ಶಿವಾನಂದ ಹಿರೇಮಠ ಬೆಂಗಳೂರು: ರಾಜ್ಯ ಉಗ್ರಾಣ ವ್ಯವಸ್ಥೆಗೆ ಗ್ರಹಣ ಹಿಡಿದಿದೆ. 862 ಕೋಟಿ ರೂ. ವೆಚ್ಚದಲ್ಲಿ ಜಾರಿಗೊಂಡ ಹೊಸ ಉಗ್ರಾಣಗಳ ನಿರ್ಮಾಣ ಮತ್ತು ದುರಸ್ತಿ ಕಾಮಗಾರಿ ಹಳಿ ತಪ್ಪಿದೆ. ಇನ್ನೊಂದೆಡೆ ಉಗ್ರಾಣಗಳ ಆಧುನೀಕರಣ, ಸ್ವಾವಲಂಬನೆಗೆ ಸರಕಾರ ಘೋಷಿಸಿದ್ದ ರೈತ ಕಣಜ 'ರಿಯಾಯಿತಿ ಯೋಜನೆ'ಗಳು ಜಾರಿಯಾಗದೆ ಉಗ್ರಾಣಗಳು ಸೊರಗುತ್ತಿವೆ. ತಾಲೂಕು ಮತ್ತು ಹೋಬಳಿ ವ್ಯಾಪ್ತಿಯಲ್ಲಿ ನಿಸ್ತೇಜಗೊಂಡಿರುವ ಉಗ್ರಾಣಗಳು ಬಳಕೆಯಾಗದೇ ದುಸ್ಥಿತಿ ತಲುಪುತ್ತಿವೆ. ರೈತರ ಸಹಭಾಗಿತ್ವವೂ ಇಲ್ಲ. ನಬಾರ್ಡ್‌ನಿಂದ ಪಡೆದ ಸಾಲಕ್ಕೆ ಪ್ರತಿ ಮೂರು ತಿಂಗಳಿಗೊಮ್ಮೆ 30 ಕೋಟಿ ರೂ. ಬಡ್ಡಿ ಪಾವತಿಸುತ್ತಿರುವ 'ರಾಜ್ಯ 'ವು ನಷ್ಟದ ಕೂಪದಿಂದ ಹೊರ ಬರಲೂ ಆಗುತ್ತಿಲ್ಲ. ಉಗ್ರಾಣದಿಂದ ಬಂದ ಲಾಭವನ್ನು ಕೇವಲ ಬಡ್ಡಿ ಪಾವತಿಗೆ ಬಳಸಲಾಗುತ್ತಿದೆ. ನಾನಾ ಸಮಸ್ಯೆಗಳಿಂದಾಗಿ ಉಗ್ರಾಣಗಳ ಸಬಲೀಕರಣ ಎಂಬುದು ತ್ರಿಶಂಕು ಸ್ಥಿತಿಗೆ ಬಂದು ನಿಂತಿದೆ. ನಿರ್ಮಾಣ ಯೋಜನೆಕೇಂದ್ರ ವಿಕಾಸ್‌ ಯೋಜನೆಯಡಿಯಲ್ಲಿ 160 ಹೊಸ ಉಗ್ರಾಣಗಳ ನಿರ್ಮಾಣ ಮತ್ತು ಈ ಮೊದಲಿನ 89 ಉಗ್ರಾಣಗಳ ದುರಸ್ತಿಗೆ ಆಂಧ್ರ ಮೂಲದ ಗುತ್ತಿಗೆದಾರರಿಗೆ 2016ರಲ್ಲಿ ಗುತ್ತಿಗೆ ನೀಡಲಾಗಿತ್ತು. ಬಡ್ಡಿ ಸಮೇತ ಅಸಲನ್ನು 5 ಕಂತುಗಳಲ್ಲಿ ಮರುಪಾವತಿಸುವ ಒಪ್ಪಂದದಡಿ ನಬಾರ್ಡ್‌ ಮೂಲಕ 862 ಕೋಟಿ ಸಾಲ ಪಡೆದು ಗುತ್ತಿಗೆ ನೀಡಲಾಗಿದೆ. ಈವರೆಗೆ 612 ಕೋಟಿ ಖರ್ಚಾದರೂ ಶೇ. 