ಹ್ಯಾಮಿಲ್ಟನ್‌: ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ಭಾರತ ತಂಡಕ್ಕೆ ದೀರ್ಘ ಕಾಲದವರೆಗೆ ಕಾಡಿದ 4ನೇ ಕ್ರಮಾಂದ ಬ್ಯಾಟ್ಸ್‌ಮನ್‌ ಕೊರತೆ ಈಗ ಇಲ್ಲವಾಗಿದೆ. ಇದಕ್ಕೆ ಮುಂಬೈನ ಯುವ ಪ್ರತಿಭೆ ಕಾರಣ ಎಂದರೆ ತಪ್ಪಾಗಲಾರದು. ಏಕದಿನ ಮತ್ತು ಟಿ20 ಕ್ರಿಕೆಟ್‌ನಲ್ಲಿ ಶ್ರೇಯಸ್‌ ಭಾರತ ತಂಡದ ಪರ ಸ್ಥಿರ ಪ್ರದರ್ಶನ ಕಾಯ್ದುಕೊಳ್ಳುವ ಮೂಲಕ ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಂಡಿದ್ದಾರೆ ಅಲ್ಲದೆ ಹಲವು ಪಂದ್ಯಗಳಲ್ಲಿ ತಂಡಕ್ಕೆ ಆಸರೆಯಾಗಿ ನಿಂತು ಮ್ಯಾಚ್‌ ವಿನ್ನರ್‌ ಆಗಿಯೂ ಹೊರಹೊಮ್ಮಿದ್ದಾರೆ. ಭಾರತ ತಂಡ ಸದ್ಯ ನ್ಯೂಜಿಲೆಂಡ್‌ ಪ್ರವಾಸದಲ್ಲಿದ್ದು, ಟೀಮ್ ಇಂಡಿಯಾ 5 ಪಂದ್ಯಗಳ ಸರಣಿಯಲ್ಲಿ 2-0 ಅಂತರದ ಮುನ್ನಡೆಯಲ್ಲಿದೆ. ಇದೀಗ ಹ್ಯಾಮಿಲ್ಟನ್‌ನಲ್ಲಿ ಬುಧವಾರ (ಜ.29 ರಂದು) 3ನೇ ಟಿ20 ಪಂದ್ಯವನ್ನಾಡಲಿದ್ದು ಇದಕ್ಕೂ ಮುನ್ನಾದಿನ ಮಾತನಾಡಿರುವ ಟೀಮ್ ಇಂಡಿಯಾ ಬ್ಯಾಟಿಂಗ್‌ ಕೋಚ್‌ 25 ವರ್ಷದ ಪ್ರತಿಭಾನ್ವಿತ ಬಲಗೈ ಬ್ಯಾಟ್ಸ್‌ಮನ್‌ನ ಕುರಿತಾಗಿ ಪ್ರಾಮಾಣಿಕ ಅಭಿಪ್ರಾಯ ನೀಡಿದ್ದಾರೆ. "ಈ ಆಟಗಾರರು ಹೆಚ್ಚು ಅವಕಾಶ ಪಡೆದಂತೆಲ್ಲಾ ತಮ್ಮ ಸಾಮರ್ಥ್ಯ ಏನೆಂಬುದನ್ನು ಸಾಬೀತು ಪಡಿಸುತ್ತಿದ್ದಾರೆ. ಪ್ರತಿ ಬಾರಿ ತಾವು ಮ್ಯಾಚ್‌ ವಿನ್ನರ್‌ಗಳೆಂದು ತೋರಿಸಿಕೊಡುತ್ತಿದ್ದಾರೆ. ಇದು ತಂಡಕ್ಕೆ ಖಂಡಿತಾ ನೆರವಾಗುತ್ತಿದೆ. ಜೊತೆಗೆ ಈ ಯುವ ಆಟಗಾರರ ಆತ್ಮವಿಶ್ವಾಸವನ್ನೂ ಹೆಚ್ಚಿಸುತ್ತಿದೆ. ಕೆಎಲ್‌ ರಾಹುಲ್‌ ಮತ್ತು ಶ್ರೇಯಸ್‌ ಅಯ್ಯರ್‌ ಅವರನ್ನು ಚಿಕ್ಕವರಿದ್ದಾಗಿನಿಂದಲೂ ಕಂಡಿದ್ದೇನೆ. ಅವರಿಬ್ಬರೂ ಮ್ಯಾಚ್‌ ವಿನ್ನರ್‌ಗಳೆಂಬುದರಲ್ಲಿ ನನಗೆ ಕಿಂಚಿತ್ತೂ ಅನುಮಾನವಿಲ್ಲ. ಇದೀಗ ತಮ್ಮ ಪ್ರತಿಭೆಯನ್ನು ಇಡೀ ಜಗತ್ತಿಗೇ ತೋರಿಸುತ್ತಿದ್ದಾರೆ," ಎಂದು ರಾಠೋಡ್‌ ಹೇಳಿದ್ದಾರೆ. "ಕೇವಲ ಬ್ಯಾಟಿಂಗ್‌ ತಂತ್ರಗಾರಿಕೆ ಮಾತ್ರವಲ್ಲ ಅವರ ಮನಸ್ಥಿತಿ ಕೂಡ ಅತ್ಯುತ್ತಮವಾಗಿದೆ. ಶ್ರೇಯಸ್‌ಗೆ ತಾನೊಬ್ಬಾ ಅಪ್ರತಿಮ ಆಟಗಾರ ಎಂಬ ವಿಶ್ವಾಸವಿದೆ. ಇದರಲ್ಲಿ ಅನುಮಾನವೇ ಬೇಡ. ತಾನೊಬ್ಬ ಮ್ಯಾಚ್‌ ವಿನ್ನರ್‌ ಎಂದು ನಂಬಿರುವ ಶ್ರೇಯಸ್‌ ಅದಕ್ಕೆ ತಕ್ಕ ಆಟವಾಡುತ್ತಿದ್ದಾರೆ ಕೂಡ. ಅದೇ ಅವರಲ್ಲಿರುವ ಅತ್ಯುತ್ತಮ ಗುಣ," ಎಂದು ವಿವರಿಸಿದ್ದಾರೆ. ಟೀಮ್ ಇಂಡಿಯಾದಲ್ಲಿ ಬೆಂಚ್‌ ಕಾಯುತ್ತಿರುವ ಆಟಗಾರರಿಗೆ ಏನೂ ಕಮ್ಮಿ ಇಲ್ಲ. ಒಬ್ಬರಿಗಿಂತಲೂ ಒಬ್ಬರನ್ನು ಮೀರಿಸುವಂತಹ ಪ್ರತಿಭೆಗಳು ಸಾಲಾಗಿ ನಿಂತಿದ್ದಾರೆ. ಇದು ಭಾರತ ತಂಡದ ಬ್ಯಾಟಿಂಗ್‌ ಕೋಚ್‌ನ ಗಮನ ಸೆಳೆದಿದೆ. "ಭಾರತ 'ಎ' ತಂಡಗಳ ಪ್ರವಾಸ ನಿಜಕ್ಕೂ ನೆರವಾಗುತ್ತಿದೆ. ಒಂದು ವೇಳೆ ಗಾಯದ ಸಮಸ್ಯೆ ಎದುರಾದರೆ ಬದಲಿ ಆಟಗಾರನತ್ತ ಗಮನ ನೀಡಿದಾಗ ಆಟಗಾರರು ಇಲ್ಲಿ ಸಮೀಪದಲ್ಲೇ ಇರುತ್ತಾರೆ. ಇದೊಂದು ಅತ್ಯುತ್ತಮ ಆಲೋಚನೆ. ತಂಡಕ್ಕೆ ಇದರಿಂದ ಹೆಚ್ಚು ಲಾಭವಾಗುತ್ತಿದೆ ಮತ್ತು ಬೆಂಚ್‌ ಸಾಮರ್ಥ್ಯ ಕೂಡ ವೃದ್ಧಿಸುತ್ತಿದೆ," ಎಂದಿದ್ದಾರೆ. ಅಯ್ಯರ್‌ ಕಿವೀಸ್‌ ವಿರುದ್ಧದ ಪ್ರಥಮ ಟಿ20ಯಲ್ಲಿ ಅಜೇಯ 59 ರನ್‌ ಚಚ್ಚಿ ಪಂದ್ಯ ಶ್ರೇಷ್ಠ ಗೌರವ ಪಡೆದರೆ, 2ನೇ ಪಂದ್ಯದಲ್ಲೂ 33 ಎಸೆತಗಳಲ್ಲಿ 44 ರನ್‌ ಬಾರಿಸಿ ತಂಡದ ಗೆಲುವಿನ ಹಾದಿಯನ್ನು ಸುಗಮವಾಗಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/37znpzY
