ಹೊಸದಿಲ್ಲಿ: ಪೌರತ್ವ ತಿದ್ದುಪಡಿ ಕಾಯಿದೆ (ಸಿಎಎ) ವಿರೋಧಿಸಿ ನಗರದಲ್ಲಿ ಪ್ರತಿಭಟನೆ ನಡೆಸುತ್ತಿದ್ದ ಜನರ ಗುಂಪಿನ ಮೇಲೆ ಗುಂಡು ಹಾರಿಸಿದ ಅಲಿಯಾಸ್‌ ರಾಮ್‌ಭಕ್ತ ಗೋಪಾಲ್‌, ಕೃತ್ಯ ಎಸಗುವ ಮುನ್ನ ಫೇಸ್‌ಬುಕ್‌ನಲ್ಲಿ ಲೈವ್‌ ನೀಡಿದ್ದ ಸಂಗತಿ ಈಗ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ. ಪೂರ್ವ ಸಿದ್ಧತೆ ಮಾಡಿಕೊಂಡೇ ಗೋಪಾಲ್‌ ಘಟನಾ ಸ್ಥಳಕ್ಕೆ ಬಂದಿದ್ದ. ತಾನು ನಡೆಸುವ ದಾಳಿ ಪ್ರಚಾರ ಆಗಲಿ ಎನ್ನುವ ಉದ್ದೇಶದಿಂದ ಆತ ಫೇಸ್‌ಬುಕ್‌ ಲೈವ್‌ ಮಾಡಿದ್ದ. ಹೈಡ್ರಾಮ ಸೃಷ್ಟಿಯಾಗುತ್ತಿದ್ದಂತೆಯೇ ತನ್ನ ಬಳಿ ಕ್ಯಾಮೆರಾ ಹಿಡಿದು ಧಾವಿಸಿದ ಮಾಧ್ಯಮ ಪ್ರತಿನಿಧಿಗಳನ್ನೂ ಆತ ವಿರೋಧಿಸಲಿಲ್ಲ. ಆತನ ಪ್ರತಿ ನಡೆಯೂ ಚಿತ್ರೀಕರಣಗೊಂಡಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಗಾಂಧಿ ಪುಣ್ಯತಿಥಿ ಅಂಗವಾಗಿ ರಾಜ್‌ಘಾಟ್‌ಗೆ ಮೆರವಣಿಗೆ ತೆರಳಲು ಪ್ರತಿಭಟನಕಾರರ ಗುಂಪು ನಿರ್ಧರಿಸಿತ್ತು. ಅದಕ್ಕೆ ಪೊಲೀಸರು ಅನುಮತಿ ನೀಡಿರಲಿಲ್ಲವಾದರೂ ಮೆರವಣಿಗೆಗೆ ಯತ್ನಿಸಲಾಗಿತ್ತು. ಇದನ್ನು ತಡೆಯಲು ಜಾಮಿಯಾ ಮಿಲಿಯಾ ವಿವಿ ಸುತ್ತ ಮುತ್ತಲಿನ ರಸ್ತೆಗಳನ್ನು ಬ್ಯಾರಿಕೇಡ್‌ ಹಾಕಿ ಬಂದ್‌ ಮಾಡಲಾಗಿತ್ತು. ರಸ್ತೆಗಳೆಲ್ಲ ಖಾಲಿಯಾಗಿದ್ದವು. ಪ್ರತಿಭಟನೆ ನಡೆಸುತ್ತಿದ್ದ ರಸ್ತೆಯ ಒಂದು ತುದಿ ಮಾತ್ರ ಜನರಿಂದ ಭರ್ತಿಯಾಗಿತ್ತು. ಖಾಲಿ ರಸ್ತೆಯಲ್ಲಿ ಜನರಿದ್ದ ಕಡೆಗೆ ಗನ್‌ ಹಿಡಿದು ಧಾವಿಸಿದ ಗೋಪಾಲ್‌ ಮೊದಲು ಸಿಎಎ ಪರ ಘೋಷಣೆಗಳನ್ನು ಕೂಗಿದ. 'ಯಾರಿಗೆ ಬೇಕು ಸ್ವಾತಂತ್ರ್ಯ? ಕೊಡ್ತೀನಿ ತೆಗೆದುಕೊಳ್ಳಿ' ಎಂದು ಪ್ರತಿಭಟನಕಾರರಿಗೆ ಎಚ್ಚರಿಕೆ ನೀಡಿದ. 