ವಾಷಿಂಗ್ಟನ್: ರಷ್ಯಾ-ಉಕ್ರೇನ್ ನಡುವಿನ ಸಂಘರ್ಷದ ಬಗ್ಗೆ ಮತ್ತೆ ಪ್ರತಿಕ್ರಿಯೆ ನೀಡಿರುವ ಅಮೆರಿಕ ಅಧ್ಯಕ್ಷ , ಉಕ್ರೇನ್ ರಕ್ಷಣೆಗಾಗಿ ಅಮೆರಿಕ ನಿರ್ಣಾಯಕ ಪ್ರತಿಕ್ರಿಯೆ ನೀಡಲು ಸಿದ್ಧವಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಉಕ್ರೇನ್ ಮೇಲೆ ಆಕ್ರಮಣ ಮಾಡುವ ರಷ್ಯಾ ಕನಸು ನನಸಾಗದು. ಅಮೆರಿಕ ಸೇರಿದಂತೆ ಸದಸ್ಯ ರಾಷ್ಟ್ರಗಳು ಉಕ್ರೇನ್ ಪರವಾಗಿ ಗಟ್ಟಿಯಾಗಿ ನಿಂತಿವೆ. ಯಾವುದೇ ರೀತಿಯ ನಿರ್ಣಾಯಕ ಪ್ರತಿಕ್ರಿಯೆಗೆ ನಾವು ತಯಾರಾಗಿದ್ದೇವೆ ಎಂದು ಜೋ ಬೈಡನ್ ಹೇಳಿದ್ದಾರೆ. ರಷ್ಯಾ-ಉಕ್ರೇನ್ ನಡುವಿನ ಸಂಘರ್ಷ ಶಾಂತಿಯುತ ರಾಜತಾಂತ್ರಿಕ ಮಾತುಕತೆಗಳ ಮೂಲಕ ಬಗೆಹರಿಯಬೇಕು ಎಂಬುದು ನಮ್ಮ ನಿಲುವು. ಆದರೆ ಒಂದು ವೇಳೆ ರಷ್ಯಾ ಯುದ್ಧದ ಮಾರ್ಗ ಹಿಡಿದರೆ, ಉಕ್ರೇನ್ ರಕ್ಷಣೆಗಾಗಿ ನಾವು ಸೈನಿಕ ಕಾರ್ಯಾಚರಣೆಗೆ ಹಿಂಜರಿಯುವುದಿಲ್ಲ ಎಂದು ಬೈಡನ್ ಸ್ಪಷ್ಟಪಡಿಸಿದರು. ಪ್ರಸ್ತುತ ರಷ್ಯನ್ ತುಕಡಿಗಳು ಉಕ್ರೇನ್ ಗಡಿಯಿಂದ ಮರಳುತ್ತಿವೆ ಎಂಬ ವರದಿಗಳು ಬರುತ್ತಿವೆ. ಇದರ ಅರ್ಥ ಯುದ್ಧದ ಕಾರ್ಮೋಡ ಕವಿದಿದೆ ಎಂದಲ್ಲ. ರಷ್ಯಾ ಯಾವಾಗ ಬೇಕಾದರೂ ಉಕ್ರೇನ್ ಮೇಲೆ ಮುಗಿ ಬೀಳಬಹುದು. ನಾವು ಯಾವುದೇ ಅಪಾಯಕಾರಿ ಸನ್ನಿವೇಶವನ್ನು ಎದುರಿಸಲು ಸಿದ್ಧರಿದ್ದೇವೆ ಎಂದು ಬೈಡನ್ ನುಡಿದಿದ್ದಾರೆ. ಉಕ್ರೇನ್ ಗಡಿಯಿಂದ ರಷ್ಯಾ ತನ್ನ ಸೈನಿಕರನ್ನು ಹಿಂಪಡೆಯುತ್ತಿದೆ ಎಂಬ ವರದಿಗಳಿವೆ. ಆದರೆ ಈ ಕುರಿತು ರಷ್ಯಾ ಸೂಕ್ತ ಸಾಕ್ಷಿಗಳನ್ನು ಒದಗಿಸಬೇಕು ಎಂದು ನಾವು ಕೋರುತ್ತೇವೆ ಎಂದು ಬೈಡನ್ ಆಡಳಿತ ಹೇಳಿದೆ. 