ಹೊಸದಿಲ್ಲಿ: ಹದಿಮೂರನೇ ಆವೃತ್ತಿಯ ಟೂರ್ನಿಯ ಫೈನಲ್‌ ಪಂದ್ಯ ವಿಶ್ವದ ಅತ್ಯಂತ ದೊಡ್ಡ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಆಯೋಜನೆಯಾಗುವುದು ಬಹುತೇಕ ಖಾತ್ರಿಯಾಗಿದೆ. ಅಹಮದಾಬಾದ್‌ನಲ್ಲಿ ನಿರ್ಮಾಣವಾಗುತ್ತಿರುವ ನೂತನ ಸರ್ದಾರ್‌ ಪಟೇಲ್ ಕ್ರೀಡಾಂಗಣದಲ್ಲಿ ಐಪಿಎಲ್ 2020 ಟೂರ್ನಿಯ ಫೈನಲ್‌ ಪಂದ್ಯ ನಡೆಯುವ ಸಾಧ್ಯತೆ ದಟ್ಟವಾಗಿದೆ. ಇದಕ್ಕೂ ಮುನ್ನ ಮಾರ್ಚ್‌ನಲ್ಲಿ ನಡೆಯಲಿರುವ ವಿಶ್ವ ಇಲೆವೆನ್‌ ಮತ್ತು ಏಷ್ಯಾ ಇಲೆವೆನ್‌ ನಡುವಣ ಪಂದ್ಯಕ್ಕೆ ಈ ಕ್ರೀಡಾಂಗಣ ಆತಿಥ್ಯ ವಹಿಸಬೇಕಿತ್ತು. ಆದರೆ, ಮಾರ್ಚ್‌ ಹೊತ್ತಿಗೆ ಕ್ರೀಡಾಂಗಣದ ನಿರ್ಮಾಣ ಕಾರ್ಯ ಇನ್ನೂ ಪೂರ್ಣಗೊಳ್ಳದೇ ಇರುವ ಕಾರಣಕ್ಕೆ ಐಪಿಎಲ್ ಪಂದ್ಯದ ಫೈನಲ್‌ ನಡೆಸುವ ಮೂಲಕ ಭಾರತದ ಬಹುದೊಡ್ಡ ಕ್ರೀಡಾಂಗಣವನ್ನು ಲೋಕಾರ್ಪಣೆ ಮಾಡುವ ಯೋಜನೆ ನಡೆದಿದೆ. ಈ ಕ್ರೀಡಾಂಗಣವನ್ನು ಮೊದಲಿಗೆ ಮೊಟೇರಾ ಕ್ರೀಡಾಂಗಣ ಎನ್ನಲಾಗುತ್ತಿತ್ತು. ನೂತನ ಕ್ರೀಡಾಂಗಣದಲ್ಲಿ ಐಪಿಎಲ್ ಫೈನಲ್‌ ನಡೆಯುವುದು ಬಹುತೇಕ ಖಾತ್ರಿಯಾಗಿದೆ ಎಂದು ಐಎಎನ್‌ಎಸ್‌ ಸುದ್ದಿ ಸಂಸ್ಥೆಗೆ ಐಪಿಎಲ್ ಆಡಳಿತ ಮಂಡಳಿಯ ಅಧಿಕಾರಿಯೊಬ್ಬರು ಮಾಹಿತಿ ನಿಡಿದ್ದಾರೆ. "ಈ ಬಗ್ಗೆ ಖಚಿತ ಮಾಹಿತಿ ಪಡೆಯಲು ನೀವು ಫೆಬ್ರವರಿಯ ವರೆಗೆ ಕಾಯಬೇಕಾಗುತ್ತದೆ. ಆದರೂ 2020ರ ಐಪಿಎಲ್ ಟೂರ್ನಿಯ ಫೈನಲ್‌ ಪಂದ್ಯವನ್ನು ಅಹಮದಾಬಾದ್‌ನಲ್ಲಿ ಆಯೋಜಿಸುವುದು ಬಹುತೇಕ ಖಾತ್ರಿಯಾಗಿದೆ," ಎಂದು ತಿಳಿಸಿದ್ದಾರೆ. ಇದೇ ವೇಳೆ ಚಾಂಪಿಯನ್ಸ್‌ ತಂಡಗಳಿಗೆ ಫೈನಲ್‌ ಪಂದ್ಯವನ್ನು