: ದಶಕಗಳಿಂದ ಕಾಂಗ್ರೆಸ್‌ ಜತೆಗೆ ಗುರುತಿಸಿಕೊಂಡು ಯುಪಿಎ ಎರಡನೇ ಅವಧಿಯಲ್ಲಿ ಕೇಂದ್ರ ಕಾನೂನು ಸಚಿವರಾಗಿ ಮಹತ್ತರ ಜವಾಬ್ದಾರಿ ವಹಿಸಿದ್ದ ಹಿರಿಯ ಕಾಂಗ್ರೆಸಿಗ ಅಶ್ವನಿ ಕುಮಾರ್ ಅವರು ಬೇಸರದಿಂದ ಪಕ್ಷ ತೊರೆದಿದ್ದಾರೆ. ಕಾಂಗ್ರೆಸ್‌ ತೊರೆದ ನಡೆಯ ಕುರಿತು ಹಲವು ಅನುಮಾನಗಳು ಹುಟ್ಟಿರುವ ಹಿನ್ನೆಲೆಯಲ್ಲಿ ಸುದ್ದಿ ಸಂಸ್ಥೆಗೆ ಅವರು ಸಂದರ್ಶನ ನೀಡಿ, ಪಂಜಾಬ್‌ ಮತ್ತು ದೇಶಾದ್ಯಂತ ಕಾಂಗ್ರೆಸ್‌ ಅಸ್ತಿತ್ವ ಉಳಿಸಿಕೊಳ್ಳಲು ಒದ್ದಾಡುತ್ತಿದೆ ಎಂದಿದ್ದಾರೆ. ನಿಮ್ಮ ತಂದೆ ಕೂಡ ಕಾಂಗ್ರೆಸ್‌ನಲ್ಲಿದ್ದರು, ನೀವು ಕೂಡ ಇಷ್ಟು ವರ್ಷಗಳ ಬಳಿಕ ಪಕ್ಷ ತೊರೆಯುತ್ತಿರುವುದೇಕೆ ಎಂಬ ಪ್ರಶ್ನೆಗೆ ಉತ್ತರಿಸಿರುವ , 46 ವರ್ಷಗಳ ಕಾಂಗ್ರೆಸ್‌ ಸಖ್ಯ ತೊರೆಯಲು ನೋವಾಗುತ್ತಿದೆ. ಆದರೆ, ಕೈ ಪಾಳಯದಲ್ಲಿ ಈಗ ನಾಯಕತ್ವದ ಕೊರತೆ ಎದ್ದು ಕಾಣುತ್ತಿದೆ. ಪಕ್ಷ ನಮ್ಮದು ಎನ್ನುವ ಭಾವನೆಯೇ ಹುಟ್ಟುತ್ತಿಲ್ಲ ಎಂದಿದ್ದಾರೆ. ನೇತಾಜಿ ಸುಭಾಷ್‌ ಚಂದ್ರ ಬೋಸ್‌ ಅವರ ಪ್ರತಿಮೆ ವಿರುದ್ಧ ಆರೋಪ, ಗುಲಾಂ ನಬಿ ಆಜಾದ್‌ ಅವರಿಗೆ ಪದ್ಮ ಗೌರವಕ್ಕೆ ಅಸಮಾಧಾನದಂತಹ ಪಕ್ಷದ ಆಂತರಿಕ ವಿಚಾರಗಳು ಬಹಳ ಬೇಸರ ಮೂಡಿಸಿವೆ. ಅಸ್ತಿತ್ವದ ಉಳಿವಿಗಾಗಿ ಒದ್ದಾಡುವ ಸ್ಥಿತಿ ಕಾಂಗ್ರೆಸ್‌ಗೆ ಬಂದಿದೆ. ರಾಷ್ಟ್ರದ ಹಿತಾಸಕ್ತಿಯನ್ನು ಪಕ್ಷದಲ್ಲಿ ಕಡೆಗಣಿಸಲಾಗಿದೆ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ. ಪಂಜಾಬ್‌ ವಿಧಾನಸಭೆ ಚುನಾವಣೆ ಹೊತ್ತಲ್ಲೇ ಪಕ್ಷ ತೊರೆಯುತ್ತಿರುವುದೇಕೆ ಎಂದು ಕೇಳಲಾದ ಪ್ರಶ್ನೆಗೆ ಉತ್ತರಿಸಿರುವ ಅಶ್ವನಿ ಕುಮಾರ್, ಸಿಎಂ ಗಾದಿಗಾಗಿ ಪಂಜಾಬಿನಲ್ಲಿ ಹಲವು ವರ್ಷಗಳಿಂದ ನಡೆಯುತ್ತಿರುವ ಕಚ್ಚಾಟವು ಪಕ್ಷದ ಬಗ್ಗೆ ಜನರಲ್ಲಿ ಅಸಹ್ಯ ಮೂಡಿಸಿದೆ. ನಮ್ಮಂಥ ಹಿರಿಯರ ಮಾತಿಗೆ ಸದ್ಯ ಯಾವುದೇ ಬೆಲೆ ಉಳಿದಿಲ್ಲ. ಹೈಕಮಾಂಡ್‌ಗೆ ಬೆರಳೆಣಿಕೆ ಜನರು ಮಾತ್ರ ಮುಖ್ಯವಾಗಿದ್ದಾರೆ. ಕ್ಯಾ. ಅಮರಿಂದರ್‌ ಸಿಂಗ್‌ ಅವರನ್ನು ತುಂಬ ಕೆಟ್ಟದಾಗಿ ನಡೆಸಿಕೊಳ್ಳಲಾಯಿತು. ಇದು ನಮ್ಮ ಭವಿಷ್ಯದ ಬಗ್ಗೆ ಆತಂಕ ಮೂಡಿಸಿತು. ಹಾಗಾಗಿ ಇದೇ ಸರಿಯಾದ ಸಮಯ ಎಂದು ನಿರ್ಧರಿಸಿ ಪಕ್ಷ ತೊರೆದೆ ಎಂದಿದ್ದಾರೆ. ಇನ್ನು ಪಂಜಾಬ್‌ನಲ್ಲಿ ಈ ಬಾರಿ ಯಾವ ಪಕ್ಷಕ್ಕೆ ಅಧಿಕಾರ ಸಿಗಲಿದೆ ಎಂಬ ಪ್ರಶ್ನೆಗೆ ಉತ್ತರಿಸಿರುವ ಅಶ್ವನಿ ಕುಮಾರ್, ದೊಡ್ಡ ಅಚ್ಚರಿಯ ಫಲಿತಾಂಶ ಕಾಣಲಿದ್ದೀರಿ. ಆಮ್‌ ಆದ್ಮಿ ಪಕ್ಷ (ಆಪ್‌) ಬಹಳ ಸರಳವಾಗಿ ಬಹುಮತದೊಂದಿಗೆ ಪಂಜಾಬಿನಲ್ಲಿ ಈ ಬಾರಿ ಸರಕಾರ ರಚಿಸಲಿದೆ. ಮುಂದಿನ ಸಿಎಂ ಭಗವಂತ್‌ ಮಾನ್‌ ಎಂದು ಭವಿಷ್ಯ ನುಡಿದಿದ್ದಾರೆ. ಇನ್ನು ರಾಹುಲ್ ಗಾಂಧಿ ಅವರ ನಾಯಕತ್ವಕ್ಕೂ, ಹಿಂದಿನ ಅಧ್ಯಕ್ಷರಿಗೂ ವ್ಯತ್ಯಾಸ ಏನು ಎಂಬ ಪ್ರಶ್ನೆಗೆ ಅಶ್ವನಿ ಕುಮಾರ್ ಖಡಕ್ ಉತ್ತರ ನೀಡಿದ್ದು, ರಾಹುಲ್ ಗಾಂಧಿ ಅವರು ಪಕ್ಷ ತೊರೆಯುವವರಿಗೆ ಬಿಜೆಪಿಯ ಭಯವಿದೆ ಎನ್ನುತ್ತಿರುತ್ತಾರೆ. ಅದು ಸುಳ್ಳು. ಕಾಂಗ್ರೆಸ್‌ನಲ್ಲಿ ಉತ್ತಮ ವಾತಾವರಣವಿಲ್ಲ ಎಂದು ಅನೇಕರು ಇತ್ತೀಚಿಗೆ ಪಕ್ಷ ಬಿಟ್ಟಿದ್ದಾರೆ. ನಮ್ಮ ಆಂತರಿಕ ಸಮಸ್ಯೆಗಳೇ ಹೆಚ್ಚಿರುವಾಗ ರಾಹುಲ್ ಬೇರೆ ಪಕ್ಷದ ಬಗ್ಗೆ ತಲೆಕೆಡಿಸಿಕೊಳ್ಳಬಾರದು ಎಂದು ತಾಕೀತು ಮಾಡಿದ್ಧಾರೆ.
from India & World News in Kannada | VK Polls https://ift.tt/MuLeGpj