50ರಷ್ಟು ಕಾಮಗಾರಿಯೂ ಪೂರ್ಣಗೊಂಡಿಲ್ಲ. ಕಾಮಗಾರಿ ಪೂರ್ಣಗೊಳಿಸಲು ಗುತ್ತಿಗೆ ಮೊತ್ತ ಸಾಲುತ್ತಿಲ್ಲ ಎಂದು ದೂರಿರುವ ಗುತ್ತಿಗೆದಾರ 2019ರಲ್ಲೇ ನ್ಯಾಯಾಲಯ ಮೆಟ್ಟಿಲೇರಿದ್ದಾರೆ. ಹಾಗಾಗಿ ಯೋಜನೆ ಅರ್ಧಕ್ಕೆ ನಿಂತಿದೆ. ಇತ್ತ ನಬಾರ್ಡ್‌ನಿಂದ ಪಡೆದ ಸಾಲ ಮರುಪಾವತಿಸುವ ಅವಧಿಯೂ ಮುಗಿದ ಪರಿಣಾಮ ಉಗ್ರಾಣಗಳಿಂದ ಗಳಿಸಿದ ಹತ್ತಾರು ಕೋಟಿ ರೂ. ಲಾಭವನ್ನು ನಬಾರ್ಡ್‌ಗೆ ಬಡ್ಡಿ ರೂಪದಲ್ಲಿ ಪಾವತಿಸಲೇಬೇಕಾದ ಸ್ಥಿತಿ ಬಂದೊದಗಿದೆ. 2021-22ರಲ್ಲಿ ಅಸಲು ಮತ್ತು ಬಡ್ಡಿ ಸೇರಿ 144 ಕೋಟಿಯನ್ನು ನಬಾರ್ಡ್‌ಗೆ ನಿಗಮವು ಭರಿಸಬೇಕಿತ್ತು. ನಷ್ಟದ ಸುಳಿಯಲ್ಲಿ ಸಿಲುಕಿರುವುದರಿಂದ ಹಣ ಪಾವತಿ ಸಾಧ್ಯವಾಗಿಲ್ಲ. ನಿಗಮದ ಪುನಶ್ಚೇತನಕ್ಕೆ ಸಹಾಯಧನ ಮತ್ತು ನಬಾರ್ಡ್‌ಗೆ ಪಾವತಿಸುವ ಹಣದ ನೆರವು ಕೋರಿ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದರೂ ಸರಕಾರದಿಂದ ಪ್ರತಿಕ್ರಿಯೆ ಬಂದಿಲ್ಲ. ಹಾಗಾಗಿ ಉಗ್ರಾಣಗಳ ಸಬಲೀಕರಣ ಸಾಧ್ಯವಾಗುತ್ತಿಲ್ಲ. ಸಿಎಂ ಬೊಮ್ಮಾಯಿ ಒಲವುಸಮಸ್ಯೆಯಿಂದ ಹೊರ ಬರಲು ಮತ್ತು ಪ್ರಗತಿ ಹಂತದಲ್ಲಿಸ್ಥಗಿತಗೊಂಡಿರುವ ಕಾಮಗಾರಿಗಳಿಗೆ 210 ಕೋಟಿ, ಈಗಿರುವ ಉಗ್ರಾಣಗಳಿಗೆ ಮೂಲಭೂತ ಸೌಕರ್ಯ ಅಭಿವೃದ್ಧಿಗೆ 80 ಕೋಟಿ ಸೇರಿ 280 ಕೋಟಿ ರೂ.