'ಜೈ ಶ್ರೀರಾಮ್‌' ಘೋಷಣೆ ಕೂಗುತ್ತಲೇ ಹೆಜ್ಜೆ ಹಾಕಿದ. 'ಭಾರತದಲ್ಲಿಉಳಿಯಬೇಕಾದರೆ ವಂದೇ ಮಾತರಂ ಘೋಷಣೆ ಕೂಗಿ' ಎಂದು ಬೆದರಿಕೆ ಹಾಕಿದ. ನಂತರ ಸಮಾಧಾನ ಪಡಿಸಲು ಕೆಲವರು ತನ್ನತ್ತ ಬರುತ್ತಿರುವುದನ್ನು ಗಮನಿಸಿ ಎಚ್ಚರಿಕೆ ನೀಡುತ್ತಲೇ ಹಿಮ್ಮುಖವಾಗಿ ಸಾಗಿದ. ಹಿಂದೆ ಪೊಲೀಸರ ಸರ್ಪಗಾವಲು ಇತ್ತು. ಈ ಒತ್ತಡದ ಘಳಿಗೆ ತೀರ ಹತ್ತಿರಕ್ಕೆ ಬಂದು ಸಮಾಧಾನಕ್ಕೆ ಯತ್ನಿಸಿದ ವಿದ್ಯಾರ್ಥಿಯತ್ತ ಗುಂಡು ಹಾರಿಸಿದ. ಗುಂಡು ವಿದ್ಯಾರ್ಥಿಯ ಕೈ ಸವರಿಕೊಂಡು ಹೊಯಿತು. ಖೇಲ್‌ ಖತಂ: ಬಿಳಿ ಬಣ್ಣದ ಪ್ಯಾಂಟ್‌, ಕಪ್ಪು ಬಣ್ಣದ ಜಾಕೆಟ್‌ ಧರಿಸಿದ್ದ ಗೋಪಾಲ್‌ ಪ್ರತಿಭಟನಾ ಸ್ಥಳಕ್ಕೆ ಬಂದು ಗುಂಡು ಹಾರಿಸುವ ಮೊದಲೇ ಫೇಸ್‌ಬುಕ್‌ನಲ್ಲಿ ಹಲವು ಸಂದೇಶಗಳನ್ನು ಪೋಸ್ಟ್‌ ಮಾಡಿದ್ದ. 'ಶಹೀನ್‌ಬಾಗ್‌ ಖೇಲ್‌ ಖತಂ' (ಇನ್ನು ಶಹೀನ್‌ಬಾಗ್‌ ಆಟ ಮುಗಿಯಿತು) ಎಂದಿದ್ದ. 'ನನ್ನ ಶವವನ್ನು ಜೈ ಶ್ರೀರಾಮ್‌ ಘೋಷಣೆ ಇರುವ ಕೇಸರಿ ಬಣ್ಣದ ವಸ್ತ್ರದಲ್ಲಿ ಹೊದಿಸಿ, ಕೊನೆಯ ಯಾತ್ರೆಗೆ ಅನುವು ಮಾಡಿಕೊಡಿ' ಎನ್ನುವ ಮತ್ತೊಂದು ಸಂದೇಶವನ್ನೂ ಆತ ಫೇಸ್‌ಬುಕ್‌ನಲ್ಲಿ ಹಾಕಿದ್ದ. ಫೇಸ್‌ಬುಕ್‌ ಸಂದೇಶದ ಸ್ಕ್ರೀನ್‌ಶಾಟ್‌ಗಳು ಜಾಲತಾಣಗಳಲ್ಲಿ ವೈರಲ್‌ ಆಗುತ್ತಿದ್ದಂತೆಯೇ ಎಲ್ಲಪೋಸ್ಟ್‌ಗಳನ್ನು ಡಿಲೀಟ್‌ ಮಾಡಿದ್ದ. ಕ್ಷಣಾರ್ಧದಲ್ಲಿ ಗಲಿಬಿಲಿ: ''ಹೋಲಿ ಫ್ಯಾಮಿಲಿ ಆಸ್ಪತ್ರೆ ಕಡೆ ಶಾಂತಿಯುವಾಗಿ ನಾವು ಮೆರವಣಿಗೆ ಹೊರಟಿದ್ದಾಗ ಪೊಲೀಸರು ತಡೆ ಹಾಕಿದರು. ಈ ವೇಳೆ ಹಠಾತ್‌ ರಸ್ತೆಗೆ ನುಗ್ಗಿದ ಯುವಕನೊಬ್ಬ ಬೆದರಿಕೆ ಹಾಕುತ್ತಲೇ ಗುಂಡು ಹಾರಿಸಿದ. ಒಂದು