ಹೊಸದಿಲ್ಲಿ: ದಿಲ್ಲಿಮುಖ್ಯಮಂತ್ರಿ ಅರವಿಂದ್‌ ಕೇಜ್ರಿವಾಲ್‌ ಅವರನ್ನು ಬೆಂಬಲಿಸಿದ ಒಕ್ಕಣೆಯನ್ನು ಆಟೋ ಮೇಲೆ ಬರೆದುಕೊಂಡಿದ್ದಕ್ಕಾಗಿ ಚಾಲಕನಿಗೆ ದಂಡ ವಿಧಿಸಲಾಗಿದೆ. ಇದನ್ನು ಪ್ರಶ್ನಿಸಿ ಆಟೋ ಚಾಲಕ ಸಲ್ಲಿಸಿರುವ ಅರ್ಜಿ ವಿಚಾರಣೆ ನಡೆಸಿದ ದಿಲ್ಲಿಹೈಕೋರ್ಟ್‌, ಈ ಸಂಬಂಧ ನಗರ ಆಡಳಿತ, ಪೊಲೀಸ್‌ ಮತ್ತು ಚುನಾವಣಾ ಆಯೋಗಕ್ಕೆ ನೋಟಿಸ್‌ ಜಾರಿ ಮಾಡಿದೆ. 'ಐ ಲವ್‌ ಕೇಜ್ರಿವಾಲ್‌' ಎನ್ನುವ ಪ್ರಚಾರ ಪೋಸ್ಟರ್‌ ಅನ್ನು ಚಾಲಕ ರಾಜೇಶ್‌ ತನ್ನ ಆಟೋ ಮೇಲೆ ಅಂಟಿಸಿದ್ದ. ಇದಕ್ಕಾಗಿ 10,000 ರೂ. ದಂಡ ವಿಧಿಸಲಾಗಿತ್ತು. ''ತಾನು ಚುನಾವಣಾ ಪ್ರಚಾರಕ್ಕಾಗಿ ಈ ಪೋಸ್ಟರ್‌ ಅಂಟಿಸಿಲ್ಲ. ಕಳೆದ ವರ್ಷ ಸೆಪ್ಟೆಂಬರ್‌- ಅಕ್ಟೋಬರ್‌ ತಿಂಗಳಲ್ಲಿಯೇ ಅದನ್ನು ನನ್ನ ಆಟೋ ಮೇಲೆ ಅಂಟಿಸಿದ್ದೆ. ಕೇಜ್ರಿವಾಲ್‌ ಮೇಲಿನ ಅಭಿಮಾನ ಕಾರಣಕ್ಕೆ ಸ್ವ ಇಚ್ಛೆಯಿಂದ ಅದನ್ನು ಅಂಟಿಸಿದ್ದೇನೆ. ಆದರೆ ಪೊಲೀಸರು ಅದನ್ನು ಜಾಹೀರಾತು ಎಂದು ಪರಿಗಣಿಸಿ ದಂಡ ವಿಧಿಸಿದ್ದಾರೆ. ಇದರಿಂದ ನನ್ನ ಮೂಲಭೂತ ಹಕ್ಕಿಗೆ ಧಕ್ಕೆಯಾಗಿದೆ,'' ಎಂದು ಅರ್ಜಿದಾರ ಮನವಿ ಮಾಡಿದ್ದಾರೆ. ಮಾರ್ಚ್ 3ರಂದು ಮುಂದಿನ ವಿಚಾರಣೆ ನಡೆಯಲಿದೆ. ಆಟೋ ಚಾಲಕನಿಗೆ ದಂಡ ವಿಧಿಸಿರುವುದನ್ನು ಖಂಡಿಸಿರುವ ಕೇಜ್ರಿವಾಲ್‌, ''ನನ್ನನ್ನು ಪ್ರೀತಿಸುವುದಾಗಿ ಬರೆದುಕೊಂಡಿರುವುದೇ ಆಟೋ ಚಾಲಕ ಮಾಡಿದ ತಪ್ಪು. ದಿಲ್ಲಿ ಪೊಲೀಸರನ್ನು ಬಳಸಿಕೊಂಡು ಬಡವರ ಮೇಲೆ ಪ್ರಹಾರ ನಡೆಸುವುದನ್ನು ಬಿಜೆಪಿ ಇನ್ನಾದಾರೂ ಬಿಡಲಿ,'' ಎಂದು ಹೇಳಿದ್ದಾರೆ.
from India & World News in Kannada | VK Polls https://ift.tt/36x5bxD
