ಮಹಾಬಲೇಶ್ವರ ಕಲ್ಕಣಿ ರಾಜಧಾನಿ ನಗರವನ್ನು ಶೀಘ್ರವಾಗಿ ಭಿಕ್ಷಾಟನೆ ಮುಕ್ತವಾಗಿಸುವ ಪ್ರಯತ್ನ ನಡೆಯುತ್ತಿದೆ. ಮಕ್ಕಳು ಮತ್ತು ತಾಯಂದಿರು ಹಸುಗೂಸುಗಳನ್ನು ಬಳಸಿ ಭಿಕ್ಷಾಟನೆ ಮಾಡುವ ಸಮಸ್ಯೆ ಕುರಿತು ಕೈಗೊಳ್ಳಬಹುದಾದ ಪರಿಣಾಮಕಾರಿ ಕ್ರಮಗಳ ಕುರಿತು ವಿವಿಧ ಇಲಾಖೆಯ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ ಸಮಾಜ ಕಲ್ಯಾಣ ಇಲಾಖೆ ಸಚಿವ ಕೋಟ ಶ್ರೀನಿವಾಸ್‌ ಪೂಜಾರಿ, ಶೀಘ್ರದಲ್ಲಿ ಭಿಕ್ಷಾಟನೆ ಮುಕ್ತ ನಗರವಾಗಿಸುವುದಕ್ಕೆ ಸೂಚನೆ ನೀಡಿದ್ದಾರೆ. ರಾಜ್ಯದಲ್ಲಿ ಅತಿ ಹೆಚ್ಚು ಭಿಕ್ಷುಕರಿರುವುದು ರಾಜಧಾನಿಯಲ್ಲಿ. ಹೀಗಾಗಿ ಬೆಂಗಳೂರು ನಗರವನ್ನು ಭಿಕ್ಷುಕ ರಹಿತ ನಗರವನ್ನಾಗಿಸಲು ಕೇಂದ್ರ ಸರಕಾರ ಯೋಜನೆಯಡಿ ಭಿಕ್ಷುಕರ ಸಮೀಕ್ಷೆ ನಡೆಸಲು ಸಾಮಾಜಿಕ ಮತ್ತು ಆರ್ಥಿಕ ಬದಲಾವಣೆ ಅಧ್ಯಯನ ಸಂಸ್ಥೆಗೆ ವಹಿಸಲಾಗಿದೆ. ಅಧ್ಯಯನ ಸಂಸ್ಥೆಯೊಂದಿಗೆ ಸಭೆ ನಡೆಸಿ ಶೀಘ್ರ ಸಮೀಕ್ಷೆ ಪೂರ್ಣಗೊಳಿಸಿ ವರದಿ ಪಡೆಯಲು ಕೇಂದ್ರ ಪರಿಹಾರ ಸಮಿತಿಗೆ ಸಚಿವರು ಸೂಚಿಸಿದ್ದಾರೆ. ನಗರದ ಸಿಗ್ನಲ್‌ಗಳಲ್ಲಿ ಹೆಚ್ಚಾಗಿ ಮಕ್ಕಳನ್ನು ಬಳಸಿ ಭಿಕ್ಷಾಟನೆ ನಡೆಸಲಾಗುತ್ತಿದೆ. ಇದಕ್ಕೆ ಆದ್ಯತೆ ಮೇಲೆ ತಡೆಗಟ್ಟಲು ಸೂಚಿಸಲಾಗಿದೆ. 2012ರಲ್ಲಿ ರಾಜ್ಯಾದ್ಯಂತ ನಡೆಸಿದ ಭಿಕ್ಷುಕರ ಗಣತಿ ವೇಳೆ ಕೇವಲ 20,758 ಮಂದಿಯಷ್ಟೇ ಕಂಡುಬಂದಿದ್ದು, ಸಿಲಿಕಾನ್‌ ಸಿಟಿಯಲ್ಲಿ 7625 ಪತ್ತೆಯಾಗಿದ್ದರು. ಭಿಕ್ಷಾಟನೆ ಅಪರಾಧವೆಂದು ಘೋಷಿಸಿ ಭಿಕ್ಷುಕರನ್ನು ಶಿಕ್ಷೆಗೆ ಒಳಪಡಿಸುವ ಕಾನೂನು (ಪ್ರೊಹಿಬಿಷನ್‌ ಆಫ್‌ ಬೆಗ್ಗರಿ ಆ್ಯಕ್ಟ್ 1975) ರಾಜ್ಯದಲ್ಲಿದ್ದರೂ ಭಿಕ್ಷಾಟನೆ ಮಾತ್ರ ನಿಂತಿಲ್ಲ. ಬದಲಾದ ಬೇಡುವ ರೀತಿಈ ಮೊದಲು ದೇವಸ್ಥಾನ, ಚರ್ಚ್, ಮಸೀದಿ ಎದುರು, ರೈಲ್ವೆ, ಬಸ್‌ ತಂಗುದಾಣ, ಟ್ರಾಫಿಕ್‌ ಸಿಗ್ನಲ್‌ಗಳಲ್ಲಿ ಮಾತ್ರ ಕಾಣಿಸಿಕೊಳ್ಳುತ್ತಿದ್ದರು. ಭಿಕ್ಷೆ ರೂಪದಲ್ಲಿ ಹಣ ಮತ್ತು ಆಹಾರ ತೆಗೆದುಕೊಳ್ಳುತ್ತಿದ್ದರು. ಹೆಚ್ಚಾಗಿ ಅಂಗವಿಕಲರು, ವೃದ್ಧರು ಮತ್ತು ಮಕ್ಕಳು ಮಾತ್ರ ಭಿಕ್ಷಾಟನೆಯಲ್ಲಿ ತೊಡಗಿಕೊಂಡಿರುವುದನ್ನು ಕಾಣಬಹುದಿತ್ತು. ಕಾಲ ಬದಲಾದ ಹಾಗೆ ಭಿಕ್ಷೆ ಕೇಳುವ ರೀತಿ ಕೂಡ ಬದಲಾಗಿದೆ. ಬಸ್‌ಗೆ ಹೋಗಲು ಹಣ ಇಲ್ಲ, ಶಸ್ತ್ರಚಿಕಿತ್ಸೆ ಮಾಡಿಸಬೇಕು, ದೇವಸ್ಥಾನ ಕಟ್ಟಿಸಬೇಕು, ಫರ್ಸ್‌ ಕಳೆದು ಹೋಗಿದೆ ಹೀಗೆ ಬೇರೆ ಬೇರೆ ನೆಪ ಹೇಳಿಕೊಂಡು ಭಿಕ್ಷಾಟನೆ ನಡೆಯುತ್ತಿದೆ. ದುಡಿದು ತಿನ್ನುವ ತಾಕತ್ತಿರುವ ಯುವಕರು ಈ ರೀತಿ ಭಿಕ್ಷಾಟನೆಯಲ್ಲಿ ತೊಡಗಿಕೊಂಡಿರುವುದು ದಿನ ನಿತ್ಯ ಕಾಣಸಿಗುತ್ತಿದೆ. ಈ ವರ್ಗದವರನ್ನು ಭಿಕ್ಷಾಟಕರೆದು ಗುರುತಿಸಿ ಗಣತಿ ಮಾಡಿದರೆ ಭಿಕ್ಷುಕರ ಸಂಖ್ಯೆ ಅರ್ಧ ಲಕ್ಷ ತಲುಪುವ ಸಾಧ್ಯತೆ ಇದೆ. ಕೇಂದ್ರ ಪರಿಹಾರ ಸಮಿತಿಸರಕಾರವು ಭಿಕ್ಷುಕರ ನಿಯಂತ್ರಣ ಹಾಗೂ ಭಿಕ್ಷುಕರನ್ನು ಪತ್ತೆ ಮಾಡಿ ಪುನರ್ವಸತಿ ಒದಗಿಸಲು 'ಕೇಂದ್ರ ಪರಿಹಾರ ಸಮಿತಿ' ರಚಿಸಿದೆ. ಇದರ ಹೊಣೆಗಾರಿಕೆಯನ್ನು ಅಧಿಕಾರಿಗಳಿಗೆ ನೀಡಿದೆ. ನಿರಾಶ್ರಿತರ ಕೇಂದ್ರಗಳನ್ನು ಸ್ಥಾಪಿಸಿ ಅವರ ನಿರ್ವಹಣೆಗೆ ಸಂಪನ್ಮೂಲವನ್ನೂ ಒದಗಿಸಿದೆ. ಇದಕ್ಕಾಗಿ ರಾಜ್ಯ ಮಟ್ಟದಲ್ಲಿ 'ನಿರಾಶ್ರಿತರ ಪರಿಹಾರ ನಿಧಿ'ಯೂ ಇದೆ. ಅದರೆ ಇದು ಯಾವುದೂ ಕಾರ್ಯರೂಪಕ್ಕೆ ಬರುತ್ತಿಲ್ಲ. ಕೊರೊನಾ ನಂತರ ಹೆಚ್ಚಳಕೊರೊನಾ ನಂತರ ಭಿಕ್ಷಾಟನೆ ದಂಧೆ ರಾಜಧಾನಿಯಲ್ಲಿ ಮತ್ತೆ ಸಕ್ರಿಯವಾಗಿದೆ. ಆರ್ಥಿಕ ಸಂಕಷ್ಟದ ಪರಿಣಾಮ ವಯೋವೃದ್ಧರು, ಮಹಿಳೆಯರು ಮತ್ತು ಮಕ್ಕಳು ಮತ್ತೆ ಭಿಕ್ಷಾಟನೆಯತ್ತ ಮುಖ ಮಾಡುತ್ತಿದ್ದಾರೆ. ತಂದೆ-ತಾಯಿ ಕಳೆದುಕೊಂಡವರು, ದುಡಿಯುವ ಮಕ್ಕಳನ್ನು ಕಳೆದುಕೊಂಡ ಹಿರಿಯ ನಾಗರಿಕರು ಭಿಕ್ಷಾಟನೆಯತ್ತ ಮುಖ ಮಾಡಿದ್ದಾರೆ. ಹಣ ನೀಡಬೇಡಿ ಆಹಾರ ನೀಡಿನಗರದ 'ಬೆಂಗಳೂರು ಹುಡುಗರು ತಂಡ' ಭಿಕ್ಷಾಟನೆ ಮುಕ್ತ ಭಾರತ ಚಳವಳಿ ಹಮ್ಮಿಕೊಂಡಿದ್ದಾರೆ. ಸಾರ್ವಜನಿಕರು ಭಿಕ್ಷೆಯಾಗಿ ಹಣ ಕೊಡಬಾರದು. ಕೊಟ್ಟರೆ ಕಾನೂನು ಬಾಹಿರ ಚಟುವಟಿಕೆಗೆ ಪ್ರೋತ್ಸಾಹ ನೀಡಿದಂತಾಗುತ್ತದೆ. ಅವರಿಗೆ ಆಹಾರ ಮತ್ತು ನೀರು ನೀಡಿ ಎಂದು ಜನರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ. ಬೆಂಗಳೂರು ಹುಡುಗರು ತಂಡದಿಂದ ಭಿಕ್ಷಾಟನೆ ವಿರೋ ಚಳವಳಿ ಪ್ರತಿ ಭಾನುವಾರ ನಡೆಯುತ್ತಿದೆ. ಮಕ್ಕಳನ್ನು ಬಳಸಿ ಭಿಕ್ಷಾಟನೆಯಾರೋ ಹೆತ್ತ ಮುಗ್ಧ ಕಂದಮ್ಮಗಳನ್ನು ದಿನದ ಬಾಡಿಗೆ ರೂಪದಲ್ಲಿ ಪಡೆದು , ಆ ಕಂದಮ್ಮಗಳನ್ನು ಕಂಕುಳಲ್ಲಿ ಇಟ್ಟುಕೊಂಡು ಬಿಸಿಲು-ಮಳೆಯಲ್ಲಿ ದಿನವಿಡಿ ಭಿಕ್ಷಾಟನೆ ಮಾಡುವ ವ್ಯವಸ್ಥಿತ ದಂಧೆ ನಗರದ ಸೇರಿದಂತೆ ಹಲವು ಕಡೆ ನಡೆಯುತ್ತಿದೆ. ಕೇವಲ ಮಕ್ಕಳನ್ನು ಮಾತ್ರವಲ್ಲ ಮಹಿಳೆಯರು, ವೃದ್ಧರು, ವಿಕಲಾಂಗರನ್ನು ಬಳಸಿಕೊಂಡು ಕೂಡ ದಂಧೆ ನಡೆಯುತ್ತಿರುವ ಹಲವು ಭಾರಿ ಬೆಳಕಿಗೆ ಬಂದಿದೆಯಾದರೂ ಶಿಕ್ಷೆಯಾದ ಉದಾಹರಣೆಗಳು ಮಾತ್ರ ಒಂದೂ ಇಲ್ಲ.
from India & World News in Kannada | VK Polls https://ift.tt/n0AkVjx