ಗಳ ಅನುದಾನ ಒದಗಿಸುವುದಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಈ ಅನುದಾನ ಒದಗಿಸುವುದಕ್ಕಾಗಿ ಮತ್ತೊಮ್ಮೆ ನಬಾರ್ಡ್‌ಗೆ ಸಾಲಕ್ಕಾಗಿ ಮನವಿ ಮಾಡಬೇಕಿದ್ದು, ಸಂಪುಟದಲ್ಲಿಅನುಮತಿ ದೊರೆಯಬೇಕಿದೆ. ಕೋವಿಡ್‌ ಕಾರಣದಿಂದ ಈ ವಿಷಯ ಕ್ಯಾಬಿನೆಟ್‌ನಲ್ಲಿ ಪ್ರಸ್ತಾಪ ಆಗಿಲ್ಲ. ಆದರೆ, ಸಿಎಂ ಕೂಡ ಉಗ್ರಾಣಗಳ ಪರಿಕಲ್ಪನೆ ಬದಲಾಯಿಸಲು ಆಸಕ್ತಿ ಹೊಂದಿದ್ದಾರೆ. ಅಮೆಜಾನ್‌, ಫ್ಲಿಕಾರ್ಟ್‌ ಸೇರಿ ಖಾಸಗಿ ಉಗ್ರಾಣಗಳಂತೆ ಸರಕಾರದ ಉಗ್ರಾಣಗಳನ್ನು ಬಲಪಡಿಸಲು ಇಚ್ಚಿಸಿದ್ದಾರೆ. ಕೋವಿಡ್‌ ನಂತರ ನಿಗಮದ ಜತೆ ಚರ್ಚೆ ನಡೆಸಲು ಸಿಎಂ ಒಪ್ಪಿಗೆ ಸೂಚಿಸಿದ್ದಾರೆ. ಜಾರಿಯಾಗದ ಯೋಜನೆಒಂದೆಡೆ ಭೌತಿಕ ಕಾಮಗಾರಿ ಸ್ಥಗಿತ, ಮತ್ತೊಂದೆಡೆ ರೈತರನ್ನು ಉಗ್ರಾಣಗಳತ್ತ ಸೆಳೆಯಲು ಸರಕಾರ ಘೋಷಿಸಿದ ಯೋಜನೆಗಳೂ ಅನುಷ್ಠಾನಗೊಳ್ಳುತ್ತಿಲ್ಲ. ರೈತರ ಆರ್ಥಿಕ ಸಮಬಲೀಕರಣಕ್ಕೆ ಉಗ್ರಾಣಗಳನ್ನೇ ಎಪಿಎಂಸಿ ಉಪ ಪ್ರಾಂಗಣಗಳಾಗಿ ಮಾಡುವ ಮತ್ತು 9 ತಿಂಗಳೂ ಉಚಿತ ಸ್ಟೋರೇಜ್‌, ಬಡ್ಡಿ ರಹಿತ ಸಾಲ ನೀಡುವ 'ರೈತ ಕಣಜ' ಯೋಜನೆ ಘೋಷಣೆಗೊಂಡರೂ ಅನುಷ್ಠಾನಗೊಂಡಿಲ್ಲ. ರೈತರ ದಾಸ್ತಾನು ಸಾರಿಗೆ ವೆಚ್ಚ ಕಡಿತಗೊಳಿಸುವುದು ಮತ್ತು ಉಗ್ರಾಣಗಳಲ್ಲೇ ದಾಸ್ತಾನಿಗೆ ಬಿಡ್‌ ಮಾಡುವ ಯೋಜನೆ ಇದಾಗಿತ್ತು. ಕಳೆದ ಬಜೆಟ್‌ನಲ್ಲಿ ಉಗ್ರಾಣ ಬಾಡಿಗೆ ಶುಲ್ಕ ಶೇ.25ರಷ್ಟು ಕಡಿಮೆ ಮಾಡಲಾಗಿದೆ. ಅಧಿಕಾರಿಗಳಿಂದ ಅಕ್ರಮನಿಮಗದ ನಷ್ಟಕ್ಕೆ ಈ ಹಿಂದೆ ಕಾರ್ಯನಿರ್ವಹಿಸಿದ 6 