ಬೆಂಗಳೂರು: ಆತಿಥೇಯ ತಂಡಕ್ಕೆ ಕೊನೆಗೂ ಅದೃಷ್ಟ ಕೈ ಹಿಡಿದಿದೆ. ತನ್ನ ಪಾಲಿನ ಎಲ್ಲ 22 ಪಂದ್ಯಗಳಿಂದ 11 ಜಯದೊಂದಿಗೆ ಒಟ್ಟು 66 ಅಂಕಗಳನ್ನು ಕಲೆಹಾಕಿದ್ದ ಪವನ್‌ ಕುಮಾರ್‌ ಸೆಹ್ರಾವತ್‌ ಬಳಗಕ್ಕೆ ಪ್ಲೇ-ಆಫ್ಸ್‌ ಸ್ಥಾನ ಖಾತ್ರಿಯಾಗಿರಲಿಲ್ಲ. ಇದಕ್ಕಾಗಿ ಉಳಿದ ಪಂದ್ಯಗಳ ಫಲಿತಾಂಶ ತನ್ನ ಪರವಾಗಿ ಒಲಿಯಲಿ ಎಂದು ಪ್ರಾರ್ಥಿಸುವಂತ್ತಾಗಿತ್ತು. ಬುಲ್ಸ್‌ ತಂಡ ಪ್ರಾರ್ಥನೆಗೆ ಕೊನೆಗೂ ಫಲ ಸಿಕ್ಕಿದೆ. ಇಲ್ಲಿನ ಶೆರ್ಟಾನ್‌ ಗ್ರ್ಯಾಂಡ್‌ ಹೋಟೆಲ್‌ ಆವಣದಲ್ಲಿ ನಿರ್ಮಿಸಲಾಗಿರುವ ಬಯೋ ಬಬಲ್‌ ವಾತಾವರಣದಲ್ಲಿ ಶನಿವಾರ ನಡೆದ ಟೂರ್ನಿಯ 130ನೇ ಪಂದ್ಯದಲ್ಲಿ ತಂಡ ಚೊಚ್ಚಲ ಆವೃತ್ತಿಯ ಚಾಂಪಿಯನ್ಸ್‌ ಜೈಪುರ ಪಿಂಕ್‌ ಪ್ಯಾಂಥರ್ಸ್‌ಗೆ 37-30 ಅಂಕಗಳ ಅಂತರದಲ್ಲಿ ಸೋಲುಣಿತು. ಇದರ ಫಲವಾಗಿ ಬೆಂಗಳೂರು ತಂಡಕ್ಕೆ ಅಂಕಪಟ್ಟಿಯಲ್ಲಿ 5ನೇ ಸ್ಥಾನಿಯಾಗಿ ಪ್ಲೇ ಆಫ್ಸ್‌ ಹಂತಕ್ಕೇರಲು ಸಾಧ್ಯವಾಗಿದೆ. 12 ತಂಡಗಳ ನಡುವಣ ಪೈಪೋಟಿಯಲ್ಲಿ 6 ತಂಡಗಳಿಗೆ ಮಾತ್ರವೇ ನಾಕ್‌ಔಟ್‌ ಹಂತಕ್ಕೇರುವ ಅವಕಾಶ ಲಭ್ಯವಾಗುತ್ತದೆ. ಲೀಗ್‌ ಹಂತದ ಮೊದಲ ಚರಣದ ಮುಕ್ತಾಯಕ್ಕೆ ಅಂಕಪಟ್ಟಿಯ ಮೊದಲ ಸ್ಥಾನದಲ್ಲಿದ್ದ ಬೆಂಗಳೂರು ತಂಡ, 2ನೇ ಚರಣದ ಮುಕ್ತಾಯಕ್ಕೆ 5ನೇ ಸ್ಥಾನಕ್ಕೆ ಜಾರಿದರೂ ಮುಂದಿನ ಸುತ್ತಿಗೆ ತೇರ್ಗಡೆಯಾಗಿದೆ. ರೇಡರ್‌ ಮೋಹಿತ್‌ ಗೋಯತ್‌ (14 ಅಂಕ) ಮತ್ತು ಅಸ್ಲಾಮ್‌ ಇನಾಂಮ್ದಾರ್‌ (11 ಅಂಕ) ಅವರ ಮನಮೋಹಕ ಪ್ರದರ್ಶನದಿಂದ ಜಯ ದಕ್ಕಿಸಿಕೊಂಡ ಪುಣೇರಿ ಪಲ್ಟನ್‌ ಪಡೆಯೂ ಅಂಕಪಟ್ಟಿಯಲ್ಲಿ 6ನೇ ಸ್ಥಾನಿಯಾಗಿ ಒಟ್ಟು 66 ಅಂಕಗಳೊಂದಿಗೆ ನಾಕ್‌ಔಟ್‌ ಹಂತಕ್ಕೆ ಅರ್ಹತೆ ಪಡೆದುಕೊಂಡಿದೆ. ಪ್ಯಾಂಥರ್ಸ್‌ ಪರ ಯುವ ರೇಡರ್‌ ಅರ್ಜುನ್‌ ದೇಶ್ವಾಲ್‌ ಬರೋಬ್ಬರಿ 18 ಅಂಕಗಳನ್ನು ತೆಗೆದು ಹೋರಾಡಿದರೂ ಸೋಲು ತಪ್ಪಿಸಲು ಸಾಧ್ಯವಾಗಲಿಲ್ಲ. ಪಂದ್ಯದ ಮೊದಲ ಅವಧಿಯ ಮುಕ್ತಾಯಕ್ಕೆ ಪುಣೇರಿ ಪಲ್ಟನ್‌ ತಂಡ 18-11 ಅಂಕಗಳ ಅಂತರದಲ್ಲಿ ಭಾರಿ ಮುನ್ನಡೆ ಗಳಿಸಿತ್ತು. ಎರಡನೇ ಅವಧಿಯಲ್ಲೂ ಇದೇ ಅಂಕರ ಕಾಯ್ದುಕೊಳ್ಳುವ ಮೂಲಕ ಜಯಶೀಲ ತಂಡವಾಗಿ ಹೊರಹೊಮ್ಮಿತು. ಇದು ಲೀಗ್‌ ಹಂತದಲ್ಲಿ ಪುಣೆ ತಂಡಕ್ಕೆ ಸಿಕ್ಕ 12ನೇ ಗೆಲುವಾಗಿದೆ. ಬೆಂಗಳೂರಿಗೆ ಗುಜರಾತ್‌ ಸವಾಲು 2018ರ ಆವೃತ್ತಿಯ ಚಾಂಪಿಯನ್ಸ್‌ ಬೆಂಗಳೂರು ಬುಲ್ಸ್‌ ತಂಡ ಪ್ಲೇ-ಆಫ್ಸ್‌ ಹಂತದಲ್ಲಿ ನಡೆಯಲಿರುವ ಎರಡನೇ ಎಲಿಮಿನೇಟರ್‌ ಪಂದ್ಯದಲ್ಲಿ (ಫೆ.23) ಬಲಿಷ್ಠ ಗುಜರಾತ್‌ ಜಯಂಟ್ಸ್‌ ಎದುರು ಪೈಪೋಟಿ ನಡೆಸಲಿದೆ. ಗುಜರಾತ್‌ ತಂಡ ಅಂಕಪಟ್ಟಿಯಲ್ಲಿ 4ನೇ ಸ್ಥಾನದೊಂದಿಗೆ ಪ್ಲೇ ಆಫ್ಸ್‌ ಟಿಕೆಟ್‌ ಪಡೆದಿತ್ತು. ಈ ನಡುವೆ ಮೊದಲ ಎಲಿಮಿನೇಟರ್‌ ಪಂದ್ಯದಲ್ಲಿ (ಫೆ.23) ಪುಣೇರಿ ಪಲ್ಟನ್‌ ಪಡೆಗೆ ಯು.ಪಿ ಯೋಧಾ ತಂಡದ ಸವಾಲು ಎದುರಾಗಿದೆ. ಎಲಿಮಿನೇಟರ್‌ 2 ಪಂದ್ಯದಲ್ಲಿ ಗೆದ್ದ ತಂಡವು ಅಂಕಪಟ್ಟಿಯ ಎರಡನೇ ಸ್ಥಾನಿ ದಬಾಂಗ್‌ ಡೆಲ್ಲಿ ವಿರುದ್ಧ ನಡೆಯಲಿರುವ ಎರಡನೇ ಸೆಮಿಫೈನಲ್‌ನಲ್ಲಿ ಕಾದಾಡಲಿದೆ. ಮೊದಲ ಎಲಿಮಿನೇಟರ್‌ ಪಂದ್ಯ ಗೆದ್ದ ತಂಡವು ಪ್ರಥಮ ಸೆಮಿಫೈನಲ್‌ ಪಂದ್ಯದಲ್ಲಿ ಅಂಕಪಟ್ಟಿಯ ಅಗ್ರಸ್ಥಾನಿ ಪಟನಾ ಪೈರೇಟ್ಸ್‌ ಎದುರು ಹೋರಾಡುವಂತ್ತಾಗಲಿದೆ. ಫೆಬ್ರವರಿ 25ರಂದು ಬೆಂಗಳೂರಿನಲ್ಲೇ ಟೂರ್ನಿಯ ಫೈನಲ್‌ ಪಂದ್ಯ ಜರುಗಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/O5Vrunb
