ಹೊಸದಿಲ್ಲಿ: ಟೂರ್ನಿಯ 13ನೇ ಆವೃತ್ತಿಯಲ್ಲಿನ ಕೆಲ ಮಹತ್ವದ ಬದಲಾವಣೆಗೆಳನ್ನು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಅಧ್ಯಕ್ಷ ಸೌರವ್‌ ಗಂಗೂಲಿ ಸೋಮವಾರ ತಿಳಿಸಿದ್ದಾರೆ. ಟೂರ್ನಿಯು ಮಾರ್ಚ್‌ 29ರಂದು ಮುಂಬೈನಲ್ಲಿ ಆರಂಭಗೊಂಡು, ಮೇ 24ರಂದು ಅಹಮದಾಬಾದ್‌ ನೂತನ ಸರ್ದಾರ್‌ ಪಟೇಲ್‌ ಕ್ರೀಡಾಂಗಣದಲ್ಲಿ ಅಂತ್ಯಗೊಳ್ಳುವ ಸಾಧ್ಯತೆ ಇದೆ. ಈ ಬಾರಿ ಹೆಚ್ಚು ದಿನಗಳ ಕಾಲ ಟೂರ್ನಿಯನ್ನು ಆಯೋಜಿಸಲಾಗುತ್ತಿರುವುದು ವಿಶೇಷ. ಈ ಮೊದಲು ಐಪಿಎಲ್‌ ವೇಳಾಪಟ್ಟಿಯಲ್ಲಿ ಈ ಬಾರಿ ಡಬಲ್‌ ಹೆಡರ್‌ ಪಂದ್ಯಗಳನ್ನು ಕೈಬಿಡುವ ಸಾಧ್ಯತೆ ಇರುವ ಕುರಿತಾಗಿ ಭಾರಿ ಚಚ್ಚೆಯಾಗಿತ್ತು, ಆದರೆ ಈ ಬಗ್ಗೆ ಸ್ಪಷ್ಟ ಮಾಹಿತಿ ನೀಡಿರುವ ಬಿಸಿಸಿಐ ಬಾಸ್‌ ಗಂಗೂಲಿ ಒಟ್ಟು 5 ಡಬಲ್‌ ಹೆಡರ್‌ ಪಂದ್ಯಗಳನ್ನು ಆಯೋಜಿಸುವುದಾಗಿ ಇಲ್ಲಿ ನಡೆದ ಐಪಿಎಲ್‌ ಆಡಳಿತ ಮಂಡಳಿ ಸಭೆಯ ಬಳಿಕ ಹೇಳಿದ್ದಾರೆ. ಇದೇ ವೇಳೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಸಮಿತಿ (ಐಸಿಸಿ)ಯ ಹೊಸ ನಿಯಮದಂತೆ ಕನ್ಕಷನ್‌ ಸಬ್‌ಸ್ಟಿಟ್ಯೂಟ್‌ ಐಪಿಎಲ್‌ಗೂ ಪರಿಚಯಿಸುತ್ತಿರುವುದಾಗಿ ಸೌರವ್‌ ಹೇಳಿದ್ದಾರೆ. ಆಟಗಾರರು ಬ್ಯಾಟಿಂಗ್‌, ಬೌಲಿಂಗ್‌ ಮತ್ತು ಫೀಲ್ಡಿಂಗ್‌ ವೇಳೆ ತಲೆಗೆ ಪೆಟ್ಟು ಮಾಡಿಕೊಂಡರೆ ಕೂಡಲೇ ಬದಲಿ ಆಟಗಾರನನ್ನು ನೀಡಿ ಗಾಯಗೊಂಡ ಆಟಗಾರನನ್ನು ವೈದ್ಯಕ್ಷೀಯ ತಪಾಸಣೆಗೆ ಒಳಪಡಿಸಬೇಕಾಗುತ್ತದೆ. ತಪಾಸಣೆಯಲ್ಲಿ ಎಲ್ಲವೂ ಸರಿಯಿದ್ದರೆ ಮಾತ್ರವೇ ಆಟಗಾರನಿಗೆ ಆಟ ಮುಂದುವರಿಸುವ ಅವಕಾಶ ನೀಡಲಾಗುತ್ತದೆ. ಇಲ್ಲವಾದರೆ ಬದಲಿ ಆಟಗಾರ ಕಣಕ್ಕಿಳಿಯಲಿದ್ದಾನೆ. ಆಲ್‌ಸ್ಟಾರ್ಸ್‌ ಪಂದ್ಯ ಆಯೋಜನೆ ಈ ಮಧ್ಯೆ ಟೂರ್ನಿಯ ಮಧ್ಯ ಭಾಗದಲ್ಲಿ ಆಲ್‌ಸ್ಟಾರ್ಸ್‌ ಪಂದ್ಯವೊಂದನ್ನು ಆಯೋಜಿಸುವ ಕುರಿತಾಗಿಯೂ ಬಿಸಿಸಿಐ ಆಲೋಚಿಸಿದೆ. ಈ ಮೂಲಕ ವಿವಿಧ ದತ್ತಿ ಕಾರ್ಯಕ್ರಮಗಳಿಗೆ ಹಣ ಸಂಗ್ರಹಿಸಲಾಗುತ್ತದೆ. "ಈ ಬಾರಿ ಐಪಿಎಲ್‌ನಲ್ಲಿ ಕನ್ಕಷನ್‌ ಸಬ್‌ಸ್ಟಿಟ್ಯೂಟ್‌ ಬಳಕೆಗೆ ತರಲಿದ್ದೇವೆ. ಜೊತೆಗೆ ಆಲ್‌ಸ್ಟಾರ್ ಪಂದ್ಯವನ್ನು ಆಯೋಜಿಸಲಿದ್ದೇವೆ," ಎಂದು ಸೌರವ್‌ ಹೇಳಿದ್ದಾರೆ. ಈ ಮಧ್ಯೆ 2020ರ ಐಪಿಎಲ್‌ ಟೂರ್ನಿಯ ಪಂದ್ಯಗಳು ರಾತ್ರಿ 7.30ಕ್ಕೆ ಶುರುವಾಗುವ ಸಾಧ್ಯತೆ ಇದೆ ಎನ್ನಲಾಗಿತ್ತು. ಆದರೆ ಎಂದಿನಂತೆ ಮಧ್ಯಾಹ್ನ 4ಕ್ಕೆ ಮತ್ತು ರಾತ್ರಿ 8ಕ್ಕೆ ಪಂದ್ಯಗಳು ಶುರುವಾಗಲಿದೆ ಎಂದು ಗಂಗೂಲಿ ಸ್ಪಷ್ಟ ಪಡಿಸಿದ್ದಾರೆ. ಈ ಬಗ್ಗೆ ಬಿಸಿಸಿಐ ಕಾರ್ಯದರ್ಶಿ ಜಯ ಶಾ ಅಧಿಕೃತ ಮಾಹಿತಿ ನೀಡಲಾಗಿದ್ದಾರೆ ಎಂದಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/37y6gGN
