ಧರ್ಮಶಾಲಾ: ಹಿಮಾಚಲ ಪ್ರದೇಶದ ಒಂದು ದೇವಾಲಯವು ಭಕ್ತರು ಕಾಣಿಕೆಯಾಗಿ ನೀಡುವ ಮೇಕೆಗಳ ಹರಾಜಿನಿಂದಲೇ 1 ಕೋಟಿ 32 ಲಕ್ಷ ರೂ. ಗೂ ಅಧಿಕ ಆದಾಯ ಪಡೆದುಕೊಂಡಿದೆ. ಹಮೀರ್‌ಪುರ ಜಿಲ್ಲೆಯ ಡಿಯೋಡ್ಸಿಧ್‌ ಪ್ರದೇಶದ ಬಾಬಾ ಬಾಲಕನಾಥ ದೇವಸ್ಥಾನಕ್ಕೆ ಈ ಆದಾಯ ಬಂದಿದೆ. 2019ರಲ್ಲಿ ಭಕ್ತರು ಕಾಣಿಕೆಯಾಗಿ ನೀಡಿದ 6,371 ಆಡುಗಳನ್ನು ಮಾಡಿದ ಬಳಿಕ 1 ಕೋಟಿ 32 ಲಕ್ಷ ರೂ. ಗೂ ಹೆಚ್ಚು ಆದಾಯ ಹರಿದು ಬಂದಿದೆ ಎಂದು ದೇವಾಲಯದ ಅಧಿಕಾರಿ ಒ.ಪಿ.ಲಖನ್ಪಾಲ್ ಹೇಳಿಕೊಂಡಿದ್ದಾರೆ. ಭಕ್ತರು ಸಾಮಾನ್ಯವಾಗಿ ಇಲ್ಲಿ ಆಡುಗಳನ್ನು ಕೊಡುಗೆಯಾಗಿ ನೀಡುತ್ತಾರೆ ಮತ್ತು ದೇವಾಲಯದ ಟ್ರಸ್ಟ್‌ ಪ್ರತಿ ಸೋಮವಾರ ಮತ್ತು ಶುಕ್ರವಾರ ಹರಾಜನ್ನು ನಡೆಸುತ್ತದೆ. ಹರಾಜಿನಿಂದ ಬಂದ ನಿಖರವಾದ ಮೊತ್ತ 1 ಕೋಟಿ 32 ಲಕ್ಷ 15 ಸಾವಿರದ 400 ರೂ. ಎಂದು ಅವರು ಹೇಳಿದ್ದಾರೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಆದಾಯ ಹೆಚ್ಚಾಗಿದೆ ಎಂದ ಲಖನ್ಪಾಲ್, ಕಳೆದ ವರ್ಷ ನಾವು 5,825 ಆಡುಗಳನ್ನು ಹರಾಜು ಹಾಕಿದ್ದೇವೆ ಮತ್ತು 1 ಕೋಟಿ 19 ಲಕ್ಷ 52 ಸಾವಿರದ 700 ರೂ ಗಳಿಸಿದ್ದೇವೆ ಎಂದೂ ಹೇಳಿದ್ದರು. ಈ ದೇವಾಲಯವು ಹಿಮಾಚಲ ಪ್ರದೇಶದ ಹಮೀರ್‌ಪುರ ಜಿಲ್ಲೆಯಲ್ಲಿದೆ. ಪ್ರಸಿದ್ಧ ಸಂತ ಬಾಬಾ ಬಾಲಕನಾಥ್ ಅವರು ಅನೇಕ ವರ್ಷಗಳಿಂದ ಜಿಲ್ಲೆಯ ಡಿಯೋಡ್ಸಿಧ್‌ ಪ್ರದೇಶದಲ್ಲಿ ಆಲದ ಮರದ ಬಳಿ ಧ್ಯಾನ ಮಾಡಿದ ಬಳಿಕ ಈ ದೇವಸ್ಥಾನ ರಚನೆಯಾಗಿದೆ ಎಂದು ತಿಳಿದುಬಂದಿದೆ. ಈ ದೇವಾಲಯದಲ್ಲಿ ಪ್ರಾಣಿಗಳನ್ನು ಬಲಿದಾನ ಮಾಡುವ ಪದ್ಧತಿಯ ಸಂಪ್ರದಾಯವಿಲ್ಲ. ಆದರೆ ಜನರು ತಮ್ಮ ಯೋಗಕ್ಷೇಮಕ್ಕಾಗಿ ಪ್ರಾರ್ಥಿಸಿ ಆಡುಗಳನ್ನು ನೀಡುತ್ತಾರೆ. ಮತ್ತು ದೇವಾಲಯವು ಪ್ರತಿ ವಾರವೂ ಮೇಕೆಗಳನ್ನು ಹರಾಜು ಮಾಡುತ್ತಾರೆ ಎಂದೂ ದೇವಾಲಯದ ಅಧಿಕಾರಿ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/2O7Ct00
