿಂತು ರನ್‌ ಹೆಕ್ಕಿದರು. ಇಂತಹ ಸಂದರ್ಭಗಳಲ್ಲಿ ಹೀಗೇ ಆಡಬೇಕು. ಏಕೆಂದರೆ ಒಮ್ಮೆ ಲಯ ಕಳೆದುಕೊಂಡರೆ ಮರಳಿ ಪಡೆದುಕೊಳ್ಳುವುದು ಕಷ್ಟವಾಗುತ್ತದೆ," ಎಂದಿದ್ದಾರೆ. ನ್ಯೂಜಿಲೆಂಡ್‌ ವಿರುದ್ಧದ ಐದು ಪಂದ್ಯಗಳ ಟಿ20 ಸರಣಿಯ ಮೊದಲ 2 ಪಂದ್ಯಗಳಲ್ಲಿ ಕ್ರಮಾವಾಗಿ 6 ಮತ್ತು 7 ವಿಕೆಟ್‌ಗಳ ಜಯ ದಾಖಲಿಸಿರುವ ಭಾರತ ತಂಡ 2-0 ಅಂತರ ಮುನ್ನಡೆ ಪಡೆದುಕೊಂಡಿದೆ. 3ನೇ ಪಂದ್ಯ ಜ.29ರಂದು (ಬುಧವಾರ) ಹ್ಯಾಮಿಲ್ಟನ್‌ನ ಸೆಡಾನ್‌ ಪಾರ್ಕ್‌ ಕ್ರೀಡಾಂಗಣದಲ್ಲಿ ನಡೆಯಲಿದ್ದು, ಟೀಮ್‌ ಇಂಡಿಯಾ ಇಲ್ಲಿ ಗೆದ್ದು ಕಿವೀಸ್‌ ನೆಲದಲ್ಲಿ ಚೊಚ್ಚಲ ಟಿ20 ಸರಣಿ ಗೆದ್ದ ಇತಿಹಾಸ ಬರೆಯುವ ಅವಕಾಶ ಹೊಂದಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2O27mTw