ಅಧಿಕಾರಿಗಳು ಕಾರಣ ಎಂದು ಜಿಲ್ಲಾ ನ್ಯಾಯಾಧೀಶರ ನೇತೃತ್ವದಲ್ಲಿ ನಡೆದ ತನಿಖೆಯಲ್ಲಿ ಗೊತ್ತಾಗಿದೆ. ಈ ಬಗ್ಗೆ ನಿಗಮವು ಸರಕಾರಕ್ಕೆ ವರದಿ ನೀಡಿದೆ. ಅಧಿಕಾರಿಗಳೇ ಭಾಗಿ ಆಗಿರುವ ಕಾರಣ ಮುಂದಿನ ಪ್ರಕ್ರಿಯೆಗೆ ಸರಕಾರ ಆಸಕ್ತಿ ತೋರಿಲ್ಲ. ರಾಜ್ಯದಲ್ಲಿರುವ ಉಗ್ರಾಣಗಳ ಸಂಖ್ಯೆಯನ್ನು ಏಕಾಏಕಿ ದ್ವಿಗುಣಗೊಳಿಸುವ ಯೋಜನೆಗೆ ಸರಕಾರ ಕೈಹಾಕಿದ್ದರಿಂದಲೇ ಸಮಸ್ಯೆ ಸುಳಿಯಲ್ಲಿ ಸಿಲುಕಿದಂತಾಗಿದೆ ಎಂದು ನಿಗಮದ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ. ಪುನಶ್ಚೇತನಕ್ಕೆ ಮಾರ್ಗವೇನು?
- ನಿಗಮ ಪುನಶ್ಚೇತನಕ್ಕೆ ಸರಕಾರದಿಂದ ತುರ್ತು ಅನುದಾನ.
- ಪ್ರಗತಿ ಹಂತದಲ್ಲಿಸ್ಥಗಿತಗೊಂಡ, ಮೂಲಭೂತ ಸೌಕರ್ಯ ಅಭಿವೃದ್ಧಿಗೆ ಪ್ರತ್ಯೇಕ ಅನುದಾನ.
- ತಾಲೂಕು, ಹೋಬಳಿ ಮಟ್ಟದಲ್ಲಿನಿಸ್ತೇಜವಾಗಿರುವ ಉಗ್ರಾಣಗಳನ್ನು ಎಫ್‌ಪಿಒಗಳಿಗೆ ಹಸ್ತಾಂತರಿಸಬೇಕು.
- ತುರ್ತಾಗಿ ಕೋಲ್ಡ್‌ ಸ್ಟೋರೇಜ್‌ ವ್ಯವಸ್ಥೆ ಜಾರಿ.
- ಕೊಯ್ಲೋತ್ತರ ತಂತ್ರಜ್ಞಾನಕ್ಕೆ ಉಗ್ರಾಣಗಳನ್ನು ಬಳಸಿಕೊಳ್ಳಬೇಕು.
- ಕೊಯ್ಲಿನ ಸಮಯದಲ್ಲೇ ಖರೀದಿ ಕೇಂದ್ರ ಆರಂಭಿಸಿದ್ದಲ್ಲಿಉಗ್ರಾಣಗಳಿಗೆ ಆದಾಯ ಹೆಚ್ಚು.
- ಪಿಪಿಪಿ ಮಾದರಿಯಲ್ಲಿಉಗ್ರಾಣ ವ್ಯವಸ್ಥೆ.
- ಎಪಿಎಂಸಿ ಉಪ ಕೇಂದ್ರಗಳಾಗಿ ಘೋಷಿಸಿದರೇ ರೈತರಿಗೆ ಅನುಕೂಲ.
from India & World News in Kannada | VK Polls https://ift.tt/HxW51y74C