ಗುಂಡು ನನ್ನ ಸ್ನೇಹಿತನ ಕೈ ಸೀಳಿಕೊಂಡು ಹೋಯಿತು,'' ಎಂದು ರ‍್ಯಾಲಿಯಲ್ಲಿ ಪಾಲ್ಗೊಂಡಿದ್ದ ಜಾಮಿಯಾ ವಿವಿಯ ವಿದ್ಯಾರ್ಥಿನಿ ಆಮ್ನಾ ಆಸಿಫ್‌ ಹೇಳಿದರು. ಮಾಸ್‌ ಕಮ್ಯುನಿಕೇಷನ್‌ ವಿದ್ಯಾರ್ಥಿಯಾಗಿರುವ ಶಾದಬ್‌ ಫಾರೂಕ್‌ ಧೈರ್ಯದಿಂದ ದಾಳಿಕೋರನನ್ನು ಸಮಾಧಾನಪಡಿಸಲು ಆತನ ಬಳಿ ಹೋದ. ಆಗ ಗುಂಡು ಹಾರಿದ್ದರಿಂದ ಶಾದಬ್‌ ಎಡಗೈಗೆ ಗಾಯವಾಯಿತು ಎಂದು ಆಮ್ನಾ ವಿವರಿಸಿದರು. ಕಾಶ್ಮೀರ ನಿವಾಸಿಯಾದ ಶಾದಬ್‌ನನ್ನು ಚಿಕಿತ್ಸೆಗಾಗಿ ಏಮ್ಸ್‌ ಆಸ್ಪತ್ರೆಗೆ ಸೇರಿಸಲಾಗಿದೆ. ಠಾಕೂರ್‌ ಹೇಳಿಕೆ ಪ್ರಚೋದನೆ: ಜಾಮಿಯಾನಗರ ಗುಂಡಿನ ದಾಳಿ ಘಟನೆ ಹಿನ್ನೆಲೆಯಲ್ಲಿಇತ್ತೀಚೆಗೆ ದಿಲ್ಲಿಚುನಾವಣಾ ರ‍್ಯಾಲಿಯಲ್ಲಿಕೇಂದ್ರ ಸಚಿವ ಅನುರಾಗ್‌ ಠಾಕೂರ್‌ ನೀಡಿದ್ದ ಪ್ರಚೋದನಾಕಾರಿ ಹೇಳಿಕೆ ಚರ್ಚೆಯ ಮುನ್ನೆಲೆಗೆ ಬಂದಿದೆ. 'ದೇಶದ್ರೋಹಿಗಳಿಗೆ ಗುಂಡಿಕ್ಕಿ' ಎನ್ನುವ ಪ್ರಚೋದನಾಕಾರಿ ಘೋಷಣೆಯನ್ನು ಠಾಕೂರ್‌ ಬಹಿರಂಗ ಸಭೆಯಲ್ಲಿಮೊಳಗಿಸಿದ್ದರು. ಇದಕ್ಕೆ ವ್ಯಾಪಕ ಟೀಕೆ ವ್ಯಕ್ತವಾಗಿತ್ತು. ಶಹೀನ್‌ಬಾಗ್‌ ಗನ್‌ ಪ್ರಕರಣ: ದಿಲ್ಲಿಯ ಶಹೀನ್‌ಬಾಗ್‌ನಲ್ಲಿಸಿಎಎ ವಿರೋಧಿಸಿ ಮಹಿಳೆಯರು ಮತ್ತು ಮಕ್ಕಳು ನಡೆಸುತ್ತಿರುವ ಪ್ರತಿಭಟನಾ ಧರಣಿ ಸ್ಥಳಕ್ಕೂ ದುಷ್ಕರ್ಮಿಯೊಬ್ಬ ನುಗ್ಗಿ ಗನ್‌ ಝಳಪಿಸಿ ಬೆದರಿಕೆ ಹಾಕಿದ್ದ. ಪ್ರತಿಭಟನೆ ಕೊನೆಗೊಳಿಸದಿದ್ದರೆ ಸುಟ್ಟು ಹಾಕುವುದಾಗಿ ಧಮಕಿ ಹಾಕಿದ್ದ. ಆತನನ್ನು ಪ್ರತಿಭಟನಕಾರರೇ ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದರು.
from India & World News in Kannada | VK Polls https://ift.tt/2SaggQi
