(): ಇರಾನ್ನ 'ಇಸ್ಲಾಮಿಕ್ ರಿವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (ಐಆರ್ಜಿಸಿ)' ಕ್ವಾಡ್ಸ್ ಫೋರ್ಸ್ ಘಟಕದ ಮುಖ್ಯಸ್ಥ ಜನರಲ್ ಖಾಸಿಮ್ ಸುಲೈಮನಿಯನ್ನು ಬಾಗ್ದಾದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಾಯು ದಾಳಿ ಮಾಡಿ ಹತ್ಯೆ ಮಾಡಿದೆ. ಕೆಲವೇ ದಿನಗಳ ಕೆಳಗೆ ಬಾಗ್ದಾದ್ನಲ್ಲಿರುವ ಅಮೆರಿಕಾ ರಾಯಭಾರ ಕಚೇರಿಯೊಳಕ್ಕೆ ಪ್ರತಿಭಟನಾಕಾರರು ನುಗ್ಗಲು ಯತ್ನಿಸಿದ್ದರು. ಅಮೆರಿಕಾ ದಾಳಿಗೆ ಬೆಂಬಲಿತ ಶಿಯಾ ಬಂಡು ಬಂಡುಕೋರ ಸಂಘಟನೆ ಕತೈಬ್ ಹೆಜ್ಬುಲ್ಲಾದ 25ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ ಹಿನ್ನೆಲೆಯಲ್ಲಿ ರೊಚ್ಚಿಗೆದ್ದಿದ್ದ ಪ್ರತಿಭಟನಾಕಾರರು ರಾಯಭಾರ ಕಚೇರಿಯ ಕಾಂಪೌಂಡ್ಗೆ ಬೆಂಕಿ ಇಟ್ಟಿದ್ದರು. ಇದಕ್ಕೀಗ ಅಮೆರಿಕಾ ಪ್ರತೀಕಾರ ತೆಗೆದುಕೊಂಡಿದ್ದು, ಇರಾನ್ನ ಪ್ರಾದೇಶಿಕ ಭದ್ರತೆಯ ವಾಸ್ತುಶಿಲ್ಪಿ ಎಂದೇ ಬಣ್ಣಿಸಲಾದ ಸುಲೈಮಾನಿಯನ್ನು ಹತ್ಯೆ ಮಾಡಿದೆ. ಸುಲೈಮನಿ ಹತ್ಯೆಯನ್ನು ವೈಟ್ಹೌಸ್ ಮತ್ತು ಪೆಂಟಗನ್ ಖಚಿತಪಡಿಸಿದ್ದು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನಿರ್ದೇಶನದ ಮೇರೆಗೆ ಈ ದಾಳಿ ನಡೆಸಿದ್ದಾಗಿ ಹೇಳಿದೆ. ಭವಿಷ್ಯದಲ್ಲಿ ಇರಾನ್ ದಾಳಿ ಮಾಡಲು ಹಾಕಿಕೊಂಡಿದ್ದ ಯೋಜನೆಗಳ ದಿಕ್ಕು ತಪ್ಪಿಸಲು ಈ ದಾಳಿ ನಡೆಸಿದ್ದಾಗಿ ಅದು ಹೇಳಿದೆ.
ಸುಲೈಮನಿ ಸೆಲೆಬ್ರಿಟಿ ಸೇನಾ ನಾಯಕನಾಗಿದ್ದು, ಆತ ದೇಶದ ಹೆಮ್ಮೆ ಎಂಬ ಭಾವನೆ ಇರಾನ್ ಜನರಲ್ಲಿದೆ. ಅದೇ ಹೆಮ್ಮೆಯ ನಾಯಕ ಸತ್ತಿರುವುದು ದೇಶದ ಜನರನ್ನು ಆಘಾತಕ್ಕೆ ಕೆಡವಿದೆ; ಅಲ್ಲದೆ ಅಮೆರಿಕಾ ವಿರುದ್ಧ ಭಾರಿ ಆಕ್ರೋಶವೇ ದೇಶದಲ್ಲಿ ಹುಟ್ಟಿಕೊಂಡಿದೆ. ಇರಾನ್ನ ಸರ್ವೋಚ್ಛ ನಾಯಕ ಆಯತುಲ್ಲಾ ಅಲ್ ಖಮೇನಿ ಸುಲೈಮನಿಯನ್ನು ‘ಹುತಾತ್ಮ’ ಎಂದು ಕರೆದಿದ್ದು, ದೇಶದಲ್ಲಿ ಮೂರು ದಿನಗಳ ಶೋಕಾಚರಣೆ ಘೋಷಿಸಲಾಗಿದೆ. ಅಮೆರಿಕಾ ವಿರುದ್ಧ ಗುಡುಗಿರುವ ಖಮೇನಿ ‘ತೀವ್ರವಾದ ಪ್ರತೀಕಾರ ಅಪರಾಧಿಗಳಿಗೆ ಕಾಯುತ್ತಿದೆ’ ಎಂದಿದ್ದಾರೆ. ಇರಾನ್ ವಿದೇಶಾಂಗ ಸಚಿವ ಜಾವೆದ್ ಝರೀಫ್ ಕೂಡ ಘಟನೆಯನ್ನು ಖಂಡಿಸಿದ್ದು, 'ಇದೊಂದು ಅಂತಾರಾಷ್ಟ್ರೀಯ ಭಯೋತ್ಪಾದನೆ' ಎಂದು ಕಿಡಿಕಾರಿದ್ದಾರೆ. ‘ತನ್ನ ಎಲ್ಲಾ ರಾಕ್ಷಸ ಸಾಹಸದ ಪರಿಣಾಮಗಳಿಗೂ ಅಮೆರಿಕವೇ ಜವಾಬ್ದಾರಿ,’ ಎಂದು ಹರಿಹಾಯ್ದಿದ್ದಾರೆ. ಸುಲೈಮನಿ ಜೊತೆಗೆ ಇರಾಕ್ನ ಮಿಲಿಟರಿ ಕಮಾಂಡರ್ ಅಬು ಮಹ್ದಿ ಅಲ್ ಮುಹಾಂದಿಸ್ ಕೂಡ ಸಾವನ್ನಪ್ಪಿದ್ದಾರೆ ಎಂಬುದಾಗಿ ಇರಾಕ್ ಅಧಿಕಾರಿಗಳು ತಿಳಿಸಿದ್ದಾರೆ. ಇಬ್ಬರೂ ಬಾಗ್ದಾದ್ ವಿಮಾನ ನಿಲ್ದಾಣಕ್ಕೆ ಆಗಮಿಸುತ್ತಿದ್ದ ವೇಳೆ ರಾಕೆಟ್ ಉಡಾಯಿಸಿರುವ ಅಮೆರಿಕಾ, ಅವರು ಚಲಿಸುತ್ತಿದ್ದ ಎರಡು ಕಾರುಗಳನ್ನು ಧ್ವಂಸ ಮಾಡಿ. ದಾಳಿಯ ತೀವ್ರತೆಗೆ ಕಾರುಗಳು ಛಿದ್ರವಾಗಿದ್ದು, ಇಬ್ಬರೂ ಸಾವನ್ನಪ್ಪಿದ್ದಾರೆ. ಈ ಘಟನೆ ಮಧ್ಯ ಪೂರ್ವ ದೇಶಗಳಲ್ಲಿ ತಲ್ಲಣ ಹುಟ್ಟು ಹಾಕಿದೆ. ಕೆಲವು ದಿನಗಳ ಹಿಂದೆ ಅಮೆರಿಕಾ ಇರಾನ್ ಬೆಂಬಲಿತ ಕತೈಬ್ ಹೆಜ್ಬುಲ್ಲಾ ಎಂದು ಕರೆಯಲ್ಪಡುವ 'ಪಾಪ್ಯುಲರ್ ಮೊಬಿಲೈಸೇಷನ್ ಪೋರ್ಸಸ್' ಮೇಲೆ ಇರಾಕ್-ಸಿರಿಯಾ ಗಡಿಯಲ್ಲಿ ದಾಳಿ ನಡೆಸಿದಾಗಲೇ ಅರಬ್ ರಾಷ್ಟ್ರಗಳಲ್ಲಿ ಉದ್ವಿಗ್ನತೆಯ ಕಿಡಿ ಹಾರಿತ್ತು. ಬೆನ್ನಿಗೆ ಪ್ರತಿಭಟನಾಕಾರರು ದೊಡ್ಡಣ್ಣನ ರಾಯಭಾರ ಕಚೇರಿ ಮೇಲೆ ದಾಳಿ ಮಾಡಿದ್ದರು. ಇದೀಗ ನೇರವಾಗಿ ಅಮೆರಿಕಾ ಇರಾನ್ನ ಬುಡಕ್ಕೆ ಬಂದು ನಿಂತಿದೆ. ಘಟನೆಯಿಂದ ಇರಾಕ್ ಮತ್ತು ಅಮೆರಿಕಾ ಸಂಬಂಧವೂ ರಾತೋರಾತ್ರಿ ಹಳಸಿದ್ದು, ಈ ಎಲ್ಲಾ ಬೆಳವಣಿಗೆಗಳು ಮುಂದಿನ ದಿನಗಳಲ್ಲಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರಿ ಪರಿಣಾಮಗಳನ್ನು ಉಂಟು ಮಾಡುವ ಸಾಧ್ಯತೆ ಇದೆ.
from India & World News in Kannada | VK Polls https://ift.tt/36oI2yc