ಆತಿಥ್ಯ ವಹಿಸಿಕೊಳ್ಳುವ ವಾಡಿಕೆ ಕುರಿತಾಗಿ ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ಅಶಿಕಾರಿಗಳು, ಫೈನಲ್‌ ಪಂದ್ಯ ಬ್ರ್ಯಾಂಡ್‌ನ ಹಕ್ಕು ಫ್ರಾಂಚೈಸಿಗಳಿಗೆ ಇದರಲ್ಲಿ ಯಾವುದೇ ಅಧಿಕಾರವಿಲ್ಲ ಎಂದು ಸ್ಪಷ್ಟ ಪಡಿಸಿದ್ದಾರೆ. "ನಾಕ್ಔಟ್ ಪಂದ್ಯಗಳು ಬಿಸಿಸಿಐನ ಆಸ್ತಿ. ಈ ಪಂದ್ಯಗಳಲ್ಲಿ ಕ್ರೀಡಾಂಗಣ ಟಿಕೆಟ್ಸ್‌ ಮೂಲಕ ಗಳಿಸುವ ಹಣ ಬಿಸಿಸಿಐಗೆ ಸೇರುತ್ತದೆ. ಹೀಗಾಗಿ ನಾಕ್ಔಟ್ ಪಂದ್ಯಗಳಲ್ಲಿ ಫ್ರಾಂಚೈಸಿ ತಂಡಗಳ ಪಾತ್ರವಿಲ್ಲ. ಅಂದಹಾಗೆ ಟೂರ್ನಿಯ ಉದ್ಘಾಟನಾ ಪಂದ್ಯವನ್ನು ಎಂದಿನಂತೆ ಚಾಂಪಿಯನ್ಸ್‌ ತಂಡದ ಅಂಗಣದಲ್ಲೇ ಆಡಿಸಲಾಗುವುದು," ಎಂದಿದ್ದಾರೆ. ಈ ಬಾರಿ ಮಾರ್ಚ್‌ 29ರಂದು ಐಪಿಎಲ್ ಟೂರ್ನಿ ಶುರುವಾಗಲಿದ್ದು, ಮೇ 24ರಂದು ಅಂತ್ಯಗೊಳ್ಳಲಿದೆ. ಈ ಬಾರಿ ಈ ಹಿಂದಿಗಿಂತಲೂ ಹೆಚ್ಚು ದಿನಗಳ ಕಾಲ ಟೂರ್ನಿ ನಡೆಯಲಿದ್ದು, ಡಬಲ್‌ ಹೆಡರ್‌ ಪಂದ್ಯಗಳನ್ನು ಕೈ ಬಿಡಲಾಗಿದೆ. ಅಂದಹಾಗೆ ಇನ್ನು ಸಂಪೂರ್ಣವಾಗಿ ಬಿಡುಗಡೆಯಾಗಬೇಕಿದೆ. ಭಾರತದ ಬಹುದೊಡ್ಡ ಕ್ರೀಡಾಂಗಣ ಮೊಟೇರಾ ಕ್ರೀಡಾಂಗಣವನ್ನು ನೆಲಸಮಗೊಳಿಸಿ 2015ರ ಬಳಿಕ ನೂತನ ಕ್ರೀಡಾಂಗಣ ನಿರ್ಮಾಣ ಕಾರ್ಯ ಆರಂಭವಾಗಿ ಇದೀಗ ಅಂತಿಮ ಘಟ್ಟದಲ್ಲಿದೆ. ಮೊದಲು 49 ಸಾವಿರ ಆಸನ ಸಾಮರ್ಥ್ಯ ಹೊಂದಿದ್ದ ಈ ಕ್ರೀಡಾಂಗಣದಲ್ಲಿ ಇದೀಗ ಬರೋಬ್ಬರಿ 1.10 ಲಕ್ಷ ಮಂದಿ ಕುಳಿತು ವೀಕ್ಷಿಸುವ ವ್ಯವಸ್ಥೆ ಮಾಡಲಾಗಿದ್ದು, ಭಾರತದ ಬಹುದೊಡ್ಡ ಕ್ರೀಡಾಂಗಣ ಎನಿಸಿಕೊಳ್ಳಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2RZjUMO
