ಬೆಂಗಳೂರು: ಸ್ವಾತಂತ್ರ್ಯ ಸಿಕ್ಕಿ ಇಷ್ಟು ವರ್ಷ ಕಳೆದರೂ, ರೈತ ನೆಮ್ಮದಿಯಿಂದ ಬದುಕಲು ಸಾಧ್ಯವಾಗುತ್ತಿಲ್ಲ. ಉತ್ತಮ ನೀರಾವರಿ, ಮಾರುಕಟ್ಟೆ ಒದಗಿಸಿದ್ದರೆ ಇಂದು ಉತ್ತಮ ಜೀವನ ನಿರ್ವಹಿಸುವ ರೈತರನ್ನು ನಾವು ನೋಡಬಹುದಾಗಿತ್ತು ಎಂದು ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಹೇಳಿದರು. ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ವಿಜಯಕರ್ನಾಟಕ ಪತ್ರಿಕೆ ಮಂಗಳವಾರ ಆಯೋಜಿಸಿದ್ದ 'ವಿಕ ಸೂಪರ್ ಸ್ಟಾರ್ ರೈತ-2019' ಪ್ರಶಸ್ತಿ ಪ್ರದಾನ ಕಾರ್ಯಕ್ರಮ ಸಮಾರೋಪ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದರು. ವಿಜಯ ಕರ್ನಾಟಕ ಪತ್ರಿಕೆಯು ರಾಜ್ಯದ ಮಾದರಿ ರೈತರನ್ನು ಗುರುತಿಸಿ ಗೌರವಿಸುವ ವಿಶಿಷ್ಟ ಅಭಿಯಾನ ಹಮ್ಮಿಕೊಂಡಿರುವುದು ಅವರ ಸಾಮಾಜಿಕ ಬದ್ಧತೆಗೆ ಹಿಡಿದಂತ ಕನ್ನಡಿ. ವಾಸ್ತವದ ಎಲ್ಲ ಸಮಸ್ಯೆಗಳ ನಡುವೆಯೂ ಮಾದರಿ ಕೃಷಿ ಪದ್ಧತಿ ಅಳವಡಿಸಿಕೊಂಡಿರುವ ರೈತರು ಹೆಚ್ಚು ಸಂಖ್ಯೆಯಲ್ಲಿದ್ದಾರೆ. ಇಂತಹ ಕಾರ್ಯಕ್ರಮವನ್ನು ಕೈಗೊಂಡಿರುವ ವಿಕ ಸರ್ಕಾರದ ನಡುವೆ ಸೇತುವೆಯಾಗಿದೆ. ಸರಕಾರವು ಕೃಷಿ ಸಂಪನ್ಮೂಲ, ಅಂತರ್ಜಲ ಹೆಚ್ಚಳಕ್ಕೆ ಸರ್ಕಾರದ ಜತೆಗೆ ವಿಕ ಪತ್ರಿಕೆಯೂ ಕೈಜೋಡಿಸಿದೆ. ಇದಕ್ಕೆ ನಾನು ವಿಕ ಪತ್ರಿಕೆಗೆ ಅಭಿನಂದನೆ ಸಲ್ಲಿಸುತ್ತೇನೆ. ನಮ್ಮ ಸರಕಾರ ಮೀನುಗಾರರ ಬೆಂಬಲಕ್ಕೂ ನಿಲ್ಲುತ್ತದೆ ಎಂದು ಹೇಳಿದರು. ವಿಜಯ ಕರ್ನಾಟಕ ಮತ್ತು ಬೆಂಗಳೂರು ಮಿರರ್ ಪತ್ರಿಕೆಗಳ ಸಿಇಒ ರಂಜಿತ್‌ ಕಾಟೆ ಅವರು ಮಾತನಾಡಿದರು. ಡಾಕ್ಟರ್, ಇಂಜಿನಿಯರ್‌, ಲಾಯರ್‌ ಮೊದಲಾದ ವೃತ್ತಿಗಳು ಗುರುತಿಸಲ್ಪಡುತ್ತವೆ ಹಾಗೂ ಗೌರವಿಸಲ್ಪಡುತ್ತವೆ. ಆದರೆ ಶ್ರಮಜೀವಿಗಳಾದ ರೈತರನ್ನು ಗುರುತಿಸುವ ಸಲುವಾಗಿ ಕನ್ನಡ ನಂ.1 ದಿನಪತ್ರಿಕೆಯಾದ ವಿಜಯಕರ್ನಾಟಕ ವಿಕ ಸೂಪರ್ ಸ್ಟಾರ್ ರೈತ ಕಾರ್ಯಕ್ರಮ ಕೈಗೊಂಡಿತು. ಈ ಕಾರ್ಯಕ್ರಮ ರೈತರಲ್ಲಿ ಉತ್ತಮ ಬಾಂಧವ್ಯ ಬೆಸೆಯುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಜಿಲ್ಲಾ ಮಟ್ಟದಲ್ಲಿ ಮಾದರಿ ರೈತರನ್ನು ಗುರುತಿಸಿ ಗೌರವಿಸುತ್ತ ಬರಲಾಗಿದೆ. ಇದೀಗ ಟಾಪ್ 20 ರೈತರಿಗೆ ಗೌರವಿಸಲಾಗುತ್ತಿದೆ. ಈ ಕಾರ್ಯಕ್ರಮಕ್ಕೆ ಸರಕಾರದಿಂದ ಹಾಗೂ ಕೃಷಿ ಸಂಸ್ಥೆಗಳಿಂದ ಉತ್ತಮಮ ಸಹಕಾರ ಸಿಕ್ಕಿದೆ ಎಂದರು. ವಿಜಯಕರ್ನಾಟಕ ಪತ್ರಿಕೆ ಸಂಪಾದಕರಾದ ಹರಿಪ್ರಕಾಶ್ ಕೋಣೆಮನೆ ಅವರು ಮಾತನಾಡಿ, ಕೃಷಿಕನಿಗೆ ಎಂದಿಗೂ ದುರ್ಭಿಕ್ಷ ಬರದು ಎಂಬ ಮಾತಿದೆ. ಆದರೆ ವಾಸ್ತವದಲ್ಲಿ ಕೃಷಿಕ ಸಮಸ್ಯೆಗಳ ಸುಳಿಯಲ್ಲಿದ್ದಾನೆ. ಇದನ್ನು ಮನಗಂಡ ವಿಜಯಕರ್ನಾಟಕ ರೈತರ ಬದುಕನ್ನು ಹಸನುಗೊಳಿಸುವ ಸದುದ್ದೇಶದೊಂದಿಗೆ ಆರಂಭಿಸಿದ್ದೇ ಈ ' ವಿಕ ಸೂಪರ್ ಸ್ಟಾರ್ ರೈತ' ಆಂದೋಲನ. ವಿಜಯ ಕರ್ನಾಟಕ ಮತ್ತು ಬೆಂಗಳೂರು ಮಿರರ್ ಪತ್ರಿಕೆಗಳ ಸಿಇಒ ರಂಜಿತ್‌ ಕಾಟೆ ಅವರು ಈ ಆಂದೋಲನದ ರೂವಾರಿಯಾಗಿದ್ದಾರೆ. ಇದು ಈ ಆಂದೋಲನ 2ನೇ ಆವೃತ್ತಿಯಾಗಿದ್ದು ಅಭೂತಪೂರ್ವ ಯಶಸ್ಸು ಕಂಡಿದ್ದು, ಲಕ್ಷಾಂತರ ರೈತರಿಗೆ ಉತ್ತಮ ಕೃಷಿ ವಿಧಾನಗಳನ್ನು ಅಳವಡಿಸಿಕೊಳ್ಳಲು ಮಾರ್ಗದರ್ಶನವಾಗಿದೆ ಎಂದರು. ಕೃಷಿ ವಿವಿ ಕುಲಪತಿ ಡಾ. ರಜೇಂದ್ರ ಪ್ರಸಾದ್‌ , ಕೃಷಿ ಇಲಾಖೆ ನಿರ್ದೇಶಕರಾದ ಬಿ.ವೈ ಶ್ರೀನಿವಾಸ್‌ ಉಪಸ್ಥಿತರಿದ್ದರು. ಆಯ್ದ 20 ವಿಕ ಸೂಪರ್ ಸ್ಟಾರ್ ರೈತರನ್ನು ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಅವರು ಪುರಸ್ಕರಿಸಿದರು. ಮುಖ್ಯಮಂತ್ರಿ ಯಡಿಯೂರಪ್ಪ ಅವರು 'ವಿಕ ಸೂಪರ್ ಸ್ಟಾರ್ ರೈತ' 2ನೇ ಆವೃತ್ತಿಯ ಸಮಾರೋಪ ಸಮಾರಂಭವನ್ನು ಸಿರಿಧಾನ್ಯಗಳ ರಾಶಿಪೂಜೆ ಮಾಡುವ ಮೂಲಕ ಉದ್ಘಾಟಿಸಿದರು. ಕನಕಪುರ ರೈತರಾದ ಕೆ.ಎಂ. ನಾಗರಾಜ್‌ ಅವರು ರಾಶಿ ಪೂಜೆಗೆ ಮಾರ್ಗದರ್ಶನ ನೀಡಿದರು.
from India & World News in Kannada | VK Polls https://ift.tt/36wouY1
