ಗುವಾಹಟಿ: 2020ರ ತನ್ನ ಮೊದಲ ಸವಾಲಿನ ಸಲುವಾಗಿ ಇಲ್ಲಿನ ಬಾರಬತಿ ಕ್ರೀಡಾಂಗಣಕ್ಕೆ ಕಾಲಿಟ್ಟಿದ್ದು, ಅಭಿಮಾನಿಯೊಬ್ಬ ಹಳೇ ಮೊಬೈಲ್ ಫೋನ್ಗಳ ಬಿಡಿ ಭಾಗಗಳನ್ನು ಬಳಕೆ ಮಾಡಿ ಸುಂದರ ಕಲಾಕೃತಿ ಒಂದನ್ನು ಹೊರತರುವ ಮೂಲಕ ಗೇಟ್ ವೇ ಆಫ್ ನಾರ್ತ್ಈಸ್ಟ್ ಇಂಡಿಯಾ ಖ್ಯಾತಿಯ ನಗರಕ್ಕೆ ಭಾರತ ತಂಡದ ನಾಯಕನಿಗೆ ಸ್ವಾಗತ ಕೋರಿದ್ದಾರೆ. ಭಾರತ ತಂಡ ಪ್ರವಾಸಿ ವಿರುದ್ಧ 3 ಪಂದ್ಯಗಳ ಟಿ20 ಕ್ರಿಕೆಟ್ ಸರಣಿಯನ್ನಾಡಲಿದ್ದು, ಮೊದಲ ಹಣಾಹಣಿ ಇಲ್ಲಿನ ಬಾರಬತಿ ಕ್ರೀಡಾಂಗಣದಲ್ಲಿ ಭಾನುವಾರ ನಡೆಯಲಿದೆ. ಭಾನುವಾರ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ತನ್ನ ಅಧಿಕೃತ ಟ್ವಿಟರ್ ಖಾತೆ ಮೂಲಕ ಅಭಿಮಾನಿಯೊಬ್ಬ ಭಾರತ ತಂಡದ ನಾಯಕನಿಗೆ ಅರ್ಪಿಸಿದ ವಿಶೇಷ ಕಲಾಕೃತಿಯ ವಿಡಿಯೋ ಒಂದನ್ನು ಶೇರ್ ಮಾಡಿದೆ. ಕಿಂಗ್ ಕೊಹ್ಲಿಯ ಅಪ್ಪಟ ಅಭಿಮಾನಿ ಆಗಿರುವ ರಾಹುಲ್ ಪಾರೆಕ್, ಹಳೇಯ ಮೊಬೈಲ್ ಫೋನ್ಗಳ ಬಿಡಿಭಾಗಗಳನ್ನು ಬಳಕೆ ಮಾಡಿ ಕೇವಲ 3 ದಿನಗಳಲ್ಲಿ ಅವರ ವಿಶೇಷ ಕಲಾಕೃತಿಯನ್ನು ನಿರ್ಮಿಸಿದ್ದಾನೆ. ಅಭಿಮಾನಿಯ ಕುಂಚದಲ್ಲಿ ಅರಳಿದ ಕಲಾಕೃತಿ ಕಂಡು ನಿಬ್ಬೆರಗಾದ ಕೊಹ್ಲಿ, ತಮ್ಮ ಹಷ್ತಾಕ್ಷರದೊಂದಿಗೆ ಅಭಿಮಾನಿಗೆ ಒಂದು ಶುಭ ಸಂದೇಶವನ್ನೂ ನೀಡಿದ್ದಾರೆ. ಅಭಿಮಾನಿಯ ಕಲಾಕೃತಿ ವೀಕ್ಷಿಸುತ್ತಿರುವ ಮತ್ತು ಅಭಿಮಾನಿಯೊಟ್ಟಿಗೆ ಕೊಹ್ಲಿ ಕಾಲ ಕಳೆದ ವಿಡಿಯೋವನ್ನು ಬಿಸಿಸಿಐ ಟ್ವೀಟ್ ಮಾಡಿದ್ದು, "ಹಳೇ ಫೋನ್ಗಳಿಂದ ನಿರ್ಮಿಸಲಾದ ಕಲೆಯಿದು. ಅಭಿಮಾನಿಗಳ ಪ್ರೀತಿ ಹೇಗೆಲ್ಲಾ ವ್ಯಕ್ತವಾಗುತ್ತವೆ. #ಟೀಮ್ ಇಂಡಿಯಾ @ವಿರಾಟ್ ಕೊಹ್ಲಿ," ಎಂದು ಬಿಸಿಸಿಐ ಟ್ವೀಟ್ ಮಾಡಿದೆ. "ನಾನು ಈ ಚಿತ್ರವನ್ನು ಹಳೇ ಫೋನ್ಗಳನ್ನು ಮತ್ತು ವೈರ್ಗಳನ್ನು ಬಳಸಿ ಮಾಡಿದ್ದೇನೆ, ಈ ಕಲಾಕೃತಿ ನಿರ್ಮಿಸಲು 3 ಹಗಲು ಮತ್ತು ಮೂರು ರಾತ್ರಿ ತೆಗೆದುಕೊಂಡಿದ್ದೇನೆ. ಕೊಹ್ಲಿ ಸರ್ ನನಗೆ ಹಸ್ತಾಕ್ಷರ ನೀಡಿದ್ದಾರೆ. ಅವರು ನನ್ನನ್ನು ಭೇಟಿಯಾಗಲು ಬಂದಾಗ ನನ್ನ ಹೃದಯ ಬಡಿತ ಹೆಚ್ಚಾಗಿತ್ತು. ಕೆಲ ತಿಂಗಳ ಹಿಂದಷ್ಟೇ ಶ್ರೀಲಂಕಾ ವಿರುದ್ಧದ ಟಿ20 ಪಂದ್ಯವನ್ನಾಡಲು ಕೊಹ್ಲಿ ಗುವಾಹಟಿಗೆ ಬರುತ್ತಾರೆ ಎಂಬ ವಿಷಯ ಗೊತ್ತಾಗಿತ್ತು," ಎಂದು ವಿಡಿಯೋದಲ್ಲಿ ಕೊಹ್ಲಿ ಅಭಿಮಾನಿ ರಾಹುಲ್ ಹೇಳಿದ್ದಾರೆ. ಒಟ್ಟಾರೆ ಟೀಮ್ ಇಂಡಿಯಾ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಅವರ ಅಭಿಮಾನಿಗಳ ಸಂಖ್ಯೆ ಅಪಾರವಾಗಿದ್ದು, ಆಗಿಂದ್ದಾಗೆ ವಿಶೇಷ ರೀತಿಯಲ್ಲಿ ತಮ್ಮ ಅಭಿಮಾನವನ್ನು ವ್ಯಕ್ತ ಪಡಿಸುತ್ತಲೇ ಇರುತ್ತಾರೆ. ಕೆಲ ತಿಂಗಳ ಹಿಂದಷ್ಟೇ ಮೈಮೇಲೆಲ್ಲಾ ಕೊಹ್ಲಿ ಅವರ ಟ್ಯಾಟು ಮತ್ತು ಅವರ ಜರ್ಸಿ ನಂಬರ್ ಎಲ್ಲವನ್ನೂ ಅಚ್ಚೆ ಹಾಕಿಸಿಕೊಂಡಿದ್ದ ಅಭಿಮಾನಿಯನ್ನು ಕೊಹ್ಲಿ ಭೇಟಿಯಾಗಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Fmn0Ve
