ಇಂದೋರ್‌: ಕ್ರಿಕೆಟ್ ಟೂರ್ನಿಯಲ್ಲಿ ಮಂಗಳವಾರ ಐತಿಹಾಸಿಕ ದಾಖಲೆಯೊಂದು ನಿರ್ಮಾಣವಾಗಿದೆ. ಮಧ್ಯ ಪ್ರದೇಶದ ವೇಗದ ಬೌಲರ್‌ ಪ್ರಥಮದರ್ಜೆ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ ಪಂದ್ಯದ ಮೊದಲ ಓವರ್‌ನಲ್ಲೇ ಹ್ಯಾಟ್ರಿಕ್‌ ಸಾಧನೆ ಮಾಡಿ ಇತಿಹಾಸ ನಿರ್ಮಿಸಿದ್ದಾರೆ. ಇಲ್ಲಿನ ಹೋಳ್ಕರ್‌ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಉತ್ತರ ಪ್ರದೇಶ ವಿರುದ್ಧದ ಪಂದ್ಯದಲ್ಲಿ ಮಧ್ಯ ಪ್ರದೇಶದ ಪರ ಐದು ವಿಕೆಟ್‌ ಸಾಧನೆ ಮೆರೆದ ರವಿ ಯಾದವ್‌, ಪ್ರಥಮ ಓವರ್‌ನಲ್ಲೇ ಹ್ಯಾಟ್ರಿಕ್‌ ಸಾಧನೆ ಮಾಡಿ ಭಾರಿ ಸುದ್ದಿಯಾಗಿದ್ದಾರೆ. 28 ವರ್ಷದ ಎಡಗೈ ವೇಗದ ಬೌಲರ್‌ ಗಾಯದ ಸಮಸ್ಯೆಗಳ ಕಾರಣ ಕೊಂಚ ತಡವಾಗಿಯಾದರೂ ರಣಜಿ ಟ್ರೋಫಿಗೆ ಭರ್ಜರಿ ಎಂಟ್ರಿ ಕೊಟ್ಟಿದ್ದಾರೆ. ಪದಾರ್ಪಣೆಯ ಪಂದ್ಯದ ಮೊದಲ ಓವರ್‌ನಲ್ಲೇ ಉತ್ತರ ಪ್ರದೇಶ ತಂಡದ ಆರ್ಯನ್‌ ಜುಯಲ್‌, ಅಂಕಿತ್‌ ರಜಪೂತ್‌ ಮತ್ತು ಸಮೀರ್‌ ರಿಝ್ವಿ ಅವರನ್ನು ಪೆವಿಲಿಯನ್‌ಗೆ ಅಟ್ಟು ಹ್ಯಾಟ್ರಿಕ್‌ ಸಾಧನೆ ಮೆರೆದರು. ಪರಿಣಾಮ ಯುಪಿ ತಂಡ ಮೊದಲ ಇನಿಂಗ್ಸ್‌ನಲ್ಲಿ 216 ರನ್‌ಗಳ ಅಲ್ಪ ಮೊತ್ತಕ್ಕೆ ಆಲ್‌ಔಟ್‌ ಆಯಿತು. ಪ್ರಥಮ ಓವರ್‌ನ ಮೂರನೇ ಎಸೆತದಲ್ಲಿ ವಿಕೆಟ್‌ಗಳ ಖಾತೆ ತೆರೆದ ರವಿ ಯಾದವ್‌, ಮೊದಲಿಗೆ ಆರ್ಯನ್‌ ಜುಯಲ್‌ (13 ರನ್‌) ಅವರನ್ನು ಕಾಟ್‌ ಬಿಹೈಂಡ್‌ ಮಾಡಿದರು. ಬಳಿಕ ಬ್ಯಾಟಿಂಗ್‌ಗೆ ಆಗಮಿಸಿದ ಅಂಕಿತ್‌ ರಜಪೂತ್‌ (0) ಮತ್ತು ಸಮೀರ್‌ ರಿಝ್ವಿ ಅವರನ್ನು ಕ್ಲೀನ್‌ ಬೌಲ್ಡ್‌ ಮಾಡಿದ ರವಿ ಯಾದವ್‌ ಹ್ಯಾಟ್ರಿಕ್‌ ಸಂಭ್ರಮದಲ್ಲಿ ಮಿಂದೆದ್ದರು. ಇದಕ್ಕೂ ಮುನ್ನ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ್ದ ಮಧ್ಯ ಪ್ರದೇಶ ತಂಡ ಯಶ್‌ ದುಬೇ ಅವರ ಅರ್ಧಶತಕದ ನೆರವಿನಿಂದ 230 ರನ್‌ಗಳ ಸಾಧಾರಣ ಮೊತ್ತ ಗಳಿಸಿತ್ತು. ಇದೀಗ ರವಿ ಯಾದವ್‌ ಅವರ ಹ್ಯಾಟ್ರಿಕ್‌ ಒಳಗೊಂಡ ಐದು ವಿಕೆಟ್‌ ಸಾಧನೆಯ ನೆರವಿನಿಂದ 14 ರನ್‌ಗಳ ಇನಿಂಗ್ಸ್‌ ಮುನ್ನಡೆ ಪಡೆದುಕೊಂಡಿದೆ. ರವಿ ಯಾದವ್‌ ಪಡೆದ ವಿಡಿಯೋ ಈ ಟ್ವೀಟ್‌ನಲ್ಲಿ ವೀಕ್ಷಿಸಬಹುದಾಗಿದೆ. ಸಂಕ್ಷಿಪ್ತ ಸ್ಕೋರ್‌ ಮಧ್ಯ ಪ್ರದೇಶ: ಮೊದಲ ಇನಿಂಗ್ಸ್‌ 70 ಓವರ್‌ಗಳಲ್ಲಿ 230 ಆಲ್‌ಔಟ್‌ (ಅಜಯ್‌ ರೊಹೇರಾ 42, ಯಶ್‌ ದುಬೇ 70, ಈಶ್ವರ್‌ ಪಾಂಡೆ 36; ಅಂಕಿತ್‌ ರಜಪೂತ್‌ 74ಕ್ಕೆ 3, ಸೌರಭ್‌ ಕುಮಾರ್‌ 59ಕ್ಕೆ 3, ಮೊಸಿನ್‌ ಖಾನ್‌ 42ಕ್ಕೆ 2). ಉತ್ತರ ಪ್ರದೇಶ: ಮೊದಲ ಇನಿಂಗ್ಸ್‌ 53 ಓವರ್‌ಗಳಲ್ಲಿ 214 ಆಲ್‌ಔಟ್‌ (ರಿಂಕು ಸಿಂಗ್‌ 53, ಔರಭ್‌ ಕುಮಾರ್‌ 98; ಗೌರವ್‌ ಯಾದವ್‌ 73ಕ್ಕೆ 3, ರವಿ ಯಾದವ್‌ 61ಕ್ಕೆ 5, ಕುಮಾರ್‌ ಕಾರ್ತಿಕೇಯ 30ಕ್ಕೆ 1). ಮಧ್ಯ ಪ್ರದೇಶ: 2ನೇ ಇನಿಂಗ್ಸ್‌ 7 ಓವರ್‌ಗಳಲ್ಲಿ 1 ವಿಕೆಟ್‌ಗೆ 27 (ಅಜಯ್‌ ರೊಹೇರ 16).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/38PAWUl
