ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ, ಕ್ರಿಕೆಟ್ ಮೇಲೆ ಎಷ್ಟು ಪ್ರೀತಿ ಇಟ್ಟುಕೊಂಡಿದ್ದಾರೆಯೋ ಅಷ್ಟೇ ಗಮನವನ್ನು ಪೂರ್ವ ಸಿದ್ಧತೆಯ ಮೇಲೂ ಹರಿಸುತ್ತಾರೆ. ಯಶಸ್ಸಿನ ರಹಸ್ಯ ಏನೆಂಬುದು ಎಲ್ಲರಿಗೂ ತಿಳಿದಿದೆ. ತಮ್ಮ ದೈಹಿಕ ಸಾಮರ್ಥ್ಯವನ್ನು ಕಾಪಾಡಿಕೊಳ್ಳುವುದರಲ್ಲಿ ಎಂದಿಗೂ ರಾಜಿಗೆ ತಯಾರಾಗುವುದಿಲ್ಲ. ಮೈದಾನದಲ್ಲೂ ತಮ್ಮ ತಂಡಕ್ಕಾಗಿ ಎಲ್ಲವನ್ನು ಅರ್ಪಿಸುವುದರ ಹಿಂದಿನ ರಹಸ್ಯವನ್ನು ಮಗದೊಮ್ಮೆ ಸ್ಫೂರ್ತಿದಾಯಕ ವಿಡಿಯೋದೊಂದಿಗೆ ಹಂಚಿದ್ದಾರೆ. ವಿರಾಟ್ ಕೊಹ್ಲಿ ತಮ್ಮ ಇನ್‌ಸ್ಟಾಗ್ರಾಂ ಪುಟದಲ್ಲಿ ಫಿಟ್ನೆಸ್ ವಿಡಿಯೋವನ್ನು ಅಭಿಮಾನಿಗಳ ಜೊತೆಗೆ ಹಂಚಿದ್ದಾರೆ. ಕೆಲಸದಲ್ಲಿ ತೊಡಗಿಸಿಕೊಳ್ಳುವುದು ಆಯ್ಕೆಯಾಗಿರಬಾರದು. ಇದು ಮತ್ತಷ್ಟು ಉತ್ತಮಗೊಳ್ಳಲು ಅವಶ್ಯಕತೆಯಾಗಿರಬೇಕು ಎಂದು ಉಲ್ಲೇಖಿಸಿದ್ದಾರೆ. ಮತ್ತಷ್ಟು ಉತ್ತಮ ಪ್ರದರ್ಶನ ನೀಡಲು ಹಾಗೂ ಫಿಟ್ನೆಸ್ ಕಾಪಾಡಲು ತಮ್ಮನ್ನು ತಾವೇ ಹೇಗೆ ಒಳಪಡಿಸಬೇಕು ಎಂಬುದಕ್ಕೆ ವಿರಾಟ್ ಕೊಹ್ಲಿ ನಿದರ್ಶನ ಬರೆದಿದ್ದಾರೆ. ದಾಖಲೆಗಳ ಮೇಲೆ ದಾಖಲೆಗಳನ್ನು ಬರೆಯುತ್ತಲೇ ಸಾಗುತ್ತಿರುವ , ಈ ಮೂಲಕ ತಮ್ಮ ಸಹ ಆಟಗಾರರಿಗೂ ಮಾದರಿಯಾಗಿದ್ದಾರೆ. ಭಾರತೀಯ ಆಟಗಾರರು ಯೊ-ಯೊ ಫಿಟ್ನೆಸ್ ಕಡ್ಡಾಯವಾಗಿ ತೇರ್ಗಡೆಯನ್ನು ಹೊಂದಿರಬೇಕು. ಇದು ಒಟ್ಟಾರೆ ಕ್ರಿಕೆಟ್ ಗುಣಮಟ್ಟದ ವೃದ್ಧಿಯಲ್ಲೂ ನೆರವಾಗಿದೆ. ಕೇವಲ ಬ್ಯಾಟ್ಸ್‌ಮನ್‌ಗಳಷ್ಟೇ ಅಲ್ಲದೆ ಬೌಲರ್‌ಗಳು ತಮ್ಮ ಫಿಟ್ನೆಸ್ ಮೇಲೆ ಗಮನ ಹರಿಸುತ್ತಿದ್ದಾರೆ. ಮೊಹಮ್ಮದ್ ಶಮಿ ಭರ್ಜರಿ ಕಮ್ ಬ್ಯಾಕ್ ಮಾಡಲು ಇದರಿಂದ ಸಾಧ್ಯವಾಗಿರುವುದನ್ನು ನೆನಪಿಸಿಕೊಳ್ಳಬಹುದಾಗಿದೆ. ಸದ್ಯ ಟೀಮ್ ಇಂಡಿಯಾ ನ್ಯೂಜಿಲೆಂಡ್ ಪ್ರವಾಸದಲ್ಲಿದ್ದು, ಮೊದಲೆರಡು ಟಿ20 ಪಂದ್ಯಗಳಲ್ಲಿ ಗೆಲ್ಲುವ ಮೂಲಕ ಐದು ಪಂದ್ಯಗಳ ಟಿ20 ಸರಣಿಯಲ್ಲಿ 2-0 ಅಂತರದ ಮುನ್ನಡೆ ದಾಖಲಿಸಿದೆ. ಅಲ್ಲದೆ ಸರಣಿ ಗೆಲ್ಲಲು ಇನ್ನೊಂದು ಪಂದ್ಯದಲ್ಲಿ ಗೆಲ್ಲಬೇಕಿದೆ. ಟಿ20 ಸರಣಿಯ ಬಳಿಕವೂ ಟೀಮ್ ಇಂಡಿಯಾವು ಮೂರು ಪಂದ್ಯಗಳ ಏಕದಿನ ಮತ್ತು ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಭಾಗವಹಿಸಲಿದೆ. ಇಲ್ಲಿ ಗಮನಾರ್ಹ ಅಂಶವೆಂದರೆ ಕಿವೀಸ್ ಪ್ರವಾಸಕ್ಕೂ ಮುನ್ನ ವಿರಾಟ್ ಕೊಹ್ಲಿ ಬಿಡುವಿಲ್ಲದ ವೇಳಾಪಟ್ಟಿ ಬಗ್ಗೆ ಅಪಸ್ವರ ಎತ್ತಿದ್ದರು. ಆದರೂ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಾಗಿ ತಂಡದ ಮೇಲೆ ಬದ್ಧತೆಯನ್ನು ಮೆರೆಯುವುದಾಗಿ ತಿಳಿಸಿದ್ದರು. ಆಸ್ಟ್ರೇಲಿಯಾ ಸರಣಿಯ ಬೆನ್ನಲ್ಲೇ ನ್ಯೂಜಿಲೆಂಡ್ ಪ್ರವಾಸ ಕೈಗೊಂಡಿದ್ದ ಟೀಮ್ ಇಂಡಿಯಾ ನೇರವಾಗಿ ಮೈದಾನಕ್ಕಿಳಿದಿತ್ತು. ಅಲ್ಲದೆ ಆಕ್ಲೆಂಡ್ ಮೈದಾನದಲ್ಲಿ ಬೆನ್ನು ಬೆನ್ನಿಗೆ ಎರಡು ಪಂದ್ಯಗಳಲ್ಲಿ ಭಾಗವಹಿಸಿತ್ತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2RA0jUh