'ರಷ್ಯನ್ನರು ನಮ್ಮ ಶತ್ರುಗಳಲ್ಲ': ಇನ್ನು ರಷ್ಯಾದೊಂದಿಗಿನ ಅಮೆರಿಕದ ಸಂಭಂಧದ ಕುರಿತಾಗಿಯೂ ಮಾತನಾಡಿರುವ ಜೋ ಬೈಡನ್. ನಾವು ರಷ್ಯನ್ ನಾಗರಿಕರ ಶತ್ರುಗಳಲ್ಲ. ಆದರೆ ಪುಟಿನ್ ಸರ್ಕಾರದ ಅಮೆರಿಕನ್ ವಿರೋಧಿ ನಿಲುವುಗಳು, ಸಮಸ್ಯೆಯನ್ನು ಜಟಿಲಗೊಳಿಸುತ್ತಿದೆ. ಉಕ್ರೇನ್ ನ್ಯಾಟೋ ಸದಸ್ಯ ರಾಷ್ಟ್ರವಾಗುವುದರಿಂದ ರಷ್ಯಾದ ಭದ್ರತೆಗೆ ಅಪಾಯ ಎಂಬ ಪುಟಿನ್ ನಿಲುವು ಸತ್ಯಕ್ಕೆ ದೂರ ಎಂದು ಬೈಡನ್ ಹೇಳಿದ್ದಾರೆ. ಅಷ್ಟಕ್ಕೂ ಅಮೆರಿಕ ಯಾವುದೇ ರಾಷ್ಟ್ರದ ಸಾರ್ವಭೌಮತೆಯನ್ನು ಗೌರವಿಸುತ್ತದೆ. ನ್ಯಾಟೋ ಸದಸ್ಯತ್ವ ಪಡೆದ ಮೇಲೆ ಉಕ್ರೇನ್ ಬಯಸುವ ರೀತಿಯಲ್ಲೇ ನಾವು ಮುಂದುವರೆಯುತ್ತೇವೆ ಎಂದು ಬೈಡನ್ ಭರವಸೆ ನೀಡಿದ್ದಾರೆ. ಉಕ್ರೇನ್ ಅನುಮತಿ ಇಲ್ಲದೇ ಯಾವುದೇ ಸೈನಿಕ ನೆಲೆಗಳನ್ನು ಆ ರಾಷ್ಟ್ರದಲ್ಲಿ ಸ್ಥಾಪಿಸುವ ಉದ್ದೇಶ ತಮಗಿಲ್ಲ ಎಂದು ಅಮೆರಿಕದ ಅಧ್ಯಕ್ಷ ಸ್ಪಷ್ಟಪಡಿಸಿದ್ದಾರೆ. ಉಕ್ರೇನ್ ನ್ಯಾಟೋ ಸದಸ್ಯ ರಾಷ್ಟ್ರವಾದರೆ, ಅಮೆರಿಕ ಸೇರಿದಂತೆ ನ್ಯಾಟೋ ಸದಸ್ಯ ರಾಷ್ಟ್ರಗಳು ಭಾರೀ ಪ್ರಮಾಣದಲ್ಲಿ ರಷ್ಯಾ ಗಡಿಯಲ್ಲಿ ಶಸ್ತ್ರಾಸ್ತ್ರಗಳನ್ನು ಜಮಾವಣೆ ಮಾಡಲಿದೆ ಎಂಬ ಆತಂಕವಿದೆ ಎಂದು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಹೇಳಿದ್ದರು. ಸದ್ಯ ಉಕ್ರೇನ್ ಗಡಿಯಿಂದ ಹಂತ ಹಂತವಾಗಿ ತನ್ನ ತುಕಡಿಗಳನ್ನು ಹಿಂಪಡೆಯುತ್ತಿರುವ ರಷ್ಯಾ, ಜಾಗತಿಕ ರಾಜತಾಂತ್ರಿಕ ಒತ್ತಡದ ಪರಿಣಾಮವಾಗಿ ಕೊಂಚ ಮೆತ್ತಗಾಗಿದೆ.
from India & World News in Kannada | VK Polls https://ift.tt/mcL6Gzb
